| Library / Tipiṭaka / තිපිටක • Tipiṭaka / විභඞ්‌ගපාළි • Vibhaṅgapāḷi |
15. පටිසම්‌භිදාවිභඞ්‌ගො
15. Paṭisambhidāvibhaṅgo
1. සුත්‌තන්‌තභාජනීයං
1. Suttantabhājanīyaṃ
1. සඞ්‌ගහවාරො
1. Saṅgahavāro
718. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා 1. අත්‌ථෙ ඤාණං අත්‌ථපටිසම්‌භිදා, ධම්‌මෙ ඤාණං ධම්‌මපටිසම්‌භිදා, තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා, ඤාණෙසු ඤාණං පටිභානපටිසම්‌භිදා. අයං සඞ්‌ගහවාරො.
718. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā 2. Atthe ñāṇaṃ atthapaṭisambhidā, dhamme ñāṇaṃ dhammapaṭisambhidā, tatra dhammaniruttābhilāpe ñāṇaṃ niruttipaṭisambhidā, ñāṇesu ñāṇaṃ paṭibhānapaṭisambhidā. Ayaṃ saṅgahavāro.
2. සච්‌චවාරො
2. Saccavāro
719. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා. දුක්‌ඛෙ ඤාණං අත්‌ථපටිසම්‌භිදා, දුක්‌ඛසමුදයෙ ඤාණං ධම්‌මපටිසම්‌භිදා, දුක්‌ඛනිරොධෙ ඤාණං අත්‌ථපටිසම්‌භිදා , දුක්‌ඛනිරොධගාමිනියා පටිපදාය ඤාණං ධම්‌මපටිසම්‌භිදා, තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා, ඤාණෙසු ඤාණං පටිභානපටිසම්‌භිදා. අයං සච්‌චවාරො.
719. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā. Dukkhe ñāṇaṃ atthapaṭisambhidā, dukkhasamudaye ñāṇaṃ dhammapaṭisambhidā, dukkhanirodhe ñāṇaṃ atthapaṭisambhidā , dukkhanirodhagāminiyā paṭipadāya ñāṇaṃ dhammapaṭisambhidā, tatra dhammaniruttābhilāpe ñāṇaṃ niruttipaṭisambhidā, ñāṇesu ñāṇaṃ paṭibhānapaṭisambhidā. Ayaṃ saccavāro.
3. හෙතුවාරො
3. Hetuvāro
720. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා නිරුත්‌තිපටිසම්‌භිදා, පටිභානපටිසම්‌භිදා. හෙතුම්‌හි ඤාණං ධම්‌මපටිසම්‌භිදා, හෙතුඵලෙ ඤාණං අත්‌ථපටිසම්‌භිදා, තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා, ඤාණෙසු ඤාණං පටිභානපටිසම්‌භිදා. අයං හෙතුවාරො.
720. Catasso paṭisambhidā – atthapaṭisambhidā, dhammapaṭisambhidā niruttipaṭisambhidā, paṭibhānapaṭisambhidā. Hetumhi ñāṇaṃ dhammapaṭisambhidā, hetuphale ñāṇaṃ atthapaṭisambhidā, tatra dhammaniruttābhilāpe ñāṇaṃ niruttipaṭisambhidā, ñāṇesu ñāṇaṃ paṭibhānapaṭisambhidā. Ayaṃ hetuvāro.
4. ධම්‌මවාරො
4. Dhammavāro
721. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා. යෙ ධම්‌මා ජාතා භූතා සඤ්‌ජාතා නිබ්‌බත්‌තා අභිනිබ්‌බත්‌තා පාතුභූතා, ඉමෙසු ධම්‌මෙසු ඤාණං අත්‌ථපටිසම්‌භිදා; යම්‌හා ධම්‌මා තෙ ධම්‌මා ජාතා භූතා සඤ්‌ජාතා නිබ්‌බත්‌තා අභිනිබ්‌බත්‌තා පාතුභූතා, තෙසු ධම්‌මෙසු ඤාණං ධම්‌මපටිසම්‌භිදා; තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා; ඤාණෙසු ඤාණං පටිභානපටිසම්‌භිදා. අයං ධම්‌මවාරො.
721. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā. Ye dhammā jātā bhūtā sañjātā nibbattā abhinibbattā pātubhūtā, imesu dhammesu ñāṇaṃ atthapaṭisambhidā; yamhā dhammā te dhammā jātā bhūtā sañjātā nibbattā abhinibbattā pātubhūtā, tesu dhammesu ñāṇaṃ dhammapaṭisambhidā; tatra dhammaniruttābhilāpe ñāṇaṃ niruttipaṭisambhidā; ñāṇesu ñāṇaṃ paṭibhānapaṭisambhidā. Ayaṃ dhammavāro.
5. පටිච්‌චසමුප්‌පාදවාරො
5. Paṭiccasamuppādavāro
722. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා. ජරාමරණෙ ඤාණං අත්‌ථපටිසම්‌භිදා, ජරාමරණසමුදයෙ ඤාණං ධම්‌මපටිසම්‌භිදා, ජරාමරණනිරොධෙ ඤාණං අත්‌ථපටිසම්‌භිදා, ජරාමරණනිරොධගාමිනියා පටිපදාය ඤාණං ධම්‌මපටිසම්‌භිදා, තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා, ඤාණෙසු ඤාණං පටිභානපටිසම්‌භිදා.
722. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā. Jarāmaraṇe ñāṇaṃ atthapaṭisambhidā, jarāmaraṇasamudaye ñāṇaṃ dhammapaṭisambhidā, jarāmaraṇanirodhe ñāṇaṃ atthapaṭisambhidā, jarāmaraṇanirodhagāminiyā paṭipadāya ñāṇaṃ dhammapaṭisambhidā, tatra dhammaniruttābhilāpe ñāṇaṃ niruttipaṭisambhidā, ñāṇesu ñāṇaṃ paṭibhānapaṭisambhidā.
723. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා. ජාතියා ඤාණං…පෙ.… භවෙ ඤාණං…පෙ.… උපාදානෙ ඤාණං…පෙ.… තණ්‌හාය ඤාණං…පෙ.… වෙදනාය ඤාණං…පෙ.… ඵස්‌සෙ ඤාණං…පෙ.… සළායතනෙ ඤාණං…පෙ.… නාමරූපෙ ඤාණං…පෙ.… විඤ්‌ඤාණෙ ඤාණං…පෙ.… සඞ්‌ඛාරෙසු ඤාණං අත්‌ථපටිසම්‌භිදා, සඞ්‌ඛාරසමුදයෙ ඤාණං ධම්‌මපටිසම්‌භිදා, සඞ්‌ඛාරනිරොධෙ ඤාණං අත්‌ථපටිසම්‌භිදා, සඞ්‌ඛාරනිරොධගාමිනියා පටිපදාය ඤාණං ධම්‌මපටිසම්‌භිදා, තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා, ඤාණෙසු ඤාණං පටිභානපටිසම්‌භිදා. අයං පටිච්‌චසමුප්‌පාදවාරො.
723. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā. Jātiyā ñāṇaṃ…pe… bhave ñāṇaṃ…pe… upādāne ñāṇaṃ…pe… taṇhāya ñāṇaṃ…pe… vedanāya ñāṇaṃ…pe… phasse ñāṇaṃ…pe… saḷāyatane ñāṇaṃ…pe… nāmarūpe ñāṇaṃ…pe… viññāṇe ñāṇaṃ…pe… saṅkhāresu ñāṇaṃ atthapaṭisambhidā, saṅkhārasamudaye ñāṇaṃ dhammapaṭisambhidā, saṅkhāranirodhe ñāṇaṃ atthapaṭisambhidā, saṅkhāranirodhagāminiyā paṭipadāya ñāṇaṃ dhammapaṭisambhidā, tatra dhammaniruttābhilāpe ñāṇaṃ niruttipaṭisambhidā, ñāṇesu ñāṇaṃ paṭibhānapaṭisambhidā. Ayaṃ paṭiccasamuppādavāro.
6. පරියත්‌තිවාරො
6. Pariyattivāro
724. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
724. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā.
තත්‌ථ කතමා ධම්‌මපටිසම්‌භිදා? ඉධ භික්‌ඛු ධම්‌මං ජානාති – සුත්‌තං ගෙය්‍යං වෙය්‍යාකරණං ගාථං උදානං ඉතිවුත්‌තකං ජාතකං අබ්‌භුතධම්‌මං වෙදල්‌ලං. අයං වුච්‌චති ‘‘ධම්‌මපටිසම්‌භිදා’’. සො තස්‌ස තස්‌සෙව භාසිතස්‌ස අත්‌ථං ජානාති – ‘‘අයං ඉමස්‌ස භාසිතස්‌ස අත්‌ථො, අයං ඉමස්‌ස භාසිතස්‌ස අත්‌ථො’’ති. අයං වුච්‌චති ‘‘අත්‌ථපටිසම්‌භිදා’’. තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. ඤාණෙසු ඤාණං පටිභානපටිසම්‌භිදා. අයං පරියත්‌තිවාරො.
