| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. පතොදසුත්‌තං
3. Patodasuttaṃ
113. ‘‘චත්‌තාරොමෙ , භික්‌ඛවෙ, භද්‍රා අස්‌සාජානීයා සන්‌තො සංවිජ්‌ජමානා ලොකස්‌මිං. කතමෙ චත්‌තාරො? ඉධ, භික්‌ඛවෙ, එකච්‌චො භද්‍රො අස්‌සාජානීයො පතොදච්‌ඡායං දිස්‌වා සංවිජ්‌ජති සංවෙගං ආපජ්‌ජති – ‘කිං නු ඛො මං අජ්‌ජ අස්‌සදම්‌මසාරථි කාරණං කාරෙස්‌සති, කිමස්‌සාහං 1 පටිකරොමී’ති! එවරූපොපි, භික්‌ඛවෙ, ඉධෙකච්‌චො භද්‍රො අස්‌සාජානීයො හොති. අයං, භික්‌ඛවෙ, පඨමො භද්‍රො අස්‌සාජානීයො සන්‌තො සංවිජ්‌ජමානො ලොකස්‌මිං.
113. ‘‘Cattārome , bhikkhave, bhadrā assājānīyā santo saṃvijjamānā lokasmiṃ. Katame cattāro? Idha, bhikkhave, ekacco bhadro assājānīyo patodacchāyaṃ disvā saṃvijjati saṃvegaṃ āpajjati – ‘kiṃ nu kho maṃ ajja assadammasārathi kāraṇaṃ kāressati, kimassāhaṃ 2 paṭikaromī’ti! Evarūpopi, bhikkhave, idhekacco bhadro assājānīyo hoti. Ayaṃ, bhikkhave, paṭhamo bhadro assājānīyo santo saṃvijjamāno lokasmiṃ.
‘‘පුන චපරං, භික්‌ඛවෙ, ඉධෙකච්‌චො භද්‍රො අස්‌සාජානීයො න හෙව ඛො පතොදච්‌ඡායං දිස්‌වා සංවිජ්‌ජති සංවෙගං ආපජ්‌ජති, අපි ච ඛො ලොමවෙධවිද්‌ධො සංවිජ්‌ජති සංවෙගං ආපජ්‌ජති – ‘කිං නු ඛො මං අජ්‌ජ අස්‌සදම්‌මසාරථි කාරණං කාරෙස්‌සති, කිමස්‌සාහං පටිකරොමී’ති! එවරූපොපි, භික්‌ඛවෙ, ඉධෙකච්‌චො භද්‍රො අස්‌සාජානීයො හොති. අයං, භික්‌ඛවෙ, දුතියො භද්‍රො අස්‌සාජානීයො සන්‌තො සංවිජ්‌ජමානො ලොකස්‌මිං.
‘‘Puna caparaṃ, bhikkhave, idhekacco bhadro assājānīyo na heva kho patodacchāyaṃ disvā saṃvijjati saṃvegaṃ āpajjati, api ca kho lomavedhaviddho saṃvijjati saṃvegaṃ āpajjati – ‘kiṃ nu kho maṃ ajja assadammasārathi kāraṇaṃ kāressati, kimassāhaṃ paṭikaromī’ti! Evarūpopi, bhikkhave, idhekacco bhadro assājānīyo hoti. Ayaṃ, bhikkhave, dutiyo bhadro assājānīyo santo saṃvijjamāno lokasmiṃ.
‘‘පුන චපරං, භික්‌ඛවෙ, ඉධෙකච්‌චො භද්‍රො අස්‌සාජානීයො න හෙව ඛො පතොදච්‌ඡායං දිස්‌වා සංවිජ්‌ජති සංවෙගං ආපජ්‌ජති නාපි ලොමවෙධවිද්‌ධො සංවිජ්‌ජති සංවෙගං ආපජ්‌ජති, අපි ච ඛො චම්‌මවෙධවිද්‌ධො සංවිජ්‌ජති සංවෙගං ආපජ්‌ජති – ‘කිං නු ඛො මං අජ්‌ජ අස්‌සදම්‌මසාරථි කාරණං කාරෙස්‌සති, කිමස්‌සාහං පටිකරොමී’ති! එවරූපොපි, භික්‌ඛවෙ, ඉධෙකච්‌චො භද්‍රො අස්‌සාජානීයො හොති. අයං, භික්‌ඛවෙ, තතියො භද්‍රො අස්‌සාජානීයො සන්‌තො සංවිජ්‌ජමානො ලොකස්‌මිං.
