| Library / Tipiṭaka / তিপিটক • Tipiṭaka / ৰিভঙ্গ-অনুটীকা • Vibhaṅga-anuṭīkā |
১৫. পটিসম্ভিদাৰিভঙ্গো
15. Paṭisambhidāvibhaṅgo
১. সুত্তন্তভাজনীযং
1. Suttantabhājanīyaṃ
১. সঙ্গহৰারৰণ্ণনা
1. Saṅgahavāravaṇṇanā
৭১৮. ‘‘এসেৰ নযো’’তি ধম্মাদীসু কতো অতিদেসো সঙ্খেপতো তেসং দস্সনং হোতীতি আহ ‘‘সঙ্খেপেন দস্সেত্ৰা’’তি। তেসং নিরুত্তিপটিভানানং ৰিসযা তব্বিসযা, তেসং, নিরুত্তিপটিভানৰিসযভূতানন্তি অত্থো। পচ্চযুপ্পন্নাদিভেদেহীতি পচ্চযুপ্পন্ননিব্বানভাসিতত্থাদিভেদেহি।
718. ‘‘Eseva nayo’’ti dhammādīsu kato atideso saṅkhepato tesaṃ dassanaṃ hotīti āha ‘‘saṅkhepena dassetvā’’ti. Tesaṃ niruttipaṭibhānānaṃ visayā tabbisayā, tesaṃ, niruttipaṭibhānavisayabhūtānanti attho. Paccayuppannādibhedehīti paccayuppannanibbānabhāsitatthādibhedehi.
দুক্খহেতুফলজাতাদিধম্মজরামরণানি দুক্খাদীনি। সচ্চহেতুধম্মপচ্চযাকারৰারেসু দুক্খসমুদযাদিপরিযাযেন আগতো ফলনিব্বত্তকো হেতু, সচ্চপচ্চযাকারৰারেসু অরিযমগ্গো, পরিযত্তিৰারে ভাসিতং, অভিধম্মভাজনীযে কুসলং, অকুসলন্তি এৰং পাল়িযং ৰুত্তানংযেৰ ৰসেন পঞ্চ ধম্মা ৰেদিতব্বাতি ইমমত্থমাহ ‘‘তথা ধম্মা চা’’তি ইমিনা।
Dukkhahetuphalajātādidhammajarāmaraṇāni dukkhādīni. Saccahetudhammapaccayākāravāresu dukkhasamudayādipariyāyena āgato phalanibbattako hetu, saccapaccayākāravāresu ariyamaggo, pariyattivāre bhāsitaṃ, abhidhammabhājanīye kusalaṃ, akusalanti evaṃ pāḷiyaṃ vuttānaṃyeva vasena pañca dhammā veditabbāti imamatthamāha ‘‘tathā dhammā cā’’ti iminā.
নিব্বত্তকহেতুআদীনন্তি নিব্বত্তকসম্পাপকঞাপকানং। পুরিমোতি পৰত্তনত্থো। তস্মিন্তি মগ্গে। পচ্ছিমোতি পাপনত্থো দট্ঠব্বো।
Nibbattakahetuādīnanti nibbattakasampāpakañāpakānaṃ. Purimoti pavattanattho. Tasminti magge. Pacchimoti pāpanattho daṭṭhabbo.
অৰিপরীতনিরুত্তীতি বুদ্ধাদীহি আচিণ্ণা তস্স তস্স অত্থস্স ৰাচকভাৰে নিরুল়্হা যাথাৰনিরুত্তি। যস্মা ৰিঞ্ঞত্তিৰিকারসহিতো সদ্দো পঞ্ঞত্তীতি অত্তনো অধিপ্পাযো, তস্মা পরমততো তং দস্সেন্তো ‘‘অৰচনভূতাযা’’তি ৰিসেসেত্ৰা ‘‘কেচি ৰণ্ণযন্তী’’তি আহ। এৰং সতীতি এৰং নিরুত্তিযা পঞ্ঞত্তিভাৰে সতি। পঞ্ঞত্তি অভিলপিতব্বাতি আপজ্জতীতি ৰুত্তে, হোতু, কো দোসো তস্সা ৰচনীযভাৰতোতি কদাচি ৰদেয্যাতি আসঙ্কন্তো আহ ‘‘ন চ ৰচনতো…পে॰… উচ্চারেতব্বং অত্থী’’তি। তেসং অত্থধম্মানং। ন ৰচনন্তি অৰচনং অৰচনসভাৰং। এৰংপকারন্তি এৰংৰিধং এৰং নিযতলিঙ্গৰিসেসজোতনাকারং।
Aviparītaniruttīti buddhādīhi āciṇṇā tassa tassa atthassa vācakabhāve niruḷhā yāthāvanirutti. Yasmā viññattivikārasahito saddo paññattīti attano adhippāyo, tasmā paramatato taṃ dassento ‘‘avacanabhūtāyā’’ti visesetvā ‘‘keci vaṇṇayantī’’ti āha. Evaṃ satīti evaṃ niruttiyā paññattibhāve sati. Paññatti abhilapitabbāti āpajjatīti vutte, hotu, ko doso tassā vacanīyabhāvatoti kadāci vadeyyāti āsaṅkanto āha ‘‘na ca vacanato…pe… uccāretabbaṃ atthī’’ti. Tesaṃ atthadhammānaṃ. Na vacananti avacanaṃ avacanasabhāvaṃ. Evaṃpakāranti evaṃvidhaṃ evaṃ niyataliṅgavisesajotanākāraṃ.
