| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
118. පටිස්‌සවදුක්‌කටාපත්‌තිකථා
118. Paṭissavadukkaṭāpattikathā
207. පටිස්‌සවෙ ආපත්‌ති දුක්‌කටස්‌සාති එත්‌ථ කිං වස්‌සාවාසපටිස්‌සුතෙයෙව දුක්‌කටාපත්‌ති හොතීති ආහ ‘‘න කෙවල’’න්‌තිආදි. එතස්‌සෙවාති වස්‌සාවාසස්‌සෙව. එවමාදිනාපීති පිසද්‌දො ‘‘පටිස්‌සවෙ’’ති එත්‌ථ යොජෙතබ්‌බො. ‘‘පටිස්‌සවෙපී’’ති හි අත්‌ථො. තස්‌ස තස්‌සාති කම්‌මස්‌ස. තඤ්‌ච ඛොති තඤ්‌ච දුක්‌කටං විසංවාදනපච්‌චයා හොතීති යොජනා. පඨමම්‌පීති පිසද්‌දො ‘‘පච්‌ඡාපී’’ති පදං සම්‌පිණ්‌ඩෙති. පඨමම්‌පි හි පාචිත්‌තියං, පච්‌ඡාපි දුක්‌කටන්‌ති අත්‌ථො.
207.Paṭissave āpatti dukkaṭassāti ettha kiṃ vassāvāsapaṭissuteyeva dukkaṭāpatti hotīti āha ‘‘na kevala’’ntiādi. Etassevāti vassāvāsasseva. Evamādināpīti pisaddo ‘‘paṭissave’’ti ettha yojetabbo. ‘‘Paṭissavepī’’ti hi attho. Tassa tassāti kammassa. Tañca khoti tañca dukkaṭaṃ visaṃvādanapaccayā hotīti yojanā. Paṭhamampīti pisaddo ‘‘pacchāpī’’ti padaṃ sampiṇḍeti. Paṭhamampi hi pācittiyaṃ, pacchāpi dukkaṭanti attho.
සො තදහෙව අකරණීයොතිආදීසු එවං විනිච්‌ඡයො වෙදිතබ්‌බොති යොජනා. පුරිමිකා ච න පඤ්‌ඤායතීති එත්‌ථ පුරෙ භවා පුරිමා, සා එව පුරිමිකා, පාටිපදතිථී. නානාසීමාය ද්‌වීසු ආවාසෙසු වස්‌සං උපගච්‌ඡන්‌තස්‌ස දුතියෙ ‘‘වසිස්‌සාමී’’ති පඨමාවාසස්‌ස උපචාරතො නික්‌ඛන්‌තමත්‌තෙ පඨමසෙනාසනග්‌ගාහස්‌ස පස්‌සම්‌භනං සන්‌ධාය වුත්‌තං ‘‘පුරිමිකා ච න පඤ්‌ඤායතී’’ති. අරුණං අනුට්‌ඨාපෙත්‌වාති වස්‌සං උපගමනවිහාරෙ අරුණං අනුට්‌ඨාපෙත්‌වා. තදහෙවාති තස්‌මිං වස්‌සූපගමනඅහනි එව, පක්‌කන්‌තස්‌සාපීති සම්‌බන්‌ධො. පිසද්‌දස්‌ස ගරහත්‌ථං දස්‌සෙන්‌තො ආහ ‘‘කො පන වාදො’’තිආදි. ආලයොති චිත්‌තස්‌ස අල්‌ලීයනං. අසතියාති සතිපමුට්‌ඨෙන. වස්‌සං න උපෙතීති ‘‘ඉමස්‌මිං විහාරෙ ඉමං තෙමාසං වස්‌සං උපෙමී’’ති (මහාව. අට්‌ඨ. 184) වචීභෙදං කත්‌වා වස්‌සං න උපෙති.
So tadaheva akaraṇīyotiādīsu evaṃ vinicchayo veditabboti yojanā. Purimikā ca na paññāyatīti ettha pure bhavā purimā, sā eva purimikā, pāṭipadatithī. Nānāsīmāya dvīsu āvāsesu vassaṃ upagacchantassa dutiye ‘‘vasissāmī’’ti paṭhamāvāsassa upacārato nikkhantamatte paṭhamasenāsanaggāhassa passambhanaṃ sandhāya vuttaṃ ‘‘purimikā ca na paññāyatī’’ti. Aruṇaṃ anuṭṭhāpetvāti vassaṃ upagamanavihāre aruṇaṃ anuṭṭhāpetvā. Tadahevāti tasmiṃ vassūpagamanaahani eva, pakkantassāpīti sambandho. Pisaddassa garahatthaṃ dassento āha ‘‘ko pana vādo’’tiādi. Ālayoti cittassa allīyanaṃ. Asatiyāti satipamuṭṭhena. Vassaṃ na upetīti ‘‘imasmiṃ vihāre imaṃ temāsaṃ vassaṃ upemī’’ti (mahāva. aṭṭha. 184) vacībhedaṃ katvā vassaṃ na upeti.
සත්‌තාහන්‌ති සත්‌තාහෙන, අනාගතායාති සම්‌බන්‌ධො. නවමිතොති පුබ්‌බකත්‌තිකමාසස්‌ස ජුණ්‌හපක්‌ඛනවමිතො, පච්‌ඡිමකත්‌තිකමාසස්‌ස ජුණ්‌හපක්‌ඛනවමිතො වා. මා වා ආගච්‌ඡතු, අනාපත්‌තීති වස්‌සංවුත්‌ථත්‌තා මා වා ආගච්‌ඡතු, අනාපත්‌තීති අත්‌ථො.
Sattāhanti sattāhena, anāgatāyāti sambandho. Navamitoti pubbakattikamāsassa juṇhapakkhanavamito, pacchimakattikamāsassa juṇhapakkhanavamito vā. Mā vā āgacchatu, anāpattīti vassaṃvutthattā mā vā āgacchatu, anāpattīti attho.
ඉති වස්‌සූපනායිකක්‌ඛන්‌ධකවණ්‌ණනාය යොජනා සමත්‌තා.
Iti vassūpanāyikakkhandhakavaṇṇanāya yojanā samattā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 118. පටිස්‌සවදුක්‌කටාපත්‌ති • 118. Paṭissavadukkaṭāpatti
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / අධම්‌මිකකතිකාදිකථා • Adhammikakatikādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පටිස්‌සවදුක්‌කටාපත්‌තිකථාවණ්‌ණනා • Paṭissavadukkaṭāpattikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අධම්‌මිකකතිකාදිකථාවණ්‌ණනා • Adhammikakatikādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අධම්‌මිකකතිකාදිකථාවණ්‌ණනා • Adhammikakatikādikathāvaṇṇanā
