| Library / Tipiṭaka / তিপিটক • Tipiṭaka / ৰিভঙ্গ-মূলটীকা • Vibhaṅga-mūlaṭīkā |
১৫. পটিসম্ভিদাৰিভঙ্গো
15. Paṭisambhidāvibhaṅgo
১. সুত্তন্তভাজনীযং
1. Suttantabhājanīyaṃ
১. সঙ্গহৰারৰণ্ণনা
1. Saṅgahavāravaṇṇanā
৭১৮. এসেৰ নযোতি সঙ্খেপেন দস্সেত্ৰা তমেৰ নযং ৰিত্থারতো দস্সেতুং ‘‘ধম্মপ্পভেদস্স হী’’তিআদিমাহ। নিরুত্তিপটিভানপ্পভেদা তব্বিসযানং অত্থাদীনং পচ্চযুপ্পন্নাদিভেদেহি ভিন্দিত্ৰা ৰেদিতব্বা।
718. Esevanayoti saṅkhepena dassetvā tameva nayaṃ vitthārato dassetuṃ ‘‘dhammappabhedassa hī’’tiādimāha. Niruttipaṭibhānappabhedā tabbisayānaṃ atthādīnaṃ paccayuppannādibhedehi bhinditvā veditabbā.
‘‘যং কিঞ্চি পচ্চযসমুপ্পন্ন’’ন্তি এতেন সচ্চহেতুধম্মপচ্চযাকারৰারেসু আগতানি দুক্খাদীনি গহিতানি। সচ্চপচ্চযাকারৰারেসু নিব্বানং, পরিযত্তিৰারে ভাসিতত্থো, অভিধম্মভাজনীযে ৰিপাকো কিরিযঞ্চাতি এৰং পাল়িযং ৰুত্তানমেৰ ৰসেন পঞ্চ অত্থা ৰেদিতব্বা, তথা ধম্মা চ।
‘‘Yaṃ kiñci paccayasamuppanna’’nti etena saccahetudhammapaccayākāravāresu āgatāni dukkhādīni gahitāni. Saccapaccayākāravāresu nibbānaṃ, pariyattivāre bhāsitattho, abhidhammabhājanīye vipāko kiriyañcāti evaṃ pāḷiyaṃ vuttānameva vasena pañca atthā veditabbā, tathā dhammā ca.
ৰিদহতীতি নিব্বত্তকহেতুআদীনং সাধারণং নিব্বচনং, তদত্থং পন ৰিভাৰেতুমাহ ‘‘পৰত্তেতি চেৰ পাপেতি চা’’তি। তেসু পুরিমো অত্থো মগ্গৰজ্জেসু দট্ঠব্বো। ভাসিতম্পি হি অৰবোধনৰসেন অত্থং পৰত্তেতীতি। মগ্গো পন নিব্বানং পাপেতীতি তস্মিং পচ্ছিমো।
Vidahatīti nibbattakahetuādīnaṃ sādhāraṇaṃ nibbacanaṃ, tadatthaṃ pana vibhāvetumāha ‘‘pavatteti ceva pāpeti cā’’ti. Tesu purimo attho maggavajjesu daṭṭhabbo. Bhāsitampi hi avabodhanavasena atthaṃ pavattetīti. Maggo pana nibbānaṃ pāpetīti tasmiṃ pacchimo.
ধম্মনিরুত্তাভিলাপেতি এত্থ ধম্ম-সদ্দো সভাৰৰাচকোতি কত্ৰা আহ ‘‘যা সভাৰনিরুত্তী’’তি, অৰিপরীতনিরুত্তীতি অত্থো। তস্সা অভিলাপেতি তস্সা নিরুত্তিযা অৰচনভূতায পঞ্ঞত্তিযা অভিলাপেতি কেচি ৰণ্ণযন্তি। এৰং সতি পঞ্ঞত্তি অভিলপিতব্বা , ন ৰচনন্তি আপজ্জতি, ন চ ৰচনতো অঞ্ঞং অভিলপিতব্বং উচ্চারেতব্বং অত্থি, অথাপি ফস্সাদিৰচনেহি বোধেতব্বং অভিলপিতব্বং সিযা, এৰং সতি অত্থধম্মৰজ্জং তেহি বোধেতব্বং ন ৰিজ্জতীতি তেসং নিরুত্তিভাৰো আপজ্জতি। ‘‘ফস্সোতি চ সভাৰনিরুত্তি, ফস্সং ফস্সাতি ন সভাৰনিরুত্তী’’তি দস্সিতোৰাযমত্থো, ন চ অৰচনং এৰংপকারং অত্থি, তস্মা ৰচনভূতায এৰ তস্সা সভাৰনিরুত্তিযা অভিলাপে উচ্চারণেতি অত্থো দট্ঠব্বো।
Dhammaniruttābhilāpeti ettha dhamma-saddo sabhāvavācakoti katvā āha ‘‘yā sabhāvaniruttī’’ti, aviparītaniruttīti attho. Tassā abhilāpeti tassā niruttiyā avacanabhūtāya paññattiyā abhilāpeti keci vaṇṇayanti. Evaṃ sati paññatti abhilapitabbā , na vacananti āpajjati, na ca vacanato aññaṃ abhilapitabbaṃ uccāretabbaṃ atthi, athāpi phassādivacanehi bodhetabbaṃ abhilapitabbaṃ siyā, evaṃ sati atthadhammavajjaṃ tehi bodhetabbaṃ na vijjatīti tesaṃ niruttibhāvo āpajjati. ‘‘Phassoti ca sabhāvanirutti, phassaṃ phassāti na sabhāvaniruttī’’ti dassitovāyamattho, na ca avacanaṃ evaṃpakāraṃ atthi, tasmā vacanabhūtāya eva tassā sabhāvaniruttiyā abhilāpe uccāraṇeti attho daṭṭhabbo.
