| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১১৮. পটিস্সৰদুক্কটাপত্তি
118. Paṭissavadukkaṭāpatti
২০৬. তেন খো পন সমযেন আযস্মতা উপনন্দেন সক্যপুত্তেন রঞ্ঞো পসেনদিস্স কোসলস্স ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো অদ্দস অন্তরামগ্গে দ্ৰে আৰাসে বহুচীৰরকে। তস্স এতদহোসি – ‘‘যংনূনাহং ইমেসু দ্ৰীসু আৰাসেসু ৰস্সং ৰসেয্যং। এৰং মে বহুং চীৰরং 1 উপ্পজ্জিস্সতী’’তি। সো তেসু দ্ৰীসু আৰাসেসু ৰস্সং ৰসি। রাজা পসেনদি কোসলো উজ্ঝাযতি খিয্যতি ৰিপাচেতি – ‘‘কথঞ্হি নাম অয্যো উপনন্দো সক্যপুত্তো অম্হাকং ৰস্সাৰাসং পটিস্সুণিত্ৰা ৰিসংৰাদেস্সতি। ননু ভগৰতা অনেকপরিযাযেন মুসাৰাদো গরহিতো, মুসাৰাদা ৰেরমণী পসত্থা’’তি। অস্সোসুং খো ভিক্খূ রঞ্ঞো পসেনদিস্স কোসলস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো রঞ্ঞো পসেনদিস্স কোসলস্স ৰস্সাৰাসং পটিস্সুণিত্ৰা ৰিসংৰাদেস্সতি। ননু ভগৰতা অনেকপরিযাযেন মুসাৰাদো গরহিতো, মুসাৰাদা ৰেরমণী পসত্থা’’তি। অথ খো তে ভিক্খূ ভগৰতো এতমত্থং আরোচেসুং…পে॰… অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং উপনন্দং সক্যপুত্তং পটিপুচ্ছি – ‘‘সচ্চং কির ত্ৰং, উপনন্দ, রঞ্ঞো পসেনদিস্স কোসলস্স ৰস্সাৰাসং পটিস্সুণিত্ৰা ৰিসংৰাদেসী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, রঞ্ঞো পসেনদিস্স কোসলস্স ৰস্সাৰাসং পটিস্সুণিত্ৰা ৰিসংৰাদেস্সসি। ননু মযা, মোঘপুরিস, অনেকপরিযাযেন মুসাৰাদো গরহিতো, মুসাৰাদা ৰেরমণী পসত্থা। নেতং, মোঘপুরিস, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি –
206. Tena kho pana samayena āyasmatā upanandena sakyaputtena rañño pasenadissa kosalassa vassāvāso paṭissuto hoti purimikāya. So taṃ āvāsaṃ gacchanto addasa antarāmagge dve āvāse bahucīvarake. Tassa etadahosi – ‘‘yaṃnūnāhaṃ imesu dvīsu āvāsesu vassaṃ vaseyyaṃ. Evaṃ me bahuṃ cīvaraṃ 2 uppajjissatī’’ti. So tesu dvīsu āvāsesu vassaṃ vasi. Rājā pasenadi kosalo ujjhāyati khiyyati vipāceti – ‘‘kathañhi nāma ayyo upanando sakyaputto amhākaṃ vassāvāsaṃ paṭissuṇitvā visaṃvādessati. Nanu bhagavatā anekapariyāyena musāvādo garahito, musāvādā veramaṇī pasatthā’’ti. Assosuṃ kho bhikkhū rañño pasenadissa kosalassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto rañño pasenadissa kosalassa vassāvāsaṃ paṭissuṇitvā visaṃvādessati. Nanu bhagavatā anekapariyāyena musāvādo garahito, musāvādā veramaṇī pasatthā’’ti. Atha kho te bhikkhū bhagavato etamatthaṃ ārocesuṃ…pe… atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ upanandaṃ sakyaputtaṃ paṭipucchi – ‘‘saccaṃ kira tvaṃ, upananda, rañño pasenadissa kosalassa vassāvāsaṃ paṭissuṇitvā visaṃvādesī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, rañño pasenadissa kosalassa vassāvāsaṃ paṭissuṇitvā visaṃvādessasi. Nanu mayā, moghapurisa, anekapariyāyena musāvādo garahito, musāvādā veramaṇī pasatthā. Netaṃ, moghapurisa, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi –
২০৭. ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো পস্সতি অন্তরামগ্গে দ্ৰে আৰাসে বহুচীৰরকে। তস্স এৰং হোতি – ‘‘যংনূনাহং ইমেসু দ্ৰীসু আৰাসেসু ৰস্সং ৰসেয্যং। এৰং মে বহুং চীৰরং উপ্পজ্জিস্সতী’’তি। সো তেসু দ্ৰীসু আৰাসেসু ৰস্সং ৰসতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