পরতোতি পরভাগে অনন্তরমনোদ্ৰারে। সদ্দগ্গহণানুসারেন গহিতায নামনিরুত্তিযং নিরুত্তিপটিসম্ভিদা পৰত্ততীতি ৰদন্তি। যদি এৰং কস্মা পাল়িযং ‘‘নিরুত্তিপটিসম্ভিদা পচ্চুপ্পন্নারম্মণা’’তি ৰুত্তাতি আহ ‘‘নিরুত্তি…পে॰… সন্ধায ৰুত্ত’’ন্তি। পচ্ছা জাননন্তি সদ্দগ্গহণুত্তরকালং নামনিরুত্তিযা জাননং। এৰন্তি এৰং সদ্দগ্গহণতো পচ্ছা নামনিরুত্তিং আরব্ভ পৰত্তং ঞাণং নিরুত্তিপটিসম্ভিদাতি গয্হমানে। এৰং নিরুত্তিযা নামপঞ্ঞত্তিপক্খে পাল়িযা, অট্ঠকথায চ ৰিরোধং দস্সেত্ৰা সদ্দপক্খে তদভাৰং দস্সেন্তো ‘‘যথা পনা’’তিআদিমাহ। তংতংসদ্দৰিভাৰকন্তি যথা তস্স তস্স সদ্দপ্পভেদনিচ্ছযস্স পচ্চযভূতং দিব্বসোতঞাণং সদ্দারম্মণমেৰ তং তং সদ্দং ৰিভূতং করোতি, এৰং নিরুত্তিপ্পভেদনিচ্ছযস্স পচ্চযভূতং নিরুত্তিসদ্দারম্মণমেৰ নিরুত্তিপটিসম্ভিদাঞাণং তং ৰিভূতং করোতীতি তস্স পচ্চুপ্পন্নারম্মণতা ৰুত্তা। সদ্দং পন ৰিভাৰেন্তং একন্ততো সদ্দূপনিবন্ধং পঞ্ঞত্তিম্পি ৰিভাৰেতিযেৰ, যতো সভাৰাসভাৰৰিসেসৰিভাৰনং সম্পজ্জতি। অঞ্ঞথা হি সদ্দমত্তগ্গহণে ৰিসেসাৰবোধো এৰ ন সিযাতি পোরাণা পঞ্ঞত্তিৰিভাৰনম্পি তস্স ইচ্ছন্তি। তংৰিভাৰকন্তি নিরুত্তিসদ্দৰিভাৰকং। ন পাল়িৰিরোধো হোতীতি যদিপি অভিধম্মভাজনীযে ‘‘যায নিরুত্তিযা তেসং ধম্মানং পঞ্ঞত্তি হোতী’’তি (ৰিভ॰ ৭২৭) ৰুত্তং, তম্পি সভাৰনিরুত্তিসদ্দেন ধম্মানং পবোধনমেৰ সন্ধায ৰুত্তং, ন তব্বিনিমুত্তং পঞ্ঞত্তিন্তি ‘‘নিরুত্তিসদ্দারম্মণা নিরুত্তিপটিসম্ভিদা’’তি ৰুচ্চমানে পাল়িযা ৰিরোধো ন হোতীতি অত্থো। ‘‘পচ্চৰেক্খন্তস্সা’’তি ৰুত্তত্তা সদ্দং গহেত্ৰা পচ্ছা গহিতায পঞ্ঞত্তিযা পচ্চৰেক্খণেন ভৰিতব্বন্তি আসঙ্কেয্যাতি তদাসঙ্কানিৰত্তনত্থমাহ ‘‘তং সভাৰনিরুত্তিং সদ্দং আরম্মণং কত্ৰা’’তিআদি। সভাৰনিরুত্তিং ৰিভাৰেন্তংযেৰাতি সভাৰনিরুত্তিৰিসযস্স সম্মোহস্স পগেৰ ৰিদ্ধংসিতত্তা অত্থসাধনৰসেন অভিঞ্ঞাঞাণং ৰিয তং ৰিভাৰেন্তমেৰ পৰত্ততি। তেনাহ ‘‘নিরুত্তিং ভিন্দন্তং পটিৰিজ্ঝন্তমেৰ উপ্পজ্জতী’’তি। পভেদগমনঞ্চেত্থ অনৰসেসতো নিরুত্তিৰিভাগজাননং। তথা সেসেসু। সক্কটনামাদীতি সক্কটৰসেন ৰুত্তনামাখ্যাতাদি। নিপাতপদং নামাদিপদানি ৰিয অত্থং ন ৰদতি, অথ খো ব্যঞ্জেতি জোতেতীতি ‘‘ব্যঞ্জন’’ন্তি ৰুত্তং নিপাতপদং।
Paratoti parabhāge anantaramanodvāre. Saddaggahaṇānusārena gahitāya nāmaniruttiyaṃ niruttipaṭisambhidā pavattatīti vadanti. Yadi evaṃ kasmā pāḷiyaṃ ‘‘niruttipaṭisambhidā paccuppannārammaṇā’’ti vuttāti āha ‘‘nirutti…pe… sandhāya vutta’’nti. Pacchā jānananti saddaggahaṇuttarakālaṃ nāmaniruttiyā jānanaṃ. Evanti evaṃ saddaggahaṇato pacchā nāmaniruttiṃ ārabbha pavattaṃ ñāṇaṃ niruttipaṭisambhidāti gayhamāne. Evaṃ niruttiyā nāmapaññattipakkhe pāḷiyā, aṭṭhakathāya ca virodhaṃ dassetvā saddapakkhe tadabhāvaṃ dassento ‘‘yathā panā’’tiādimāha. Taṃtaṃsaddavibhāvakanti yathā tassa tassa saddappabhedanicchayassa