তং সভাৰনিরুত্তিং সদ্দং আরম্মণং কত্ৰা পচ্চৰেক্খন্তস্স তস্মিং সভাৰনিরুত্তাভিলাপে পভেদগতং ঞাণং নিরুত্তিপটিসম্ভিদাতি ৰুত্তত্তা নিরুত্তিসদ্দারম্মণায সোতৰিঞ্ঞাণৰীথিযা পরতো মনোদ্ৰারে নিরুত্তিপটিসম্ভিদা পৰত্ততীতি ৰদন্তি। ‘‘নিরুত্তিপটিসম্ভিদা পচ্চুপ্পন্নারম্মণা’’তি চ ৰচনং সদ্দং গহেত্ৰা পচ্ছা জাননং সন্ধায ৰুত্তন্তি। এৰং পন অঞ্ঞস্মিং পচ্চুপ্পন্নারম্মণে অঞ্ঞং পচ্চুপ্পন্নারম্মণন্তি ৰুত্তন্তি আপজ্জতি। যথা পন দিব্বসোতঞাণং মনুস্সামনুস্সাদিসদ্দপ্পভেদনিচ্ছযস্স পচ্চযভূতং তং তং সদ্দৰিভাৰকং, এৰং সভাৰাসভাৰনিরুত্তিনিচ্ছযস্স পচ্চযভূতং পচ্চুপ্পন্নসভাৰনিরুত্তিসদ্দারম্মণং তংৰিভাৰকঞাণং নিরুত্তিপটিসম্ভিদাতি ৰুচ্চমানে ন পাল়িৰিরোধো হোতি। তং সভাৰনিরুত্তিং সদ্দং আরম্মণং কত্ৰা পচ্চৰেক্খন্তস্সাতি চ পচ্চুপ্পন্নসদ্দারম্মণং পচ্চৰেক্খণং পৰত্তযন্তস্সাতি ন ন সক্কা ৰত্তুং। তম্পি হি ঞাণং সভাৰনিরুত্তিং ৰিভাৰেন্তংযেৰ তংতংসদ্দপচ্চৰেক্খণানন্তরং তংতংপভেদনিচ্ছযহেতুত্তা নিরুত্তিং ভিন্দন্তং পটিৰিজ্ঝন্তমেৰ উপ্পজ্জতীতি চ পভেদগতম্পি হোতীতি। সভাৰনিরুত্তীতি মাগধভাসা অধিপ্পেতাতি ততো অঞ্ঞং সক্কটনামাদিসদ্দং সন্ধায ‘‘অঞ্ঞং পনা’’তি আহ। ব্যঞ্জনন্তি নিপাতপদমাহ।
Taṃ sabhāvaniruttiṃ saddaṃ ārammaṇaṃ katvā paccavekkhantassa tasmiṃ sabhāvaniruttābhilāpe pabhedagataṃ ñāṇaṃ niruttipaṭisambhidāti vuttattā niruttisaddārammaṇāya sotaviññāṇavīthiyā parato manodvāre niruttipaṭisambhidā pavattatīti vadanti. ‘‘Niruttipaṭisambhidā paccuppannārammaṇā’’ti ca vacanaṃ saddaṃ gahetvā pacchā jānanaṃ sandhāya vuttanti. Evaṃ pana aññasmiṃ paccuppannārammaṇe aññaṃ paccuppannārammaṇanti vuttanti āpajjati. Yathā pana dibbasotañāṇaṃ manussāmanussādisaddappabhedanicchayassa paccayabhūtaṃ taṃ taṃ saddavibhāvakaṃ, evaṃ sabhāvāsabhāvaniruttinicchayassa paccayabhūtaṃ paccuppannasabhāvaniruttisaddārammaṇaṃ taṃvibhāvakañāṇaṃ niruttipaṭisambhidāti vuccamāne na pāḷivirodho hoti. Taṃ sabhāvaniruttiṃ saddaṃ ārammaṇaṃ katvā paccavekkhantassāti ca paccuppannasaddārammaṇaṃ paccavekkhaṇaṃ pavattayantassāti na na sakkā vattuṃ. Tampi hi ñāṇaṃ sabhāvaniruttiṃ vibhāventaṃyeva taṃtaṃsaddapaccavekkhaṇānantaraṃ taṃtaṃpabhedanicchayahetuttā niruttiṃ bhindantaṃ paṭivijjhantameva uppajjatīti ca pabhedagatampi hotīti. Sabhāvaniruttīti māgadhabhāsā adhippetāti tato aññaṃ sakkaṭanāmādisaddaṃ sandhāya ‘‘aññaṃ panā’’ti āha. Byañjananti nipātapadamāha.