207. Idha pana, bhikkhave, bhikkhunā vassāvāso paṭissuto hoti purimikāya. So taṃ āvāsaṃ gacchanto passati antarāmagge dve āvāse bahucīvarake. Tassa evaṃ hoti – ‘‘yaṃnūnāhaṃ imesu dvīsu āvāsesu vassaṃ vaseyyaṃ. Evaṃ me bahuṃ cīvaraṃ uppajjissatī’’ti. So tesu dvīsu āvāsesu vassaṃ vasati. Tassa, bhikkhave, bhikkhuno purimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে 3 ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ অকরণীযো পক্কমতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti purimikāya. So taṃ āvāsaṃ gacchanto bahiddhā uposathaṃ karoti, pāṭipade 4 vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So tadaheva akaraṇīyo pakkamati. Tassa, bhikkhave, bhikkhuno purimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ সকরণীযো পক্কমতি। তস্স , ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti purimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So tadaheva sakaraṇīyo pakkamati. Tassa , bhikkhave, bhikkhuno purimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা অকরণীযো পক্কমতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti purimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So dvīhatīhaṃ vasitvā akaraṇīyo pakkamati. Tassa, bhikkhave, bhikkhuno purimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সকরণীযো পক্কমতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti purimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So dvīhatīhaṃ vasitvā sakaraṇīyo pakkamati. Tassa, bhikkhave, bhikkhuno purimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং বহিদ্ধা ৰীতিনামেতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti purimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So dvīhatīhaṃ vasitvā sattāhakaraṇīyena pakkamati. So taṃ sattāhaṃ bahiddhā vītināmeti. Tassa, bhikkhave, bhikkhuno purimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সত্তাহকরণীযেন পক্কমতি । সো তং সত্তাহং অন্তো সন্নিৰত্তং করোতি। তস্স, ভিক্খৰে, ভিক্খুনো পুরিমিকা চ পঞ্ঞাযতি, পটিস্সৰে চ অনাপত্তি।
Idha pana, bhikkhave, bhikkhunā vassāvāso paṭissuto hoti purimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So dvīhatīhaṃ vasitvā sattāhakaraṇīyena pakkamati . So taṃ sattāhaṃ anto sannivattaṃ karoti. Tassa, bhikkhave, bhikkhuno purimikā ca paññāyati, paṭissave ca anāpatti.
ইধ পন, ভিক্খৰে , ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি , পরিৰেণং সম্মজ্জতি। সো সত্তাহং অনাগতায পৰারণায সকরণীযো পক্কমতি। আগচ্ছেয্য ৰা সো, ভিক্খৰে, ভিক্খু তং আৰাসং ন ৰা আগচ্ছেয্য, তস্স, ভিক্খৰে, ভিক্খুনো পুরিমিকা চ পঞ্ঞাযতি, পটিস্সৰে চ অনাপত্তি।
Idha pana, bhikkhave , bhikkhunā vassāvāso paṭissuto hoti purimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti , pariveṇaṃ sammajjati. So sattāhaṃ anāgatāya pavāraṇāya sakaraṇīyo pakkamati. Āgaccheyya vā so, bhikkhave, bhikkhu taṃ āvāsaṃ na vā āgaccheyya, tassa, bhikkhave, bhikkhuno purimikā ca paññāyati, paṭissave ca anāpatti.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গন্ত্ৰা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ অকরণীযো পক্কমতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti purimikāya. So taṃ āvāsaṃ gantvā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So tadaheva akaraṇīyo pakkamati. Tassa, bhikkhave, bhikkhuno purimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গন্ত্ৰা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ সকরণীযো পক্কমতি…পে॰… সো দ্ৰীহতীহং ৰসিত্ৰা অকরণীযো পক্কমতি…পে॰… সো দ্ৰীহতীহং ৰসিত্ৰা সকরণীযো পক্কমতি…পে॰… সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং বহিদ্ধা ৰীতিনামেতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স…পে॰… সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং অন্তো সন্নিৰত্তং করোতি। তস্স, ভিক্খৰে, ভিক্খুনো পুরিমিকা চ পঞ্ঞাযতি, পটিস্সৰে চ অনাপত্তি…পে॰… সো সত্তাহং অনাগতায পৰারণায সকরণীযো পক্কমতি। আগচ্ছেয্য ৰা সো, ভিক্খৰে, ভিক্খু তং আৰাসং ন ৰা আগচ্ছেয্য, তস্স, ভিক্খৰে, ভিক্খুনো পুরিমিকা চ পঞ্ঞাযতি, পটিস্সৰে চ অনাপত্তি।
