| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
4. படிஸாரணீயகம்மங்
4. Paṭisāraṇīyakammaṃ
33. தேன கோ² பன ஸமயேன ஆயஸ்மா ஸுத⁴ம்மோ மச்சி²காஸண்டே³ சித்தஸ்ஸ க³ஹபதினோ ஆவாஸிகோ ஹோதி, நவகம்மிகோ து⁴வப⁴த்திகோ. யதா³ சித்தோ க³ஹபதி ஸங்க⁴ங் வா க³ணங் வா புக்³க³லங் வா நிமந்தேதுகாமோ ஹோதி ததா³ ந ஆயஸ்மந்தங் ஸுத⁴ம்மங் அனபலோகெத்வா ஸங்க⁴ங் வா க³ணங் வா புக்³க³லங் வா நிமந்தேதி.
33. Tena kho pana samayena āyasmā sudhammo macchikāsaṇḍe cittassa gahapatino āvāsiko hoti, navakammiko dhuvabhattiko. Yadā citto gahapati saṅghaṃ vā gaṇaṃ vā puggalaṃ vā nimantetukāmo hoti tadā na āyasmantaṃ sudhammaṃ anapaloketvā saṅghaṃ vā gaṇaṃ vā puggalaṃ vā nimanteti.
தேன கோ² பன ஸமயேன ஸம்ப³ஹுலா தே²ரா பி⁴க்கூ², ஆயஸ்மா ச ஸாரிபுத்தோ, ஆயஸ்மா ச மஹாமொக்³க³ல்லானோ, ஆயஸ்மா ச மஹாகச்சானோ, ஆயஸ்மா ச மஹாகொட்டி²கோ , ஆயஸ்மா ச மஹாகப்பினோ, ஆயஸ்மா ச மஹாசுந்தோ³, ஆயஸ்மா ச அனுருத்³தோ⁴, ஆயஸ்மா ச ரேவதோ, ஆயஸ்மா ச உபாலி, ஆயஸ்மா ச ஆனந்தோ³, ஆயஸ்மா ச ராஹுலோ, காஸீஸு சாரிகங் சரமானா யேன மச்சி²காஸண்டோ³ தத³வஸருங்.
Tena kho pana samayena sambahulā therā bhikkhū, āyasmā ca sāriputto, āyasmā ca mahāmoggallāno, āyasmā ca mahākaccāno, āyasmā ca mahākoṭṭhiko , āyasmā ca mahākappino, āyasmā ca mahācundo, āyasmā ca anuruddho, āyasmā ca revato, āyasmā ca upāli, āyasmā ca ānando, āyasmā ca rāhulo, kāsīsu cārikaṃ caramānā yena macchikāsaṇḍo tadavasaruṃ.
அஸ்ஸோஸி கோ² சித்தோ க³ஹபதி தே²ரா கிர பி⁴க்கூ² மச்சி²காஸண்ட³ங் அனுப்பத்தாதி. அத² கோ² சித்தோ க³ஹபதி யேன தே²ரா பி⁴க்கூ² தேனுபஸங்கமி , உபஸங்கமித்வா தே²ரே பி⁴க்கூ² அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² சித்தங் க³ஹபதிங் ஆயஸ்மா ஸாரிபுத்தோ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி.
Assosi kho citto gahapati therā kira bhikkhū macchikāsaṇḍaṃ anuppattāti. Atha kho citto gahapati yena therā bhikkhū tenupasaṅkami , upasaṅkamitvā there bhikkhū abhivādetvā ekamantaṃ nisīdi. Ekamantaṃ nisinnaṃ kho cittaṃ gahapatiṃ āyasmā sāriputto dhammiyā kathāya sandassesi samādapesi samuttejesi sampahaṃsesi.
அத² கோ² சித்தோ க³ஹபதி ஆயஸ்மதா ஸாரிபுத்தேன த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹங்ஸிதோ தே²ரே பி⁴க்கூ² ஏதத³வோச – ‘‘அதி⁴வாஸெந்து மே, ப⁴ந்தே, தே²ரா ஸ்வாதனாய ஆக³ந்துகப⁴த்த’’ந்தி. அதி⁴வாஸேஸுங் கோ² தே²ரா பி⁴க்கூ² 1 துண்ஹீபா⁴வேன.