কথিতং অট্ঠকথাযং। বোধিমণ্ড-সদ্দো পঠমাভিসম্বুদ্ধট্ঠানে এৰ দট্ঠব্বো, ন যত্থ কত্থচি বোধিরুক্খস্স পতিট্ঠিতট্ঠানে। সুৰণ্ণসলাকন্তি সেট্ঠসলাকং, ধম্মদেসনত্থং সলাকং গহেত্ৰাতি অত্থো, ন পটিসম্ভিদাযং ঠিতেন পৰারিতং, তস্মা পটিসম্ভিদাতো অঞ্ঞেনেৰ পকারেন জানিতব্বতো ন সক্কটভাসাজাননং পটিসম্ভিদাকিচ্চন্তি অধিপ্পাযো।
Kathitaṃ aṭṭhakathāyaṃ. Bodhimaṇḍa-saddo paṭhamābhisambuddhaṭṭhāne eva daṭṭhabbo, na yattha katthaci bodhirukkhassa patiṭṭhitaṭṭhāne. Suvaṇṇasalākanti seṭṭhasalākaṃ, dhammadesanatthaṃ salākaṃ gahetvāti attho, na paṭisambhidāyaṃ ṭhitena pavāritaṃ, tasmā paṭisambhidāto aññeneva pakārena jānitabbato na sakkaṭabhāsājānanaṃ paṭisambhidākiccanti adhippāyo.
ইদং কথিতন্তি মাগধভাসায সভাৰনিরুত্তিতাঞাপনত্থং ইদং ইদানি ৰত্তব্বং কথিতন্তি অত্থো। ছদ্দন্তৰারণ (জা॰ ১.১৬.৯৭ আদযো) -তিত্তিরজাতকাদীসু (জা॰ ১.৪.৭৩ আদযো) তিরচ্ছানেসু চ মাগধভাসা উস্সন্না, ন ওট্টকাদিভাসা সক্কটং ৰা।
Idaṃ kathitanti māgadhabhāsāya sabhāvaniruttitāñāpanatthaṃ idaṃ idāni vattabbaṃ kathitanti attho. Chaddantavāraṇa (jā. 1.16.97 ādayo) -tittirajātakādīsu (jā. 1.4.73 ādayo) tiracchānesu ca māgadhabhāsā ussannā, na oṭṭakādibhāsā sakkaṭaṃ vā.
তত্থাতি মাগধসেসভাসাসু। সেসা পরিৰত্তন্তি একন্তেন কালন্তরে অঞ্ঞথা হোন্তি ৰিনস্সন্তি চ। মাগধা পন কত্থচি কদাচি পরিৰত্তন্তীপি ন সব্বত্থ সব্বদা সব্বথা চ পরিৰত্ততি, কপ্পৰিনাসেপি তিট্ঠতিযেৰাতি ‘‘অযমেৰেকা ন পরিৰত্ততী’’তি আহ। পপঞ্চোতি চিরাযনন্তি অত্থো। বুদ্ধৰচনমেৰ চেতস্স ৰিসযো, তেনেৰ ‘‘নেলঙ্গো সেতপচ্ছাদো’’তি গাথং পুচ্ছিতো চিত্তো গহপতি ‘‘‘কিং নু খো এতং, ভন্তে, ভগৰতা ভাসিত’ন্তি? ‘এৰং গহপতী’তি। ‘তেন হি, ভন্তে, মুহুত্তং আগমেথ, যাৰস্স অত্থং পেক্খামী’’’তি (সং॰ নি॰ ৪.৩৪৭) আহাতি ৰদন্তি।
Tatthāti māgadhasesabhāsāsu. Sesā parivattanti ekantena kālantare aññathā honti vinassanti ca. Māgadhā pana katthaci kadāci parivattantīpi na sabbattha sabbadā sabbathā ca parivattati, kappavināsepi tiṭṭhatiyevāti ‘‘ayamevekā na parivattatī’’ti āha. Papañcoti cirāyananti attho. Buddhavacanameva cetassa visayo, teneva ‘‘nelaṅgo setapacchādo’’ti gāthaṃ pucchito citto gahapati ‘‘‘kiṃ nu kho etaṃ, bhante, bhagavatā bhāsita’nti? ‘Evaṃ gahapatī’ti. ‘Tena hi, bhante, muhuttaṃ āgametha, yāvassa atthaṃ pekkhāmī’’’ti (saṃ. ni. 4.347) āhāti vadanti.