paccayabhūtaṃ dibbasotañāṇaṃ saddārammaṇameva taṃ taṃ saddaṃ vibhūtaṃ karoti, evaṃ niruttippabhedanicchayassa paccayabhūtaṃ niruttisaddārammaṇameva niruttipaṭisambhidāñāṇaṃ taṃ vibhūtaṃ karotīti tassa paccuppannārammaṇatā vuttā. Saddaṃ pana vibhāventaṃ ekantato saddūpanibandhaṃ paññattimpi vibhāvetiyeva, yato sabhāvāsabhāvavisesavibhāvanaṃ sampajjati. Aññathā hi saddamattaggahaṇe visesāvabodho eva na siyāti porāṇā paññattivibhāvanampi tassa icchanti. Taṃvibhāvakanti niruttisaddavibhāvakaṃ. Na pāḷivirodho hotīti yadipi abhidhammabhājanīye ‘‘yāya niruttiyā tesaṃ dhammānaṃ paññatti hotī’’ti (vibha. 727) vuttaṃ, tampi sabhāvaniruttisaddena dhammānaṃ pabodhanameva sandhāya vuttaṃ, na tabbinimuttaṃ paññattinti ‘‘niruttisaddārammaṇā niruttipaṭisambhidā’’ti vuccamāne pāḷiyā virodho na hotīti attho. ‘‘Paccavekkhantassā’’ti vuttattā saddaṃ gahetvā pacchā gahitāya paññattiyā paccavekkhaṇena bhavitabbanti āsaṅkeyyāti tadāsaṅkānivattanatthamāha ‘‘taṃ sabhāvaniruttiṃ saddaṃ ārammaṇaṃ katvā’’tiādi. Sabhāvaniruttiṃ vibhāventaṃyevāti sabhāvaniruttivisayassa sammohassa pageva viddhaṃsitattā atthasādhanavasena abhiññāñāṇaṃ viya taṃ vibhāventameva pavattati. Tenāha ‘‘niruttiṃ bhindantaṃ paṭivijjhantameva uppajjatī’’ti. Pabhedagamanañcettha anavasesato niruttivibhāgajānanaṃ. Tathā sesesu. Sakkaṭanāmādīti sakkaṭavasena vuttanāmākhyātādi. Nipātapadaṃ nāmādipadāni viya atthaṃ na vadati, atha kho byañjeti jotetīti ‘‘byañjana’’nti vuttaṃ nipātapadaṃ.
বোধি ঞাণং মণ্ডভূতং এত্থাতি বোধিমণ্ডো, মহাবোধিট্ঠানং। তেনাহ ‘‘পঠমাভিসম্বুদ্ধট্ঠানে’’তি। অঞ্ঞেন পকারেনাতি উগ্গহাদিপ্পকারেন।
Bodhi ñāṇaṃ maṇḍabhūtaṃ etthāti bodhimaṇḍo, mahābodhiṭṭhānaṃ. Tenāha ‘‘paṭhamābhisambuddhaṭṭhāne’’ti. Aññena pakārenāti uggahādippakārena.
অঞ্ঞথা হোন্তীতি পুরিসযুগে পুরিসযুগে একদেসেন পরিৰত্তন্তা কালন্তরে অঞ্ঞাকারা ভৰন্তি। ৰিনস্সন্তীতি তংতংভাসানং মনুস্সানং ৰিনাসেন ন পঞ্ঞাযন্তি, মনুস্সানং দুরুগ্গহণাদিনা কত্থচি কদাচি পরিৰত্তন্তীপি ব্রহ্মলোকাদীসু যথাসভাৰেনেৰ অৰট্ঠানতো ন সব্বত্থ, সব্বদা, সব্বথা চ পরিৰত্ততি। তেনাহ ‘‘কপ্পৰিনাসেপি তিট্ঠতিযেৰা’’তি। এতস্স নিরুত্তিপটিসম্ভিদাঞাণস্স।
Aññathā hontīti purisayuge purisayuge ekadesena parivattantā kālantare aññākārā bhavanti. Vinassantīti taṃtaṃbhāsānaṃ manussānaṃ vināsena na paññāyanti, manussānaṃ duruggahaṇādinā katthaci kadāci parivattantīpi brahmalokādīsu yathāsabhāveneva avaṭṭhānato na sabbattha, sabbadā, sabbathā ca parivattati. Tenāha ‘‘kappavināsepi tiṭṭhatiyevā’’ti. Etassa niruttipaṭisambhidāñāṇassa.