Atha kho citto gahapati āyasmatā sāriputtena dhammiyā kathāya sandassito samādapito samuttejito sampahaṃsito there bhikkhū etadavoca – ‘‘adhivāsentu me, bhante, therā svātanāya āgantukabhatta’’nti. Adhivāsesuṃ kho therā bhikkhū 2 tuṇhībhāvena.
அத² கோ² சித்தோ க³ஹபதி தே²ரானங் பி⁴க்கூ²னங் அதி⁴வாஸனங் விதி³த்வா உட்டா²யாஸனா தே²ரே பி⁴க்கூ² அபி⁴வாதெ³த்வா பத³க்கி²ணங் கத்வா யேனாயஸ்மா ஸுத⁴ம்மோ தேனுபஸங்கமி, உபஸங்கமித்வா ஆயஸ்மந்தங் ஸுத⁴ம்மங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ கோ² சித்தோ க³ஹபதி ஆயஸ்மந்தங் ஸுத⁴ம்மங் ஏதத³வோச – ‘‘அதி⁴வாஸேது மே, ப⁴ந்தே, அய்யோ ஸுத⁴ம்மோ ஸ்வாதனாய ப⁴த்தங் ஸத்³தி⁴ங் தே²ரேஹீ’’தி. அத² கோ² ஆயஸ்மா ஸுத⁴ம்மோ ‘புப்³பே³ க்²வாயங் சித்தோ க³ஹபதி யதா³ ஸங்க⁴ங் வா க³ணங் வா புக்³க³லங் வா நிமந்தேதுகாமோ ந மங் அனபலோகெத்வா ஸங்க⁴ங் வா க³ணங் வா புக்³க³லங் வா நிமந்தேதி; ஸோதா³னி மங் அனபலோகெத்வா தே²ரே பி⁴க்கூ² நிமந்தேஸி; து³ட்டோ²தா³னாயங் சித்தோ க³ஹபதி அனபெக்கோ² விரத்தரூபோ மயீ’தி சித்தங் க³ஹபதிங் ஏதத³வோச – ‘‘அலங், க³ஹபதி, நாதி⁴வாஸேமீ’’தி. து³தியம்பி கோ²…பே॰… ததியம்பி கோ² சித்தோ க³ஹபதி ஆயஸ்மந்தங் ஸுத⁴ம்மங் ஏதத³வோச – ‘‘அதி⁴வாஸேது மே, ப⁴ந்தே, அய்யோ ஸுத⁴ம்மோ ஸ்வாதனாய ப⁴த்தங் ஸத்³தி⁴ங் தே²ரேஹீ’’தி. ‘‘அலங், க³ஹபதி, நாதி⁴வாஸேமீ’’தி. அத² கோ² சித்தோ க³ஹபதி ‘கிங் மே கரிஸ்ஸதி அய்யோ ஸுத⁴ம்மோ அதி⁴வாஸெந்தோ வா அனதி⁴வாஸெந்தோ வா’தி ஆயஸ்மந்தங் ஸுத⁴ம்மங் அபி⁴வாதெ³த்வா பத³க்கி²ணங் கத்வா பக்காமி.
Atha kho citto gahapati therānaṃ bhikkhūnaṃ adhivāsanaṃ viditvā uṭṭhāyāsanā there bhikkhū abhivādetvā padakkhiṇaṃ katvā yenāyasmā sudhammo tenupasaṅkami, upasaṅkamitvā āyasmantaṃ sudhammaṃ abhivādetvā ekamantaṃ aṭṭhāsi. Ekamantaṃ ṭhito kho citto gahapati āyasmantaṃ sudhammaṃ etadavoca – ‘‘adhivāsetu me, bhante, ayyo sudhammo svātanāya bhattaṃ saddhiṃ therehī’’ti. Atha kho āyasmā sudhammo ‘pubbe khvāyaṃ citto gahapati yadā saṅghaṃ vā gaṇaṃ vā puggalaṃ vā nimantetukāmo na maṃ anapaloketvā saṅghaṃ vā gaṇaṃ vā puggalaṃ vā nimanteti; sodāni maṃ anapaloketvā there bhikkhū nimantesi; duṭṭhodānāyaṃ citto gahapati anapekkho virattarūpo mayī’ti cittaṃ gahapatiṃ etadavoca – ‘‘alaṃ, gahapati, nādhivāsemī’’ti. Dutiyampi kho…pe… tatiyampi kho citto gahapati āyasmantaṃ sudhammaṃ etadavoca – ‘‘adhivāsetu me, bhante, ayyo sudhammo svātanāya bhattaṃ saddhiṃ therehī’’ti. ‘‘Alaṃ, gahapati, nādhivāsemī’’ti. Atha kho citto gahapati ‘kiṃ me karissati ayyo sudhammo adhivāsento vā anadhivāsento vā’ti āyasmantaṃ sudhammaṃ abhivādetvā padakkhiṇaṃ katvā pakkāmi.