সব্বত্থকঞাণন্তি অত্থাদীসু ঞাণং। তঞ্হি সব্বেসু তেসু তীসু চতূসুপি ৰা পৰত্তত্তা, কুসলকিরিযভূতায পটিভানপটিসম্ভিদায ধম্মত্থভাৰতো তীসু এৰ ৰা পৰত্তত্তা ‘‘সব্বত্থকঞাণ’’ন্তি ৰুত্তং। ইমানি ঞাণানি ইদমত্থজোতকানীতি সাত্থকানং পচ্চৰেক্খিতব্বত্তা সব্বো অত্থো এতস্সাতিপি সব্বত্থকং, সব্বস্মিং খিত্তন্তি ৰা। সেক্খে পৰত্তা অরহত্তপ্পত্তিযা ৰিসদা হোন্তীতি ৰদন্তি। পুব্বযোগো ৰিয পন অরহত্তপ্পত্তি অরহতোপি পটিসম্ভিদাৰিসদতায পচ্চযো ন ন হোতীতি পঞ্চন্নম্পি যথাযোগং সেক্খাসেক্খপটিসম্ভিদাৰিসদত্তকারণতা যোজেতব্বা।
Sabbatthakañāṇanti atthādīsu ñāṇaṃ. Tañhi sabbesu tesu tīsu catūsupi vā pavattattā, kusalakiriyabhūtāya paṭibhānapaṭisambhidāya dhammatthabhāvato tīsu eva vā pavattattā ‘‘sabbatthakañāṇa’’nti vuttaṃ. Imāni ñāṇāni idamatthajotakānīti sātthakānaṃ paccavekkhitabbattā sabbo attho etassātipi sabbatthakaṃ, sabbasmiṃ khittanti vā. Sekkhe pavattā arahattappattiyā visadā hontīti vadanti. Pubbayogo viya pana arahattappatti arahatopi paṭisambhidāvisadatāya paccayo na na hotīti pañcannampi yathāyogaṃ sekkhāsekkhapaṭisambhidāvisadattakāraṇatā yojetabbā.
পুচ্ছায পরতো পৰত্তা কথাতি কত্ৰা অট্ঠকথা ‘‘পরিপুচ্ছা’’তি ৰুত্তা। পটিপত্তিং পূরেতব্বং মঞ্ঞিস্সন্তীতি পটিপত্তিগরুতায লাভং হীল়েন্তেন সতসহস্সগ্ঘনকম্পি কম্বলং ৰাসিযা কোট্টেত্ৰা পরিভণ্ডকরণং মযা কতং আৰজ্জিত্ৰা লাভগরুনো পরিযত্তিধরা ধম্মকথিকাৰ ভৰিতুং ন মঞ্ঞিস্সন্তীতি ৰুত্তং হোতি। এত্থ চ থেরস্স কঙ্খুপ্পত্তিযা পুব্বে অৰিসদতং দস্সেত্ৰা অরহত্তপ্পত্তস্স পঞ্হৰিস্সজ্জনেন অরহত্তপ্পত্তিযা ৰিসদতা দস্সিতা। তিস্সত্থেরো অনন্তরং ৰুত্তো তিস্সত্থেরো এৰাতি ৰদন্তি।
Pucchāya parato pavattā kathāti katvā aṭṭhakathā ‘‘paripucchā’’ti vuttā. Paṭipattiṃ pūretabbaṃ maññissantīti paṭipattigarutāya lābhaṃ hīḷentena satasahassagghanakampi kambalaṃ vāsiyā koṭṭetvā paribhaṇḍakaraṇaṃ mayā kataṃ āvajjitvā lābhagaruno pariyattidharā dhammakathikāva bhavituṃ na maññissantīti vuttaṃ hoti. Ettha ca therassa kaṅkhuppattiyā pubbe avisadataṃ dassetvā arahattappattassa pañhavissajjanena arahattappattiyā visadatā dassitā. Tissatthero anantaraṃ vutto tissatthero evāti vadanti.
