| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
படிப்பஸ்ஸம்பே⁴தப்³ப³அட்டா²ரஸகங்
Paṭippassambhetabbaaṭṭhārasakaṃ
9. ‘‘பஞ்சஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் படிப்பஸ்ஸம்பே⁴தப்³ப³ங். ந உபஸம்பாதே³தி, ந நிஸ்ஸயங் தே³தி, ந ஸாமணேரங் உபட்டா²பேதி, ந பி⁴க்கு²னோவாத³கஸம்முதிங் ஸாதி³யதி, ஸம்மதோபி பி⁴க்கு²னியோ ந ஓவத³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் படிப்பஸ்ஸம்பே⁴தப்³ப³ங்.
9. ‘‘Pañcahi, bhikkhave, aṅgehi samannāgatassa bhikkhuno tajjanīyakammaṃ paṭippassambhetabbaṃ. Na upasampādeti, na nissayaṃ deti, na sāmaṇeraṃ upaṭṭhāpeti, na bhikkhunovādakasammutiṃ sādiyati, sammatopi bhikkhuniyo na ovadati – imehi kho, bhikkhave, pañcahaṅgehi samannāgatassa bhikkhuno tajjanīyakammaṃ paṭippassambhetabbaṃ.
‘‘அபரேஹிபி , பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் படிப்பஸ்ஸம்பே⁴தப்³ப³ங். யாய ஆபத்தியா ஸங்கே⁴ன தஜ்ஜனீயகம்மங் கதங் ஹோதி தங் ஆபத்திங் ந ஆபஜ்ஜதி, அஞ்ஞங் வா தாதி³ஸிகங், ததோ வா பாபிட்ட²தரங்; கம்மங் ந க³ரஹதி, கம்மிகே ந க³ரஹதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் படிப்பஸ்ஸம்பே⁴தப்³ப³ங்.
‘‘Aparehipi , bhikkhave, pañcahaṅgehi samannāgatassa bhikkhuno tajjanīyakammaṃ paṭippassambhetabbaṃ. Yāya āpattiyā saṅghena tajjanīyakammaṃ kataṃ hoti taṃ āpattiṃ na āpajjati, aññaṃ vā tādisikaṃ, tato vā pāpiṭṭhataraṃ; kammaṃ na garahati, kammike na garahati – imehi kho, bhikkhave, pañcahaṅgehi samannāgatassa bhikkhuno tajjanīyakammaṃ paṭippassambhetabbaṃ.
‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ தஜ்ஜனீயகம்மங் படிப்பஸ்ஸம்பே⁴தப்³ப³ங்.
‘‘Aṭṭhahi, bhikkhave, aṅgehi samannāgatassa bhikkhuno tajjanīyakammaṃ paṭippassambhetabbaṃ.
ந பகதத்தஸ்ஸ பி⁴க்கு²னோ உபோஸத²ங் ட²பேதி, ந பவாரணங் ட²பேதி, ந ஸவசனீயங் கரோதி, ந அனுவாத³ங் பட்ட²பேதி, ந ஓகாஸங் காரேதி, ந சோதே³தி, ந ஸாரேதி, ந பி⁴க்கூ²ஹி ஸம்பயோஜேதி – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ பி⁴க்கு²னோ , தஜ்ஜனீயகம்மங் படிப்பஸ்ஸம்பே⁴தப்³ப³ங்.
Na pakatattassa bhikkhuno uposathaṃ ṭhapeti, na pavāraṇaṃ ṭhapeti, na savacanīyaṃ karoti, na anuvādaṃ paṭṭhapeti, na okāsaṃ kāreti, na codeti, na sāreti, na bhikkhūhi sampayojeti – imehi kho, bhikkhave, aṭṭhahaṅgehi samannāgatassa bhikkhuno , tajjanīyakammaṃ paṭippassambhetabbaṃ.
படிப்பஸ்ஸம்பே⁴தப்³ப³அட்டா²ரஸகங் நிட்டி²தங்.
Paṭippassambhetabbaaṭṭhārasakaṃ niṭṭhitaṃ.
10. ‘‘ஏவஞ்ச பன, பி⁴க்க²வே, படிப்பஸ்ஸம்பே⁴தப்³ப³ங். தேஹி, பி⁴க்க²வே, பண்டு³கலோஹிதகேஹி பி⁴க்கூ²ஹி ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘மயங், ப⁴ந்தே, ஸங்கே⁴ன தஜ்ஜனீயகம்மகதா ஸம்மா வத்தாம, லோமங் பாதேம, நெத்தா²ரங் வத்தாம, தஜ்ஜனீயஸ்ஸ கம்மஸ்ஸ படிப்பஸ்ஸத்³தி⁴ங் யாசாமா’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
10. ‘‘Evañca pana, bhikkhave, paṭippassambhetabbaṃ. Tehi, bhikkhave, paṇḍukalohitakehi bhikkhūhi saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘mayaṃ, bhante, saṅghena tajjanīyakammakatā sammā vattāma, lomaṃ pātema, netthāraṃ vattāma, tajjanīyassa kammassa paṭippassaddhiṃ yācāmā’ti. Dutiyampi yācitabbā. Tatiyampi yācitabbā. Byattena bhikkhunā paṭibalena saṅgho ñāpetabbo –
‘‘ஸுணாது மே, ப⁴ந்தே, ஸங்கோ⁴. இமே பண்டு³கலோஹிதகா பி⁴க்கூ² ஸங்கே⁴ன தஜ்ஜனீயகம்மகதா ஸம்மா வத்தந்தி, லோமங் பாதெந்தி, நெத்தா²ரங் வத்தந்தி , தஜ்ஜனீயஸ்ஸ கம்மஸ்ஸ படிப்பஸ்ஸத்³தி⁴ங் யாசந்தி. யதி³ ஸங்க⁴ஸ்ஸ பத்தகல்லங், ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் படிப்பஸ்ஸம்பெ⁴ய்ய. ஏஸா ஞத்தி.