34. அத² கோ² சித்தோ க³ஹபதி தஸ்ஸா ரத்தியா அச்சயேன தே²ரானங் பி⁴க்கூ²னங் பணீதங் கா²த³னீயங் போ⁴ஜனீயங் படியாதா³பேஸி. அத² கோ² ஆயஸ்மா ஸுத⁴ம்மோ ‘யங்னூனாஹங் சித்தஸ்ஸ க³ஹபதினோ தே²ரானங் பி⁴க்கூ²னங் படியத்தங் பஸ்ஸெய்ய’ந்தி புப்³ப³ண்ஹஸமயங் நிவாஸெத்வா பத்தசீவரமாதா³ய யேன சித்தஸ்ஸ க³ஹபதினோ நிவேஸனங் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³. அத² கோ² சித்தோ க³ஹபதி யேனாயஸ்மா ஸுத⁴ம்மோ தேனுபஸங்கமி, உபஸங்கமித்வா ஆயஸ்மந்தங் ஸுத⁴ம்மங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² சித்தங் க³ஹபதிங் ஆயஸ்மா ஸுத⁴ம்மோ ஏதத³வோச – ‘‘பஹூதங் கோ² தே இத³ங், க³ஹபதி, கா²த³னீயங் போ⁴ஜனீயங் படியத்தங்; ஏகா ச கோ² இத⁴ நத்தி² யதி³த³ங் திலஸங்கு³ளிகா’’தி. ‘‘ப³ஹும்ஹி வத, ப⁴ந்தே, ரதனே பு³த்³த⁴வசனே 3 விஜ்ஜமானே அய்யேன ஸுத⁴ம்மேன யதே³வ கிஞ்சி பா⁴ஸிதங் யதி³த³ங் திலஸங்கு³ளிகாதி. பூ⁴தபுப்³ப³ங், ப⁴ந்தே, த³க்கி²ணாபத²கா வாணிஜா புரத்தி²மங் ஜனபத³ங் அக³மங்ஸு வாணிஜ்ஜாய. தே ததோ குக்குடிங் ஆனேஸுங். அத² கோ² ஸா, ப⁴ந்தே, குக்குடீ காகேன ஸத்³தி⁴ங் ஸங்வாஸங் கப்பேஸி. ஸா போதகங் ஜனேஸி. யதா³ கோ² ஸோ, ப⁴ந்தே, குக்குடபோதகோ காகவஸ்ஸங் வஸ்ஸிதுகாமோ ஹோதி, காககுக்குடீதி வஸ்ஸதி; யதா³ குக்குடிவஸ்ஸங் வஸ்ஸிதுகாமோ ஹோதி, குக்குடிகாகாதி வஸ்ஸதி. ஏவமேவ கோ², ப⁴ந்தே, ப³ஹும்ஹி ரதனே பு³த்³த⁴வசனே விஜ்ஜமானே அய்யேன ஸுத⁴ம்மேன யதே³வ கிஞ்சி பா⁴ஸிதங் யதி³த³ங் திலஸங்கு³ளிகா’’தி. ‘‘அக்கோஸஸி மங் த்வங், க³ஹபதி, பரிபா⁴ஸஸி மங் த்வங், க³ஹபதி. ஏஸோ தே, க³ஹபதி, ஆவாஸோ, பக்கமிஸ்ஸாமீ’’தி. ‘‘நாஹங், ப⁴ந்தே, அய்யங் ஸுத⁴ம்மங் அக்கோஸாமி, பரிபா⁴ஸாமி 4. வஸது, ப⁴ந்தே, அய்யோ ஸுத⁴ம்மோ மச்சி²காஸண்டே³. ரமணீயங் அம்பா³டகவனங். அஹங் அய்யஸ்ஸ ஸுத⁴ம்மஸ்ஸ உஸ்ஸுக்கங் கரிஸ்ஸாமி, சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரான’’ந்தி. து³தியம்பி கோ²…பே॰… ததியம்பி கோ² ஆயஸ்மா ஸுத⁴ம்மோ சித்தங் க³ஹபதிங் ஏதத³வோச – ‘‘அக்கோஸஸி மங் த்வங், க³ஹபதி, பரிபா⁴ஸஸி மங் த்வங், க³ஹபதி. ஏஸோ தே, க³ஹபதி, ஆவாஸோ, பக்கமிஸ்ஸாமீ’’தி. ‘‘கஹங், ப⁴ந்தே, அய்யோ ஸுத⁴ம்மோ க³மிஸ்ஸதீ’’தி? ‘‘ஸாவத்தி²ங் கோ² அஹங், க³ஹபதி, க³மிஸ்ஸாமி ப⁴க³வந்தங் த³ஸ்ஸனாயா’’தி. ‘‘தேன ஹி, ப⁴ந்தே, யஞ்ச அத்தனா ப⁴ணிதங், யஞ்ச மயா ப⁴ணிதங் தங் ஸப்³ப³ங் ப⁴க³வதோ ஆரோசேஹி. அனச்ச²ரியங் கோ² பனேதங், ப⁴ந்தே, யங் அய்யோ ஸுத⁴ம்மோ புனதே³வ மச்சி²காஸண்ட³ங் பச்சாக³ச்செ²ய்யா’’தி.