পভেদো নাম মগ্গেহি অধিগতানং পটিসম্ভিদানং পভেদগমনং। অধিগমো তেহি পটিলাভো, তস্মা সো লোকুত্তরো, পভেদো কামাৰচরো দট্ঠব্বো। ন পন তথাতি যথা অধিগমস্স বলৰপচ্চযো হোতি, ন তথা পভেদস্সাতি অত্থো। ইদানি পরিযত্তিযাদীনং অধিগমস্স বলৰপচ্চযত্তাভাৰং, পুব্বযোগস্স চ বলৰপচ্চযত্তং দস্সেন্তো ‘‘পরিযত্তিসৰনপরিপুচ্ছা হী’’তিআদিমাহ। তত্থ পটিসম্ভিদা নাম নত্থীতি পটিসম্ভিদাধিগমো নত্থীতি অধিপ্পাযো। ইদানি যং ৰুত্তং হোতি, তং দস্সেন্তো ‘‘ইমে পনা’’তিআদিমাহ। পুব্বযোগাধিগমা হি দ্ৰেপি ৰিসদকারণাতি ‘‘পুব্বযোগো পভেদস্স বলৰপচ্চযো হোতী’’তি ৰুত্তন্তি।
Pabhedo nāma maggehi adhigatānaṃ paṭisambhidānaṃ pabhedagamanaṃ. Adhigamo tehi paṭilābho, tasmā so lokuttaro, pabhedo kāmāvacaro daṭṭhabbo. Na pana tathāti yathā adhigamassa balavapaccayo hoti, na tathā pabhedassāti attho. Idāni pariyattiyādīnaṃ adhigamassa balavapaccayattābhāvaṃ, pubbayogassa ca balavapaccayattaṃ dassento ‘‘pariyattisavanaparipucchā hī’’tiādimāha. Tattha paṭisambhidā nāma natthīti paṭisambhidādhigamo natthīti adhippāyo. Idāni yaṃ vuttaṃ hoti, taṃ dassento ‘‘ime panā’’tiādimāha. Pubbayogādhigamā hi dvepi visadakāraṇāti ‘‘pubbayogo pabhedassa balavapaccayo hotī’’ti vuttanti.
সঙ্গহৰারৰণ্ণনা নিট্ঠিতা।
Saṅgahavāravaṇṇanā niṭṭhitā.
২. সচ্চৰারাদিৰণ্ণনা
2. Saccavārādivaṇṇanā
৭১৯. হেতুৰারে কালত্তযেপি হেতুফলধম্মা ‘‘অত্থা’’তি ৰুত্তা, তেসঞ্চ হেতুধম্মা ‘‘ধম্মা’’তি, ধম্মৰারে ৰেনেয্যৰসেন অতীতানঞ্চ সঙ্গহিতত্তা ‘‘উপ্পন্না সমুপ্পন্না’’তিআদি ন ৰুত্তন্তি অতীতপচ্চুপ্পন্না ‘‘অত্থা’’তি ৰুত্তা, তংনিব্বত্তকা চ ‘‘ধম্মা’’তি ইদমেতেসং দ্ৰিন্নম্পি ৰারানং নানত্তং।
719. Hetuvāre kālattayepi hetuphaladhammā ‘‘atthā’’ti vuttā, tesañca hetudhammā ‘‘dhammā’’ti, dhammavāre veneyyavasena atītānañca saṅgahitattā ‘‘uppannā samuppannā’’tiādi na vuttanti atītapaccuppannā ‘‘atthā’’ti vuttā, taṃnibbattakā ca ‘‘dhammā’’ti idametesaṃ dvinnampi vārānaṃ nānattaṃ.
সচ্চৰারাদিৰণ্ণনা নিট্ঠিতা।
Saccavārādivaṇṇanā niṭṭhitā.
সুত্তন্তভাজনীযৰণ্ণনা নিট্ঠিতা।
Suttantabhājanīyavaṇṇanā niṭṭhitā.