Idha pana, bhikkhave, bhikkhunā vassāvāso paṭissuto hoti purimikāya. So taṃ āvāsaṃ gantvā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So tadaheva sakaraṇīyo pakkamati…pe… so dvīhatīhaṃ vasitvā akaraṇīyo pakkamati…pe… so dvīhatīhaṃ vasitvā sakaraṇīyo pakkamati…pe… so dvīhatīhaṃ vasitvā sattāhakaraṇīyena pakkamati. So taṃ sattāhaṃ bahiddhā vītināmeti. Tassa, bhikkhave, bhikkhuno purimikā ca na paññāyati, paṭissave ca āpatti dukkaṭassa…pe… so dvīhatīhaṃ vasitvā sattāhakaraṇīyena pakkamati. So taṃ sattāhaṃ anto sannivattaṃ karoti. Tassa, bhikkhave, bhikkhuno purimikā ca paññāyati, paṭissave ca anāpatti…pe… so sattāhaṃ anāgatāya pavāraṇāya sakaraṇīyo pakkamati. Āgaccheyya vā so, bhikkhave, bhikkhu taṃ āvāsaṃ na vā āgaccheyya, tassa, bhikkhave, bhikkhuno purimikā ca paññāyati, paṭissave ca anāpatti.
২০৮. ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ অকরণীযো পক্কমতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
208. Idha pana, bhikkhave, bhikkhunā vassāvāso paṭissuto hoti pacchimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So tadaheva akaraṇīyo pakkamati. Tassa, bhikkhave, bhikkhuno pacchimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ সকরণীযো পক্কমতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti pacchimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So tadaheva sakaraṇīyo pakkamati. Tassa, bhikkhave, bhikkhuno pacchimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা অকরণীযো পক্কমতি । তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti pacchimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So dvīhatīhaṃ vasitvā akaraṇīyo pakkamati . Tassa, bhikkhave, bhikkhuno pacchimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সকরণীযো পক্কমতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti pacchimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So dvīhatīhaṃ vasitvā sakaraṇīyo pakkamati. Tassa, bhikkhave, bhikkhuno pacchimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং বহিদ্ধা ৰীতিনামেতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti pacchimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So dvīhatīhaṃ vasitvā sattāhakaraṇīyena pakkamati. So taṃ sattāhaṃ bahiddhā vītināmeti. Tassa, bhikkhave, bhikkhuno pacchimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং অন্তো সন্নিৰত্তং করোতি। তস্স, ভিক্খৰে, ভিক্খুনো পচ্ছিমিকা চ পঞ্ঞাযতি, পটিস্সৰে চ অনাপত্তি।
Idha pana, bhikkhave, bhikkhunā vassāvāso paṭissuto hoti pacchimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So dvīhatīhaṃ vasitvā sattāhakaraṇīyena pakkamati. So taṃ sattāhaṃ anto sannivattaṃ karoti. Tassa, bhikkhave, bhikkhuno pacchimikā ca paññāyati, paṭissave ca anāpatti.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো সত্তাহং অনাগতায কোমুদিযা চাতুমাসিনিযা সকরণীযো পক্কমতি। আগচ্ছেয্য ৰা সো, ভিক্খৰে, ভিক্খু তং আৰাসং ন ৰা আগচ্ছেয্য, তস্স, ভিক্খৰে, ভিক্খুনো পচ্ছিমিকা চ পঞ্ঞাযতি, পটিস্সৰে চ অনাপত্তি।