Tattha katamā dhammapaṭisambhidā? Idha bhikkhu dhammaṃ jānāti – suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. Ayaṃ vuccati ‘‘dhammapaṭisambhidā’’. So tassa tasseva bhāsitassa atthaṃ jānāti – ‘‘ayaṃ imassa bhāsitassa attho, ayaṃ imassa bhāsitassa attho’’ti. Ayaṃ vuccati ‘‘atthapaṭisambhidā’’. Tatra dhammaniruttābhilāpe ñāṇaṃ niruttipaṭisambhidā. Ñāṇesu ñāṇaṃ paṭibhānapaṭisambhidā. Ayaṃ pariyattivāro.
සුත්‌තන්‌තභාජනීයං.
Suttantabhājanīyaṃ.
2. අභිධම්‌මභාජනීයං
2. Abhidhammabhājanīyaṃ
1. කුසලවාරො
1. Kusalavāro
725. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
725. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා කුසලා? යස්‌මිං සමයෙ කාමාවචරං කුසලං චිත්‌තං උප්‌පන්‌නං හොති සොමනස්‌සසහගතං ඤාණසම්‌පයුත්‌තං රූපාරම්‌මණං වා…පෙ.… ධම්‌මාරම්‌මණං වා යං යං වා පනාරබ්‌භ , තස්‌මිං සමයෙ ඵස්‌සො හොති…පෙ.… අවික්‌ඛෙපො හොති, ඉමෙ ධම්‌මා කුසලා. ඉමෙසු ධම්‌මෙසු ඤාණං ධම්‌මපටිසම්‌භිදා. තෙසං විපාකෙ ඤාණං අත්‌ථපටිසම්‌භිදා, යාය නිරුත්‌තියා තෙසං ධම්‌මානං පඤ්‌ඤත්‌ති හොති, තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā kusalā? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ rūpārammaṇaṃ vā…pe… dhammārammaṇaṃ vā yaṃ yaṃ vā panārabbha , tasmiṃ samaye phasso hoti…pe… avikkhepo hoti, ime dhammā kusalā. Imesu dhammesu ñāṇaṃ dhammapaṭisambhidā. Tesaṃ vipāke ñāṇaṃ atthapaṭisambhidā, yāya niruttiyā tesaṃ dhammānaṃ paññatti hoti, tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
726. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
726. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා කුසලා? යස්‌මිං සමයෙ කාමාවචරං කුසලං චිත්‌තං උප්‌පන්‌නං හොති සොමනස්‌සසහගතං ඤාණසම්‌පයුත්‌තං සසඞ්‌ඛාරෙන…පෙ.… සොමනස්‌සසහගතං ඤාණවිප්‌පයුත්‌තං…පෙ.… සොමනස්‌සසහගතං ඤාණවිප්‌පයුත්‌තං සසඞ්‌ඛාරෙන…පෙ.… උපෙක්‌ඛාසහගතං ඤාණසම්‌පයුත්‌තං…පෙ.… උපෙක්‌ඛාසහගතං ඤාණසම්‌පයුත්‌තං සසඞ්‌ඛාරෙන…පෙ.… උපෙක්‌ඛාසහගතං ඤාණවිප්‌පයුත්‌තං…පෙ.… උපෙක්‌ඛාසහගතං ඤාණවිප්‌පයුත්‌තං සසඞ්‌ඛාරෙන රූපාරම්‌මණං වා…පෙ.… ධම්‌මාරම්‌මණං වා යං යං වා පනාරබ්‌භ, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා කුසලා. ඉමෙසු ධම්‌මෙසු ඤාණං ධම්‌මපටිසම්‌භිදා. තෙසං විපාකෙ ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā kusalā? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ sasaṅkhārena…pe… somanassasahagataṃ ñāṇavippayuttaṃ…pe… somanassasahagataṃ ñāṇavippayuttaṃ sasaṅkhārena…pe… upekkhāsahagataṃ ñāṇasampayuttaṃ…pe… upekkhāsahagataṃ ñāṇasampayuttaṃ sasaṅkhārena…pe… upekkhāsahagataṃ ñāṇavippayuttaṃ…pe… upekkhāsahagataṃ ñāṇavippayuttaṃ sasaṅkhārena rūpārammaṇaṃ vā…pe… dhammārammaṇaṃ vā yaṃ yaṃ vā panārabbha, tasmiṃ samaye phasso hoti…pe… avikkhepo hoti. Ime dhammā kusalā. Imesu dhammesu ñāṇaṃ dhammapaṭisambhidā. Tesaṃ vipāke ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
727. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
727. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා කුසලා? යස්‌මිං සමයෙ රූපූපපත්‌තියා මග්‌ගං භාවෙති විවිච්‌චෙව කාමෙහි…පෙ.… පඨමං ඣානං උපසම්‌පජ්‌ජ විහරති පථවීකසිණං, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා කුසලා. ඉමෙසු ධම්‌මෙසු ඤාණං ධම්‌මපටිසම්‌භිදා. තෙසං විපාකෙ ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā kusalā? Yasmiṃ samaye rūpūpapattiyā maggaṃ bhāveti vivicceva kāmehi…pe… paṭhamaṃ jhānaṃ upasampajja viharati pathavīkasiṇaṃ, tasmiṃ samaye phasso hoti…pe… avikkhepo hoti. Ime dhammā kusalā. Imesu dhammesu ñāṇaṃ dhammapaṭisambhidā. Tesaṃ vipāke ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
728. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
728. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා කුසලා? යස්‌මිං සමයෙ අරූපූපපත්‌තියා මග්‌ගං භාවෙති සබ්‌බසො ආකිඤ්‌චඤ්‌ඤායතනං සමතික්‌කම්‌ම නෙවසඤ්‌ඤානාසඤ්‌ඤායතනසඤ්‌ඤාසහගතං සුඛස්‌ස ච පහානා…පෙ.… චතුත්‌ථං ඣානං උපසම්‌පජ්‌ජ විහරති, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා කුසලා. ඉමෙසු ධම්‌මෙසු ඤාණං ධම්‌මපටිසම්‌භිදා. තෙසං විපාකෙ ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā kusalā? Yasmiṃ samaye arūpūpapattiyā maggaṃ bhāveti sabbaso ākiñcaññāyatanaṃ samatikkamma nevasaññānāsaññāyatanasaññāsahagataṃ sukhassa ca pahānā…pe… catutthaṃ jhānaṃ upasampajja viharati, tasmiṃ samaye phasso hoti…pe… avikkhepo hoti. Ime dhammā kusalā. Imesu dhammesu ñāṇaṃ dhammapaṭisambhidā. Tesaṃ vipāke ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
729. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
729. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා කුසලා? යස්‌මිං සමයෙ ලොකුත්‌තරං ඣානං භාවෙති නිය්‍යානිකං අපචයගාමිං දිට්‌ඨිගතානං පහානාය පඨමාය භූමියා පත්‌තියා විවිච්‌චෙව කාමෙහි…පෙ.… පඨමං ඣානං උපසම්‌පජ්‌ජ විහරති දුක්‌ඛපටිපදං දන්‌ධාභිඤ්‌ඤං, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා කුසලා. ඉමෙසු ධම්‌මෙසු ඤාණං ධම්‌මපටිසම්‌භිදා. තෙසං විපාකෙ ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā kusalā? Yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye phasso hoti…pe… avikkhepo hoti. Ime dhammā kusalā. Imesu dhammesu ñāṇaṃ dhammapaṭisambhidā. Tesaṃ vipāke ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
2. අකුසලවාරො
2. Akusalavāro
730. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
730. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අකුසලා? යස්‌මිං සමයෙ අකුසලං චිත්‌තං උප්‌පන්‌නං හොති සොමනස්‌සසහගතං දිට්‌ඨිගතසම්‌පයුත්‌තං රූපාරම්‌මණං වා…පෙ.… ධම්‌මාරම්‌මණං වා යං යං වා පනාරබ්‌භ, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා අකුසලා. ඉමෙසු ධම්‌මෙසු ඤාණං ධම්‌මපටිසම්‌භිදා. තෙසං විපාකෙ ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā akusalā? Yasmiṃ samaye akusalaṃ cittaṃ uppannaṃ hoti somanassasahagataṃ diṭṭhigatasampayuttaṃ rūpārammaṇaṃ vā…pe… dhammārammaṇaṃ vā yaṃ yaṃ vā panārabbha, tasmiṃ samaye phasso hoti…pe… avikkhepo hoti. Ime dhammā akusalā. Imesu dhammesu ñāṇaṃ dhammapaṭisambhidā. Tesaṃ vipāke ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
731. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
731. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අකුසලා? යස්‌මිං සමයෙ අකුසලං චිත්‌තං උප්‌පන්‌නං හොති සොමනස්‌සසහගතං දිට්‌ඨිගතසම්‌පයුත්‌තං සසඞ්‌ඛාරෙන…පෙ.… සොමනස්‌සසහගතං දිට්‌ඨිගතවිප්‌පයුත්‌තං…පෙ.… සොමනස්‌සසහගතං දිට්‌ඨිගතවිප්‌පයුත්‌තං සසඞ්‌ඛාරෙන…පෙ.… උපෙක්‌ඛාසහගතං දිට්‌ඨිගතසම්‌පයුත්‌තං…පෙ.… උපෙක්‌ඛාසහගතං දිට්‌ඨිගතසම්‌පයුත්‌තං සසඞ්‌ඛාරෙන…පෙ.… උපෙක්‌ඛාසහගතං දිට්‌ඨිගතවිප්‌පයුත්‌තං…පෙ.… උපෙක්‌ඛාසහගතං දිට්‌ඨිගතවිප්‌පයුත්‌තං සසඞ්‌ඛාරෙන…පෙ.… දොමනස්‌සසහගතං පටිඝසම්‌පයුත්‌තං…පෙ.… දොමනස්‌සසහගතං පටිඝසම්‌පයුත්‌තං සසඞ්‌ඛාරෙන…පෙ.… උපෙක්‌ඛාසහගතං විචිකිච්‌ඡාසම්‌පයුත්‌තං…පෙ.… උපෙක්‌ඛාසහගතං උද්‌ධච්‌චසම්‌පයුත්‌තං රූපාරම්‌මණං වා…පෙ.… ධම්‌මාරම්‌මණං වා යං යං වා පනාරබ්‌භ, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා අකුසලා. ඉමෙසු ධම්‌මෙසු ඤාණං ධම්‌මපටිසම්‌භිදා. තෙසං විපාකෙ ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā akusalā? Yasmiṃ samaye akusalaṃ cittaṃ uppannaṃ hoti somanassasahagataṃ diṭṭhigatasampayuttaṃ sasaṅkhārena…pe… somanassasahagataṃ diṭṭhigatavippayuttaṃ…pe… somanassasahagataṃ diṭṭhigatavippayuttaṃ sasaṅkhārena…pe… upekkhāsahagataṃ diṭṭhigatasampayuttaṃ…pe… upekkhāsahagataṃ diṭṭhigatasampayuttaṃ sasaṅkhārena…pe… upekkhāsahagataṃ diṭṭhigatavippayuttaṃ…pe… upekkhāsahagataṃ diṭṭhigatavippayuttaṃ sasaṅkhārena…pe… domanassasahagataṃ paṭighasampayuttaṃ…pe… domanassasahagataṃ paṭighasampayuttaṃ sasaṅkhārena…pe… upekkhāsahagataṃ vicikicchāsampayuttaṃ…pe… upekkhāsahagataṃ uddhaccasampayuttaṃ rūpārammaṇaṃ vā…pe… dhammārammaṇaṃ vā yaṃ yaṃ vā panārabbha, tasmiṃ samaye phasso hoti…pe… avikkhepo hoti. Ime dhammā akusalā. Imesu dhammesu ñāṇaṃ dhammapaṭisambhidā. Tesaṃ vipāke ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
3. විපාකවාරො
3. Vipākavāro
732. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා .
732. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā .
කතමෙ ධම්‌මා අබ්‍යාකතා? යස්‌මිං සමයෙ කාමාවචරස්‌ස කුසලස්‌ස කම්‌මස්‌ස කතත්‌තා උපචිතත්‌තා විපාකං චක්‌ඛුවිඤ්‌ඤාණං උප්‌පන්‌නං හොති උපෙක්‌ඛාසහගතං රූපාරම්‌මණං, තස්‌මිං සමයෙ ඵස්‌සො හොති, වෙදනා හොති, සඤ්‌ඤා හොති, චෙතනා හොති, චිත්‌තං හොති, උපෙක්‌ඛා හොති, චිත්‌තස්‌සෙකග්‌ගතා හොති, මනින්‌ද්‍රියං හොති, උපෙක්‌ඛින්‌ද්‍රියං හොති, ජීවිතින්‌ද්‍රියං හොති, යෙ වා පන තස්‌මිං සමයෙ අඤ්‌ඤෙපි අත්‌ථි පටිච්‌චසමුප්‌පන්‌නා අරූපිනො ධම්‌මා. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye kāmāvacarassa kusalassa kammassa katattā upacitattā vipākaṃ cakkhuviññāṇaṃ uppannaṃ hoti upekkhāsahagataṃ rūpārammaṇaṃ, tasmiṃ samaye phasso hoti, vedanā hoti, saññā hoti, cetanā hoti, cittaṃ hoti, upekkhā hoti, cittassekaggatā hoti, manindriyaṃ hoti, upekkhindriyaṃ hoti, jīvitindriyaṃ hoti, ye vā pana tasmiṃ samaye aññepi atthi paṭiccasamuppannā arūpino dhammā. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
733. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
733. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ කාමාවචරස්‌ස කුසලස්‌ස කම්‌මස්‌ස කතත්‌තා උපචිතත්‌තා විපාකං සොතවිඤ්‌ඤාණං උප්‌පන්‌නං හොති උපෙක්‌ඛාසහගතං සද්‌දාරම්‌මණං…පෙ.… ඝානවිඤ්‌ඤාණං උප්‌පන්‌නං හොති උපෙක්‌ඛාසහගතං ගන්‌ධාරම්‌මණං…පෙ.… ජිව්‌හාවිඤ්‌ඤාණං උප්‌පන්‌නං හොති උපෙක්‌ඛාසහගතං රසාරම්‌මණං…පෙ.… කායවිඤ්‌ඤාණං උප්‌පන්‌නං හොති සුඛසහගතං ඵොට්‌ඨබ්‌බාරම්‌මණං, තස්‌මිං සමයෙ ඵස්‌සො හොති, වෙදනා හොති, සඤ්‌ඤා හොති, චෙතනා හොති, චිත්‌තං හොති, සුඛං හොති, චිත්‌තස්‌සෙකග්‌ගතා හොති, මනින්‌ද්‍රියං හොති, සුඛින්‌ද්‍රියං හොති, ජීවිතින්‌ද්‍රියං හොති , යෙ වා පන තස්‌මිං සමයෙ අඤ්‌ඤෙපි අත්‌ථි පටිච්‌චසමුප්‌පන්‌නා අරූපිනො ධම්‌මා. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye kāmāvacarassa kusalassa kammassa katattā upacitattā vipākaṃ sotaviññāṇaṃ uppannaṃ hoti upekkhāsahagataṃ saddārammaṇaṃ…pe… ghānaviññāṇaṃ uppannaṃ hoti upekkhāsahagataṃ gandhārammaṇaṃ…pe… jivhāviññāṇaṃ uppannaṃ hoti upekkhāsahagataṃ rasārammaṇaṃ…pe… kāyaviññāṇaṃ uppannaṃ hoti sukhasahagataṃ phoṭṭhabbārammaṇaṃ, tasmiṃ samaye phasso hoti, vedanā hoti, saññā hoti, cetanā hoti, cittaṃ hoti, sukhaṃ hoti, cittassekaggatā hoti, manindriyaṃ hoti, sukhindriyaṃ hoti, jīvitindriyaṃ hoti , ye vā pana tasmiṃ samaye aññepi atthi paṭiccasamuppannā arūpino dhammā. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
734. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා. කතමෙ ධම්‌මා අබ්‍යාකතා? යස්‌මිං සමයෙ කාමාවචරස්‌ස කුසලස්‌ස කම්‌මස්‌ස කතත්‌තා උපචිතත්‌තා විපාකා මනොධාතු උප්‌පන්‌නා හොති උපෙක්‌ඛාසහගතා රූපාරම්‌මණා වා…පෙ.… ඵොට්‌ඨබ්‌බාරම්‌මණා වා යං යං වා පනාරබ්‌භ, තස්‌මිං සමයෙ ඵස්‌සො හොති, වෙදනා හොති, සඤ්‌ඤා හොති, චෙතනා හොති, චිත්‌තං හොති, විතක්‌කො හොති, විචාරො හොති, උපෙක්‌ඛා හොති , චිත්‌තස්‌සෙකග්‌ගතා හොති, මනින්‌ද්‍රියං හොති, උපෙක්‌ඛින්‌ද්‍රියං හොති, ජීවිතින්‌ද්‍රියං හොති, යෙ වා පන තස්‌මිං සමයෙ අඤ්‌ඤෙපි අත්‌ථි පටිච්‌චසමුප්‌පන්‌නා අරූපිනො ධම්‌මා. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
734. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā. Katame dhammā abyākatā? Yasmiṃ samaye kāmāvacarassa kusalassa kammassa katattā upacitattā vipākā manodhātu uppannā hoti upekkhāsahagatā rūpārammaṇā vā…pe… phoṭṭhabbārammaṇā vā yaṃ yaṃ vā panārabbha, tasmiṃ samaye phasso hoti, vedanā hoti, saññā hoti, cetanā hoti, cittaṃ hoti, vitakko hoti, vicāro hoti, upekkhā hoti , cittassekaggatā hoti, manindriyaṃ hoti, upekkhindriyaṃ hoti, jīvitindriyaṃ hoti, ye vā pana tasmiṃ samaye aññepi atthi paṭiccasamuppannā arūpino dhammā. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
735. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
735. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ කාමාවචරස්‌ස කුසලස්‌ස කම්‌මස්‌ස කතත්‌තා උපචිතත්‌තා විපාකා මනොවිඤ්‌ඤාණධාතු උප්‌පන්‌නා හොති සොමනස්‌සසහගතා රූපාරම්‌මණා වා…පෙ.… ධම්‌මාරම්‌මණා වා යං යං වා පනාරබ්‌භ, තස්‌මිං සමයෙ ඵස්‌සො හොති, වෙදනා හොති, සඤ්‌ඤා හොති, චෙතනා හොති, චිත්‌තං හොති, විතක්‌කො හොති, විචාරො හොති, පීති හොති, සුඛං හොති, චිත්‌තස්‌සෙකග්‌ගතා හොති, මනින්‌ද්‍රියං හොති, සොමනස්‌සින්‌ද්‍රියං හොති, ජීවිතින්‌ද්‍රියං හොති, යෙ වා පන තස්‌මිං සමයෙ අඤ්‌ඤෙපි අත්‌ථි පටිච්‌චසමුප්‌පන්‌නා අරූපිනො ධම්‌මා . ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye kāmāvacarassa kusalassa kammassa katattā upacitattā vipākā manoviññāṇadhātu uppannā hoti somanassasahagatā rūpārammaṇā vā…pe… dhammārammaṇā vā yaṃ yaṃ vā panārabbha, tasmiṃ samaye phasso hoti, vedanā hoti, saññā hoti, cetanā hoti, cittaṃ hoti, vitakko hoti, vicāro hoti, pīti hoti, sukhaṃ hoti, cittassekaggatā hoti, manindriyaṃ hoti, somanassindriyaṃ hoti, jīvitindriyaṃ hoti, ye vā pana tasmiṃ samaye aññepi atthi paṭiccasamuppannā arūpino dhammā . Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
736. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
736. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ කාමාවචරස්‌ස කුසලස්‌ස කම්‌මස්‌ස කතත්‌තා උපචිතත්‌තා විපාකා මනොවිඤ්‌ඤාණධාතු උප්‌පන්‌නා හොති උපෙක්‌ඛාසහගතා රූපාරම්‌මණා වා…පෙ.… ධම්‌මාරම්‌මණා වා යං යං වා පනාරබ්‌භ, තස්‌මිං සමයෙ ඵස්‌සො හොති, වෙදනා හොති, සඤ්‌ඤා හොති, චෙතනා හොති, චිත්‌තං හොති, විතක්‌කො හොති, විචාරො හොති, උපෙක්‌ඛා හොති, චිත්‌තස්‌සෙකග්‌ගතා හොති, මනින්‌ද්‍රියං හොති, උපෙක්‌ඛින්‌ද්‍රියං හොති, ජීවිතින්‌ද්‍රියං හොති, යෙ වා පන තස්‌මිං සමයෙ අඤ්‌ඤෙපි අත්‌ථි පටිච්‌චසමුප්‌පන්‌නා අරූපිනො ධම්‌මා. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye kāmāvacarassa kusalassa kammassa katattā upacitattā vipākā manoviññāṇadhātu uppannā hoti upekkhāsahagatā rūpārammaṇā vā…pe… dhammārammaṇā vā yaṃ yaṃ vā panārabbha, tasmiṃ samaye phasso hoti, vedanā hoti, saññā hoti, cetanā hoti, cittaṃ hoti, vitakko hoti, vicāro hoti, upekkhā hoti, cittassekaggatā hoti, manindriyaṃ hoti, upekkhindriyaṃ hoti, jīvitindriyaṃ hoti, ye vā pana tasmiṃ samaye aññepi atthi paṭiccasamuppannā arūpino dhammā. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
737. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
737. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ කාමාවචරස්‌ස කුසලස්‌ස කම්‌මස්‌ස කතත්‌තා උපචිතත්‌තා විපාකා මනොවිඤ්‌ඤාණධාතු උප්‌පන්‌නා හොති සොමනස්‌සසහගතා ඤාණසම්‌පයුත්‌තා…පෙ.… සොමනස්‌සසහගතා ඤාණසම්‌පයුත්‌තා සසඞ්‌ඛාරෙන…පෙ.… සොමනස්‌සසහගතා ඤාණවිප්‌පයුත්‌තා…පෙ.… සොමනස්‌සසහගතා ඤාණවිප්‌පයුත්‌තා සසඞ්‌ඛාරෙන…පෙ.… උපෙක්‌ඛාසහගතා ඤාණසම්‌පයුත්‌තා…පෙ.… උපෙක්‌ඛාසහගතා ඤාණසම්‌පයුත්‌තා සසඞ්‌ඛාරෙන…පෙ.… උපෙක්‌ඛාසහගතා ඤාණවිප්‌පයුත්‌තා…පෙ.… උපෙක්‌ඛාසහගතා ඤාණවිප්‌පයුත්‌තා සසඞ්‌ඛාරෙන රූපාරම්‌මණා වා…පෙ.… ධම්‌මාරම්‌මණා වා යං යං වා පනාරබ්‌භ, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye kāmāvacarassa kusalassa kammassa katattā upacitattā vipākā manoviññāṇadhātu uppannā hoti somanassasahagatā ñāṇasampayuttā…pe… somanassasahagatā ñāṇasampayuttā sasaṅkhārena…pe… somanassasahagatā ñāṇavippayuttā…pe… somanassasahagatā ñāṇavippayuttā sasaṅkhārena…pe… upekkhāsahagatā ñāṇasampayuttā…pe… upekkhāsahagatā ñāṇasampayuttā sasaṅkhārena…pe… upekkhāsahagatā ñāṇavippayuttā…pe… upekkhāsahagatā ñāṇavippayuttā sasaṅkhārena rūpārammaṇā vā…pe… dhammārammaṇā vā yaṃ yaṃ vā panārabbha, tasmiṃ samaye phasso hoti…pe… avikkhepo hoti. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
738. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
738. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ රූපූපපත්‌තියා මග්‌ගං භාවෙති විවිච්‌චෙව කාමෙහි…පෙ.… පඨමං ඣානං උපසම්‌පජ්‌ජ විහරති පථවීකසිණං, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා කුසලා . තස්‌සෙව රූපාවචරස්‌ස කුසලස්‌ස කම්‌මස්‌ස කතත්‌තා උපචිතත්‌තා විපාකං විවිච්‌චෙව කාමෙහි…පෙ.… පඨමං ඣානං උපසම්‌පජ්‌ජ විහරති පථවීකසිණං, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye rūpūpapattiyā maggaṃ bhāveti vivicceva kāmehi…pe… paṭhamaṃ jhānaṃ upasampajja viharati pathavīkasiṇaṃ, tasmiṃ samaye phasso hoti…pe… avikkhepo hoti. Ime dhammā kusalā . Tasseva rūpāvacarassa kusalassa kammassa katattā upacitattā vipākaṃ vivicceva kāmehi…pe… paṭhamaṃ jhānaṃ upasampajja viharati pathavīkasiṇaṃ, tasmiṃ samaye phasso hoti…pe… avikkhepo hoti. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
739. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
739. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ අරූපූපපත්‌තියා මග්‌ගං භාවෙති සබ්‌බසො ආකිඤ්‌චඤ්‌ඤායතනං සමතික්‌කම්‌ම නෙවසඤ්‌ඤානාසඤ්‌ඤායතනසඤ්‌ඤාසහගතං සුඛස්‌ස ච පහානා…පෙ.… චතුත්‌ථං ඣානං උපසම්‌පජ්‌ජ විහරති, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා කුසලා. තස්‌සෙව අරූපාවචරස්‌ස කුසලස්‌ස කම්‌මස්‌ස කතත්‌තා උපචිතත්‌තා විපාකං සබ්‌බසො ආකිඤ්‌චඤ්‌ඤායතනං සමතික්‌කම්‌ම නෙවසඤ්‌ඤානාසඤ්‌ඤායතනසඤ්‌ඤාසහගතං සුඛස්‌ස ච පහානා…පෙ.… චතුත්‌ථං ඣානං උපසම්‌පජ්‌ජ විහරති, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye arūpūpapattiyā maggaṃ bhāveti sabbaso ākiñcaññāyatanaṃ samatikkamma nevasaññānāsaññāyatanasaññāsahagataṃ sukhassa ca pahānā…pe… catutthaṃ jhānaṃ upasampajja viharati, tasmiṃ samaye phasso hoti…pe… avikkhepo hoti. Ime dhammā kusalā. Tasseva arūpāvacarassa kusalassa kammassa katattā upacitattā vipākaṃ sabbaso ākiñcaññāyatanaṃ samatikkamma nevasaññānāsaññāyatanasaññāsahagataṃ sukhassa ca pahānā…pe… catutthaṃ jhānaṃ upasampajja viharati, tasmiṃ samaye phasso hoti…pe… avikkhepo hoti. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
740. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
740. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ ලොකුත්‌තරං ඣානං භාවෙති නිය්‍යානිකං අපචයගාමිං දිට්‌ඨිගතානං පහානාය පඨමාය භූමියා පත්‌තියා විවිච්‌චෙව කාමෙහි…පෙ.… පඨමං ඣානං උපසම්‌පජ්‌ජ විහරති දුක්‌ඛපටිපදං දන්‌ධාභිඤ්‌ඤං, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා කුසලා. තස්‌සෙව ලොකුත්‌තරස්‌ස කුසලස්‌ස කම්‌මස්‌ස කතත්‌තා භාවිතත්‌තා විපාකං විවිච්‌චෙව කාමෙහි…පෙ.… පඨමං ඣානං උපසම්‌පජ්‌ජ විහරති දුක්‌ඛපටිපදං දන්‌ධාභිඤ්‌ඤං සුඤ්‌ඤතං, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye phasso hoti…pe… avikkhepo hoti. Ime dhammā kusalā. Tasseva lokuttarassa kusalassa kammassa katattā bhāvitattā vipākaṃ vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ suññataṃ, tasmiṃ samaye phasso hoti…pe… avikkhepo hoti. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
741. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
741. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ අකුසලස්‌ස කම්‌මස්‌ස කතත්‌තා උපචිතත්‌තා විපාකං චක්‌ඛුවිඤ්‌ඤාණං උප්‌පන්‌නං හොති උපෙක්‌ඛාසහගතං රූපාරම්‌මණං…පෙ.… සොතවිඤ්‌ඤාණං උප්‌පන්‌නං හොති උපෙක්‌ඛාසහගතං සද්‌දාරම්‌මණං…පෙ.… ඝානවිඤ්‌ඤාණං උප්‌පන්‌නං හොති උපෙක්‌ඛාසහගතං ගන්‌ධාරම්‌මණං…පෙ.… ජිව්‌හාවිඤ්‌ඤාණං උප්‌පන්‌නං හොති උපෙක්‌ඛාසහගතං රසාරම්‌මණං…පෙ.… කායවිඤ්‌ඤාණං උප්‌පන්‌නං හොති දුක්‌ඛසහගතං ඵොට්‌ඨබ්‌බාරම්‌මණං, තස්‌මිං සමයෙ ඵස්‌සො හොති, වෙදනා හොති, සඤ්‌ඤා හොති, චෙතනා හොති, චිත්‌තං හොති, දුක්‌ඛං හොති, චිත්‌තස්‌සෙකග්‌ගතා හොති, මනින්‌ද්‍රියං හොති, දුක්‌ඛින්‌ද්‍රියං හොති, ජීවිතින්‌ද්‍රියං හොති, යෙ වා පන තස්‌මිං සමයෙ අඤ්‌ඤෙපි අත්‌ථි පටිච්‌චසමුප්‌පන්‌නා අරූපිනො ධම්‌මා. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye akusalassa kammassa katattā upacitattā vipākaṃ cakkhuviññāṇaṃ uppannaṃ hoti upekkhāsahagataṃ rūpārammaṇaṃ…pe… sotaviññāṇaṃ uppannaṃ hoti upekkhāsahagataṃ saddārammaṇaṃ…pe… ghānaviññāṇaṃ uppannaṃ hoti upekkhāsahagataṃ gandhārammaṇaṃ…pe… jivhāviññāṇaṃ uppannaṃ hoti upekkhāsahagataṃ rasārammaṇaṃ…pe… kāyaviññāṇaṃ uppannaṃ hoti dukkhasahagataṃ phoṭṭhabbārammaṇaṃ, tasmiṃ samaye phasso hoti, vedanā hoti, saññā hoti, cetanā hoti, cittaṃ hoti, dukkhaṃ hoti, cittassekaggatā hoti, manindriyaṃ hoti, dukkhindriyaṃ hoti, jīvitindriyaṃ hoti, ye vā pana tasmiṃ samaye aññepi atthi paṭiccasamuppannā arūpino dhammā. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
742. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
742. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ අකුසලස්‌ස කම්‌මස්‌ස කතත්‌තා උපචිතත්‌තා විපාකා මනොධාතු උප්‌පන්‌නා හොති උපෙක්‌ඛාසහගතා රූපාරම්‌මණා වා…පෙ.… ඵොට්‌ඨබ්‌බාරම්‌මණා වා…පෙ.… මනොවිඤ්‌ඤාණධාතු උප්‌පන්‌නා හොති උපෙක්‌ඛාසහගතා රූපාරම්‌මණා වා…පෙ.… ධම්‌මාරම්‌මණා වා යං යං වා පනාරබ්‌භ, තස්‌මිං සමයෙ ඵස්‌සො හොති , වෙදනා හොති, සඤ්‌ඤා හොති, චෙතනා හොති, චිත්‌තං හොති, විතක්‌කො හොති, විචාරො හොති, උපෙක්‌ඛා හොති, චිත්‌තස්‌සෙකග්‌ගතා හොති, මනින්‌ද්‍රියං හොති, උපෙක්‌ඛින්‌ද්‍රියං හොති, ජීවිතින්‌ද්‍රියං හොති, යෙ වා පන තස්‌මිං සමයෙ අඤ්‌ඤෙපි අත්‌ථි පටිච්‌චසමුප්‌පන්‌නා අරූපිනො ධම්‌මා. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye akusalassa kammassa katattā upacitattā vipākā manodhātu uppannā hoti upekkhāsahagatā rūpārammaṇā vā…pe… phoṭṭhabbārammaṇā vā…pe… manoviññāṇadhātu uppannā hoti upekkhāsahagatā rūpārammaṇā vā…pe… dhammārammaṇā vā yaṃ yaṃ vā panārabbha, tasmiṃ samaye phasso hoti , vedanā hoti, saññā hoti, cetanā hoti, cittaṃ hoti, vitakko hoti, vicāro hoti, upekkhā hoti, cittassekaggatā hoti, manindriyaṃ hoti, upekkhindriyaṃ hoti, jīvitindriyaṃ hoti, ye vā pana tasmiṃ samaye aññepi atthi paṭiccasamuppannā arūpino dhammā. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
4. කිරියවාරො
4. Kiriyavāro
743. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
743. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ මනොධාතු උප්‌පන්‌නා හොති කිරියා නෙව කුසලා නාකුසලා න ච කම්‌මවිපාකා උපෙක්‌ඛාසහගතා රූපාරම්‌මණා වා…පෙ.… ඵොට්‌ඨබ්‌බාරම්‌මණා වා යං යං වා පනාරබ්‌භ, තස්‌මිං සමයෙ ඵස්‌සො හොති, වෙදනා හොති, සඤ්‌ඤා හොති, චෙතනා හොති, චිත්‌තං හොති, විතක්‌කො හොති, විචාරො හොති, උපෙක්‌ඛා හොති, චිත්‌තස්‌සෙකග්‌ගතා හොති, මනින්‌ද්‍රියං හොති, උපෙක්‌ඛින්‌ද්‍රියං හොති, ජීවිතින්‌ද්‍රියං හොති, යෙ වා පන තස්‌මිං සමයෙ අඤ්‌ඤෙපි අත්‌ථි පටිච්‌චසමුප්‌පන්‌නා අරූපිනො ධම්‌මා. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා . යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye manodhātu uppannā hoti kiriyā neva kusalā nākusalā na ca kammavipākā upekkhāsahagatā rūpārammaṇā vā…pe… phoṭṭhabbārammaṇā vā yaṃ yaṃ vā panārabbha, tasmiṃ samaye phasso hoti, vedanā hoti, saññā hoti, cetanā hoti, cittaṃ hoti, vitakko hoti, vicāro hoti, upekkhā hoti, cittassekaggatā hoti, manindriyaṃ hoti, upekkhindriyaṃ hoti, jīvitindriyaṃ hoti, ye vā pana tasmiṃ samaye aññepi atthi paṭiccasamuppannā arūpino dhammā. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā . Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
744. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
744. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ මනොවිඤ්‌ඤාණධාතු උප්‌පන්‌නා හොති කිරියා නෙව කුසලා නාකුසලා න ච කම්‌මවිපාකා සොමනස්‌සසහගතා රූපාරම්‌මණා වා…පෙ.… ධම්‌මාරම්‌මණා වා…පෙ.… මනොවිඤ්‌ඤාණධාතු උප්‌පන්‌නා හොති කිරියා නෙව කුසලා නාකුසලා න ච කම්‌මවිපාකා උපෙක්‌ඛාසහගතා රූපාරම්‌මණා වා…පෙ.… ධම්‌මාරම්‌මණා වා යං යං වා පනාරබ්‌භ, තස්‌මිං සමයෙ ඵස්‌සො හොති, වෙදනා හොති, සඤ්‌ඤා හොති, චෙතනා හොති, චිත්‌තං හොති, විතක්‌කො හොති, විචාරො හොති, උපෙක්‌ඛා හොති, චිත්‌තස්‌සෙකග්‌ගතා හොති, වීරියින්‌ද්‍රියං හොති , සමාධින්‌ද්‍රියං හොති, මනින්‌ද්‍රියං හොති, උපෙක්‌ඛින්‌ද්‍රියං හොති, ජීවිතින්‌ද්‍රියං හොති, යෙ වා පන තස්‌මිං සමයෙ අඤ්‌ඤෙපි අත්‌ථි පටිච්‌චසමුප්‌පන්‌නා අරූපිනො ධම්‌මා. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye manoviññāṇadhātu uppannā hoti kiriyā neva kusalā nākusalā na ca kammavipākā somanassasahagatā rūpārammaṇā vā…pe… dhammārammaṇā vā…pe… manoviññāṇadhātu uppannā hoti kiriyā neva kusalā nākusalā na ca kammavipākā upekkhāsahagatā rūpārammaṇā vā…pe… dhammārammaṇā vā yaṃ yaṃ vā panārabbha, tasmiṃ samaye phasso hoti, vedanā hoti, saññā hoti, cetanā hoti, cittaṃ hoti, vitakko hoti, vicāro hoti, upekkhā hoti, cittassekaggatā hoti, vīriyindriyaṃ hoti , samādhindriyaṃ hoti, manindriyaṃ hoti, upekkhindriyaṃ hoti, jīvitindriyaṃ hoti, ye vā pana tasmiṃ samaye aññepi atthi paṭiccasamuppannā arūpino dhammā. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
745. තිස්‌සො පටිසම්‌භිදා – අත්‌ථපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