২. অভিধম্মভাজনীযৰণ্ণনা
2. Abhidhammabhājanīyavaṇṇanā
৭২৫. অৰুত্তত্তাতি ‘‘তেসং ৰিপাকে ঞাণ’’ন্তি সামঞ্ঞেন ৰত্ৰা ৰিসেসেন অৰুত্তত্তাতি অধিপ্পাযো। এত্থ চ কিরিযানং অৰিপাকত্তা ধম্মভাৰো ন ৰুত্তোতি। যদি এৰং ৰিপাকা ন হোন্তীতি অত্থভাৰো চ ন ৰত্তব্বোতি? ন, পচ্চযুপ্পন্নত্তা। এৰঞ্চে কুসলাকুসলানম্পি অত্থভাৰো আপজ্জতীতি। নপ্পটিসিদ্ধো, ৰিপাকস্স পন পধানহেতুতায পাকটত্তা ধম্মভাৰোৰ তেসং ৰুত্তো। কিরিযানং পচ্চযত্তা ধম্মভাৰো আপজ্জতীতি চে? নাযং দোসো অপ্পটিসিদ্ধত্তা, কম্মফলসম্বন্ধস্স পন অহেতুত্তা ধম্মভাৰো ন ৰুত্তো। অপিচ ‘‘অযং ইমস্স পচ্চযো, ইদং পচ্চযুপ্পন্ন’’ন্তি এৰং ভেদং অকত্ৰা কেৰলং কুসলাকুসলে ৰিপাককিরিযধম্মে চ সভাৰতো পচ্চৰেক্খন্তস্স ধম্মপটিসম্ভিদা অত্থপটিসম্ভিদা চ হোতীতিপি তেসং অত্থধম্মতা ন ৰুত্তাতি ৰেদিতব্বা । কুসলাকুসলৰারেসু চ ধম্মপটিসম্ভিদা কুসলাকুসলানং পচ্চযভাৰং সত্তিৰিসেসং সনিপ্ফাদেতব্বতং পস্সন্তী নিপ্ফাদেতব্বাপেক্খা হোতীতি তংসম্বন্ধেনেৰ ‘‘তেসং ৰিপাকে ঞাণং অত্থপটিসম্ভিদা’’তি ৰুত্তং। সভাৰদস্সনমত্তমেৰ পন অত্থপটিসম্ভিদায কিচ্চং নিপ্ফন্নফলমত্তদস্সনতোতি তস্সা নিপ্ফাদকানপেক্খত্তা ৰিপাকৰারে ‘‘তেসং ৰিপচ্চনকে ঞাণং ধম্মপটিসম্ভিদা’’তি ন ৰুত্তন্তি ৰেদিতব্বং।
725. Avuttattāti ‘‘tesaṃ vipāke ñāṇa’’nti sāmaññena vatvā visesena avuttattāti adhippāyo. Ettha ca kiriyānaṃ avipākattā dhammabhāvo na vuttoti. Yadi evaṃ vipākā na hontīti atthabhāvo ca na vattabboti? Na, paccayuppannattā. Evañce kusalākusalānampi atthabhāvo āpajjatīti. Nappaṭisiddho, vipākassa pana padhānahetutāya pākaṭattā dhammabhāvova tesaṃ vutto. Kiriyānaṃ paccayattā dhammabhāvo āpajjatīti ce? Nāyaṃ doso appaṭisiddhattā, kammaphalasambandhassa pana ahetuttā dhammabhāvo na vutto. Apica ‘‘ayaṃ imassa paccayo, idaṃ paccayuppanna’’nti evaṃ bhedaṃ akatvā kevalaṃ kusalākusale vipākakiriyadhamme ca sabhāvato paccavekkhantassa dhammapaṭisambhidā atthapaṭisambhidā ca hotītipi tesaṃ atthadhammatā na vuttāti veditabbā . Kusalākusalavāresu ca dhammapaṭisambhidā kusalākusalānaṃ paccayabhāvaṃ sattivisesaṃ sanipphādetabbataṃ passantī nipphādetabbāpekkhā hotīti taṃsambandheneva ‘‘tesaṃ vipāke ñāṇaṃ atthapaṭisambhidā’’ti vuttaṃ. Sabhāvadassanamattameva pana atthapaṭisambhidāya kiccaṃ nipphannaphalamattadassanatoti tassā nipphādakānapekkhattā vipākavāre ‘‘tesaṃ vipaccanake ñāṇaṃ dhammapaṭisambhidā’’ti na vuttanti veditabbaṃ.
সভাৰপঞ্ঞত্তিযাতি ন সত্তাদিপঞ্ঞত্তিযা, অৰিপরীতপঞ্ঞত্তিযা ৰা। খোভেত্ৰাতি লোমহংসজননসাধুকারদানাদীহি খোভেত্ৰা। পুন ধম্মস্সৰনে জানিস্সথাতি অপ্পস্সুতত্তা দুতিযৰারং কথেন্তো তদেৰ কথেস্সতীতি অধিপ্পাযো।
Sabhāvapaññattiyāti na sattādipaññattiyā, aviparītapaññattiyā vā. Khobhetvāti lomahaṃsajananasādhukāradānādīhi khobhetvā. Puna dhammassavanejānissathāti appassutattā dutiyavāraṃ kathento tadeva kathessatīti adhippāyo.
৭৪৬. ভূমিদস্সনত্থন্তি এত্থ কামাৰচরা লোকুত্তরা চ ভূমি ‘‘ভূমী’’তি ৰেদিতব্বা, চিত্তুপ্পাদা ৰাতি।
746. Bhūmidassanatthanti ettha kāmāvacarā lokuttarā ca bhūmi ‘‘bhūmī’’ti veditabbā, cittuppādā vāti.
অভিধম্মভাজনীযৰণ্ণনা নিট্ঠিতা।
Abhidhammabhājanīyavaṇṇanā niṭṭhitā.