‘‘Puna caparaṃ, bhikkhave, idhekacco bhadro assājānīyo na heva kho patodacchāyaṃ disvā saṃvijjati saṃvegaṃ āpajjati nāpi lomavedhaviddho saṃvijjati saṃvegaṃ āpajjati, api ca kho cammavedhaviddho saṃvijjati saṃvegaṃ āpajjati – ‘kiṃ nu kho maṃ ajja assadammasārathi kāraṇaṃ kāressati, kimassāhaṃ paṭikaromī’ti! Evarūpopi, bhikkhave, idhekacco bhadro assājānīyo hoti. Ayaṃ, bhikkhave, tatiyo bhadro assājānīyo santo saṃvijjamāno lokasmiṃ.
‘‘පුන චපරං, භික්‌ඛවෙ, ඉධෙකච්‌චො භද්‍රො අස්‌සාජානීයො න හෙව ඛො පතොදච්‌ඡායං දිස්‌වා සංවිජ්‌ජති සංවෙගං ආපජ්‌ජති නාපි ලොමවෙධවිද්‌ධො සංවිජ්‌ජති සංවෙගං ආපජ්‌ජති නාපි චම්‌මවෙධවිද්‌ධො සංවිජ්‌ජති සංවෙගං ආපජ්‌ජති, අපි ච ඛො අට්‌ඨිවෙධවිද්‌ධො සංවිජ්‌ජති සංවෙගං ආපජ්‌ජති – ‘කිං නු ඛො මං අජ්‌ජ අස්‌සදම්‌මසාරථි කාරණං කාරෙස්‌සති, කිමස්‌සාහං පටිකරොමී’ති ! එවරූපොපි, භික්‌ඛවෙ, ඉධෙකච්‌චො භද්‍රො අස්‌සාජානීයො හොති. අයං, භික්‌ඛවෙ, චතුත්‌ථො භද්‍රො අස්‌සාජානීයො සන්‌තො සංවිජ්‌ජමානො ලොකස්‌මිං. ඉමෙ ඛො, භික්‌ඛවෙ, චත්‌තාරො භද්‍රා අස්‌සාජානීයා සන්‌තො සංවිජ්‌ජමානා ලොකස්‌මිං.
‘‘Puna caparaṃ, bhikkhave, idhekacco bhadro assājānīyo na heva kho patodacchāyaṃ disvā saṃvijjati saṃvegaṃ āpajjati nāpi lomavedhaviddho saṃvijjati saṃvegaṃ āpajjati nāpi cammavedhaviddho saṃvijjati saṃvegaṃ āpajjati, api ca kho aṭṭhivedhaviddho saṃvijjati saṃvegaṃ āpajjati – ‘kiṃ nu kho maṃ ajja assadammasārathi kāraṇaṃ kāressati, kimassāhaṃ paṭikaromī’ti ! Evarūpopi, bhikkhave, idhekacco bhadro assājānīyo hoti. Ayaṃ, bhikkhave, catuttho bhadro assājānīyo santo saṃvijjamāno lokasmiṃ. Ime kho, bhikkhave, cattāro bhadrā assājānīyā santo saṃvijjamānā lokasmiṃ.
‘‘එවමෙවං ඛො, භික්‌ඛවෙ, චත්‌තාරොමෙ භද්‍රා පුරිසාජානීයා සන්‌තො සංවිජ්‌ජමානා ලොකස්‌මිං. කතමෙ චත්‌තාරො? ඉධ, භික්‌ඛවෙ, එකච්‌චො භද්‍රො පුරිසාජානීයො සුණාති – ‘අමුකස්‌මිං නාම ගාමෙ වා නිගමෙ වා ඉත්‌ථී වා පුරිසො වා දුක්‌ඛිතො වා කාලඞ්‌කතො 3 වා’ති. සො තෙන සංවිජ්‌ජති, සංවෙගං ආපජ්‌ජති. සංවිග්‌ගො යොනිසො පදහති. පහිතත්‌තො කායෙන චෙව පරමසච්‌චං 4 සච්‌ඡිකරොති, පඤ්‌ඤාය ච අතිවිජ්‌ඣ පස්‌සති. සෙය්‍යථාපි සො, භික්‌ඛවෙ, භද්‍රො අස්‌සාජානීයො පතොදච්‌ඡායං දිස්‌වා සංවිජ්‌ජති සංවෙගං ආපජ්‌ජති; තථූපමාහං, භික්‌ඛවෙ, ඉමං භද්‍රං පුරිසාජානීයං වදාමි. එවරූපොපි, භික්‌ඛවෙ, ඉධෙකච්‌චො භද්‍රො පුරිසාජානීයො හොති. අයං, භික්‌ඛවෙ, පඨමො භද්‍රො පුරිසාජානීයො සන්‌තො සංවිජ්‌ජමානො ලොකස්‌මිං.
