| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. පටිසාරණීයසුත්‌තං
9. Paṭisāraṇīyasuttaṃ
89. 1 ‘‘අට්‌ඨහි, භික්‌ඛවෙ, ධම්‌මෙහි සමන්‌නාගතස්‌ස භික්‌ඛුනො ආකඞ්‌ඛමානො සඞ්‌ඝො පටිසාරණීයකම්‌මං කරෙය්‍ය. කතමෙහි අට්‌ඨහි? ගිහීනං අලාභාය පරිසක්‌කති, ගිහීනං අනත්‌ථාය පරිසක්‌කති, ගිහී අක්‌කොසති පරිභාසති, ගිහී ගිහීහි භෙදෙති, බුද්‌ධස්‌ස අවණ්‌ණං භාසති, ධම්‌මස්‌ස අවණ්‌ණං භාසති, සඞ්‌ඝස්‌ස අවණ්‌ණං භාසති, ධම්‌මිකඤ්‌ච ගිහිපටිස්‌සවං න සච්‌චාපෙති. ඉමෙහි ඛො, භික්‌ඛවෙ, අට්‌ඨහි ධම්‌මෙහි සමන්‌නාගතස්‌ස භික්‌ඛුනො ආකඞ්‌ඛමානො සඞ්‌ඝො පටිසාරණීයං කම්‌මං කරෙය්‍ය.
89.2 ‘‘Aṭṭhahi, bhikkhave, dhammehi samannāgatassa bhikkhuno ākaṅkhamāno saṅgho paṭisāraṇīyakammaṃ kareyya. Katamehi aṭṭhahi? Gihīnaṃ alābhāya parisakkati, gihīnaṃ anatthāya parisakkati, gihī akkosati paribhāsati, gihī gihīhi bhedeti, buddhassa avaṇṇaṃ bhāsati, dhammassa avaṇṇaṃ bhāsati, saṅghassa avaṇṇaṃ bhāsati, dhammikañca gihipaṭissavaṃ na saccāpeti. Imehi kho, bhikkhave, aṭṭhahi dhammehi samannāgatassa bhikkhuno ākaṅkhamāno saṅgho paṭisāraṇīyaṃ kammaṃ kareyya.
‘‘අට්‌ඨහි, භික්‌ඛවෙ, ධම්‌මෙහි සමන්‌නාගතස්‌ස භික්‌ඛුනො ආකඞ්‌ඛමානො සඞ්‌ඝො පටිසාරණීයකම්‌මං පටිප්‌පස්‌සම්‌භෙය්‍ය. කතමෙහි අට්‌ඨහි? න ගිහීනං අලාභාය පරිසක්‌කති, න ගිහීනං අනත්‌ථාය පරිසක්‌කති, න ගිහී අක්‌කොසති පරිභාසති, න ගිහී ගිහීහි භෙදෙති, බුද්‌ධස්‌ස වණ්‌ණං භාසති, ධම්‌මස්‌ස වණ්‌ණං භාසති, සඞ්‌ඝස්‌ස වණ්‌ණං භාසති, ධම්‌මිකඤ්‌ච ගිහිපටිස්‌සවං සච්‌චාපෙති . ඉමෙහි ඛො, භික්‌ඛවෙ, අට්‌ඨහි ධම්‌මෙහි සමන්‌නාගතස්‌ස භික්‌ඛුනො ආකඞ්‌ඛමානො සඞ්‌ඝො පටිසාරණීයකම්‌මං පටිප්‌පස්‌සම්‌භෙය්‍යා’’ති. නවමං.
‘‘Aṭṭhahi, bhikkhave, dhammehi samannāgatassa bhikkhuno ākaṅkhamāno saṅgho paṭisāraṇīyakammaṃ paṭippassambheyya. Katamehi aṭṭhahi? Na gihīnaṃ alābhāya parisakkati, na gihīnaṃ anatthāya parisakkati, na gihī akkosati paribhāsati, na gihī gihīhi bhedeti, buddhassa vaṇṇaṃ bhāsati, dhammassa vaṇṇaṃ bhāsati, saṅghassa vaṇṇaṃ bhāsati, dhammikañca gihipaṭissavaṃ saccāpeti . Imehi kho, bhikkhave, aṭṭhahi dhammehi samannāgatassa bhikkhuno ākaṅkhamāno saṅgho paṭisāraṇīyakammaṃ paṭippassambheyyā’’ti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. පටිසාරණීයසුත්‌තවණ්‌ණනා • 9. Paṭisāraṇīyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. සද්‌ධාසුත්‌තාදිවණ්‌ණනා • 1-10. Saddhāsuttādivaṇṇanā