৩. পঞ্হপুচ্ছকৰণ্ণনা
3. Pañhapucchakavaṇṇanā
৭৪৭. পচ্চযসমুপ্পন্নঞ্চ অত্থং পচ্চযধম্মঞ্চাতি ৰচনেহি হেতাদিপচ্চযসমুপ্পন্নানং কুসলাকুসলরূপানম্পি অত্থপরিযাযং, হেতাদিপচ্চযভূতানং ৰিপাককিরিযরূপানম্পি ধম্মপরিযাযঞ্চ দস্সেতি। পটিভানপটিসম্ভিদায কামাৰচরৰিপাকারম্মণতা মহগ্গতারম্মণতা চ পটিসম্ভিদাঞাণারম্মণত্তে ন যুজ্জতি পটিসম্ভিদাঞাণানং কামাৰচরলোকুত্তরকুসলেসু কামাৰচরকিরিযালোকুত্তরৰিপাকেসু চ উপ্পত্তিতো। সব্বঞাণারম্মণতায সতি যুজ্জেয্য, ‘‘যেন ঞাণেন তানি ঞাণানি জানাতী’’তি (ৰিভ॰ ৭২৬) ৰচনতো পন ন সব্বঞাণারম্মণতাতি কথযন্তি। সুত্তন্তভাজনীযে পন ‘‘ঞাণেসু ঞাণং পটিভানপটিসম্ভিদা’’তি অৰিসেসেন ৰুত্তত্তা সব্বঞাণারম্মণতা সিযা। অভিধম্মভাজনীযেপি চিত্তুপ্পাদৰসেন কথনং নিরৰসেসকথনন্তি যথাদস্সিতৰিসযৰচনৰসেন ‘‘যেন ঞাণেন তানি ঞাণানি জানাতী’’তি যং ৰুত্তং, তং অঞ্ঞারম্মণতং ন পটিসেধেতীতি। যথা চ অত্থপটিসম্ভিদাৰিসযানং ন নিরৰসেসেন কথনং অভিধম্মভাজনীযে, এৰং পটিভানপটিসম্ভিদাৰিসযস্সপীতি। এৰং পটিভানপটিসম্ভিদায সব্বঞাণৰিসযত্তা ‘‘তিস্সো পটিসম্ভিদা সিযা পরিত্তারম্মণা সিযা মহগ্গতারম্মণা সিযা অপ্পমাণারম্মণা’’তি (ৰিভ॰ ৭৪৯) ৰুত্তা।
747. Paccayasamuppannañca atthaṃ paccayadhammañcāti vacanehi hetādipaccayasamuppannānaṃ kusalākusalarūpānampi atthapariyāyaṃ, hetādipaccayabhūtānaṃ vipākakiriyarūpānampi dhammapariyāyañca dasseti. Paṭibhānapaṭisambhidāya kāmāvacaravipākārammaṇatā mahaggatārammaṇatā ca paṭisambhidāñāṇārammaṇatte na yujjati paṭisambhidāñāṇānaṃ kāmāvacaralokuttarakusalesu kāmāvacarakiriyālokuttaravipākesu ca uppattito. Sabbañāṇārammaṇatāya sati yujjeyya, ‘‘yena ñāṇena tāni ñāṇāni jānātī’’ti (vibha. 726) vacanato pana na sabbañāṇārammaṇatāti kathayanti. Suttantabhājanīye pana ‘‘ñāṇesu ñāṇaṃ paṭibhānapaṭisambhidā’’ti avisesena vuttattā sabbañāṇārammaṇatā siyā. Abhidhammabhājanīyepi cittuppādavasena kathanaṃ niravasesakathananti yathādassitavisayavacanavasena ‘‘yena ñāṇena tāni ñāṇāni jānātī’’ti yaṃ vuttaṃ, taṃ aññārammaṇataṃ na paṭisedhetīti. Yathā ca atthapaṭisambhidāvisayānaṃ na niravasesena kathanaṃ abhidhammabhājanīye, evaṃ paṭibhānapaṭisambhidāvisayassapīti. Evaṃ paṭibhānapaṭisambhidāya sabbañāṇavisayattā ‘‘tisso paṭisambhidā siyā parittārammaṇā siyā mahaggatārammaṇā siyā appamāṇārammaṇā’’ti (vibha. 749) vuttā.