Idha pana, bhikkhave, bhikkhunā vassāvāso paṭissuto hoti pacchimikāya. So taṃ āvāsaṃ gacchanto bahiddhā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So sattāhaṃ anāgatāya komudiyā cātumāsiniyā sakaraṇīyo pakkamati. Āgaccheyya vā so, bhikkhave, bhikkhu taṃ āvāsaṃ na vā āgaccheyya, tassa, bhikkhave, bhikkhuno pacchimikā ca paññāyati, paṭissave ca anāpatti.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গন্ত্ৰা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ অকরণীযো পক্কমতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স।
Idha pana, bhikkhave, bhikkhunā vassāvāso paṭissuto hoti pacchimikāya. So taṃ āvāsaṃ gantvā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So tadaheva akaraṇīyo pakkamati. Tassa, bhikkhave, bhikkhuno pacchimikā ca na paññāyati, paṭissave ca āpatti dukkaṭassa.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গন্ত্ৰা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ সকরণীযো পক্কমতি…পে॰… সো দ্ৰীহতীহং ৰসিত্ৰা অকরণীযো পক্কমতি …পে॰… সো দ্ৰীহতীহং ৰসিত্ৰা সকরণীযো পক্কমতি…পে॰… সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং বহিদ্ধা ৰীতিনামেতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স…পে॰… সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং অন্তো সন্নিৰত্তং করোতি। তস্স ভিক্খৰে, ভিক্খুনো পচ্ছিমিকা চ পঞ্ঞাযতি, পটিস্সৰে চ অনাপত্তি।
Idha pana, bhikkhave, bhikkhunā vassāvāso paṭissuto hoti pacchimikāya. So taṃ āvāsaṃ gantvā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So tadaheva sakaraṇīyo pakkamati…pe… so dvīhatīhaṃ vasitvā akaraṇīyo pakkamati …pe… so dvīhatīhaṃ vasitvā sakaraṇīyo pakkamati…pe… so dvīhatīhaṃ vasitvā sattāhakaraṇīyena pakkamati. So taṃ sattāhaṃ bahiddhā vītināmeti. Tassa, bhikkhave, bhikkhuno pacchimikā ca na paññāyati, paṭissave ca āpatti dukkaṭassa…pe… so dvīhatīhaṃ vasitvā sattāhakaraṇīyena pakkamati. So taṃ sattāhaṃ anto sannivattaṃ karoti. Tassa bhikkhave, bhikkhuno pacchimikā ca paññāyati, paṭissave ca anāpatti.
ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গন্ত্ৰা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো সত্তাহং অনাগতায কোমুদিযা চাতুমাসিনিযা সকরণীযো পক্কমতি। আগচ্ছেয্য ৰা সো, ভিক্খৰে, ভিক্খু তং আৰাসং ন ৰা আগচ্ছেয্য, তস্স, ভিক্খৰে, ভিক্খুনো পচ্ছিমিকা চ পঞ্ঞাযতি, পটিস্সৰে চ অনাপত্তীতি।
Idha pana, bhikkhave, bhikkhunā vassāvāso paṭissuto hoti pacchimikāya. So taṃ āvāsaṃ gantvā uposathaṃ karoti, pāṭipade vihāraṃ upeti, senāsanaṃ paññapeti, pānīyaṃ paribhojanīyaṃ upaṭṭhāpeti, pariveṇaṃ sammajjati. So sattāhaṃ anāgatāya komudiyā cātumāsiniyā sakaraṇīyo pakkamati. Āgaccheyya vā so, bhikkhave, bhikkhu taṃ āvāsaṃ na vā āgaccheyya, tassa, bhikkhave, bhikkhuno pacchimikā ca paññāyati, paṭissave ca anāpattīti.
পটিস্সৰদুক্কটাপত্তি নিট্ঠিতা।
Paṭissavadukkaṭāpatti niṭṭhitā.
ৰস্সূপনাযিকক্খন্ধকো ততিযো।
Vassūpanāyikakkhandhako tatiyo.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / অধম্মিককতিকাদিকথা • Adhammikakatikādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পটিস্সৰদুক্কটাপত্তিকথাৰণ্ণনা • Paṭissavadukkaṭāpattikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধম্মিককতিকাদিকথাৰণ্ণনা • Adhammikakatikādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধম্মিককতিকাদিকথাৰণ্ণনা • Adhammikakatikādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১১৮. পটিস্সৰদুক্কটাপত্তিকথা • 118. Paṭissavadukkaṭāpattikathā
