| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
པཊིཔྤསྶམྦྷེཏབྦཏེཙཏྟཱལཱིསཀཾ
Paṭippassambhetabbatecattālīsakaṃ
༦༣. ‘‘པཉྩཧི, བྷིཀྑཝེ, ཨངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ པཊིཔྤསྶམྦྷེཏབྦཾ། ན ཨུཔསམྤཱདེཏི, ན ནིསྶཡཾ དེཏི, ན སཱམཎེརཾ ཨུཔཊྛཱཔེཏི, ན བྷིཀྑུནོཝཱདཀསམྨུཏིཾ སཱདིཡཏི, སམྨཏོཔི བྷིཀྑུནིཡོ ན ཨོཝདཏི – ཨིམེཧི ཁོ, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ པཊིཔྤསྶམྦྷེཏབྦཾ།
63. ‘‘Pañcahi, bhikkhave, aṅgehi samannāgatassa bhikkhuno, āpattiyā appaṭikamme, ukkhepanīyakammaṃ paṭippassambhetabbaṃ. Na upasampādeti, na nissayaṃ deti, na sāmaṇeraṃ upaṭṭhāpeti, na bhikkhunovādakasammutiṃ sādiyati, sammatopi bhikkhuniyo na ovadati – imehi kho, bhikkhave, pañcahaṅgehi samannāgatassa bhikkhuno, āpattiyā appaṭikamme, ukkhepanīyakammaṃ paṭippassambhetabbaṃ.
‘‘ཨཔརེཧིཔི, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ པཊིཔྤསྶམྦྷེཏབྦཾ། ཡཱཡ ཨཱཔཏྟིཡཱ སངྒྷེན, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ ཀཏཾ ཧོཏི ཏཾ ཨཱཔཏྟིཾ ན ཨཱཔཛྫཏི, ཨཉྙཾ ཝཱ ཏཱདིསིཀཾ, ཏཏོ ཝཱ པཱཔིཊྛཏརཾ ; ཀམྨཾ ན གརཧཏི, ཀམྨིཀེ ན གརཧཏི…པེ॰… ན པཀཏཏྟསྶ བྷིཀྑུནོ ཨབྷིཝཱདནཾ, པཙྩུཊྛཱནཾ, ཨཉྫལིཀམྨཾ, སཱམཱིཙིཀམྨཾ, ཨཱསནཱབྷིཧཱརཾ སཱདིཡཏི…པེ॰… ན པཀཏཏྟསྶ བྷིཀྑུནོ སེཡྻཱབྷིཧཱརཾ, པཱདོདཀཾ པཱདཔཱིཋཾ, པཱདཀཐལིཀཾ, པཏྟཙཱིཝརཔྤཊིགྒཧཎཾ, ནཧཱནེ པིཊྛིཔརིཀམྨཾ སཱདིཡཏི…པེ॰… ན པཀཏཏྟཾ བྷིཀྑུཾ སཱིལཝིཔཏྟིཡཱ ཨནུདྡྷཾསེཏི, ན ཨཱཙཱརཝིཔཏྟིཡཱ ཨནུདྡྷཾསེཏི, ན དིཊྛིཝིཔཏྟིཡཱ ཨནུདྡྷཾསེཏི, ན ཨཱཛཱིཝཝིཔཏྟིཡཱ ཨནུདྡྷཾསེཏི, ན བྷིཀྑུཾ བྷིཀྑཱུཧི བྷེདེཏི…པེ॰… ན གིཧིདྡྷཛཾ དྷཱརེཏི, ན ཏིཏྠིཡདྡྷཛཾ དྷཱརེཏི, ན ཏིཏྠིཡེ སེཝཏི, བྷིཀྑཱུ སེཝཏི, བྷིཀྑུསིཀྑཱཡ སིཀྑཏི…པེ॰… ན པཀཏཏྟེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝསཏི, ན ཨེཀཙྪནྣེ ཨནཱཝཱསེ ཝསཏི, ན ཨེཀཙྪནྣེ ཨཱཝཱསེ ཝཱ ཨནཱཝཱསེ ཝཱ ཝསཏི, པཀཏཏྟཾ བྷིཀྑུཾ དིསྭཱ ཨཱསནཱ ཝུཊྛཱཏི, ན པཀཏཏྟཾ བྷིཀྑུཾ ཨཱསཱདེཏི ཨནྟོ ཝཱ བཧི ཝཱ – ཨིམེཧི ཁོ, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ པཊིཔྤསྶམྦྷེཏབྦཾ།