‘‘Evamevaṃ kho, bhikkhave, cattārome bhadrā purisājānīyā santo saṃvijjamānā lokasmiṃ. Katame cattāro? Idha, bhikkhave, ekacco bhadro purisājānīyo suṇāti – ‘amukasmiṃ nāma gāme vā nigame vā itthī vā puriso vā dukkhito vā kālaṅkato 5 vā’ti. So tena saṃvijjati, saṃvegaṃ āpajjati. Saṃviggo yoniso padahati. Pahitatto kāyena ceva paramasaccaṃ 6 sacchikaroti, paññāya ca ativijjha passati. Seyyathāpi so, bhikkhave, bhadro assājānīyo patodacchāyaṃ disvā saṃvijjati saṃvegaṃ āpajjati; tathūpamāhaṃ, bhikkhave, imaṃ bhadraṃ purisājānīyaṃ vadāmi. Evarūpopi, bhikkhave, idhekacco bhadro purisājānīyo hoti. Ayaṃ, bhikkhave, paṭhamo bhadro purisājānīyo santo saṃvijjamāno lokasmiṃ.
‘‘පුන චපරං, භික්‌ඛවෙ, ඉධෙකච්‌චො භද්‍රො පුරිසාජානීයො න හෙව ඛො සුණාති – ‘අමුකස්‌මිං නාම ගාමෙ වා නිගමෙ වා ඉත්‌ථී වා පුරිසො වා දුක්‌ඛිතො වා කාලඞ්‌කතො වා’ති, අපි ච ඛො සාමං පස්‌සති ඉත්‌ථිං වා පුරිසං වා දුක්‌ඛිතං වා කාලඞ්‌කතං වා. සො තෙන සංවිජ්‌ජති, සංවෙගං ආපජ්‌ජති. සංවිග්‌ගො යොනිසො පදහති. පහිතත්‌තො කායෙන චෙව පරමසච්‌චං සච්‌ඡිකරොති, පඤ්‌ඤාය ච අතිවිජ්‌ඣ පස්‌සති. සෙය්‍යථාපි සො, භික්‌ඛවෙ, භද්‍රො අස්‌සාජානීයො ලොමවෙධවිද්‌ධො සංවිජ්‌ජති සංවෙගං ආපජ්‌ජති; තථූපමාහං, භික්‌ඛවෙ, ඉමං භද්‍රං පුරිසාජානීයං වදාමි. එවරූපොපි, භික්‌ඛවෙ, ඉධෙකච්‌චො භද්‍රො පුරිසාජානීයො හොති. අයං, භික්‌ඛවෙ, දුතියො භද්‍රො පුරිසාජානීයො සන්‌තො සංවිජ්‌ජමානො ලොකස්‌මිං.
‘‘Puna caparaṃ, bhikkhave, idhekacco bhadro purisājānīyo na heva kho suṇāti – ‘amukasmiṃ nāma gāme vā nigame vā itthī vā puriso vā dukkhito vā kālaṅkato vā’ti, api ca kho sāmaṃ passati itthiṃ vā purisaṃ vā dukkhitaṃ vā kālaṅkataṃ vā. So tena saṃvijjati, saṃvegaṃ āpajjati. Saṃviggo yoniso padahati. Pahitatto kāyena ceva paramasaccaṃ sacchikaroti, paññāya ca ativijjha passati. Seyyathāpi so, bhikkhave, bhadro assājānīyo lomavedhaviddho saṃvijjati saṃvegaṃ āpajjati; tathūpamāhaṃ, bhikkhave, imaṃ bhadraṃ purisājānīyaṃ vadāmi. Evarūpopi, bhikkhave, idhekacco bhadro purisājānīyo hoti. Ayaṃ, bhikkhave, dutiyo bhadro purisājānīyo santo saṃvijjamāno lokasmiṃ.
‘‘පුන චපරං, භික්‌ඛවෙ, ඉධෙකච්‌චො භද්‍රො පුරිසාජානීයො න හෙව ඛො සුණාති – ‘අමුකස්‌මිං නාම ගාමෙ වා නිගමෙ වා ඉත්‌ථී වා පුරිසො වා දුක්‌ඛිතො වා කාලඞ්‌කතො වා’ති, නාපි සාමං පස්‌සති ඉත්‌ථිං වා පුරිසං වා දුක්‌ඛිතං වා කාලඞ්‌කතං වා, අපි ච ඛ්‌වස්‌ස ඤාති වා සාලොහිතො වා දුක්‌ඛිතො වා හොති කාලඞ්‌කතො වා. සො තෙන සංවිජ්‌ජති, සංවෙගං ආපජ්‌ජති. සංවිග්‌ගො යොනිසො පදහති. පහිතත්‌තො කායෙන චෙව පරමසච්‌චං සච්‌ඡිකරොති, පඤ්‌ඤාය ච අතිවිජ්‌ඣ පස්‌සති. සෙය්‍යථාපි සො, භික්‌ඛවෙ, භද්‍රො අස්‌සාජානීයො චම්‌මවෙධවිද්‌ධො සංවිජ්‌ජති සංවෙගං ආපජ්‌ජති; තථූපමාහං, භික්‌ඛවෙ, ඉමං භද්‍රං පුරිසාජානීයං වදාමි. එවරූපොපි, භික්‌ඛවෙ, ඉධෙකච්‌චො භද්‍රො පුරිසාජානීයො හොති. අයං, භික්‌ඛවෙ, තතියො භද්‍රො පුරිසාජානීයො සන්‌තො සංවිජ්‌ජමානො ලොකස්‌මිං.
