| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៦. បតិដ្ឋិតសុត្តំ
6. Patiṭṭhitasuttaṃ
៥២៦. ‘‘ឯកធម្មេ បតិដ្ឋិតស្ស, ភិក្ខវេ, ភិក្ខុនោ បញ្ចិន្ទ្រិយានិ ភាវិតានិ ហោន្តិ សុភាវិតានិ។ កតមស្មិំ ឯកធម្មេ? អប្បមាទេ។ កតមោ ច ភិក្ខវេ, អប្បមាទោ? ឥធ, ភិក្ខវេ, ភិក្ខុ ចិត្តំ រក្ខតិ អាសវេសុ ច សាសវេសុ ច ធម្មេសុ។ តស្ស ចិត្តំ រក្ខតោ អាសវេសុ ច សាសវេសុ ច ធម្មេសុ សទ្ធិន្ទ្រិយម្បិ ភាវនាបារិបូរិំ គច្ឆតិ។ វីរិយិន្ទ្រិយម្បិ ភាវនាបារិបូរិំ គច្ឆតិ។ សតិន្ទ្រិយម្បិ ភាវនាបារិបូរិំ គច្ឆតិ។ សមាធិន្ទ្រិយម្បិ ភាវនាបារិបូរិំ គច្ឆតិ។ បញ្ញិន្ទ្រិយម្បិ ភាវនាបារិបូរិំ គច្ឆតិ។ ឯវម្បិ ខោ, ភិក្ខវេ, ឯកធម្មេ បតិដ្ឋិតស្ស ភិក្ខុនោ បញ្ចិន្ទ្រិយានិ ភាវិតានិ ហោន្តិ សុភាវិតានី’’តិ។ ឆដ្ឋំ។
526. ‘‘Ekadhamme patiṭṭhitassa, bhikkhave, bhikkhuno pañcindriyāni bhāvitāni honti subhāvitāni. Katamasmiṃ ekadhamme? Appamāde. Katamo ca bhikkhave, appamādo? Idha, bhikkhave, bhikkhu cittaṃ rakkhati āsavesu ca sāsavesu ca dhammesu. Tassa cittaṃ rakkhato āsavesu ca sāsavesu ca dhammesu saddhindriyampi bhāvanāpāripūriṃ gacchati. Vīriyindriyampi bhāvanāpāripūriṃ gacchati. Satindriyampi bhāvanāpāripūriṃ gacchati. Samādhindriyampi bhāvanāpāripūriṃ gacchati. Paññindriyampi bhāvanāpāripūriṃ gacchati. Evampi kho, bhikkhave, ekadhamme patiṭṭhitassa bhikkhuno pañcindriyāni bhāvitāni honti subhāvitānī’’ti. Chaṭṭhaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦-៧. បតិដ្ឋិតសុត្តាទិវណ្ណនា • 6-7. Patiṭṭhitasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៦. បតិដ្ឋិតសុត្តវណ្ណនា • 6. Patiṭṭhitasuttavaṇṇanā