745. Tisso paṭisambhidā – atthapaṭisambhidā, niruttipaṭisambhidā, paṭibhānapaṭisambhidā.
කතමෙ ධම්‌මා අබ්‍යාකතා? යස්‌මිං සමයෙ මනොවිඤ්‌ඤාණධාතු උප්‌පන්‌නා හොති කිරියා නෙව කුසලා නාකුසලා න ච කම්‌මවිපාකා සොමනස්‌සසහගතා ඤාණසම්‌පයුත්‌තා…පෙ.… සොමනස්‌සසහගතා ඤාණසම්‌පයුත්‌තා සසඞ්‌ඛාරෙන…පෙ.… සොමනස්‌සසහගතා ඤාණවිප්‌පයුත්‌තා…පෙ.… සොමනස්‌සසහගතා ඤාණවිප්‌පයුත්‌තා සසඞ්‌ඛාරෙන…පෙ.… උපෙක්‌ඛාසහගතා ඤාණසම්‌පයුත්‌තා…පෙ.… උපෙක්‌ඛාසහගතා ඤාණසම්‌පයුත්‌තා සසඞ්‌ඛාරෙන…පෙ.… උපෙක්‌ඛාසහගතා ඤාණවිප්‌පයුත්‌තා…පෙ.… උපෙක්‌ඛාසහගතා ඤාණවිප්‌පයුත්‌තා සසඞ්‌ඛාරෙන…පෙ.… රූපාවචරං ඣානං භාවෙති…පෙ.… අරූපාවචරං ඣානං භාවෙති කිරියං නෙව කුසලං නාකුසලං න ච කම්‌මවිපාකං දිට්‌ඨධම්‌මසුඛවිහාරං…පෙ.… සබ්‌බසො ආකිඤ්‌චඤ්‌ඤායතනං සමතික්‌කම්‌ම නෙවසඤ්‌ඤානාසඤ්‌ඤායතනසඤ්‌ඤාසහගතං සුඛස්‌ස ච පහානා…පෙ.… චතුත්‌ථං ඣානං උපසම්‌පජ්‌ජ විහරති, තස්‌මිං සමයෙ ඵස්‌සො හොති…පෙ.… අවික්‌ඛෙපො හොති. ඉමෙ ධම්‌මා අබ්‍යාකතා. ඉමෙසු ධම්‌මෙසු ඤාණං අත්‌ථපටිසම්‌භිදා. යාය නිරුත්‌තියා තෙසං ධම්‌මානං පඤ්‌ඤත්‌ති හොති තත්‍ර ධම්‌මනිරුත්‌තාභිලාපෙ ඤාණං නිරුත්‌තිපටිසම්‌භිදා. යෙන ඤාණෙන තානි ඤාණානි ජානාති – ‘‘ඉමානි ඤාණානි ඉදමත්‌ථජොතකානී’’ති, ඤාණෙසු ඤාණං පටිභානපටිසම්‌භිදා.
Katame dhammā abyākatā? Yasmiṃ samaye manoviññāṇadhātu uppannā hoti kiriyā neva kusalā nākusalā na ca kammavipākā somanassasahagatā ñāṇasampayuttā…pe… somanassasahagatā ñāṇasampayuttā sasaṅkhārena…pe… somanassasahagatā ñāṇavippayuttā…pe… somanassasahagatā ñāṇavippayuttā sasaṅkhārena…pe… upekkhāsahagatā ñāṇasampayuttā…pe… upekkhāsahagatā ñāṇasampayuttā sasaṅkhārena…pe… upekkhāsahagatā ñāṇavippayuttā…pe… upekkhāsahagatā ñāṇavippayuttā sasaṅkhārena…pe… rūpāvacaraṃ jhānaṃ bhāveti…pe… arūpāvacaraṃ jhānaṃ bhāveti kiriyaṃ neva kusalaṃ nākusalaṃ na ca kammavipākaṃ diṭṭhadhammasukhavihāraṃ…pe… sabbaso ākiñcaññāyatanaṃ samatikkamma nevasaññānāsaññāyatanasaññāsahagataṃ sukhassa ca pahānā…pe… catutthaṃ jhānaṃ upasampajja viharati, tasmiṃ samaye phasso hoti…pe… avikkhepo hoti. Ime dhammā abyākatā. Imesu dhammesu ñāṇaṃ atthapaṭisambhidā. Yāya niruttiyā tesaṃ dhammānaṃ paññatti hoti tatra dhammaniruttābhilāpe ñāṇaṃ niruttipaṭisambhidā. Yena ñāṇena tāni ñāṇāni jānāti – ‘‘imāni ñāṇāni idamatthajotakānī’’ti, ñāṇesu ñāṇaṃ paṭibhānapaṭisambhidā.
746. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා. තිස්‌සො පටිසම්‌භිදා කාමාවචරකුසලතො චතූසු ඤාණසම්‌පයුත්‌තෙසු චිත්‌තුප්‌පාදෙසු, කිරියතො චතූසු ඤාණසම්‌පයුත්‌තෙසු චිත්‌තුප්‌පාදෙසු උප්‌පජ්‌ජන්‌ති. අත්‌ථපටිසම්‌භිදා එතෙසු චෙව උප්‌පජ්‌ජති, චතූසු මග්‌ගෙසු චතූසු ඵලෙසු ච උප්‌පජ්‌ජති.
746. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā. Tisso paṭisambhidā kāmāvacarakusalato catūsu ñāṇasampayuttesu cittuppādesu, kiriyato catūsu ñāṇasampayuttesu cittuppādesu uppajjanti. Atthapaṭisambhidā etesu ceva uppajjati, catūsu maggesu catūsu phalesu ca uppajjati.
අභිධම්‌මභාජනීයං.
Abhidhammabhājanīyaṃ.
3. පඤ්‌හාපුච්‌ඡකං
3. Pañhāpucchakaṃ
747. චතස්‌සො පටිසම්‌භිදා – අත්‌ථපටිසම්‌භිදා, ධම්‌මපටිසම්‌භිදා, නිරුත්‌තිපටිසම්‌භිදා, පටිභානපටිසම්‌භිදා.
747. Catasso paṭisambhidā – atthapaṭisambhidā, dhammapaṭisambhidā, niruttipaṭisambhidā, paṭibhānapaṭisambhidā.
748. චතුන්‌නං පටිසම්‌භිදානං කති කුසලා, කති අකුසලා, කති අබ්‍යාකතා…පෙ.… කති සරණා, කති අරණා?
748. Catunnaṃ paṭisambhidānaṃ kati kusalā, kati akusalā, kati abyākatā…pe… kati saraṇā, kati araṇā?
1. තිකං
1. Tikaṃ
749. සියා කුසලා, සියා අබ්‍යාකතා. සියා සුඛාය වෙදනාය සම්‌පයුත්‌තා, සියා අදුක්‌ඛමසුඛාය වෙදනාය සම්‌පයුත්‌තා. තිස්‌සො පටිසම්‌භිදා සියා විපාකධම්‌මධම්‌මා, සියා නෙවවිපාකනවිපාකධම්‌මධම්‌මා; අත්‌ථපටිසම්‌භිදා සියා විපාකා, සියා විපාකධම්‌මධම්‌මා, සියා නෙවවිපාකනවිපාකධම්‌මධම්‌මා. තිස්‌සො පටිසම්‌භිදා අනුපාදින්‌නුපාදානියා; අත්‌ථපටිසම්‌භිදා සියා අනුපාදින්‌නුපාදානියා, සියා අනුපාදින්‌නඅනුපාදානියා. තිස්‌සො පටිසම්‌භිදා අසංකිලිට්‌ඨඅසංකිලෙසිකා; අත්‌ථපටිසම්‌භිදා සියා අසංකිලිට්‌ඨසංකිලෙසිකා, සියා අසංකිලිට්‌ඨඅසංකිලෙසිකා.
