| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
2. படிஸந்த³ஹனபஞ்ஹோ
2. Paṭisandahanapañho
2. ராஜா ஆஹ ‘‘ப⁴ந்தே நாக³ஸேன, யோ ந படிஸந்த³ஹதி, ஜானாதி ஸோ ‘ந படிஸந்த³ஹிஸ்ஸாமீ’தி? ‘‘ஆம, மஹாராஜ, யோ ந படிஸந்த³ஹதி, ஜானாதி ஸோ ‘ந படிஸந்த³ஹிஸ்ஸாமீ’தி. ‘‘கத²ங், ப⁴ந்தே, ஜானாதீ’’தி? ‘‘யோ ஹேது யோ பச்சயோ, மஹாராஜ, படிஸந்த³ஹனாய, தஸ்ஸ ஹேதுஸ்ஸ தஸ்ஸ பச்சயஸ்ஸ உபரமா ஜானாதி ஸோ ‘ந படிஸந்த³ஹிஸ்ஸாமீ’’’தி.
2. Rājā āha ‘‘bhante nāgasena, yo na paṭisandahati, jānāti so ‘na paṭisandahissāmī’ti? ‘‘Āma, mahārāja, yo na paṭisandahati, jānāti so ‘na paṭisandahissāmī’ti. ‘‘Kathaṃ, bhante, jānātī’’ti? ‘‘Yo hetu yo paccayo, mahārāja, paṭisandahanāya, tassa hetussa tassa paccayassa uparamā jānāti so ‘na paṭisandahissāmī’’’ti.
‘‘ஓபம்மங் கரோஹீ’’தி. ‘‘யதா², மஹாராஜ, கஸ்ஸகோ க³ஹபதிகோ கஸித்வா ச வபித்வா ச த⁴ஞ்ஞாகா³ரங் பரிபூரெய்ய. ஸோ அபரேன ஸமயேன நேவ கஸ்ஸெய்ய ந வப்பெய்ய, யதா²ஸம்ப⁴தஞ்ச த⁴ஞ்ஞங் பரிபு⁴ஞ்ஜெய்ய வா விஸஜ்ஜெய்ய வா யதா² பச்சயங் வா கரெய்ய, ஜானெய்ய ஸோ, மஹாராஜ, கஸ்ஸகோ க³ஹபதிகோ ‘ந மே த⁴ஞ்ஞாகா³ரங் பரிபூரெஸ்ஸதீ’தி? ‘‘ஆம, ப⁴ந்தே, ஜானெய்யா’’தி. ‘‘கத²ங் ஜானெய்யா’’தி? ‘‘யோ ஹேது யோ பச்சயோ த⁴ஞ்ஞாகா³ரஸ்ஸ பரிபூரணாய, தஸ்ஸ ஹேதுஸ்ஸ தஸ்ஸ பச்சயஸ்ஸ உபரமா ஜானாதி ‘ந மே த⁴ஞ்ஞாகா³ரங் பரிபூரெஸ்ஸதீ’’’தி. ‘‘ஏவமேவ கோ², மஹாராஜ, யோ ஹேது யோ பச்சயோ படிஸந்த³ஹனாய, தஸ்ஸ ஹேதுஸ்ஸ தஸ்ஸ பச்சயஸ்ஸ உபரமா ஜானாதி ஸோ ‘ந படிஸந்த³ஹிஸ்ஸாமீ’தி.
‘‘Opammaṃ karohī’’ti. ‘‘Yathā, mahārāja, kassako gahapatiko kasitvā ca vapitvā ca dhaññāgāraṃ paripūreyya. So aparena samayena neva kasseyya na vappeyya, yathāsambhatañca dhaññaṃ paribhuñjeyya vā visajjeyya vā yathā paccayaṃ vā kareyya, jāneyya so, mahārāja, kassako gahapatiko ‘na me dhaññāgāraṃ paripūressatī’ti? ‘‘Āma, bhante, jāneyyā’’ti. ‘‘Kathaṃ jāneyyā’’ti? ‘‘Yo hetu yo paccayo dhaññāgārassa paripūraṇāya, tassa hetussa tassa paccayassa uparamā jānāti ‘na me dhaññāgāraṃ paripūressatī’’’ti. ‘‘Evameva kho, mahārāja, yo hetu yo paccayo paṭisandahanāya, tassa hetussa tassa paccayassa uparamā jānāti so ‘na paṭisandahissāmī’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
படிஸந்த³ஹனபஞ்ஹோ து³தியோ.
Paṭisandahanapañho dutiyo.
