| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. পতিরূপসুত্তং
4. Patirūpasuttaṃ
১৫০. একং সমযং ভগৰা কোসলেসু ৰিহরতি একসালাযং ব্রাহ্মণগামে। তেন খো পন সমযেন ভগৰা মহতিযা গিহিপরিসায পরিৰুতো ধম্মং দেসেতি।
150. Ekaṃ samayaṃ bhagavā kosalesu viharati ekasālāyaṃ brāhmaṇagāme. Tena kho pana samayena bhagavā mahatiyā gihiparisāya parivuto dhammaṃ deseti.
অথ খো মারস্স পাপিমতো এতদহোসি – ‘‘অযং খো সমণো গোতমো মহতিযা গিহিপরিসায পরিৰুতো ধম্মং দেসেতি। যংনূনাহং যেন সমণো গোতমো তেনুপসঙ্কমেয্যং ৰিচক্খুকম্মাযা’’তি। অথ খো মারো পাপিমা যেন ভগৰা তেনুপসঙ্কমি; উপসঙ্কমিত্ৰা ভগৰন্তং গাথায অজ্ঝভাসি –
Atha kho mārassa pāpimato etadahosi – ‘‘ayaṃ kho samaṇo gotamo mahatiyā gihiparisāya parivuto dhammaṃ deseti. Yaṃnūnāhaṃ yena samaṇo gotamo tenupasaṅkameyyaṃ vicakkhukammāyā’’ti. Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘নেতং তৰ পতিরূপং, যদঞ্ঞমনুসাসসি।
‘‘Netaṃ tava patirūpaṃ, yadaññamanusāsasi;
অনুরোধৰিরোধেসু, মা সজ্জিত্থো তদাচর’’ন্তি॥
Anurodhavirodhesu, mā sajjittho tadācara’’nti.
‘‘হিতানুকম্পী সম্বুদ্ধো, যদঞ্ঞমনুসাসতি।
‘‘Hitānukampī sambuddho, yadaññamanusāsati;
অনুরোধৰিরোধেহি, ৰিপ্পমুত্তো তথাগতো’’তি॥
Anurodhavirodhehi, vippamutto tathāgato’’ti.
অথ খো মারো পাপিমা ‘‘জানাতি মং ভগৰা, জানাতি মং সুগতো’’তি দুক্খী দুম্মনো তত্থেৰন্তরধাযীতি।
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. পতিরূপসুত্তৰণ্ণনা • 4. Patirūpasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. পতিরূপসুত্তৰণ্ণনা • 4. Patirūpasuttavaṇṇanā