749. Siyā kusalā, siyā abyākatā. Siyā sukhāya vedanāya sampayuttā, siyā adukkhamasukhāya vedanāya sampayuttā. Tisso paṭisambhidā siyā vipākadhammadhammā, siyā nevavipākanavipākadhammadhammā; atthapaṭisambhidā siyā vipākā, siyā vipākadhammadhammā, siyā nevavipākanavipākadhammadhammā. Tisso paṭisambhidā anupādinnupādāniyā; atthapaṭisambhidā siyā anupādinnupādāniyā, siyā anupādinnaanupādāniyā. Tisso paṭisambhidā asaṃkiliṭṭhaasaṃkilesikā; atthapaṭisambhidā siyā asaṃkiliṭṭhasaṃkilesikā, siyā asaṃkiliṭṭhaasaṃkilesikā.
තිස්‌සො පටිසම්‌භිදා සවිතක්‌කසවිචාරා; අත්‌ථපටිසම්‌භිදා සියා සවිතක්‌කසවිචාරා, සියා අවිතක්‌කවිචාරමත්‌තා, සියා අවිතක්‌කඅවිචාරා. සියා පීතිසහගතා, සියා සුඛසහගතා, සියා උපෙක්‌ඛාසහගතා. නෙව දස්‌සනෙන න භාවනාය පහාතබ්‌බා. නෙව දස්‌සනෙන න භාවනාය පහාතබ්‌බහෙතුකා.
Tisso paṭisambhidā savitakkasavicārā; atthapaṭisambhidā siyā savitakkasavicārā, siyā avitakkavicāramattā, siyā avitakkaavicārā. Siyā pītisahagatā, siyā sukhasahagatā, siyā upekkhāsahagatā. Neva dassanena na bhāvanāya pahātabbā. Neva dassanena na bhāvanāya pahātabbahetukā.
තිස්‌සො පටිසම්‌භිදා සියා ආචයගාමිනො, සියා නෙවාචයගාමිනාපචයගාමිනො; අත්‌ථපටිසම්‌භිදා සියා ආචයගාමිනී , සියා අපචයගාමිනී, සියා නෙවාචයගාමිනාපචයගාමිනී.
Tisso paṭisambhidā siyā ācayagāmino, siyā nevācayagāmināpacayagāmino; atthapaṭisambhidā siyā ācayagāminī , siyā apacayagāminī, siyā nevācayagāmināpacayagāminī.
තිස්‌සො පටිසම්‌භිදා නෙවසෙක්‌ඛනාසෙක්‌ඛා, අත්‌ථපටිසම්‌භිදා සියා සෙක්‌ඛා, සියා අසෙක්‌ඛා , සියා නෙවසෙක්‌ඛනාසෙක්‌ඛා. තිස්‌සො පටිසම්‌භිදා පරිත්‌තා; අත්‌ථපටිසම්‌භිදා සියා පරිත්‌තා, සියා අප්‌පමාණා. නිරුත්‌තිපටිසම්‌භිදා පරිත්‌තාරම්‌මණා; තිස්‌සො පටිසම්‌භිදා සියා පරිත්‌තාරම්‌මණා, සියා මහග්‌ගතාරම්‌මණා, සියා අප්‌පමාණාරම්‌මණා.
Tisso paṭisambhidā nevasekkhanāsekkhā, atthapaṭisambhidā siyā sekkhā, siyā asekkhā , siyā nevasekkhanāsekkhā. Tisso paṭisambhidā parittā; atthapaṭisambhidā siyā parittā, siyā appamāṇā. Niruttipaṭisambhidā parittārammaṇā; tisso paṭisambhidā siyā parittārammaṇā, siyā mahaggatārammaṇā, siyā appamāṇārammaṇā.
තිස්‌සො පටිසම්‌භිදා මජ්‌ඣිමා; අත්‌ථපටිසම්‌භිදා සියා මජ්‌ඣිමා, සියා පණීතා. තිස්‌සො පටිසම්‌භිදා අනියතා; අත්‌ථපටිසම්‌භිදා සියා සම්‌මත්‌තනියතා, සියා අනියතා. නිරුත්‌තිපටිසම්‌භිදා න වත්‌තබ්‌බා – මග්‌ගාරම්‌මණාතිපි, මග්‌ගහෙතුකාතිපි, මග්‌ගාධිපතිනීතිපි; අත්‌ථපටිසම්‌භිදා න මග්‌ගාරම්‌මණා, සියා මග්‌ගහෙතුකා, සියා මග්‌ගාධිපතිනී, සියා න වත්‌තබ්‌බා මග්‌ගහෙතුකාතිපි, මග්‌ගාධිපතිනීතිපි; ද්‌වෙ පටිසම්‌භිදා සියා මග්‌ගාරම්‌මණා, න මග්‌ගහෙතුකා, සියා මග්‌ගාධිපතිනො, සියා න වත්‌තබ්‌බා මග්‌ගාරම්‌මණාතිපි, මග්‌ගාධිපතිනොතිපි.
Tisso paṭisambhidā majjhimā; atthapaṭisambhidā siyā majjhimā, siyā paṇītā. Tisso paṭisambhidā aniyatā; atthapaṭisambhidā siyā sammattaniyatā, siyā aniyatā. Niruttipaṭisambhidā na vattabbā – maggārammaṇātipi, maggahetukātipi, maggādhipatinītipi; atthapaṭisambhidā na maggārammaṇā, siyā maggahetukā, siyā maggādhipatinī, siyā na vattabbā maggahetukātipi, maggādhipatinītipi; dve paṭisambhidā siyā maggārammaṇā, na maggahetukā, siyā maggādhipatino, siyā na vattabbā maggārammaṇātipi, maggādhipatinotipi.
තිස්‌සො පටිසම්‌භිදා සියා උප්‌පන්‌නා, සියා අනුප්‌පන්‌නා, න වත්‌තබ්‌බා උප්‌පාදිනොති; අත්‌ථපටිසම්‌භිදා සියා උප්‌පන්‌නා, සියා අනුප්‌පන්‌නා, සියා උප්‌පාදිනී. සියා අතීතා, සියා අනාගතා, සියා පච්‌චුප්‌පන්‌නා. නිරුත්‌තිපටිසම්‌භිදා පච්‌චුප්‌පන්‌නාරම්‌මණා; ද්‌වෙ පටිසම්‌භිදා සියා අතීතාරම්‌මණා, සියා අනාගතාරම්‌මණා, සියා පච්‌චුප්‌පන්‌නාරම්‌මණා ; අත්‌ථපටිසම්‌භිදා සියා අතීතාරම්‌මණා, සියා අනාගතාරම්‌මණා, සියා පච්‌චුප්‌පන්‌නාරම්‌මණා, සියා න වත්‌තබ්‌බා අතීතාරම්‌මණාතිපි, අනාගතාරම්‌මණාතිපි, පච්‌චුප්‌පන්‌නාරම්‌මණාතිපි. සියා අජ්‌ඣත්‌තා, සියා බහිද්‌ධා, සියා අජ්‌ඣත්‌තබහිද්‌ධා. නිරුත්‌තිපටිසම්‌භිදා බහිද්‌ධාරම්‌මණා; තිස්‌සො පටිසම්‌භිදා සියා අජ්‌ඣත්‌තාරම්‌මණා, සියා බහිද්‌ධාරම්‌මණා, සියා අජ්‌ඣත්‌තබහිද්‌ධාරම්‌මණා. අනිදස්‌සනඅපටිඝා.
Tisso paṭisambhidā siyā uppannā, siyā anuppannā, na vattabbā uppādinoti; atthapaṭisambhidā siyā uppannā, siyā anuppannā, siyā uppādinī. Siyā atītā, siyā anāgatā, siyā paccuppannā. Niruttipaṭisambhidā paccuppannārammaṇā; dve paṭisambhidā siyā atītārammaṇā, siyā anāgatārammaṇā, siyā paccuppannārammaṇā ; atthapaṭisambhidā siyā atītārammaṇā, siyā anāgatārammaṇā, siyā paccuppannārammaṇā, siyā na vattabbā atītārammaṇātipi, anāgatārammaṇātipi, paccuppannārammaṇātipi. Siyā ajjhattā, siyā bahiddhā, siyā ajjhattabahiddhā. Niruttipaṭisambhidā bahiddhārammaṇā; tisso paṭisambhidā siyā ajjhattārammaṇā, siyā bahiddhārammaṇā, siyā ajjhattabahiddhārammaṇā. Anidassanaapaṭighā.
2. දුකං
2. Dukaṃ
750. හෙතූ, සහෙතුකා, හෙතුසම්‌පයුත්‌තා, හෙතූ චෙව සහෙතුකා ච, හෙතූ චෙව හෙතුසම්‌පයුත්‌තා ච, න වත්‌තබ්‌බා න හෙතූ සහෙතුකාතිපි, නහෙතූඅහෙතුකාතිපි.