‘‘Aparehipi, bhikkhave, pañcahaṅgehi samannāgatassa bhikkhuno, āpattiyā appaṭikamme, ukkhepanīyakammaṃ paṭippassambhetabbaṃ. Yāya āpattiyā saṅghena, āpattiyā appaṭikamme, ukkhepanīyakammaṃ kataṃ hoti taṃ āpattiṃ na āpajjati, aññaṃ vā tādisikaṃ, tato vā pāpiṭṭhataraṃ ; kammaṃ na garahati, kammike na garahati…pe… na pakatattassa bhikkhuno abhivādanaṃ, paccuṭṭhānaṃ, añjalikammaṃ, sāmīcikammaṃ, āsanābhihāraṃ sādiyati…pe… na pakatattassa bhikkhuno seyyābhihāraṃ, pādodakaṃ pādapīṭhaṃ, pādakathalikaṃ, pattacīvarappaṭiggahaṇaṃ, nahāne piṭṭhiparikammaṃ sādiyati…pe… na pakatattaṃ bhikkhuṃ sīlavipattiyā anuddhaṃseti, na ācāravipattiyā anuddhaṃseti, na diṭṭhivipattiyā anuddhaṃseti, na ājīvavipattiyā anuddhaṃseti, na bhikkhuṃ bhikkhūhi bhedeti…pe… na gihiddhajaṃ dhāreti, na titthiyaddhajaṃ dhāreti, na titthiye sevati, bhikkhū sevati, bhikkhusikkhāya sikkhati…pe… na pakatattena bhikkhunā saddhiṃ ekacchanne āvāse vasati, na ekacchanne anāvāse vasati, na ekacchanne āvāse vā anāvāse vā vasati, pakatattaṃ bhikkhuṃ disvā āsanā vuṭṭhāti, na pakatattaṃ bhikkhuṃ āsādeti anto vā bahi vā – imehi kho, bhikkhave, pañcahaṅgehi samannāgatassa bhikkhuno, āpattiyā appaṭikamme, ukkhepanīyakammaṃ paṭippassambhetabbaṃ.
‘‘ཨཊྛཧི , བྷིཀྑཝེ, ཨངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ པཊིཔྤསྶམྦྷེཏབྦཾ། ན པཀཏཏྟསྶ བྷིཀྑུནོ ཨུཔོསཐཾ ཋཔེཏི, ན པཝཱརཎཾ ཋཔེཏི, ན སཝཙནཱིཡཾ ཀརོཏི, ན ཨནུཝཱདཾ པཊྛཔེཏི, ན ཨོཀཱསཾ ཀཱརེཏི, ན ཙོདེཏི, ན སཱརེཏི, ན བྷིཀྑཱུཧི སམྤཡོཛེཏི – ཨིམེཧི ཁོ, བྷིཀྑཝེ, ཨཊྛཧངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ པཊིཔྤསྶམྦྷེཏབྦཾ།
‘‘Aṭṭhahi , bhikkhave, aṅgehi samannāgatassa bhikkhuno, āpattiyā appaṭikamme, ukkhepanīyakammaṃ paṭippassambhetabbaṃ. Na pakatattassa bhikkhuno uposathaṃ ṭhapeti, na pavāraṇaṃ ṭhapeti, na savacanīyaṃ karoti, na anuvādaṃ paṭṭhapeti, na okāsaṃ kāreti, na codeti, na sāreti, na bhikkhūhi sampayojeti – imehi kho, bhikkhave, aṭṭhahaṅgehi samannāgatassa bhikkhuno, āpattiyā appaṭikamme, ukkhepanīyakammaṃ paṭippassambhetabbaṃ.
ཨཱཔཏྟིཡཱ ཨཔྤཊིཀམྨེ ཨུཀྑེཔནཱིཡཀམྨེ
Āpattiyā appaṭikamme ukkhepanīyakamme
པཊིཔྤསྶམྦྷེཏབྦཏེཙཏྟཱལཱིསཀཾ ནིཊྛིཏཾ།
Paṭippassambhetabbatecattālīsakaṃ niṭṭhitaṃ.
