| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೨೫೯. ಪಟಿಸಾರಣೀಯಕಮ್ಮವಿವಾದಕಥಾ
259. Paṭisāraṇīyakammavivādakathā
೪೩೬. ಇಧ ಪನ, ಭಿಕ್ಖವೇ, ಭಿಕ್ಖು ಗಿಹೀ ಅಕ್ಕೋಸತಿ ಪರಿಭಾಸತಿ। ತತ್ರ ಚೇ ಭಿಕ್ಖೂನಂ ಏವಂ ಹೋತಿ – ‘‘ಅಯಂ ಖೋ, ಆವುಸೋ, ಭಿಕ್ಖು ಗಿಹೀ ಅಕ್ಕೋಸತಿ ಪರಿಭಾಸತಿ। ಹನ್ದಸ್ಸ ಮಯಂ ಪಟಿಸಾರಣೀಯಕಮ್ಮಂ ಕರೋಮಾ’’ತಿ। ತೇ ತಸ್ಸ ಪಟಿಸಾರಣೀಯಕಮ್ಮಂ ಕರೋನ್ತಿ – ಅಧಮ್ಮೇನ ವಗ್ಗಾ…ಪೇ॰… ಅಧಮ್ಮೇನ ಸಮಗ್ಗಾ… ಧಮ್ಮೇನ ವಗ್ಗಾ… ಧಮ್ಮಪತಿರೂಪಕೇನ ವಗ್ಗಾ… ಧಮ್ಮಪತಿರೂಪಕೇನ ಸಮಗ್ಗಾ। ತತ್ರಟ್ಠೋ ಸಙ್ಘೋ ವಿವದತಿ – ‘‘ಅಧಮ್ಮೇನ ವಗ್ಗಕಮ್ಮಂ, ಅಧಮ್ಮೇನ ಸಮಗ್ಗಕಮ್ಮಂ, ಧಮ್ಮೇನ ವಗ್ಗಕಮ್ಮಂ, ಧಮ್ಮಪತಿರೂಪಕೇನ ವಗ್ಗಕಮ್ಮಂ, ಧಮ್ಮಪತಿರೂಪಕೇನ ಸಮಗ್ಗಕಮ್ಮಂ, ಅಕತಂ ಕಮ್ಮಂ ದುಕ್ಕಟಂ ಕಮ್ಮಂ ಪುನ ಕಾತಬ್ಬಂ ಕಮ್ಮ’’ನ್ತಿ। ತತ್ರ, ಭಿಕ್ಖವೇ, ಯೇ ತೇ ಭಿಕ್ಖೂ ಏವಮಾಹಂಸು – ‘‘ಧಮ್ಮಪತಿರೂಪಕೇನ ಸಮಗ್ಗಕಮ್ಮ’’ನ್ತಿ, ಯೇ ಚ ತೇ ಭಿಕ್ಖೂ ಏವಮಾಹಂಸು – ‘‘ಅಕತಂ ಕಮ್ಮಂ ದುಕ್ಕಟಂ ಕಮ್ಮಂ ಪುನ ಕಾತಬ್ಬಂ ಕಮ್ಮ’’ನ್ತಿ, ಇಮೇ ತತ್ಥ ಭಿಕ್ಖೂ ಧಮ್ಮವಾದಿನೋ। ಇಮೇ ಪಞ್ಚ ವಾರಾ ಸಂಖಿತ್ತಾ।
436. Idha pana, bhikkhave, bhikkhu gihī akkosati paribhāsati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu gihī akkosati paribhāsati. Handassa mayaṃ paṭisāraṇīyakammaṃ karomā’’ti. Te tassa paṭisāraṇīyakammaṃ karonti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Ime pañca vārā saṃkhittā.
ಪಟಿಸಾರಣೀಯಕಮ್ಮವಿವಾದಕಥಾ ನಿಟ್ಠಿತಾ।
Paṭisāraṇīyakammavivādakathā niṭṭhitā.
