| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๖. ปติฎฺฐิตสุตฺตํ
6. Patiṭṭhitasuttaṃ
๕๒๖. ‘‘เอกธเมฺม ปติฎฺฐิตสฺส, ภิกฺขเว, ภิกฺขุโน ปญฺจินฺทฺริยานิ ภาวิตานิ โหนฺติ สุภาวิตานิฯ กตมสฺมิํ เอกธเมฺม? อปฺปมาเทฯ กตโม จ ภิกฺขเว, อปฺปมาโท? อิธ, ภิกฺขเว, ภิกฺขุ จิตฺตํ รกฺขติ อาสเวสุ จ สาสเวสุ จ ธเมฺมสุฯ ตสฺส จิตฺตํ รกฺขโต อาสเวสุ จ สาสเวสุ จ ธเมฺมสุ สทฺธินฺทฺริยมฺปิ ภาวนาปาริปูริํ คจฺฉติฯ วีริยินฺทฺริยมฺปิ ภาวนาปาริปูริํ คจฺฉติฯ สตินฺทฺริยมฺปิ ภาวนาปาริปูริํ คจฺฉติฯ สมาธินฺทฺริยมฺปิ ภาวนาปาริปูริํ คจฺฉติฯ ปญฺญินฺทฺริยมฺปิ ภาวนาปาริปูริํ คจฺฉติฯ เอวมฺปิ โข, ภิกฺขเว, เอกธเมฺม ปติฎฺฐิตสฺส ภิกฺขุโน ปญฺจินฺทฺริยานิ ภาวิตานิ โหนฺติ สุภาวิตานี’’ติฯ ฉฎฺฐํฯ
526. ‘‘Ekadhamme patiṭṭhitassa, bhikkhave, bhikkhuno pañcindriyāni bhāvitāni honti subhāvitāni. Katamasmiṃ ekadhamme? Appamāde. Katamo ca bhikkhave, appamādo? Idha, bhikkhave, bhikkhu cittaṃ rakkhati āsavesu ca sāsavesu ca dhammesu. Tassa cittaṃ rakkhato āsavesu ca sāsavesu ca dhammesu saddhindriyampi bhāvanāpāripūriṃ gacchati. Vīriyindriyampi bhāvanāpāripūriṃ gacchati. Satindriyampi bhāvanāpāripūriṃ gacchati. Samādhindriyampi bhāvanāpāripūriṃ gacchati. Paññindriyampi bhāvanāpāripūriṃ gacchati. Evampi kho, bhikkhave, ekadhamme patiṭṭhitassa bhikkhuno pañcindriyāni bhāvitāni honti subhāvitānī’’ti. Chaṭṭhaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๖-๗. ปติฎฺฐิตสุตฺตาทิวณฺณนา • 6-7. Patiṭṭhitasuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๖. ปติฎฺฐิตสุตฺตวณฺณนา • 6. Patiṭṭhitasuttavaṇṇanā
