| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៨. បដិសល្លានសុត្តំ
8. Paṭisallānasuttaṃ
៤៥. វុត្តញ្ហេតំ ភគវតា, វុត្តមរហតាតិ មេ សុតំ –
45. Vuttañhetaṃ bhagavatā, vuttamarahatāti me sutaṃ –
‘‘បដិសល្លានារាមា 1, ភិក្ខវេ, វិហរថ បដិសល្លានរតា, អជ្ឈត្តំ ចេតោសមថមនុយុត្តា, អនិរាកតជ្ឈានា, វិបស្សនាយ សមន្នាគតា, ព្រូហេតា សុញ្ញាគារានំ ។ បដិសល្លានារាមានំ, ភិក្ខវេ, វិហរតំ បដិសល្លានរតានំ អជ្ឈត្តំ ចេតោសមថមនុយុត្តានំ អនិរាកតមជ្ឈានានំ វិបស្សនាយ សមន្នាគតានំ ព្រូហេតានំ សុញ្ញាគារានំ ទ្វិន្នំ ផលានំ អញ្ញតរំ ផលំ បាដិកង្ខំ – ទិដ្ឋេវ ធម្មេ អញ្ញា, សតិ វា ឧបាទិសេសេ អនាគាមិតា’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Paṭisallānārāmā 2, bhikkhave, viharatha paṭisallānaratā, ajjhattaṃ cetosamathamanuyuttā, anirākatajjhānā, vipassanāya samannāgatā, brūhetā suññāgārānaṃ . Paṭisallānārāmānaṃ, bhikkhave, viharataṃ paṭisallānaratānaṃ ajjhattaṃ cetosamathamanuyuttānaṃ anirākatamajjhānānaṃ vipassanāya samannāgatānaṃ brūhetānaṃ suññāgārānaṃ dvinnaṃ phalānaṃ aññataraṃ phalaṃ pāṭikaṅkhaṃ – diṭṭheva dhamme aññā, sati vā upādisese anāgāmitā’’ti. Etamatthaṃ bhagavā avoca. Tatthetaṃ iti vuccati –
សម្មា ធម្មំ វិបស្សន្តិ, កាមេសុ អនបេក្ខិនោ។
Sammā dhammaṃ vipassanti, kāmesu anapekkhino.
‘‘អប្បមាទរតា សន្តា, បមាទេ ភយទស្សិនោ;
‘‘Appamādaratā santā, pamāde bhayadassino;
អភព្ពា បរិហានាយ, និព្ពានស្សេវ សន្តិកេ’’តិ។
Abhabbā parihānāya, nibbānasseva santike’’ti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ អដ្ឋមំ។
Ayampi attho vutto bhagavatā, iti me sutanti. Aṭṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៨. បដិសល្លានសុត្តវណ្ណនា • 8. Paṭisallānasuttavaṇṇanā
