| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. படிஸம்பி⁴தா³கதா²வண்ணனா
5. Paṭisambhidākathāvaṇṇanā
432-433. இதா³னி படிஸம்பி⁴தா³கதா² நாம ஹோதி. தத்த² யேஸங் ‘‘யங்கிஞ்சி அரியானங் ஞாணங், ஸப்³ப³ங் லோகுத்தரமேவா’’தி க³ஹெத்வா ‘‘ஸப்³ப³ங் ஞாணங் படிஸம்பி⁴தா³’’தி லத்³தி⁴, ஸெய்யதா²பி அந்த⁴கானங்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸம்முதிஞாணபஞ்ஹேஸு பத²வீகஸிணஸம்முதியங் ஸமாபத்திஞாணங் ஸந்தா⁴ய படிக்கி²பதி, நிருத்திஞாணங் ஸந்தா⁴ய படிஜானாதி. யே கேசி ஸம்முதிந்தி பஞ்ஹே புது²ஜ்ஜனே ஸந்தா⁴ய படிக்கி²பதி. சேதோபரியாயபஞ்ஹேஸு புது²ஜ்ஜனஸ்ஸ ஞாணங் ஸந்தா⁴ய படிக்கி²பதி, அரியஸ்ஸ ஞாணங் ஸந்தா⁴ய படிஜானாதி. ஸப்³பா³ பஞ்ஞாதிபஞ்ஹேஸு கஸிணஸமாபத்திபஞ்ஹங் ஸந்தா⁴ய படிக்கி²பதி, லோகுத்தரங் ஸந்தா⁴ய படிஜானாதி. பத²வீகஸிணஸமாபத்திந்திஆதி³ ‘‘யா ஏதேஸு எத்தகேஸு டா²னேஸு பஞ்ஞா, கிங் ஸப்³பா³ ஸா படிஸம்பி⁴தா³’’தி புச்ச²னத்த²ங் வுத்தங். தேன ஹி ஸப்³ப³ங் ஞாணந்தி யஸ்மா ஸப்³பா³ லோகுத்தரபஞ்ஞா படிஸம்பி⁴தா³ , தஸ்மா ஸப்³ப³ந்தி வசனங் ஸாமஞ்ஞப²லேன ஸத்³தி⁴ங் பதிட்டா²பேதீதி.
432-433. Idāni paṭisambhidākathā nāma hoti. Tattha yesaṃ ‘‘yaṃkiñci ariyānaṃ ñāṇaṃ, sabbaṃ lokuttaramevā’’ti gahetvā ‘‘sabbaṃ ñāṇaṃ paṭisambhidā’’ti laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Sammutiñāṇapañhesu pathavīkasiṇasammutiyaṃ samāpattiñāṇaṃ sandhāya paṭikkhipati, niruttiñāṇaṃ sandhāya paṭijānāti. Ye keci sammutinti pañhe puthujjane sandhāya paṭikkhipati. Cetopariyāyapañhesu puthujjanassa ñāṇaṃ sandhāya paṭikkhipati, ariyassa ñāṇaṃ sandhāya paṭijānāti. Sabbā paññātipañhesu kasiṇasamāpattipañhaṃ sandhāya paṭikkhipati, lokuttaraṃ sandhāya paṭijānāti. Pathavīkasiṇasamāpattintiādi ‘‘yā etesu ettakesu ṭhānesu paññā, kiṃ sabbā sā paṭisambhidā’’ti pucchanatthaṃ vuttaṃ. Tenahi sabbaṃ ñāṇanti yasmā sabbā lokuttarapaññā paṭisambhidā , tasmā sabbanti vacanaṃ sāmaññaphalena saddhiṃ patiṭṭhāpetīti.
படிஸம்பி⁴தா³கதா²வண்ணனா.
Paṭisambhidākathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (47) 5. படிஸம்பி⁴தா³கதா² • (47) 5. Paṭisambhidākathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 5. படிஸம்பி⁴தா³கதா²வண்ணனா • 5. Paṭisambhidākathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 5. படிஸம்பி⁴தா³கதா²வண்ணனா • 5. Paṭisambhidākathāvaṇṇanā
