| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၆-၇. ပဋိသမ္ဘိဒာပ္ပတ္တသုတ္တာဒိဝဏ္ဏနာ
6-7. Paṭisambhidāppattasuttādivaṇṇanā
၈၆-၈၇. ဆဋ္ဌေ ပဋိသမ္ဘိဒာသု ယံ ဝတ္တဗ္ဗံ, တံ ဟေဋ္ဌာ ဝုတ္တမေဝ။ ဥစ္စာဝစာနီတိ ဥစ္စနီစာနိ။ တေနာဟ ‘‘မဟန္တခုဒ္ဒကာနီ’’တိ။ ကိံကရဏီယာနီတိ ‘‘ကိံ ကရောမီ’’တိ ဧဝံ ဝတ္ဝာ ကတ္တဗ္ဗကမ္မာနိ။ တတ္ထ ဥစ္စကမ္မာနိ နာမ စီဝရသ္သ ကရဏံ, ရဇနံ, စေတိယေ သုဓာကမ္မံ, ဥပောသထာဂာရစေတိယဃရဗောဓိဃရေသု ကတ္တဗ္ဗကမ္မန္တိ ဧဝမာဒိ။ အဝစကမ္မံ နာမ ပာဒဓောဝနမက္ခနာဒိ ခုဒ္ဒကကမ္မံ။ တတ္ရုပာယာသာတိ တတ္ရုပဂမနိယာ, တတ္ရ တတ္ရ မဟန္တေ ခုဒ္ဒကေ စ ကမ္မေ သာဓနဝသေန ဥပဂစ္ဆန္တိယာတိ အတ္ထော။ တသ္သ တသ္သ ကမ္မသ္သ နိပ္ဖာဒနေ သမတ္ထာယာတိ ဝုတ္တံ ဟောတိ။ တတ္ရုပာယာယာတိ ဝာ တတ္ရ တတ္ရ ကမ္မေ သာဓေတဗ္ဗေ ဥပာယဘူတာယ။ အလံ ကာတုန္တိ ကာတုံ သမတ္ထော ဟောတိ။ အလံ သံဝိဓာတုန္တိ ဝိစာရေတုံ သမတ္ထော။ သတ္တမံ ဥတ္တာနမေဝ။
86-87. Chaṭṭhe paṭisambhidāsu yaṃ vattabbaṃ, taṃ heṭṭhā vuttameva. Uccāvacānīti uccanīcāni. Tenāha ‘‘mahantakhuddakānī’’ti. Kiṃkaraṇīyānīti ‘‘kiṃ karomī’’ti evaṃ vatvā kattabbakammāni. Tattha uccakammāni nāma cīvarassa karaṇaṃ, rajanaṃ, cetiye sudhākammaṃ, uposathāgāracetiyagharabodhigharesu kattabbakammanti evamādi. Avacakammaṃ nāma pādadhovanamakkhanādi khuddakakammaṃ. Tatrupāyāsāti tatrupagamaniyā, tatra tatra mahante khuddake ca kamme sādhanavasena upagacchantiyāti attho. Tassa tassa kammassa nipphādane samatthāyāti vuttaṃ hoti. Tatrupāyāyāti vā tatra tatra kamme sādhetabbe upāyabhūtāya. Alaṃ kātunti kātuṃ samattho hoti. Alaṃ saṃvidhātunti vicāretuṃ samattho. Sattamaṃ uttānameva.
ပဋိသမ္ဘိဒာပ္ပတ္တသုတ္တာဒိဝဏ္ဏနာ နိဋ္ဌိတာ။
Paṭisambhidāppattasuttādivaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya
၆. ပဋိသမ္ဘိဒာပတ္တသုတ္တံ • 6. Paṭisambhidāpattasuttaṃ
၇. သီလဝန္တသုတ္တံ • 7. Sīlavantasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā)
၆. ပဋိသမ္ဘိဒာပ္ပတ္တသုတ္တဝဏ္ဏနာ • 6. Paṭisambhidāppattasuttavaṇṇanā
၇. သီလဝန္တသုတ္တဝဏ္ဏနာ • 7. Sīlavantasuttavaṇṇanā
