| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
པཊིཔྤསྶམྦྷེཏབྦཨཊྛཱརསཀཾ
Paṭippassambhetabbaaṭṭhārasakaṃ
༡༩. ‘‘པཉྩཧི , བྷིཀྑཝེ, ཨངྒེཧི སམནྣཱགཏསྶ བྷིཀྑུནོ ནིཡསྶཀམྨཾ པཊིཔྤསྶམྦྷེཏབྦཾ ། ན ཨུཔསམྤཱདེཏི, ན ནིསྶཡཾ དེཏི, ན སཱམཎེརཾ ཨུཔཊྛཱཔེཏི, ན བྷིཀྑུནོཝཱདཀསམྨུཏིཾ སཱདིཡཏི, སམྨཏོཔི བྷིཀྑུནིཡོ ན ཨོཝདཏི – ཨིམེཧི ཁོ, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ ནིཡསྶཀམྨཾ པཊིཔྤསྶམྦྷེཏབྦཾ།
19. ‘‘Pañcahi , bhikkhave, aṅgehi samannāgatassa bhikkhuno niyassakammaṃ paṭippassambhetabbaṃ . Na upasampādeti, na nissayaṃ deti, na sāmaṇeraṃ upaṭṭhāpeti, na bhikkhunovādakasammutiṃ sādiyati, sammatopi bhikkhuniyo na ovadati – imehi kho, bhikkhave, pañcahaṅgehi samannāgatassa bhikkhuno niyassakammaṃ paṭippassambhetabbaṃ.
‘‘ཨཔརེཧིཔི, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ ནིཡསྶཀམྨཾ པཊིཔྤསྶམྦྷེཏབྦཾ། ཡཱཡ ཨཱཔཏྟིཡཱ སངྒྷེན ནིཡསྶཀམྨཾ ཀཏཾ ཧོཏི ཏཾ ཨཱཔཏྟིཾ ན ཨཱཔཛྫཏི, ཨཉྙཾ ཝཱ ཏཱདིསིཀཾ, ཏཏོ ཝཱ པཱཔིཊྛཏརཾ; ཀམྨཾ ན གརཧཏི, ཀམྨིཀེ ན གརཧཏི – ཨིམེཧི ཁོ, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ ནིཡསྶཀམྨཾ པཊིཔྤསྶམྦྷེཏབྦཾ།
‘‘Aparehipi, bhikkhave, pañcahaṅgehi samannāgatassa bhikkhuno niyassakammaṃ paṭippassambhetabbaṃ. Yāya āpattiyā saṅghena niyassakammaṃ kataṃ hoti taṃ āpattiṃ na āpajjati, aññaṃ vā tādisikaṃ, tato vā pāpiṭṭhataraṃ; kammaṃ na garahati, kammike na garahati – imehi kho, bhikkhave, pañcahaṅgehi samannāgatassa bhikkhuno niyassakammaṃ paṭippassambhetabbaṃ.
‘‘ཨཊྛཧི, བྷིཀྑཝེ, ཨངྒེཧི སམནྣཱགཏསྶ བྷིཀྑུནོ ནིཡསྶཀམྨཾ པཊིཔྤསྶམྦྷེཏབྦཾ།
‘‘Aṭṭhahi, bhikkhave, aṅgehi samannāgatassa bhikkhuno niyassakammaṃ paṭippassambhetabbaṃ.
ན པཀཏཏྟསྶ བྷིཀྑུནོ ཨུཔོསཐཾ ཋཔེཏི, ན པཝཱརཎཾ ཋཔེཏི, ན སཝཙནཱིཡཾ ཀརོཏི, ན ཨནུཝཱདཾ པཊྛཔེཏི, ན ཨོཀཱསཾ ཀཱརེཏི, ན ཙོདེཏི, ན སཱརེཏི, ན བྷིཀྑཱུཧི སམྤཡོཛེཏི – ཨིམེཧི ཁོ, བྷིཀྑཝེ, ཨཊྛཧངྒེཧི སམནྣཱགཏསྶ བྷིཀྑུནོ ནིཡསྶཀམྨཾ པཊིཔྤསྶམྦྷེཏབྦཾ།
Na pakatattassa bhikkhuno uposathaṃ ṭhapeti, na pavāraṇaṃ ṭhapeti, na savacanīyaṃ karoti, na anuvādaṃ paṭṭhapeti, na okāsaṃ kāreti, na codeti, na sāreti, na bhikkhūhi sampayojeti – imehi kho, bhikkhave, aṭṭhahaṅgehi samannāgatassa bhikkhuno niyassakammaṃ paṭippassambhetabbaṃ.
པཊིཔྤསྶམྦྷེཏབྦཨཊྛཱརསཀཾ ནིཊྛིཏཾ།
Paṭippassambhetabbaaṭṭhārasakaṃ niṭṭhitaṃ.
༢༠. ‘‘ཨེཝཉྩ པན, བྷིཀྑཝེ, པཊིཔྤསྶམྦྷེཏབྦཾ། ཏེན, བྷིཀྑཝེ, སེཡྻསཀེན བྷིཀྑུནཱ སངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ – ‘ཨཧཾ, བྷནྟེ, སངྒྷེན ནིཡསྶཀམྨཀཏོ སམྨཱ ཝཏྟཱམི, ལོམཾ པཱཏེམི, ནེཏྠཱརཾ ཝཏྟཱམི, ནིཡསྶསྶ ཀམྨསྶ པཊིཔྤསྶདྡྷིཾ ཡཱཙཱམཱི’ཏི། དུཏིཡམྤི ཡཱཙིཏབྦཱ། ཏཏིཡམྤི ཡཱཙིཏབྦཱ ། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
20. ‘‘Evañca pana, bhikkhave, paṭippassambhetabbaṃ. Tena, bhikkhave, seyyasakena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘ahaṃ, bhante, saṅghena niyassakammakato sammā vattāmi, lomaṃ pātemi, netthāraṃ vattāmi, niyassassa kammassa paṭippassaddhiṃ yācāmī’ti. Dutiyampi yācitabbā. Tatiyampi yācitabbā . Byattena bhikkhunā paṭibalena saṅgho ñāpetabbo –
‘‘སུཎཱཏུ མེ, བྷནྟེ, སངྒྷོ། ཨཡཾ སེཡྻསཀོ བྷིཀྑུ སངྒྷེན ནིཡསྶཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ནིཡསྶསྶ ཀམྨསྶ པཊིཔྤསྶདྡྷིཾ ཡཱཙཏི། ཡདི སངྒྷསྶ པཏྟཀལླཾ, སངྒྷོ སེཡྻསཀསྶ བྷིཀྑུནོ ནིཡསྶཀམྨཾ པཊིཔྤསྶམྦྷེཡྻ། ཨེསཱ ཉཏྟི།
‘‘Suṇātu me, bhante, saṅgho. Ayaṃ seyyasako bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Yadi saṅghassa pattakallaṃ, saṅgho seyyasakassa bhikkhuno niyassakammaṃ paṭippassambheyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ སེཡྻསཀོ བྷིཀྑུ སངྒྷེན ནིཡསྶཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ནིཡསྶསྶ ཀམྨསྶ པཊིཔྤསྶདྡྷིཾ ཡཱཙཏི། སངྒྷོ སེཡྻསཀསྶ བྷིཀྑུནོ ནིཡསྶཀམྨཾ པཊིཔྤསྶམྦྷེཏི། ཡསྶཱཡསྨཏོ ཁམཏི སེཡྻསཀསྶ བྷིཀྑུནོ ནིཡསྶསྶ ཀམྨསྶ པཊིཔྤསྶདྡྷི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ seyyasako bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Saṅgho seyyasakassa bhikkhuno niyassakammaṃ paṭippassambheti. Yassāyasmato khamati seyyasakassa bhikkhuno niyassassa kammassa paṭippassaddhi, so tuṇhassa; yassa nakkhamati, so bhāseyya.
‘‘དུཏིཡམྤི ཨེཏམཏྠཾ ཝདཱམི – སུཎཱཏུ མེ, བྷནྟེ, སངྒྷོ། ཨཡཾ སེཡྻསཀོ བྷིཀྑུ སངྒྷེན ནིཡསྶཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ནིཡསྶསྶ ཀམྨསྶ པཊིཔྤསྶདྡྷིཾ ཡཱཙཏི། སངྒྷོ སེཡྻསཀསྶ བྷིཀྑུནོ ནིཡསྶཀམྨཾ པཊིཔྤསྶམྦྷེཏི། ཡསྶཱཡསྨཏོ ཁམཏི སེཡྻསཀསྶ བྷིཀྑུནོ ནིཡསྶསྶ ཀམྨསྶ པཊིཔྤསྶདྡྷི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Dutiyampi etamatthaṃ vadāmi – suṇātu me, bhante, saṅgho. Ayaṃ seyyasako bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Saṅgho seyyasakassa bhikkhuno niyassakammaṃ paṭippassambheti. Yassāyasmato khamati seyyasakassa bhikkhuno niyassassa kammassa paṭippassaddhi, so tuṇhassa; yassa nakkhamati, so bhāseyya.
‘‘ཏཏིཡམྤི ཨེཏམཏྠཾ ཝདཱམི – སུཎཱཏུ མེ, བྷནྟེ, སངྒྷོ། ཨཡཾ སེཡྻསཀོ བྷིཀྑུ སངྒྷེན ནིཡསྶཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ནིཡསྶསྶ ཀམྨསྶ པཊིཔྤསྶདྡྷིཾ ཡཱཙཏི། སངྒྷོ སེཡྻསཀསྶ བྷིཀྑུནོ ནིཡསྶཀམྨཾ པཊིཔྤསྶམྦྷེཏི། ཡསྶཱཡསྨཏོ ཁམཏི སེཡྻསཀསྶ བྷིཀྑུནོ ནིཡསྶསྶ ཀམྨསྶ པཊིཔྤསྶདྡྷི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Tatiyampi etamatthaṃ vadāmi – suṇātu me, bhante, saṅgho. Ayaṃ seyyasako bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Saṅgho seyyasakassa bhikkhuno niyassakammaṃ paṭippassambheti. Yassāyasmato khamati seyyasakassa bhikkhuno niyassassa kammassa paṭippassaddhi, so tuṇhassa; yassa nakkhamati, so bhāseyya.
‘‘པཊིཔྤསྶདྡྷཾ སངྒྷེན སེཡྻསཀསྶ བྷིཀྑུནོ ནིཡསྶཀམྨཾ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Paṭippassaddhaṃ saṅghena seyyasakassa bhikkhuno niyassakammaṃ. Khamati saṅghassa, tasmā tuṇhī, evametaṃ dhārayāmī’’ti.
ནིཡསྶཀམྨཾ ནིཊྛིཏཾ དུཏིཡཾ།
Niyassakammaṃ niṭṭhitaṃ dutiyaṃ.