যদিপি ‘‘সিযা অত্থপটিসম্ভিদা ন মগ্গারম্মণা’’তি (ৰিভ॰ ৭৪৯) ৰচনতো অভিধম্মভাজনীযে ৰুত্তপটিসম্ভিদাস্ৰেৰ পঞ্হপুচ্ছকনযো পৰত্তো। ন হি মগ্গো পচ্চযুপ্পন্নো ন হোতি, অভিধম্মভাজনীযে চ পটিসম্ভিদাঞাণৰিসযা এৰ পটিভানপটিসম্ভিদা ৰুত্তাতি ন তস্সা মহগ্গতারম্মণতাতি। এৰমপি দ্ৰেপি এতা পাল়িযো ৰিরুজ্ঝন্তি, তাসু বলৰতরায ঠত্ৰা ইতরায অধিপ্পাযো মগ্গিতব্বো। কুসলাকুসলানং পন পচ্চযুপ্পন্নত্তপটিৰেধোপি কুসলাকুসলভাৰপটিৰেধৰিনিমুত্তো নত্থীতি নিপ্পরিযাযা তত্থ ধম্মপটিসম্ভিদা একন্তধম্মৰিসযত্তা, তথা ৰিপাককিরিযানং পচ্চযভাৰপটিৰেধোপি ৰিপাককিরিযভাৰপটিৰেধৰিনিমুত্তো নত্থীতি নিপ্পরিযাযা তত্থ অত্থপটিসম্ভিদা একন্তিকঅত্থৰিসযত্তা। কিঞ্চি পন ঞাণং অপ্পটিভানভূতং নত্থি ঞেয্যপ্পকাসনতোতি সব্বস্মিম্পি ঞাণে নিপ্পরিযাযা পটিভানপটিসম্ভিদা ভৰিতুং অরহতি। নিপ্পরিযাযপটিসম্ভিদাসু পঞ্হপুচ্ছকস্স পৰত্তিযং দ্ৰেপি পাল়িযো ন ৰিরুজ্ঝন্তি।
Yadipi ‘‘siyā atthapaṭisambhidā na maggārammaṇā’’ti (vibha. 749) vacanato abhidhammabhājanīye vuttapaṭisambhidāsveva pañhapucchakanayo pavatto. Na hi maggo paccayuppanno na hoti, abhidhammabhājanīye ca paṭisambhidāñāṇavisayā eva paṭibhānapaṭisambhidā vuttāti na tassā mahaggatārammaṇatāti. Evamapi dvepi etā pāḷiyo virujjhanti, tāsu balavatarāya ṭhatvā itarāya adhippāyo maggitabbo. Kusalākusalānaṃ pana paccayuppannattapaṭivedhopi kusalākusalabhāvapaṭivedhavinimutto natthīti nippariyāyā tattha dhammapaṭisambhidā ekantadhammavisayattā, tathā vipākakiriyānaṃ paccayabhāvapaṭivedhopi vipākakiriyabhāvapaṭivedhavinimutto natthīti nippariyāyā tattha atthapaṭisambhidā ekantikaatthavisayattā. Kiñci pana ñāṇaṃ appaṭibhānabhūtaṃ natthi ñeyyappakāsanatoti sabbasmimpi ñāṇe nippariyāyā paṭibhānapaṭisambhidā bhavituṃ arahati. Nippariyāyapaṭisambhidāsu pañhapucchakassa pavattiyaṃ dvepi pāḷiyo na virujjhanti.
সদ্দারম্মণত্তা বহিদ্ধারম্মণাতি এত্থ পরস্স অভিলাপসদ্দারম্মণত্তাতি ভৰিতব্বং। ন হি সদ্দারম্মণতা বহিদ্ধারম্মণতায কারণং সদ্দস্স অজ্ঝত্তস্স চ সব্ভাৰাতি। অনুৰত্তমানো চ সো এৰ সদ্দোতি ৰিসেসনং ন কতন্তি দট্ঠব্বং।
Saddārammaṇattā bahiddhārammaṇāti ettha parassa abhilāpasaddārammaṇattāti bhavitabbaṃ. Na hi saddārammaṇatā bahiddhārammaṇatāya kāraṇaṃ saddassa ajjhattassa ca sabbhāvāti. Anuvattamāno ca so eva saddoti visesanaṃ na katanti daṭṭhabbaṃ.
পঞ্হপুচ্ছকৰণ্ণনা নিট্ঠিতা।
Pañhapucchakavaṇṇanā niṭṭhitā.
পটিসম্ভিদাৰিভঙ্গৰণ্ণনা নিট্ঠিতা।
Paṭisambhidāvibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৫. পটিসম্ভিদাৰিভঙ্গো • 15. Paṭisambhidāvibhaṅgo
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / সম্মোহৰিনোদনী-অট্ঠকথা • Sammohavinodanī-aṭṭhakathā
১. সুত্তন্তভাজনীযং • 1. Suttantabhājanīyaṃ
২. অভিধম্মভাজনীযৰণ্ণনা • 2. Abhidhammabhājanīyavaṇṇanā
৩. পঞ্হাপুচ্ছকৰণ্ণনা • 3. Pañhāpucchakavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১৫. পটিসম্ভিদাৰিভঙ্গো • 15. Paṭisambhidāvibhaṅgo