অত্থাদীসু ঞাণন্তি অত্থপটিসম্ভিদাদি। অত্থধম্মনিরুত্তিৰসেন তীসু। অত্থধম্মনিরুত্তিপটিভানৰসেন চতূসুপি ৰা। অত্থধম্মাদিনা অত্তনা জোতেতব্বেন সহ অত্থেনাতি সাত্থকানি। সব্বো অত্থধম্মাদিকো অত্থো ৰিসযভূতো এতস্স ঞাণস্স অত্থীতি সব্বত্থকং। সব্বস্মিং অত্থাদিকে ৰিসযে খিত্তং অত্তনো পচ্চযেহি ঠপিতং পৰত্তিতং। অরহত্তপ্পত্তিযা ৰিসদা হোন্তি পটিপক্খধম্মানং সব্বসো ৰিদ্ধংসিতত্তা। পঞ্চন্নন্তি অধিগমপরিযত্তিসৰনপরিপুচ্ছাপুব্বযোগানং। যথাযোগন্তি যং যং যস্স পুগ্গলস্স ৰিসদতায যুজ্জতি, তথা যোজেতব্বং।
Atthādīsu ñāṇanti atthapaṭisambhidādi. Atthadhammaniruttivasena tīsu. Atthadhammaniruttipaṭibhānavasena catūsupi vā. Atthadhammādinā attanā jotetabbena saha atthenāti sātthakāni. Sabbo atthadhammādiko attho visayabhūto etassa ñāṇassa atthīti sabbatthakaṃ. Sabbasmiṃ atthādike visaye khittaṃ attano paccayehi ṭhapitaṃ pavattitaṃ. Arahattappattiyā visadā honti paṭipakkhadhammānaṃ sabbaso viddhaṃsitattā. Pañcannanti adhigamapariyattisavanaparipucchāpubbayogānaṃ. Yathāyoganti yaṃ yaṃ yassa puggalassa visadatāya yujjati, tathā yojetabbaṃ.
পরিপুচ্ছাহেতু পৰত্তা কথা পরিপুচ্ছাতি ৰুত্তাতি আহ ‘‘পুচ্ছায…পে॰… পরিপুচ্ছাতি ৰুত্তা’’তি।
Paripucchāhetu pavattā kathā paripucchāti vuttāti āha ‘‘pucchāya…pe… paripucchāti vuttā’’ti.
তেহীতি মগ্গেহি। পটিলাভো নাম পুব্বযোগসম্পত্তিযা অত্থাদিৰিসযস্স সম্মোহস্স সমুচ্ছিন্দনং, তং পন মগ্গকিচ্চমেৰাতি আহ ‘‘সো লোকুত্তরো’’তি। অত্থাদীনং পভেদতো সল্লক্খণৰিভাৰনৰৰত্থাপনা যথারহং পরিত্তকুসলমহাকিরিযচিত্তৰসেন হোতীতি ৰুত্তং ‘‘পভেদো কামাৰচরো’’তি। যথা পুব্বযোগো অধিগমস্স বলৰপচ্চযো সভাৰহেতুভাৰতো, ন তথা পভেদস্স অসভাৰহেতুতায, পরম্পরপচ্চযতায চাতি অধিপ্পাযো। পরিযত্তিআদীনং পভেদস্স বলৰপচ্চযতায , অধিগমস্স চ তদভাৰে এসেৰ নযো। তত্থাতি নিমিত্তত্থে ভুম্মং, তাসু পরিযত্তিসৰনপরিপুচ্ছাসু নিমিত্তভূতাসূতি অত্থো। যং ৰুত্তং হোতীতি ‘‘এতেসু পনা’’তিআদিনা অট্ঠকথাৰচনেন যং অত্থজাতং ৰুত্তং হোতি। তং দস্সেন্তোতি তং নিদ্ধারেত্ৰা দস্সেন্তো। ‘‘পুব্বযোগাধিগমা’’তি ৰত্ৰা ‘‘দ্ৰেপী’’তি ৰচনং অধিগমসহিতোযেৰ পুব্বযোগো পভেদস্স বলৰপচ্চযো, ন কেৰলোতি দস্সনত্থং। তেন ৰুত্তং অট্ঠকথাযং ‘‘দ্ৰেপি একতো হুত্ৰা’’তি (ৰিভ॰ অট্ঠ॰ ৭১৮)। ‘‘দ্ৰেপি ৰিসদকারণা’’তি ৰুত্তে পুব্বযোগস্সাপি ৰিসদকারণত্তং লব্ভতেৰাতি আহ ‘‘দ্ৰেপি ৰিসদকারণাতি…পে॰… ৰুত্ত’’ন্তি।
Tehīti maggehi. Paṭilābho nāma pubbayogasampattiyā atthādivisayassa sammohassa samucchindanaṃ, taṃ pana maggakiccamevāti āha ‘‘so lokuttaro’’ti. Atthādīnaṃ pabhedato sallakkhaṇavibhāvanavavatthāpanā yathārahaṃ parittakusalamahākiriyacittavasena hotīti vuttaṃ ‘‘pabhedo kāmāvacaro’’ti. Yathā pubbayogo adhigamassa balavapaccayo sabhāvahetubhāvato, na tathā pabhedassa asabhāvahetutāya, paramparapaccayatāya cāti adhippāyo. Pariyattiādīnaṃ pabhedassa balavapaccayatāya , adhigamassa ca tadabhāve eseva nayo. Tatthāti nimittatthe bhummaṃ, tāsu pariyattisavanaparipucchāsu nimittabhūtāsūti attho. Yaṃ vuttaṃ hotīti ‘‘etesu panā’’tiādinā aṭṭhakathāvacanena yaṃ atthajātaṃ vuttaṃ hoti. Taṃ dassentoti taṃ niddhāretvā dassento. ‘‘Pubbayogādhigamā’’ti vatvā ‘‘dvepī’’ti vacanaṃ adhigamasahitoyeva pubbayogo pabhedassa balavapaccayo, na kevaloti dassanatthaṃ. Tena vuttaṃ aṭṭhakathāyaṃ ‘‘dvepi ekato hutvā’’ti (vibha. aṭṭha. 718). ‘‘Dvepi visadakāraṇā’’ti vutte pubbayogassāpi visadakāraṇattaṃ labbhatevāti āha ‘‘dvepi visadakāraṇāti…pe… vutta’’nti.
