| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
པཊིཔྤསྶམྦྷེཏབྦཨཊྛཱརསཀཾ
Paṭippassambhetabbaaṭṭhārasakaṃ
༤༤. ‘‘པཉྩཧི, བྷིཀྑཝེ, ཨངྒེཧི སམནྣཱགཏསྶ བྷིཀྑུནོ པཊིསཱརཎཱིཡཀམྨཾ པཊིཔྤསྶམྦྷེཏབྦཾ། ན ཨུཔསམྤཱདེཏི, ན ནིསྶཡཾ དེཏི, ན སཱམཎེརཾ ཨུཔཊྛཱཔེཏི, ན བྷིཀྑུནོཝཱདཀསམྨུཏིཾ སཱདིཡཏི, སམྨཏོཔི བྷིཀྑུནིཡོ ན ཨོཝདཏི – ཨིམེཧི ཁོ, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ པཊིསཱརཎཱིཡཀམྨཾ པཊིཔྤསྶམྦྷེཏབྦཾ།
44. ‘‘Pañcahi, bhikkhave, aṅgehi samannāgatassa bhikkhuno paṭisāraṇīyakammaṃ paṭippassambhetabbaṃ. Na upasampādeti, na nissayaṃ deti, na sāmaṇeraṃ upaṭṭhāpeti, na bhikkhunovādakasammutiṃ sādiyati, sammatopi bhikkhuniyo na ovadati – imehi kho, bhikkhave, pañcahaṅgehi samannāgatassa bhikkhuno paṭisāraṇīyakammaṃ paṭippassambhetabbaṃ.
‘‘ཨཔརེཧིཔི, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ པཊིསཱརཎཱིཡཀམྨཾ པཊིཔྤསྶམྦྷེཏབྦཾ། ཡཱཡ ཨཱཔཏྟིཡཱ སངྒྷེན པཊིསཱརཎཱིཡཀམྨཾ ཀཏཾ ཧོཏི ཏཾ ཨཱཔཏྟིཾ ན ཨཱཔཛྫཏི, ཨཉྙཾ ཝཱ ཏཱདིསིཀཾ, ཏཏོ ཝཱ པཱཔིཊྛཏརཾ; ཀམྨཾ ན གརཧཏི, ཀམྨིཀེ ན གརཧཏི – ཨིམེཧི ཁོ, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ པཊིསཱརཎཱིཡཀམྨཾ པཊིཔྤསྶམྦྷེཏབྦཾ།
‘‘Aparehipi, bhikkhave, pañcahaṅgehi samannāgatassa bhikkhuno paṭisāraṇīyakammaṃ paṭippassambhetabbaṃ. Yāya āpattiyā saṅghena paṭisāraṇīyakammaṃ kataṃ hoti taṃ āpattiṃ na āpajjati, aññaṃ vā tādisikaṃ, tato vā pāpiṭṭhataraṃ; kammaṃ na garahati, kammike na garahati – imehi kho, bhikkhave, pañcahaṅgehi samannāgatassa bhikkhuno paṭisāraṇīyakammaṃ paṭippassambhetabbaṃ.
‘‘ཨཊྛཧི, བྷིཀྑཝེ, ཨངྒེཧི སམནྣཱགཏསྶ བྷིཀྑུནོ པཊིསཱརཎཱིཡཀམྨཾ པཊིཔྤསྶམྦྷེཏབྦཾ། ན པཀཏཏྟསྶ བྷིཀྑུནོ ཨུཔོསཐཾ ཋཔེཏི, ན པཝཱརཎཾ ཋཔེཏི, ན སཝཙནཱིཡཾ ཀརོཏི, ན ཨནུཝཱདཾ པཊྛཔེཏི, ན ཨོཀཱསཾ ཀཱརེཏི, ན ཙོདེཏི, ན སཱརེཏི, ན བྷིཀྑཱུཧི སམྤཡོཛེཏི – ཨིམེཧི ཁོ, བྷིཀྑཝེ, ཨཊྛཧངྒེཧི སམནྣཱགཏསྶ བྷིཀྑུནོ པཊིསཱརཎཱིཡཀམྨཾ པཊིཔྤསྶམྦྷེཏབྦཾ།
‘‘Aṭṭhahi, bhikkhave, aṅgehi samannāgatassa bhikkhuno paṭisāraṇīyakammaṃ paṭippassambhetabbaṃ. Na pakatattassa bhikkhuno uposathaṃ ṭhapeti, na pavāraṇaṃ ṭhapeti, na savacanīyaṃ karoti, na anuvādaṃ paṭṭhapeti, na okāsaṃ kāreti, na codeti, na sāreti, na bhikkhūhi sampayojeti – imehi kho, bhikkhave, aṭṭhahaṅgehi samannāgatassa bhikkhuno paṭisāraṇīyakammaṃ paṭippassambhetabbaṃ.
པཊིསཱརཎཱིཡཀམྨེ པཊིཔྤསྶམྦྷེཏབྦཨཊྛཱརསཀཾ ནིཊྛིཏཾ།
Paṭisāraṇīyakamme paṭippassambhetabbaaṭṭhārasakaṃ niṭṭhitaṃ.