750. Hetū, sahetukā, hetusampayuttā, hetū ceva sahetukā ca, hetū ceva hetusampayuttā ca, na vattabbā na hetū sahetukātipi, nahetūahetukātipi.
සප්‌පච්‌චයා , සඞ්‌ඛතා, අනිදස්‌සනා, අප්‌පටිඝා, අරූපා, තිස්‌සො පටිසම්‌භිදා ලොකියා, අත්‌ථපටිසම්‌භිදා සියා ලොකියා, සියා ලොකුත්‌තරා, කෙනචි විඤ්‌ඤෙය්‍යා, කෙනචි න විඤ්‌ඤෙය්‍යා.
Sappaccayā , saṅkhatā, anidassanā, appaṭighā, arūpā, tisso paṭisambhidā lokiyā, atthapaṭisambhidā siyā lokiyā, siyā lokuttarā, kenaci viññeyyā, kenaci na viññeyyā.
නො ආසවා. තිස්‌සො පටිසම්‌භිදා සාසවා; අත්‌ථපටිසම්‌භිදා සියා සාසවා, සියා අනාසවා. ආසවවිප්‌පයුත්‌තා. තිස්‌සො පටිසම්‌භිදා න වත්‌තබ්‌බා ආසවා චෙව සාසවා චාති, සාසවා චෙව නො ච ආසවා; අත්‌ථපටිසම්‌භිදා න වත්‌තබ්‌බා ආසවො 3 චෙව සාසවා චාති, සියා සාසවා චෙව නො ච ආසවො 4, සියා න වත්‌තබ්‌බා සාසවා චෙව නො ච ආසවාති. න වත්‌තබ්‌බා ආසවා චෙව ආසවසම්‌පයුත්‌තා චාතිපි, ආසවසම්‌පයුත්‌තා චෙව නො ච ආසවාතිපි. තිස්‌සො පටිසම්‌භිදා ආසවවිප්‌පයුත්‌තා සාසවා; අත්‌ථපටිසම්‌භිදා සියා ආසවවිප්‌පයුත්‌තා සාසවා, සියා ආසවවිප්‌පයුත්‌තා අනාසවා.
No āsavā. Tisso paṭisambhidā sāsavā; atthapaṭisambhidā siyā sāsavā, siyā anāsavā. Āsavavippayuttā. Tisso paṭisambhidā na vattabbā āsavā ceva sāsavā cāti, sāsavā ceva no ca āsavā; atthapaṭisambhidā na vattabbā āsavo 5 ceva sāsavā cāti, siyā sāsavā ceva no ca āsavo 6, siyā na vattabbā sāsavā ceva no ca āsavāti. Na vattabbā āsavā ceva āsavasampayuttā cātipi, āsavasampayuttā ceva no ca āsavātipi. Tisso paṭisambhidā āsavavippayuttā sāsavā; atthapaṭisambhidā siyā āsavavippayuttā sāsavā, siyā āsavavippayuttā anāsavā.
නො සංයොජනා…පෙ.… නො ගන්‌ථා…පෙ.… නො ඔඝා…පෙ.… නො යොගා…පෙ.… නො නීවරණා…පෙ.… නො පරාමාසා…පෙ.… සාරම්‌මණා. නො චිත්‌තා, චෙතසිකා, චිත්‌තසම්‌පයුත්‌තා, චිත්‌තසංසට්‌ඨා, චිත්‌තසමුට්‌ඨානා, චිත්‌තසහභුනො, චිත්‌තානුපරිවත්‌තිනො. චිත්‌තසංසට්‌ඨසමුට්‌ඨානා, චිත්‌තසංසට්‌ඨසමුට්‌ඨානසහභුනො, චිත්‌තසංසට්‌ඨසමුට්‌ඨානානුපරිවත්‌තිනො, බාහිරා, නො උපාදා, අනුපාදින්‌නා.
No saṃyojanā…pe… no ganthā…pe… no oghā…pe… no yogā…pe… no nīvaraṇā…pe… no parāmāsā…pe… sārammaṇā. No cittā, cetasikā, cittasampayuttā, cittasaṃsaṭṭhā, cittasamuṭṭhānā, cittasahabhuno, cittānuparivattino. Cittasaṃsaṭṭhasamuṭṭhānā, cittasaṃsaṭṭhasamuṭṭhānasahabhuno, cittasaṃsaṭṭhasamuṭṭhānānuparivattino, bāhirā, no upādā, anupādinnā.
නො උපාදානා…පෙ.… නො කිලෙසා…පෙ.… න දස්‌සනෙන පහාතබ්‌බා. න භාවනාය පහාතබ්‌බා. න දස්‌සනෙන පහාතබ්‌බහෙතුකා. න භාවනාය පහාතබ්‌බහෙතුකා. තිස්‌සො පටිසම්‌භිදා සවිතක්‌කා; අත්‌ථපටිසම්‌භිදා සියා සවිතක්‌කා, සියා අවිතක්‌කා. තිස්‌සො පටිසම්‌භිදා සවිචාරා; අත්‌ථපටිසම්‌භිදා සියා සවිචාරා, සියා අවිචාරා. සියා සප්‌පීතිකා, සියා අප්‌පීතිකා. සියා පීතිසහගතා, සියා න පීතිසහගතා. සියා සුඛසහගතා, සියා න සුඛසහගතා. සියා උපෙක්‌ඛාසහගතා, සියා න උපෙක්‌ඛාසහගතා. තිස්‌සො පටිසම්‌භිදා කාමාවචරා; අත්‌ථපටිසම්‌භිදා සියා කාමාවචරා, සියා න කාමාවචරා. න රූපාවචරා. න අරූපාවචරා . තිස්‌සො පටිසම්‌භිදා පරියාපන්‌නා; අත්‌ථපටිසම්‌භිදා සියා පරියාපන්‌නා, සියා අපරියාපන්‌නා. තිස්‌සො පටිසම්‌භිදා අනිය්‍යානිකා; අත්‌ථපටිසම්‌භිදා සියා නිය්‍යානිකා, සියා අනිය්‍යානිකා. තිස්‌සො පටිසම්‌භිදා අනියතා; අත්‌ථපටිසම්‌භිදා සියා නියතා , සියා අනියතා. තිස්‌සො පටිසම්‌භිදා සඋත්‌තරා; අත්‌ථපටිසම්‌භිදා සියා සඋත්‌තරා , සියා අනුත්‌තරා. අරණාති.
No upādānā…pe… no kilesā…pe… na dassanena pahātabbā. Na bhāvanāya pahātabbā. Na dassanena pahātabbahetukā. Na bhāvanāya pahātabbahetukā. Tisso paṭisambhidā savitakkā; atthapaṭisambhidā siyā savitakkā, siyā avitakkā. Tisso paṭisambhidā savicārā; atthapaṭisambhidā siyā savicārā, siyā avicārā. Siyā sappītikā, siyā appītikā. Siyā pītisahagatā, siyā na pītisahagatā. Siyā sukhasahagatā, siyā na sukhasahagatā. Siyā upekkhāsahagatā, siyā na upekkhāsahagatā. Tisso paṭisambhidā kāmāvacarā; atthapaṭisambhidā siyā kāmāvacarā, siyā na kāmāvacarā. Na rūpāvacarā. Na arūpāvacarā . Tisso paṭisambhidā pariyāpannā; atthapaṭisambhidā siyā pariyāpannā, siyā apariyāpannā. Tisso paṭisambhidā aniyyānikā; atthapaṭisambhidā siyā niyyānikā, siyā aniyyānikā. Tisso paṭisambhidā aniyatā; atthapaṭisambhidā siyā niyatā , siyā aniyatā. Tisso paṭisambhidā sauttarā; atthapaṭisambhidā siyā sauttarā , siyā anuttarā. Araṇāti.
පඤ්‌හාපුච්‌ඡකං.
Pañhāpucchakaṃ.
පටිසම්‌භිදාවිභඞ්‌ගො නිට්‌ඨිතො.
Paṭisambhidāvibhaṅgo niṭṭhito.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / සම්‌මොහවිනොදනී-අට්‌ඨකථා • Sammohavinodanī-aṭṭhakathā
1. සුත්‌තන්‌තභාජනීයං • 1. Suttantabhājanīyaṃ
2. අභිධම්‌මභාජනීයවණ්‌ණනා • 2. Abhidhammabhājanīyavaṇṇanā
3. පඤ්‌හාපුච්‌ඡකවණ්‌ණනා • 3. Pañhāpucchakavaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / විභඞ්‌ග-මූලටීකා • Vibhaṅga-mūlaṭīkā / 15. පටිසම්‌භිදාවිභඞ්‌ගො • 15. Paṭisambhidāvibhaṅgo
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / විභඞ්‌ග-අනුටීකා • Vibhaṅga-anuṭīkā / 15. පටිසම්‌භිදාවිභඞ්‌ගො • 15. Paṭisambhidāvibhaṅgo