সঙ্গহৰারৰণ্ণনা নিট্ঠিতা।
Saṅgahavāravaṇṇanā niṭṭhitā.
২. সচ্চৰারাদিৰণ্ণনা
2. Saccavārādivaṇṇanā
৭১৯. কালত্তযেপীতি অতীতাদীসু তীসুপি কালেসু। হেতুফলধম্মা হেতূনং ফলভূতা ধম্মা, পচ্চযনিব্বত্তাতি অত্থো। তেসঞ্চ হেতুধম্মাতি তেসং হেতুফলানং পচ্চযনিব্বত্তানং হেতুভূতা ধম্মা ‘‘ধম্মা’’তি ৰুত্তাতি যোজনা। ৰিনেয্যৰসেনাতি তথাৰিনেতব্বপুগ্গলজ্ঝাসযৰসেন। উপ্পন্না সমুপ্পন্নাতিআদি ন ৰুত্তন্তি উপ্পন্না সমুপ্পন্না উট্ঠিতা সমুট্ঠিতা পচ্চুপ্পন্নাতিআদি ন ৰুত্তং একন্তপচ্চুপ্পন্নস্সেৰ সঙ্গাহকত্তা। তংনিব্বত্তকাতি তেসং অত্থভাৰেন ৰুত্তানং নিপ্ফাদকা। ধম্মাতি ৰুত্তা ধম্মভাৰেন কথিতা।
719. Kālattayepīti atītādīsu tīsupi kālesu. Hetuphaladhammā hetūnaṃ phalabhūtā dhammā, paccayanibbattāti attho. Tesañca hetudhammāti tesaṃ hetuphalānaṃ paccayanibbattānaṃ hetubhūtā dhammā ‘‘dhammā’’ti vuttāti yojanā. Vineyyavasenāti tathāvinetabbapuggalajjhāsayavasena. Uppannā samuppannātiādi na vuttanti uppannā samuppannā uṭṭhitā samuṭṭhitā paccuppannātiādi na vuttaṃ ekantapaccuppannasseva saṅgāhakattā. Taṃnibbattakāti tesaṃ atthabhāvena vuttānaṃ nipphādakā. Dhammāti vuttā dhammabhāvena kathitā.
সচ্চৰারাদিৰণ্ণনা নিট্ঠিতা।
Saccavārādivaṇṇanā niṭṭhitā.
সুত্তন্তভাজনীযৰণ্ণনা নিট্ঠিতা।
Suttantabhājanīyavaṇṇanā niṭṭhitā.
