| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
படிப்பஸ்ஸம்பே⁴தப்³ப³அட்டா²ரஸகங்
Paṭippassambhetabbaaṭṭhārasakaṃ
19. ‘‘பஞ்சஹி , பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பே⁴தப்³ப³ங் . ந உபஸம்பாதே³தி, ந நிஸ்ஸயங் தே³தி, ந ஸாமணேரங் உபட்டா²பேதி, ந பி⁴க்கு²னோவாத³கஸம்முதிங் ஸாதி³யதி, ஸம்மதோபி பி⁴க்கு²னியோ ந ஓவத³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பே⁴தப்³ப³ங்.
19. ‘‘Pañcahi , bhikkhave, aṅgehi samannāgatassa bhikkhuno niyassakammaṃ paṭippassambhetabbaṃ . Na upasampādeti, na nissayaṃ deti, na sāmaṇeraṃ upaṭṭhāpeti, na bhikkhunovādakasammutiṃ sādiyati, sammatopi bhikkhuniyo na ovadati – imehi kho, bhikkhave, pañcahaṅgehi samannāgatassa bhikkhuno niyassakammaṃ paṭippassambhetabbaṃ.
‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பே⁴தப்³ப³ங். யாய ஆபத்தியா ஸங்கே⁴ன நியஸ்ஸகம்மங் கதங் ஹோதி தங் ஆபத்திங் ந ஆபஜ்ஜதி, அஞ்ஞங் வா தாதி³ஸிகங், ததோ வா பாபிட்ட²தரங்; கம்மங் ந க³ரஹதி, கம்மிகே ந க³ரஹதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பே⁴தப்³ப³ங்.
‘‘Aparehipi, bhikkhave, pañcahaṅgehi samannāgatassa bhikkhuno niyassakammaṃ paṭippassambhetabbaṃ. Yāya āpattiyā saṅghena niyassakammaṃ kataṃ hoti taṃ āpattiṃ na āpajjati, aññaṃ vā tādisikaṃ, tato vā pāpiṭṭhataraṃ; kammaṃ na garahati, kammike na garahati – imehi kho, bhikkhave, pañcahaṅgehi samannāgatassa bhikkhuno niyassakammaṃ paṭippassambhetabbaṃ.
‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பே⁴தப்³ப³ங்.
‘‘Aṭṭhahi, bhikkhave, aṅgehi samannāgatassa bhikkhuno niyassakammaṃ paṭippassambhetabbaṃ.
ந பகதத்தஸ்ஸ பி⁴க்கு²னோ உபோஸத²ங் ட²பேதி, ந பவாரணங் ட²பேதி, ந ஸவசனீயங் கரோதி, ந அனுவாத³ங் பட்ட²பேதி, ந ஓகாஸங் காரேதி, ந சோதே³தி, ந ஸாரேதி, ந பி⁴க்கூ²ஹி ஸம்பயோஜேதி – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பே⁴தப்³ப³ங்.
Na pakatattassa bhikkhuno uposathaṃ ṭhapeti, na pavāraṇaṃ ṭhapeti, na savacanīyaṃ karoti, na anuvādaṃ paṭṭhapeti, na okāsaṃ kāreti, na codeti, na sāreti, na bhikkhūhi sampayojeti – imehi kho, bhikkhave, aṭṭhahaṅgehi samannāgatassa bhikkhuno niyassakammaṃ paṭippassambhetabbaṃ.
படிப்பஸ்ஸம்பே⁴தப்³ப³அட்டா²ரஸகங் நிட்டி²தங்.
Paṭippassambhetabbaaṭṭhārasakaṃ niṭṭhitaṃ.
20. ‘‘ஏவஞ்ச பன, பி⁴க்க²வே, படிப்பஸ்ஸம்பே⁴தப்³ப³ங். தேன, பி⁴க்க²வே, ஸெய்யஸகேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘அஹங், ப⁴ந்தே, ஸங்கே⁴ன நியஸ்ஸகம்மகதோ ஸம்மா வத்தாமி, லோமங் பாதேமி, நெத்தா²ரங் வத்தாமி, நியஸ்ஸஸ்ஸ கம்மஸ்ஸ படிப்பஸ்ஸத்³தி⁴ங் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³ . ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
20. ‘‘Evañca pana, bhikkhave, paṭippassambhetabbaṃ. Tena, bhikkhave, seyyasakena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘ahaṃ, bhante, saṅghena niyassakammakato sammā vattāmi, lomaṃ pātemi, netthāraṃ vattāmi, niyassassa kammassa paṭippassaddhiṃ yācāmī’ti. Dutiyampi yācitabbā. Tatiyampi yācitabbā . Byattena bhikkhunā paṭibalena saṅgho ñāpetabbo –
‘‘ஸுணாது மே, ப⁴ந்தே, ஸங்கோ⁴. அயங் ஸெய்யஸகோ பி⁴க்கு² ஸங்கே⁴ன நியஸ்ஸகம்மகதோ ஸம்மா வத்ததி, லோமங் பாதேதி, நெத்தா²ரங் வத்ததி, நியஸ்ஸஸ்ஸ கம்மஸ்ஸ படிப்பஸ்ஸத்³தி⁴ங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ ஸெய்யஸகஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பெ⁴ய்ய. ஏஸா ஞத்தி.