༦༤. ‘‘ཨེཝཉྩ པན, བྷིཀྑཝེ, པཊིཔྤསྶམྦྷེཏབྦཾ། ཏེན བྷིཀྑཝེ, ཚནྣེན བྷིཀྑུནཱ སངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ – ‘ཨཧཾ, བྷནྟེ, སངྒྷེན, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཀཏོ སམྨཱ ཝཏྟཱམི, ལོམཾ པཱཏེམི, ནེཏྠཱརཾ ཝཏྟཱམི, ཨཱཔཏྟིཡཱ ཨཔྤཊིཀམྨེ ཨུཀྑེཔནཱིཡསྶ ཀམྨསྶ པཊིཔྤསྶདྡྷིཾ ཡཱཙཱམཱི’ཏི། དུཏིཡམྤི ཡཱཙིཏབྦཱ། ཏཏིཡམྤི ཡཱཙིཏབྦཱ། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
64. ‘‘Evañca pana, bhikkhave, paṭippassambhetabbaṃ. Tena bhikkhave, channena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘ahaṃ, bhante, saṅghena, āpattiyā appaṭikamme, ukkhepanīyakammakato sammā vattāmi, lomaṃ pātemi, netthāraṃ vattāmi, āpattiyā appaṭikamme ukkhepanīyassa kammassa paṭippassaddhiṃ yācāmī’ti. Dutiyampi yācitabbā. Tatiyampi yācitabbā. Byattena bhikkhunā paṭibalena saṅgho ñāpetabbo –
‘‘སུཎཱཏུ མེ, བྷནྟེ, སངྒྷོ། ཨཡཾ ཚནྣོ བྷིཀྑུ སངྒྷེན, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཨཱཔཏྟིཡཱ ཨཔྤཊིཀམྨེ ཨུཀྑེཔནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཡདི སངྒྷསྶ པཏྟཀལླཾ, སངྒྷོ ཚནྣསྶ བྷིཀྑུནོ , ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ པཊིཔྤསྶམྦྷེཡྻ། ཨེསཱ ཉཏྟི།
‘‘Suṇātu me, bhante, saṅgho. Ayaṃ channo bhikkhu saṅghena, āpattiyā appaṭikamme, ukkhepanīyakammakato sammā vattati, lomaṃ pāteti, netthāraṃ vattati, āpattiyā appaṭikamme ukkhepanīyassa kammassa paṭippassaddhiṃ yācati. Yadi saṅghassa pattakallaṃ, saṅgho channassa bhikkhuno , āpattiyā appaṭikamme, ukkhepanīyakammaṃ paṭippassambheyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ ཚནྣོ བྷིཀྑུ སངྒྷེན, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཨཱཔཏྟིཡཱ ཨཔྤཊིཀམྨེ ཨུཀྑེཔནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། སངྒྷོ ཚནྣསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ པཊིཔྤསྶམྦྷེཏི། ཡསྶཱཡསྨཏོ ཁམཏི ཚནྣསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡསྶ ཀམྨསྶ པཊིཔྤསྶདྡྷི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ channo bhikkhu saṅghena, āpattiyā appaṭikamme, ukkhepanīyakammakato sammā vattati, lomaṃ pāteti, netthāraṃ vattati, āpattiyā appaṭikamme ukkhepanīyassa kammassa paṭippassaddhiṃ yācati. Saṅgho channassa bhikkhuno, āpattiyā appaṭikamme, ukkhepanīyakammaṃ paṭippassambheti. Yassāyasmato khamati channassa bhikkhuno, āpattiyā appaṭikamme, ukkhepanīyassa kammassa paṭippassaddhi, so tuṇhassa; yassa nakkhamati, so bhāseyya.
‘‘དུཏིཡམྤི ཨེཏམཏྠཾ ཝདཱམི…པེ॰… ཏཏིཡམྤི ཨེཏམཏྠཾ ཝདཱམི – སུཎཱཏུ མེ, བྷནྟེ, སངྒྷོ། ཨཡཾ ཚནྣོ བྷིཀྑུ སངྒྷེན, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། སངྒྷོ ཚནྣསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ པཊིཔྤསྶམྦྷེཏི། ཡསྶཱཡསྨཏོ ཁམཏི ཚནྣསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡསྶ ཀམྨསྶ པཊིཔྤསྶདྡྷི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ channo bhikkhu saṅghena, āpattiyā appaṭikamme, ukkhepanīyakammakato sammā vattati, lomaṃ pāteti, netthāraṃ vattati, āpattiyā appaṭikamme, ukkhepanīyassa kammassa paṭippassaddhiṃ yācati. Saṅgho channassa bhikkhuno, āpattiyā appaṭikamme, ukkhepanīyakammaṃ paṭippassambheti. Yassāyasmato khamati channassa bhikkhuno, āpattiyā appaṭikamme, ukkhepanīyassa kammassa paṭippassaddhi, so tuṇhassa; yassa nakkhamati, so bhāseyya.
‘‘པཊིཔྤསྶདྡྷཾ སངྒྷེན ཚནྣསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Paṭippassaddhaṃ saṅghena channassa bhikkhuno, āpattiyā appaṭikamme, ukkhepanīyakammaṃ. Khamati saṅghassa, tasmā tuṇhī, evametaṃ dhārayāmī’’ti.
ཨཱཔཏྟིཡཱ ཨཔྤཊིཀམྨེ ཨུཀྑེཔནཱིཡཀམྨཾ ནིཊྛིཏཾ ཚཊྛཾ།
Āpattiyā appaṭikamme ukkhepanīyakammaṃ niṭṭhitaṃ chaṭṭhaṃ.