༤༥. ‘‘ཨེཝཉྩ པན, བྷིཀྑཝེ, པཊིཔྤསྶམྦྷེཏབྦཾ། ཏེན 1, བྷིཀྑཝེ, སུདྷམྨེན བྷིཀྑུནཱ སངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ – ‘ཨཧཾ, བྷནྟེ, སངྒྷེན པཊིསཱརཎཱིཡཀམྨཀཏོ སམྨཱ ཝཏྟཱམི, ལོམཾ པཱཏེམི, ནེཏྠཱརཾ ཝཏྟཱམི, པཊིསཱརཎཱིཡསྶ ཀམྨསྶ པཊིཔྤསྶདྡྷིཾ ཡཱཙཱམཱི’ཏི ། དུཏིཡམྤི ཡཱཙིཏབྦཱ། ཏཏིཡམྤི ཡཱཙིཏབྦཱ། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
45. ‘‘Evañca pana, bhikkhave, paṭippassambhetabbaṃ. Tena 2, bhikkhave, sudhammena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘ahaṃ, bhante, saṅghena paṭisāraṇīyakammakato sammā vattāmi, lomaṃ pātemi, netthāraṃ vattāmi, paṭisāraṇīyassa kammassa paṭippassaddhiṃ yācāmī’ti . Dutiyampi yācitabbā. Tatiyampi yācitabbā. Byattena bhikkhunā paṭibalena saṅgho ñāpetabbo –
‘‘སུཎཱཏུ མེ, བྷནྟེ, སངྒྷོ། ཨཡཾ སུདྷམྨོ བྷིཀྑུ སངྒྷེན པཊིསཱརཎཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, པཊིསཱརཎཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཡདི སངྒྷསྶ པཏྟཀལླཾ, སངྒྷོ སུདྷམྨསྶ བྷིཀྑུནོ པཊིསཱརཎཱིཡཀམྨཾ པཊིཔྤསྶམྦྷེཡྻ། ཨེསཱ ཉཏྟི།
‘‘Suṇātu me, bhante, saṅgho. Ayaṃ sudhammo bhikkhu saṅghena paṭisāraṇīyakammakato sammā vattati, lomaṃ pāteti, netthāraṃ vattati, paṭisāraṇīyassa kammassa paṭippassaddhiṃ yācati. Yadi saṅghassa pattakallaṃ, saṅgho sudhammassa bhikkhuno paṭisāraṇīyakammaṃ paṭippassambheyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ སུདྷམྨོ བྷིཀྑུ སངྒྷེན པཊིསཱརཎཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, པཊིསཱརཎཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། སངྒྷོ སུདྷམྨསྶ བྷིཀྑུནོ པཊིསཱརཎཱིཡཀམྨཾ པཊིཔྤསྶམྦྷེཏི། ཡསྶཱཡསྨཏོ ཁམཏི སུདྷམྨསྶ བྷིཀྑུནོ པཊིསཱརཎཱིཡསྶ ཀམྨསྶ པཊིཔྤསྶདྡྷི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ sudhammo bhikkhu saṅghena paṭisāraṇīyakammakato sammā vattati, lomaṃ pāteti, netthāraṃ vattati, paṭisāraṇīyassa kammassa paṭippassaddhiṃ yācati. Saṅgho sudhammassa bhikkhuno paṭisāraṇīyakammaṃ paṭippassambheti. Yassāyasmato khamati sudhammassa bhikkhuno paṭisāraṇīyassa kammassa paṭippassaddhi, so tuṇhassa; yassa nakkhamati, so bhāseyya.
‘‘དུཏིཡམྤི ཨེཏམཏྠཾ ཝདཱམི…པེ॰… ཏཏིཡམྤི ཨེཏམཏྠཾ ཝདཱམི – སུཎཱཏུ མེ, བྷནྟེ, སངྒྷོ། ཨཡཾ སུདྷམྨོ བྷིཀྑུ སངྒྷེན པཊིསཱརཎཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, པཊིསཱརཎཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། སངྒྷོ སུདྷམྨསྶ བྷིཀྑུནོ པཊིསཱརཎཱིཡཀམྨཾ པཊིཔྤསྶམྦྷེཏི། ཡསྶཱཡསྨཏོ ཁམཏི སུདྷམྨསྶ བྷིཀྑུནོ པཊིསཱརཎཱིཡསྶ ཀམྨསྶ པཊིཔྤསྶདྡྷི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ sudhammo bhikkhu saṅghena paṭisāraṇīyakammakato sammā vattati, lomaṃ pāteti, netthāraṃ vattati, paṭisāraṇīyassa kammassa paṭippassaddhiṃ yācati. Saṅgho sudhammassa bhikkhuno paṭisāraṇīyakammaṃ paṭippassambheti. Yassāyasmato khamati sudhammassa bhikkhuno paṭisāraṇīyassa kammassa paṭippassaddhi, so tuṇhassa; yassa nakkhamati, so bhāseyya.
‘‘པཊིཔྤསྶདྡྷཾ སངྒྷེན སུདྷམྨསྶ བྷིཀྑུནོ པཊིསཱརཎཱིཡཀམྨཾ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Paṭippassaddhaṃ saṅghena sudhammassa bhikkhuno paṭisāraṇīyakammaṃ. Khamati saṅghassa, tasmā tuṇhī, evametaṃ dhārayāmī’’ti.
པཊིསཱརཎཱིཡཀམྨཾ ནིཊྛིཏཾ ཙཏུཏྠཾ།
Paṭisāraṇīyakammaṃ niṭṭhitaṃ catutthaṃ.
Footnotes:
