| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๔. ปฎิสารณียกมฺมกถา
4. Paṭisāraṇīyakammakathā
๓๓. สุธมฺมวตฺถุสฺมิํ เอวมโตฺถ เวทิตโพฺพติ โยชนาฯ อนปโลเกตฺวาติ เอตฺถ อปปุโพฺพ โลกสโทฺท อาปุจฺฉนโตฺถติ อาห ‘‘น อาปุจฺฉิตฺวา’’ติฯ
33. Sudhammavatthusmiṃ evamattho veditabboti yojanā. Anapaloketvāti ettha apapubbo lokasaddo āpucchanatthoti āha ‘‘na āpucchitvā’’ti.
๓๔. กินฺติ กิํ นาม ขาทนียโภชนียํฯ โวติ ตุเมฺหหิฯ คหปตีติ อาลปนปทํฯ เถรานํ อตฺถายาติ สมฺพโนฺธฯ ปฎิยตฺตนฺติ ปฎิยาทิตํฯ ‘‘เอตํ อโวจา’’ติ อิมินา เอตทโวจาติ เอตฺถ นิคฺคหิตาเทสสนฺธิํ ทเสฺสติฯ ยทิทนฺติ สโทฺท ‘‘ติลสํคุฬิกา’’ติ ปเทน โยชิตตฺตา อิตฺถิลิโงฺคติ อาห ‘‘ยา อย’’นฺติฯ ติลสกฺขลิกาติ ติเลน สํสฎฺฐา สกฺขลิกาฯ ‘‘สา นตฺถี’’ติ อิมินา อุตฺตรวาเกฺย ยํสทฺทสฺส ปุพฺพวาเกฺย ตํสทฺทาเปกฺขตํ ทเสฺสติฯ เอโก ปุริโสติ สมฺพโนฺธฯ ปูวิโยติ ปูวํ, ปูเวน วา กยวิกฺกโยฯ เตนาติ การเณนฯ นนฺติ คหปติํฯ เถโรติ สุธมฺมเตฺถโรฯ ยเทว กิญฺจีติ เอตฺถ กิญฺจิ เอว ยํ วจนนฺติ ทเสฺสโนฺต อาห ‘‘กิญฺจิเทว ติลสํคุฬิกาวจน’’นฺติฯ อิทนฺติ อิมํ อตฺถํฯ โสติ กุกฺกุฎโปตโกฯ กากวสฺสิตนฺติ กากสฺส วสฺสิตํ, เนว อกาสีติ สมฺพโนฺธฯ ตยาปีติ ปิสโทฺท กุกฺกุฎโปตกํ อเปกฺขติฯ เนว ภิกฺขุวจนํ วุตฺตํ, น คิหิวจนํ วุตฺตํ, อิติ อิมมตฺถํ ทเสฺสตีติ โยชนาฯ
34.Kinti kiṃ nāma khādanīyabhojanīyaṃ. Voti tumhehi. Gahapatīti ālapanapadaṃ. Therānaṃ atthāyāti sambandho. Paṭiyattanti paṭiyāditaṃ. ‘‘Etaṃ avocā’’ti iminā etadavocāti ettha niggahitādesasandhiṃ dasseti. Yadidanti saddo ‘‘tilasaṃguḷikā’’ti padena yojitattā itthiliṅgoti āha ‘‘yā aya’’nti. Tilasakkhalikāti tilena saṃsaṭṭhā sakkhalikā. ‘‘Sā natthī’’ti iminā uttaravākye yaṃsaddassa pubbavākye taṃsaddāpekkhataṃ dasseti. Eko purisoti sambandho. Pūviyoti pūvaṃ, pūvena vā kayavikkayo. Tenāti kāraṇena. Nanti gahapatiṃ. Theroti sudhammatthero. Yadeva kiñcīti ettha kiñci eva yaṃ vacananti dassento āha ‘‘kiñcideva tilasaṃguḷikāvacana’’nti. Idanti imaṃ atthaṃ. Soti kukkuṭapotako. Kākavassitanti kākassa vassitaṃ, neva akāsīti sambandho. Tayāpīti pisaddo kukkuṭapotakaṃ apekkhati. Neva bhikkhuvacanaṃ vuttaṃ, na gihivacanaṃ vuttaṃ, iti imamatthaṃ dassetīti yojanā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / จูฬวคฺคปาฬิ • Cūḷavaggapāḷi / ๔. ปฎิสารณียกมฺมํ • 4. Paṭisāraṇīyakammaṃ
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / จูฬวคฺค-อฎฺฐกถา • Cūḷavagga-aṭṭhakathā / ปฎิสารณียกมฺมกถา • Paṭisāraṇīyakammakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ปฎิสารณียกมฺมกถาวณฺณนา • Paṭisāraṇīyakammakathāvaṇṇanā