34. Atha kho citto gahapati tassā rattiyā accayena therānaṃ bhikkhūnaṃ paṇītaṃ khādanīyaṃ bhojanīyaṃ paṭiyādāpesi. Atha kho āyasmā sudhammo ‘yaṃnūnāhaṃ cittassa gahapatino therānaṃ bhikkhūnaṃ paṭiyattaṃ passeyya’nti pubbaṇhasamayaṃ nivāsetvā pattacīvaramādāya yena cittassa gahapatino nivesanaṃ tenupasaṅkami, upasaṅkamitvā paññatte āsane nisīdi. Atha kho citto gahapati yenāyasmā sudhammo tenupasaṅkami, upasaṅkamitvā āyasmantaṃ sudhammaṃ abhivādetvā ekamantaṃ nisīdi. Ekamantaṃ nisinnaṃ kho cittaṃ gahapatiṃ āyasmā sudhammo etadavoca – ‘‘pahūtaṃ kho te idaṃ, gahapati, khādanīyaṃ bhojanīyaṃ paṭiyattaṃ; ekā ca kho idha natthi yadidaṃ tilasaṅguḷikā’’ti. ‘‘Bahumhi vata, bhante, ratane buddhavacane 5 vijjamāne ayyena sudhammena yadeva kiñci bhāsitaṃ yadidaṃ tilasaṅguḷikāti. Bhūtapubbaṃ, bhante, dakkhiṇāpathakā vāṇijā puratthimaṃ janapadaṃ agamaṃsu vāṇijjāya. Te tato kukkuṭiṃ ānesuṃ. Atha kho sā, bhante, kukkuṭī kākena saddhiṃ saṃvāsaṃ kappesi. Sā potakaṃ janesi. Yadā kho so, bhante, kukkuṭapotako kākavassaṃ vassitukāmo hoti, kākakukkuṭīti vassati; yadā kukkuṭivassaṃ vassitukāmo hoti, kukkuṭikākāti vassati. Evameva kho, bhante, bahumhi ratane buddhavacane vijjamāne ayyena sudhammena yadeva kiñci bhāsitaṃ yadidaṃ tilasaṃguḷikā’’ti. ‘‘Akkosasi maṃ tvaṃ, gahapati, paribhāsasi maṃ tvaṃ, gahapati. Eso te, gahapati, āvāso, pakkamissāmī’’ti. ‘‘Nāhaṃ, bhante, ayyaṃ sudhammaṃ akkosāmi, paribhāsāmi 6. Vasatu, bhante, ayyo sudhammo macchikāsaṇḍe. Ramaṇīyaṃ ambāṭakavanaṃ. Ahaṃ ayyassa sudhammassa ussukkaṃ karissāmi, cīvarapiṇḍapātasenāsanagilānappaccayabhesajjaparikkhārāna’’nti. Dutiyampi kho…pe… tatiyampi kho āyasmā sudhammo cittaṃ gahapatiṃ etadavoca – ‘‘akkosasi maṃ tvaṃ, gahapati, paribhāsasi maṃ tvaṃ, gahapati. Eso te, gahapati, āvāso, pakkamissāmī’’ti. ‘‘Kahaṃ, bhante, ayyo sudhammo gamissatī’’ti? ‘‘Sāvatthiṃ kho ahaṃ, gahapati, gamissāmi bhagavantaṃ dassanāyā’’ti. ‘‘Tena hi, bhante, yañca attanā bhaṇitaṃ, yañca mayā bhaṇitaṃ taṃ sabbaṃ bhagavato ārocehi. Anacchariyaṃ kho panetaṃ, bhante, yaṃ ayyo sudhammo punadeva macchikāsaṇḍaṃ paccāgaccheyyā’’ti.