২. অভিধম্মভাজনীযৰণ্ণনা
2. Abhidhammabhājanīyavaṇṇanā
৭২৫. সামঞ্ঞেন ৰত্ৰা ৰিসেসেন অৰুত্তত্তাতি ‘‘তেসং ৰিপাকে’’তি যথাৰুত্তকুসলৰিপাকতাদিসামঞ্ঞেন ৰত্ৰা সহেতুকাহেতুকাদিৰিসেসেন অৰুত্তত্তা, সরূপেন নিদ্ধারেত্ৰা অৰুত্তত্তাতি অত্থো। অৰিপাকত্তাতি অৰিপাকধম্মত্তা। যদি এৰন্তি পচ্চযভাৰতো লব্ভমানোপি ধম্মভাৰো অৰিপাকধম্মতায কিরিযানং যদি ন ৰুত্তো, এৰং সতি। সতিপি পচ্চযুপ্পন্নভাৰে অৰিপাকভাৰতো অত্থভাৰোপি ন ৰত্তব্বো। তেনাহ ‘‘ৰিপাকা ন হোন্তীতি অত্থভাৰো চ ন ৰত্তব্বো’’তি। এৰঞ্চেতি যদি পচ্চযুপ্পন্নত্তা কিরিযানং অত্থভাৰো ৰুত্তো। নপ্পটিসিদ্ধো ইচ্ছিতোৰাতি অত্থো। যদি এৰং কস্মা ন ৰুত্তোতি আহ ‘‘ৰিপাকস্স পনা’’তিআদি। তেসন্তি কুসলাকুসলানং, ৰিপাককিরিযধম্মানঞ্চ। অত্থধম্মতাতি ৰুত্তনযেন লব্ভমানোপি যথাক্কমং অত্থভাৰো, ধম্মভাৰো চ ন ৰুত্তো। পচ্চযভাৰং সত্তিৰিসেসং সনিপ্ফাদেতব্বতন্তি পদত্তযেনাপি ৰিপাকধম্মতমেৰাহ। সা হি ৰিপাকানং হেতুভাৰতো পচ্চযভাৰো, তদুপ্পাদনসমত্থতায সত্তিৰিসেসো, তেহি সগব্ভা ৰিয হোতীতি ‘‘সনিপ্ফাদেতব্বতা’’তি চ ৰুচ্চতি। তং পস্সন্তী নিপ্ফাদকৰিসেসাপি নিপ্ফাদেতব্বাপেক্খা হোতি ধম্মপটিসম্ভিদা। তংসম্বন্ধেনাতি নিপ্ফাদেতব্বসম্বন্ধেন। ধম্মপটিসম্ভিদং ৰদন্তেন অত্থপটিসম্ভিদাপি ৰুত্তা।
725. Sāmaññenavatvā visesena avuttattāti ‘‘tesaṃ vipāke’’ti yathāvuttakusalavipākatādisāmaññena vatvā sahetukāhetukādivisesena avuttattā, sarūpena niddhāretvā avuttattāti attho. Avipākattāti avipākadhammattā. Yadi evanti paccayabhāvato labbhamānopi dhammabhāvo avipākadhammatāya kiriyānaṃ yadi na vutto, evaṃ sati. Satipi paccayuppannabhāve avipākabhāvato atthabhāvopi na vattabbo. Tenāha ‘‘vipākā na hontīti atthabhāvo ca na vattabbo’’ti. Evañceti yadi paccayuppannattā kiriyānaṃ atthabhāvo vutto. Nappaṭisiddho icchitovāti attho. Yadi evaṃ kasmā na vuttoti āha ‘‘vipākassa panā’’tiādi. Tesanti kusalākusalānaṃ, vipākakiriyadhammānañca. Atthadhammatāti vuttanayena labbhamānopi yathākkamaṃ atthabhāvo, dhammabhāvo ca na vutto. Paccayabhāvaṃ sattivisesaṃ sanipphādetabbatanti padattayenāpi vipākadhammatamevāha. Sā hi vipākānaṃ hetubhāvato paccayabhāvo, taduppādanasamatthatāya sattiviseso, tehi sagabbhā viya hotīti ‘‘sanipphādetabbatā’’ti ca vuccati. Taṃ passantī nipphādakavisesāpi nipphādetabbāpekkhā hoti dhammapaṭisambhidā. Taṃsambandhenāti nipphādetabbasambandhena. Dhammapaṭisambhidaṃ vadantena atthapaṭisambhidāpi vuttā.
সভাৰধম্মে পঞ্ঞত্তি সভাৰপঞ্ঞত্তীতি আহ ‘‘ন সত্তাদিপঞ্ঞত্তিযা’’তি। সভাৰেন, নিরুত্তিযেৰ ৰা সভাৰপঞ্ঞত্তীতি ৰুত্তাতি আহ ‘‘অৰিপরীতপঞ্ঞত্তিযা ৰা’’তি।
Sabhāvadhamme paññatti sabhāvapaññattīti āha ‘‘na sattādipaññattiyā’’ti. Sabhāvena, niruttiyeva vā sabhāvapaññattīti vuttāti āha ‘‘aviparītapaññattiyā vā’’ti.
৭৪৬. ৰোহারভূমিং, অধিগমভূমিঞ্চ একজ্ঝং কত্ৰা আহ ‘‘কামাৰচরা, লোকুত্তরা চ ভূমি ভূমী’’তি। চিত্তুপ্পাদা ৰা পৰত্তিট্ঠানভাৰতো ভূমি।
746. Vohārabhūmiṃ, adhigamabhūmiñca ekajjhaṃ katvā āha ‘‘kāmāvacarā, lokuttarā ca bhūmi bhūmī’’ti. Cittuppādā vā pavattiṭṭhānabhāvato bhūmi.
অভিধম্মভাজনীযৰণ্ণনা নিট্ঠিতা।
Abhidhammabhājanīyavaṇṇanā niṭṭhitā.
