| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
4. පටිපත්‌තිවග්‌ගවණ්‌ණනා
4. Paṭipattivaggavaṇṇanā
31-40. චතුත්‌ථෙ මිච්‌ඡාපටිපත්‌තින්‌ති අයාථාවපටිපත්‌තිං. මිච්‌ඡාපටිපන්‌නන්‌ති අයාථාවපටිපන්‌නං. ඉති එකං සුත්‌තං ධම්‌මවසෙන කථිතං, එකං පුග්‌ගලවසෙන. අපාරා පාරන්‌ති වට්‌ටතො නිබ්‌බානං. පාරගාමිනොති එත්‌ථ යෙපි පාරඞ්‌ගතා, යෙපි ගච්‌ඡන්‌ති, යෙපි ගමිස්‌සන්‌ති, සබ්‌බෙ පාරගාමිනොත්‌වෙව වෙදිතබ්‌බා.
31-40. Catutthe micchāpaṭipattinti ayāthāvapaṭipattiṃ. Micchāpaṭipannanti ayāthāvapaṭipannaṃ. Iti ekaṃ suttaṃ dhammavasena kathitaṃ, ekaṃ puggalavasena. Apārā pāranti vaṭṭato nibbānaṃ. Pāragāminoti ettha yepi pāraṅgatā, yepi gacchanti, yepi gamissanti, sabbe pāragāminotveva veditabbā.
තීරමෙවානුධාවතීති වට්‌ටමෙව අනුධාවති, වට්‌ටෙ විචරති. කණ්‌හන්‌ති අකුසලධම්‌මං. සුක්‌කන්‌ති කුසලධම්‌මං. ඔකා අනොකන්‌ති වට්‌ටතො නිබ්‌බානං. ආගම්‌මාති ආරබ්‌භ සන්‌ධාය පටිච්‌ච. පරියොදපෙය්‍යාති පරිසුද්‌ධං කරෙය්‍ය. චිත්‌තක්‌ලෙසෙහීති චිත්‌තං කිලිස්‌සාපෙන්‌තෙහි නීවරණෙහි. සම්‌බොධියඞ්‌ගෙසූති සත්‌තසු බොජ්‌ඣඞ්‌ගෙසු.
Tīramevānudhāvatīti vaṭṭameva anudhāvati, vaṭṭe vicarati. Kaṇhanti akusaladhammaṃ. Sukkanti kusaladhammaṃ. Okā anokanti vaṭṭato nibbānaṃ. Āgammāti ārabbha sandhāya paṭicca. Pariyodapeyyāti parisuddhaṃ kareyya. Cittaklesehīti cittaṃ kilissāpentehi nīvaraṇehi. Sambodhiyaṅgesūti sattasu bojjhaṅgesu.
සාමඤ්‌ඤත්‌ථන්‌ති නිබ්‌බානං. තඤ්‌හි සාමඤ්‌ඤෙන උපගන්‌තබ්‌බතො සාමඤ්‌ඤත්‌ථොති වුච්‌චති. බ්‍රහ්‌මඤ්‌ඤන්‌ති සෙට්‌ඨභාවං. බ්‍රහ්‌මඤ්‌ඤත්‌ථන්‌ති නිබ්‌බානං බ්‍රහ්‌මඤ්‌ඤෙන උපගන්‌තබ්‌බතො. යත්‌ථ යත්‌ථ පන හෙට්‌ඨා ච ඉමෙසු ච තීසු සුත්‌තෙසු ‘‘රාගක්‌ඛයො’’ති ආගතං, තත්‌ථ තත්‌ථ අරහත්‌තම්‌පි වට්‌ටතියෙවාති වදන්‌ති.
Sāmaññatthanti nibbānaṃ. Tañhi sāmaññena upagantabbato sāmaññatthoti vuccati. Brahmaññanti seṭṭhabhāvaṃ. Brahmaññatthanti nibbānaṃ brahmaññena upagantabbato. Yattha yattha pana heṭṭhā ca imesu ca tīsu suttesu ‘‘rāgakkhayo’’ti āgataṃ, tattha tattha arahattampi vaṭṭatiyevāti vadanti.
පටිපත්‌තිවග්‌ගො චතුත්‌ථො.
Paṭipattivaggo catuttho.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya
1. පඨමපටිපත්‌තිසුත්‌තං • 1. Paṭhamapaṭipattisuttaṃ
2. දුතියපටිපත්‌තිසුත්‌තං • 2. Dutiyapaṭipattisuttaṃ
3. විරද්‌ධසුත්‌තං • 3. Viraddhasuttaṃ
4. පාරඞ්‌ගමසුත්‌තං • 4. Pāraṅgamasuttaṃ
5. පඨමසාමඤ්‌ඤසුත්‌තං • 5. Paṭhamasāmaññasuttaṃ
6. දුතියසාමඤ්‌ඤසුත්‌තං • 6. Dutiyasāmaññasuttaṃ
7. පඨමබ්‍රහ්‌මඤ්‌ඤසුත්‌තං • 7. Paṭhamabrahmaññasuttaṃ
8. දුතියබ්‍රහ්‌මඤ්‌ඤසුත්‌තං • 8. Dutiyabrahmaññasuttaṃ
9. පඨමබ්‍රහ්‌මචරියසුත්‌තං • 9. Paṭhamabrahmacariyasuttaṃ
10. දුතියබ්‍රහ්‌මචරියසුත්‌තං • 10. Dutiyabrahmacariyasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4. පටිපත්‌තිවග්‌ගවණ්‌ණනා • 4. Paṭipattivaggavaṇṇanā