35. அத² கோ² ஆயஸ்மா ஸுத⁴ம்மோ ஸேனாஸனங் ஸங்ஸாமெத்வா பத்தசீவரமாதா³ய யேன ஸாவத்தி² தேன பக்காமி. அனுபுப்³பே³ன யேன ஸாவத்தி² ஜேதவனங் அனாத²பிண்டி³கஸ்ஸ ஆராமோ யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஸுத⁴ம்மோ யஞ்ச அத்தனா ப⁴ணிதங் யஞ்ச சித்தேன க³ஹபதினா ப⁴ணிதங் தங் ஸப்³ப³ங் ப⁴க³வதோ ஆரோசேஸி.
35. Atha kho āyasmā sudhammo senāsanaṃ saṃsāmetvā pattacīvaramādāya yena sāvatthi tena pakkāmi. Anupubbena yena sāvatthi jetavanaṃ anāthapiṇḍikassa ārāmo yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sudhammo yañca attanā bhaṇitaṃ yañca cittena gahapatinā bhaṇitaṃ taṃ sabbaṃ bhagavato ārocesi.
விக³ரஹி பு³த்³தோ⁴ ப⁴க³வா – ‘‘அனநுச்ச²விகங், மோக⁴புரிஸ, அனநுலோமிகங் அப்பதிரூபங் அஸ்ஸாமணகங் அகப்பியங் அகரணீயங். கத²ஞ்ஹி நாம த்வங், மோக⁴புரிஸ, சித்தங் க³ஹபதிங் ஸத்³த⁴ங் பஸன்னங் தா³யகங் காரகங் ஸங்கு⁴பட்டா²கங் ஹீனேன கு²ங்ஸெஸ்ஸஸி, ஹீனேன வம்பெ⁴ஸ்ஸஸி? நேதங், மோக⁴புரிஸ, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – தேன ஹி, பி⁴க்க²வே, ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மங் கரோது – சித்தோ தே க³ஹபதி க²மாபேதப்³போ³தி. ஏவஞ்ச பன, பி⁴க்க²வே, காதப்³ப³ங் – பட²மங் ஸுத⁴ம்மோ பி⁴க்கு² சோதே³தப்³போ³, சோதெ³த்வா ஸாரேதப்³போ³, ஸாரெத்வா ஆபத்திங் ஆரோபேதப்³போ³, ஆபத்திங் ஆரோபெத்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, cittaṃ gahapatiṃ saddhaṃ pasannaṃ dāyakaṃ kārakaṃ saṅghupaṭṭhākaṃ hīnena khuṃsessasi, hīnena vambhessasi? Netaṃ, moghapurisa, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – tena hi, bhikkhave, saṅgho sudhammassa bhikkhuno paṭisāraṇīyakammaṃ karotu – citto te gahapati khamāpetabboti. Evañca pana, bhikkhave, kātabbaṃ – paṭhamaṃ sudhammo bhikkhu codetabbo, codetvā sāretabbo, sāretvā āpattiṃ āropetabbo, āpattiṃ āropetvā byattena bhikkhunā paṭibalena saṅgho ñāpetabbo –
36. ‘‘ஸுணாது மே, ப⁴ந்தே, ஸங்கோ⁴. அயங் ஸுத⁴ம்மோ பி⁴க்கு² சித்தங் க³ஹபதிங் ஸத்³த⁴ங் பஸன்னங் தா³யகங் காரகங் ஸங்கு⁴பட்டா²கங் ஹீனேன கு²ங்ஸேதி, ஹீனேன வம்பே⁴தி. யதி³ ஸங்க⁴ஸ்ஸ பத்தகல்லங், ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மங் கரெய்ய – சித்தோ தே க³ஹபதி க²மாபேதப்³போ³தி. ஏஸா ஞத்தி.