৩. পঞ্হপুচ্ছকৰণ্ণনা
3. Pañhapucchakavaṇṇanā
৭৪৭. সব্বঞাণারম্মণতাযাতি পটিসম্ভিদাপটিসম্ভিদাঞাণারম্মণতায। ‘‘সুত্তন্তভাজনীযে পন…পে॰… সিযা’’তি ইদং অভিধম্মভাজনীযেন ৰিরুজ্ঝতি, তস্স ৰা সাৰসেসদেসনতা আপজ্জতীতি চোদনং মনসি কত্ৰা আহ ‘‘অভিধম্মভাজনীযে’’তিআদি। নিরৰসেসকথনন্তি অসেসেত্ৰা কথনং। তেন চিত্তুপ্পাদসঙ্গহিতে অত্থে অসেসেত্ৰা দেসনা ইধ অভিধম্মভাজনীযস্স ভারো, ন সব্বঞেয্যধম্মেতি দস্সেতি। যথাদস্সিতৰিসযৰচনৰসেনাতি দস্সিতপ্পকারৰিসযস্স কথনৰসেন, ধম্মত্থৰসেন দস্সিতে তংতংচিত্তুপ্পাদে তত্থ ধম্মনিরুত্তাভিলাপেন ঞাণস্স কথনৰসেনাতি অত্থো। অঞ্ঞারম্মণতং ন পটিসেধেতি অতপ্পরভাৰতোতি অধিপ্পাযো। ন নিরৰসেসেন কথনং অচিত্তুপ্পাদপরিযাপন্নস্স ৰিসযস্স অকথিতত্তা। এৰং পটিভানপটিসম্ভিদাৰিসযস্সাপি ন নিরৰসেসেন কথনন্তি সুত্তন্তভাজনীযে অৰিসেসৰচনেন সব্বঞাণারম্মণতংযেৰ পটিভানপটিসম্ভিদায পতিট্ঠাপেতি। তথা তিস্সো পটিসম্ভিদাতিআদিপঞ্হপুচ্ছকপাল়িযাপি। তিস্সোতি অত্থধম্মপটিভানপটিসম্ভিদা। নিরুত্তিপটিসম্ভিদা হি ‘‘পরিত্তারম্মণা’’তেৰ ৰুত্তা।
747. Sabbañāṇārammaṇatāyāti paṭisambhidāpaṭisambhidāñāṇārammaṇatāya. ‘‘Suttantabhājanīye pana…pe… siyā’’ti idaṃ abhidhammabhājanīyena virujjhati, tassa vā sāvasesadesanatā āpajjatīti codanaṃ manasi katvā āha ‘‘abhidhammabhājanīye’’tiādi. Niravasesakathananti asesetvā kathanaṃ. Tena cittuppādasaṅgahite atthe asesetvā desanā idha abhidhammabhājanīyassa bhāro, na sabbañeyyadhammeti dasseti. Yathādassitavisayavacanavasenāti dassitappakāravisayassa kathanavasena, dhammatthavasena dassite taṃtaṃcittuppāde tattha dhammaniruttābhilāpena ñāṇassa kathanavasenāti attho. Aññārammaṇataṃ na paṭisedheti atapparabhāvatoti adhippāyo. Na niravasesena kathanaṃ acittuppādapariyāpannassa visayassa akathitattā. Evaṃ paṭibhānapaṭisambhidāvisayassāpi na niravasesena kathananti suttantabhājanīye avisesavacanena sabbañāṇārammaṇataṃyeva paṭibhānapaṭisambhidāya patiṭṭhāpeti. Tathā tisso paṭisambhidātiādipañhapucchakapāḷiyāpi. Tissoti atthadhammapaṭibhānapaṭisambhidā. Niruttipaṭisambhidā hi ‘‘parittārammaṇā’’teva vuttā.
যদিপি সিযা ন তস্সা মহগ্গতারম্মণতাতি সম্বন্ধো। ‘‘ন হি মগ্গো পচ্চযুপ্পন্নো ন হোতী’’তি ইমিনা ‘‘অত্থপটিসম্ভিদা ন মগ্গারম্মণা’’তি ৰচনস্স যথাৰুত্তত্থসাধকতং ৰিভাৰেতি। তস্সাতি পটিভানপটিসম্ভিদায ন মহগ্গতারম্মণতা সম্ভৰতি ননু নযং অনুস্সরন্তস্সাতি অধিপ্পাযো। দ্ৰেপীতি ‘‘অত্থপটিসম্ভিদা ন মগ্গারম্মণা, তিস্সো পটিসম্ভিদা সিযা পরিত্তারম্মণা, সিযা মহগ্গতারম্মণা, সিযা অপ্পমাণারম্মণা’’তি চ দ্ৰেপি এতা পাল়িযো। তাসু বলৰতরায ঠানস্স, ইতরায অধিপ্পাযমগ্গনস্স চ উপাযদস্সনমুখেন তাসং অঞ্ঞমঞ্ঞং অৰিরোধং দস্সেতুং ‘‘কুসলাকুসলানং পনা’’তিআদিমাহ। ‘‘নিপ্পরিযাযা তত্থ ধম্মপটিসম্ভিদা’’তি এতেন তত্থ অত্থপটিসম্ভিদায পরিযাযভাৰমাহ। তথা ৰিপাককিরিযানন্তিআদি যথাধিপ্পেতস্স অত্থস্স ৰিসদিসূদাহরণদস্সনং। উভযেনপি ‘‘অত্থপটিসম্ভিদা ন মগ্গারম্মণা’’তি (ৰিভ॰ ৭৪৯) ৰচনং সুত্তন্তনযানুগতং নিপ্পরিযাযত্থস্স তত্থ অধিপ্পেতত্তাতি দীপেতি। কিঞ্চি পন ঞাণন্তিআদি ‘‘তিস্সো পটিসম্ভিদা’’তিআদিপাল়িযা সমত্থকং। যথাধিপ্পেতস্স অত্থস্স পটিভানং দীপনং পটিভানং। তেনাহ ‘‘ঞেয্যপ্পকাসনতো’’তি। ইতি যা ‘‘তিস্সো পটিসম্ভিদা’’তি পাল়ি, তস্সা বলৰভাৰৰিভাৰনেন ইতরায অধিপ্পাযমগ্গনং কতন্তি ৰেদিতব্বং। নিপ্পরিযাযাতি পরিযাযরহিতা উজুকং সরূপেনেৰ পৰত্তা। নিপ্পরিযায…পে॰… পৰত্তিযন্তি একন্তিকঅত্থারম্মণং ঞাণং অত্থপটিসম্ভিদা, ঞাণারম্মণং পটিভানপটিসম্ভিদাতি গহেত্ৰা দেসনাযং।