‘‘Suṇātu me, bhante, saṅgho. Ime paṇḍukalohitakā bhikkhū saṅghena tajjanīyakammakatā sammā vattanti, lomaṃ pātenti, netthāraṃ vattanti , tajjanīyassa kammassa paṭippassaddhiṃ yācanti. Yadi saṅghassa pattakallaṃ, saṅgho paṇḍukalohitakānaṃ bhikkhūnaṃ tajjanīyakammaṃ paṭippassambheyya. Esā ñatti.
‘‘ஸுணாது மே, ப⁴ந்தே, ஸங்கோ⁴. இமே பண்டு³கலோஹிதகா பி⁴க்கூ² ஸங்கே⁴ன தஜ்ஜனீயகம்மகதா ஸம்மா வத்தந்தி, லோமங் பாதெந்தி, நெத்தா²ரங் வத்தந்தி, தஜ்ஜனீயஸ்ஸ கம்மஸ்ஸ படிப்பஸ்ஸத்³தி⁴ங் யாசந்தி. ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் படிப்பஸ்ஸம்பே⁴தி. யஸ்ஸாயஸ்மதோ க²மதி பண்டு³கலோஹிதகானங் பி⁴க்கூ²னங் தஜ்ஜனீயஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ime paṇḍukalohitakā bhikkhū saṅghena tajjanīyakammakatā sammā vattanti, lomaṃ pātenti, netthāraṃ vattanti, tajjanīyassa kammassa paṭippassaddhiṃ yācanti. Saṅgho paṇḍukalohitakānaṃ bhikkhūnaṃ tajjanīyakammaṃ paṭippassambheti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa paṭippassaddhi, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி – ஸுணாது மே , ப⁴ந்தே, ஸங்கோ⁴. இமே பண்டு³கலோஹிதகா பி⁴க்கூ² ஸங்கே⁴ன தஜ்ஜனீயகம்மகதா ஸம்மா வத்தந்தி, லோமங் பாதெந்தி, நெத்தா²ரங் வத்தந்தி, தஜ்ஜனீயஸ்ஸ கம்மஸ்ஸ படிப்பஸ்ஸத்³தி⁴ங் யாசந்தி. ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் படிப்பஸ்ஸம்பே⁴தி. யஸ்ஸாயஸ்மதோ க²மதி பண்டு³கலோஹிதகானங் பி⁴க்கூ²னங் தஜ்ஜனீயஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Dutiyampi etamatthaṃ vadāmi – suṇātu me , bhante, saṅgho. Ime paṇḍukalohitakā bhikkhū saṅghena tajjanīyakammakatā sammā vattanti, lomaṃ pātenti, netthāraṃ vattanti, tajjanīyassa kammassa paṭippassaddhiṃ yācanti. Saṅgho paṇḍukalohitakānaṃ bhikkhūnaṃ tajjanīyakammaṃ paṭippassambheti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa paṭippassaddhi, so tuṇhassa; yassa nakkhamati, so bhāseyya.
‘‘ததியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴. இமே பண்டு³கலோஹிதகா பி⁴க்கூ² ஸங்கே⁴ன தஜ்ஜனீயகம்மகதா ஸம்மா வத்தந்தி, லோமங் பாதெந்தி, நெத்தா²ரங் வத்தந்தி, தஜ்ஜனீயஸ்ஸ கம்மஸ்ஸ படிப்பஸ்ஸத்³தி⁴ங் யாசந்தி. ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் படிப்பஸ்ஸம்பே⁴தி. யஸ்ஸாயஸ்மதோ க²மதி பண்டு³கலோஹிதகானங் பி⁴க்கூ²னங் தஜ்ஜனீயஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Tatiyampi etamatthaṃ vadāmi – suṇātu me, bhante, saṅgho. Ime paṇḍukalohitakā bhikkhū saṅghena tajjanīyakammakatā sammā vattanti, lomaṃ pātenti, netthāraṃ vattanti, tajjanīyassa kammassa paṭippassaddhiṃ yācanti. Saṅgho paṇḍukalohitakānaṃ bhikkhūnaṃ tajjanīyakammaṃ paṭippassambheti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa paṭippassaddhi, so tuṇhassa; yassa nakkhamati, so bhāseyya.
‘‘படிப்பஸ்ஸத்³த⁴ங் ஸங்கே⁴ன பண்டு³கலோஹிதகானங் பி⁴க்கூ²னங் தஜ்ஜனீயகம்மங். க²மதி ஸங்க⁴ஸ்ஸ,
‘‘Paṭippassaddhaṃ saṅghena paṇḍukalohitakānaṃ bhikkhūnaṃ tajjanīyakammaṃ. Khamati saṅghassa,
தஸ்மா துண்ஹீ, ஏவமேதங் தா⁴ரயாமீ’’தி.
Tasmā tuṇhī, evametaṃ dhārayāmī’’ti.
தஜ்ஜனீயகம்மங் நிட்டி²தங் பட²மங்.
Tajjanīyakammaṃ niṭṭhitaṃ paṭhamaṃ.
