| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. පතිරූපසුත්‌තං
4. Patirūpasuttaṃ
150. එකං සමයං භගවා කොසලෙසු විහරති එකසාලායං බ්‍රාහ්‌මණගාමෙ. තෙන ඛො පන සමයෙන භගවා මහතියා ගිහිපරිසාය පරිවුතො ධම්‌මං දෙසෙති.
150. Ekaṃ samayaṃ bhagavā kosalesu viharati ekasālāyaṃ brāhmaṇagāme. Tena kho pana samayena bhagavā mahatiyā gihiparisāya parivuto dhammaṃ deseti.
අථ ඛො මාරස්‌ස පාපිමතො එතදහොසි – ‘‘අයං ඛො සමණො ගොතමො මහතියා ගිහිපරිසාය පරිවුතො ධම්‌මං දෙසෙති. යංනූනාහං යෙන සමණො ගොතමො තෙනුපසඞ්‌කමෙය්‍යං විචක්‌ඛුකම්‌මායා’’ති. අථ ඛො මාරො පාපිමා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං ගාථාය අජ්‌ඣභාසි –
Atha kho mārassa pāpimato etadahosi – ‘‘ayaṃ kho samaṇo gotamo mahatiyā gihiparisāya parivuto dhammaṃ deseti. Yaṃnūnāhaṃ yena samaṇo gotamo tenupasaṅkameyyaṃ vicakkhukammāyā’’ti. Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘නෙතං තව පතිරූපං, යදඤ්‌ඤමනුසාසසි;
‘‘Netaṃ tava patirūpaṃ, yadaññamanusāsasi;
අනුරොධවිරොධෙසු, මා සජ්‌ජිත්‌ථො තදාචර’’න්‌ති.
Anurodhavirodhesu, mā sajjittho tadācara’’nti.
‘‘හිතානුකම්‌පී සම්‌බුද්‌ධො, යදඤ්‌ඤමනුසාසති;
‘‘Hitānukampī sambuddho, yadaññamanusāsati;
අනුරොධවිරොධෙහි, විප්‌පමුත්‌තො තථාගතො’’ති.
Anurodhavirodhehi, vippamutto tathāgato’’ti.
අථ ඛො මාරො පාපිමා ‘‘ජානාති මං භගවා, ජානාති මං සුගතො’’ති දුක්‌ඛී දුම්‌මනො තත්‌ථෙවන්‌තරධායීති.
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. පතිරූපසුත්‌තවණ්‌ණනා • 4. Patirūpasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4. පතිරූපසුත්‌තවණ්‌ණනා • 4. Patirūpasuttavaṇṇanā