Yadipi siyā na tassā mahaggatārammaṇatāti sambandho. ‘‘Na hi maggo paccayuppanno na hotī’’ti iminā ‘‘atthapaṭisambhidā na maggārammaṇā’’ti vacanassa yathāvuttatthasādhakataṃ vibhāveti. Tassāti paṭibhānapaṭisambhidāya na mahaggatārammaṇatā sambhavati nanu nayaṃ anussarantassāti adhippāyo. Dvepīti ‘‘atthapaṭisambhidā na maggārammaṇā, tisso paṭisambhidā siyā parittārammaṇā, siyā mahaggatārammaṇā, siyā appamāṇārammaṇā’’ti ca dvepi etā pāḷiyo. Tāsu balavatarāya ṭhānassa, itarāya adhippāyamagganassa ca upāyadassanamukhena tāsaṃ aññamaññaṃ avirodhaṃ dassetuṃ ‘‘kusalākusalānaṃ panā’’tiādimāha. ‘‘Nippariyāyā tattha dhammapaṭisambhidā’’ti etena tattha atthapaṭisambhidāya pariyāyabhāvamāha. Tathā vipākakiriyānantiādi yathādhippetassa atthassa visadisūdāharaṇadassanaṃ. Ubhayenapi ‘‘atthapaṭisambhidā na maggārammaṇā’’ti (vibha. 749) vacanaṃ suttantanayānugataṃ nippariyāyatthassa tattha adhippetattāti dīpeti. Kiñci pana ñāṇantiādi ‘‘tisso paṭisambhidā’’tiādipāḷiyā samatthakaṃ. Yathādhippetassa atthassa paṭibhānaṃ dīpanaṃ paṭibhānaṃ. Tenāha ‘‘ñeyyappakāsanato’’ti. Iti yā ‘‘tisso paṭisambhidā’’ti pāḷi, tassā balavabhāvavibhāvanena itarāya adhippāyamagganaṃ katanti veditabbaṃ. Nippariyāyāti pariyāyarahitā ujukaṃ sarūpeneva pavattā. Nippariyāya…pe… pavattiyanti ekantikaatthārammaṇaṃ ñāṇaṃ atthapaṭisambhidā, ñāṇārammaṇaṃ paṭibhānapaṭisambhidāti gahetvā desanāyaṃ.
সো এৰাতি পরস্স অভিলাপসদ্দো এৰ। অনুৰত্তমানতা চস্স নিরুত্তিপটিসম্ভিদা পচ্চুপ্পন্নমেৰ সদ্দং আরম্মণং করোন্তী, সদ্দং সুত্ৰা ‘‘অযং সভাৰনিরুত্তি, অযং ন সভাৰনিরুত্তী’’তি জানন্তীতি চ আদিৰচনৰসেন ৰেদিতব্বো।
So evāti parassa abhilāpasaddo eva. Anuvattamānatā cassa niruttipaṭisambhidā paccuppannameva saddaṃ ārammaṇaṃ karontī, saddaṃ sutvā ‘‘ayaṃ sabhāvanirutti, ayaṃ na sabhāvaniruttī’’ti jānantīti ca ādivacanavasena veditabbo.
পঞ্হপুচ্ছকৰণ্ণনা নিট্ঠিতা।
Pañhapucchakavaṇṇanā niṭṭhitā.
পটিসম্ভিদাৰিভঙ্গৰণ্ণনা নিট্ঠিতা।
Paṭisambhidāvibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৫. পটিসম্ভিদাৰিভঙ্গো • 15. Paṭisambhidāvibhaṅgo
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / সম্মোহৰিনোদনী-অট্ঠকথা • Sammohavinodanī-aṭṭhakathā
১. সুত্তন্তভাজনীযং • 1. Suttantabhājanīyaṃ
২. অভিধম্মভাজনীযৰণ্ণনা • 2. Abhidhammabhājanīyavaṇṇanā
৩. পঞ্হাপুচ্ছকৰণ্ণনা • 3. Pañhāpucchakavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৫. পটিসম্ভিদাৰিভঙ্গো • 15. Paṭisambhidāvibhaṅgo