36. ‘‘Suṇātu me, bhante, saṅgho. Ayaṃ sudhammo bhikkhu cittaṃ gahapatiṃ saddhaṃ pasannaṃ dāyakaṃ kārakaṃ saṅghupaṭṭhākaṃ hīnena khuṃseti, hīnena vambheti. Yadi saṅghassa pattakallaṃ, saṅgho sudhammassa bhikkhuno paṭisāraṇīyakammaṃ kareyya – citto te gahapati khamāpetabboti. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் ஸுத⁴ம்மோ பி⁴க்கு² சித்தங் க³ஹபதிங் ஸத்³த⁴ங் பஸன்னங் தா³யகங் காரகங் ஸங்கு⁴பட்டா²கங் ஹீனேன கு²ங்ஸேதி, ஹீனேன வம்பே⁴தி. ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மங் கரோதி – சித்தோ தே க³ஹபதி க²மாபேதப்³போ³தி. யஸ்ஸாயஸ்மதோ க²மதி ஸுத⁴ம்மஸ்ஸ பி⁴க்கு²னோ படிஸாரணீயஸ்ஸ கம்மஸ்ஸ கரணங் – சித்தோ தே க³ஹபதி க²மாபேதப்³போ³தி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ sudhammo bhikkhu cittaṃ gahapatiṃ saddhaṃ pasannaṃ dāyakaṃ kārakaṃ saṅghupaṭṭhākaṃ hīnena khuṃseti, hīnena vambheti. Saṅgho sudhammassa bhikkhuno paṭisāraṇīyakammaṃ karoti – citto te gahapati khamāpetabboti. Yassāyasmato khamati sudhammassa bhikkhuno paṭisāraṇīyassa kammassa karaṇaṃ – citto te gahapati khamāpetabboti, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴. அயங் ஸுத⁴ம்மோ பி⁴க்கு² சித்தங் க³ஹபதிங் ஸத்³த⁴ங் பஸன்னங் தா³யகங் காரகங் ஸங்கு⁴பட்டா²கங் ஹீனேன கு²ங்ஸேதி, ஹீனேன வம்பே⁴தி. ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மங் கரோதி – சித்தோ தே க³ஹபதி க²மாபேதப்³போ³தி. யஸ்ஸாயஸ்மதோ க²மதி ஸுத⁴ம்மஸ்ஸ பி⁴க்கு²னோ படிஸாரணீயஸ்ஸ கம்மஸ்ஸ கரணங் – சித்தோ தே க³ஹபதி க²மாபேதப்³போ³தி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ sudhammo bhikkhu cittaṃ gahapatiṃ saddhaṃ pasannaṃ dāyakaṃ kārakaṃ saṅghupaṭṭhākaṃ hīnena khuṃseti, hīnena vambheti. Saṅgho sudhammassa bhikkhuno paṭisāraṇīyakammaṃ karoti – citto te gahapati khamāpetabboti. Yassāyasmato khamati sudhammassa bhikkhuno paṭisāraṇīyassa kammassa karaṇaṃ – citto te gahapati khamāpetabboti, so tuṇhassa; yassa nakkhamati, so bhāseyya.
‘‘கதங் ஸங்கே⁴ன ஸுத⁴ம்மஸ்ஸ பி⁴க்கு²னோ படிஸாரணீயகம்மங் – சித்தோ தே க³ஹபதி க²மாபேதப்³போ³தி. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Kataṃ saṅghena sudhammassa bhikkhuno paṭisāraṇīyakammaṃ – citto te gahapati khamāpetabboti. Khamati saṅghassa, tasmā tuṇhī, evametaṃ dhārayāmī’’ti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / படிஸாரணீயகம்மகதா² • Paṭisāraṇīyakammakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / படிஸாரணீயகம்மகதா²வண்ணனா • Paṭisāraṇīyakammakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / நியஸ்ஸகம்மகதா²தி³வண்ணனா • Niyassakammakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. படிஸாரணீயகம்மகதா² • 4. Paṭisāraṇīyakammakathā