‘‘Suṇātu me, bhante, saṅgho. Ayaṃ seyyasako bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Yadi saṅghassa pattakallaṃ, saṅgho seyyasakassa bhikkhuno niyassakammaṃ paṭippassambheyya. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் ஸெய்யஸகோ பி⁴க்கு² ஸங்கே⁴ன நியஸ்ஸகம்மகதோ ஸம்மா வத்ததி, லோமங் பாதேதி, நெத்தா²ரங் வத்ததி, நியஸ்ஸஸ்ஸ கம்மஸ்ஸ படிப்பஸ்ஸத்³தி⁴ங் யாசதி. ஸங்கோ⁴ ஸெய்யஸகஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பே⁴தி. யஸ்ஸாயஸ்மதோ க²மதி ஸெய்யஸகஸ்ஸ பி⁴க்கு²னோ நியஸ்ஸஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ seyyasako bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Saṅgho seyyasakassa bhikkhuno niyassakammaṃ paṭippassambheti. Yassāyasmato khamati seyyasakassa bhikkhuno niyassassa kammassa paṭippassaddhi, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴. அயங் ஸெய்யஸகோ பி⁴க்கு² ஸங்கே⁴ன நியஸ்ஸகம்மகதோ ஸம்மா வத்ததி, லோமங் பாதேதி, நெத்தா²ரங் வத்ததி, நியஸ்ஸஸ்ஸ கம்மஸ்ஸ படிப்பஸ்ஸத்³தி⁴ங் யாசதி. ஸங்கோ⁴ ஸெய்யஸகஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பே⁴தி. யஸ்ஸாயஸ்மதோ க²மதி ஸெய்யஸகஸ்ஸ பி⁴க்கு²னோ நியஸ்ஸஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Dutiyampi etamatthaṃ vadāmi – suṇātu me, bhante, saṅgho. Ayaṃ seyyasako bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Saṅgho seyyasakassa bhikkhuno niyassakammaṃ paṭippassambheti. Yassāyasmato khamati seyyasakassa bhikkhuno niyassassa kammassa paṭippassaddhi, so tuṇhassa; yassa nakkhamati, so bhāseyya.
‘‘ததியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴. அயங் ஸெய்யஸகோ பி⁴க்கு² ஸங்கே⁴ன நியஸ்ஸகம்மகதோ ஸம்மா வத்ததி, லோமங் பாதேதி, நெத்தா²ரங் வத்ததி, நியஸ்ஸஸ்ஸ கம்மஸ்ஸ படிப்பஸ்ஸத்³தி⁴ங் யாசதி. ஸங்கோ⁴ ஸெய்யஸகஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பே⁴தி. யஸ்ஸாயஸ்மதோ க²மதி ஸெய்யஸகஸ்ஸ பி⁴க்கு²னோ நியஸ்ஸஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Tatiyampi etamatthaṃ vadāmi – suṇātu me, bhante, saṅgho. Ayaṃ seyyasako bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Saṅgho seyyasakassa bhikkhuno niyassakammaṃ paṭippassambheti. Yassāyasmato khamati seyyasakassa bhikkhuno niyassassa kammassa paṭippassaddhi, so tuṇhassa; yassa nakkhamati, so bhāseyya.
‘‘படிப்பஸ்ஸத்³த⁴ங் ஸங்கே⁴ன ஸெய்யஸகஸ்ஸ பி⁴க்கு²னோ நியஸ்ஸகம்மங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Paṭippassaddhaṃ saṅghena seyyasakassa bhikkhuno niyassakammaṃ. Khamati saṅghassa, tasmā tuṇhī, evametaṃ dhārayāmī’’ti.
நியஸ்ஸகம்மங் நிட்டி²தங் து³தியங்.
Niyassakammaṃ niṭṭhitaṃ dutiyaṃ.