‘‘Puna caparaṃ, bhikkhave, idhekacco bhadro purisājānīyo na heva kho suṇāti – ‘amukasmiṃ nāma gāme vā nigame vā itthī vā puriso vā dukkhito vā kālaṅkato vā’ti, nāpi sāmaṃ passati itthiṃ vā purisaṃ vā dukkhitaṃ vā kālaṅkataṃ vā, api ca khvassa ñāti vā sālohito vā dukkhito vā hoti kālaṅkato vā. So tena saṃvijjati, saṃvegaṃ āpajjati. Saṃviggo yoniso padahati. Pahitatto kāyena ceva paramasaccaṃ sacchikaroti, paññāya ca ativijjha passati. Seyyathāpi so, bhikkhave, bhadro assājānīyo cammavedhaviddho saṃvijjati saṃvegaṃ āpajjati; tathūpamāhaṃ, bhikkhave, imaṃ bhadraṃ purisājānīyaṃ vadāmi. Evarūpopi, bhikkhave, idhekacco bhadro purisājānīyo hoti. Ayaṃ, bhikkhave, tatiyo bhadro purisājānīyo santo saṃvijjamāno lokasmiṃ.
‘‘පුන චපරං, භික්‌ඛවෙ, ඉධෙකච්‌චො භද්‍රො පුරිසාජානීයො න හෙව ඛො සුණාති – ‘අමුකස්‌මිං නාම ගාමෙ වා නිගමෙ වා ඉත්‌ථී වා පුරිසො වා දුක්‌ඛිතො වා කාලඞ්‌කතො වා’ති, නාපි සාමං පස්‌සති ඉත්‌ථිං වා පුරිසං වා දුක්‌ඛිතං වා කාලඞ්‌කතං වා, නාපිස්‌ස ඤාති වා සාලොහිතො වා දුක්‌ඛිතො වා හොති කාලඞ්‌කතො වා, අපි ච ඛො සාමඤ්‌ඤෙව ඵුට්‌ඨො හොති සාරීරිකාහි වෙදනාහි දුක්‌ඛාහි තිබ්‌බාහි 7 ඛරාහි කටුකාහි අසාතාහි අමනාපාහි පාණහරාහි. සො තෙන සංවිජ්‌ජති, සංවෙගං ආපජ්‌ජති. සංවිග්‌ගො යොනිසො පදහති. පහිතත්‌තො කායෙන චෙව පරමසච්‌චං සච්‌ඡිකරොති, පඤ්‌ඤාය ච අතිවිජ්‌ඣ පස්‌සති. සෙය්‍යථාපි සො, භික්‌ඛවෙ, භද්‍රො අස්‌සාජානීයො අට්‌ඨිවෙධවිද්‌ධො සංවිජ්‌ජති සංවෙගං ආපජ්‌ජති; තථූපමාහං, භික්‌ඛවෙ, ඉමං භද්‍රං පුරිසාජානීයං වදාමි. එවරූපොපි, භික්‌ඛවෙ, ඉධෙකච්‌චො භද්‍රො පුරිසාජානීයො හොති. අයං, භික්‌ඛවෙ, චතුත්‌ථො භද්‍රො පුරිසාජානීයො සන්‌තො සංවිජ්‌ජමානො ලොකස්‌මිං. ඉමෙ ඛො, භික්‌ඛවෙ, චත්‌තාරො භද්‍රා පුරිසාජානීයා සන්‌තො සංවිජ්‌ජමානා ලොකස්‌මි’’න්‌ති. තතියං.
‘‘Puna caparaṃ, bhikkhave, idhekacco bhadro purisājānīyo na heva kho suṇāti – ‘amukasmiṃ nāma gāme vā nigame vā itthī vā puriso vā dukkhito vā kālaṅkato vā’ti, nāpi sāmaṃ passati itthiṃ vā purisaṃ vā dukkhitaṃ vā kālaṅkataṃ vā, nāpissa ñāti vā sālohito vā dukkhito vā hoti kālaṅkato vā, api ca kho sāmaññeva phuṭṭho hoti sārīrikāhi vedanāhi dukkhāhi tibbāhi 8 kharāhi kaṭukāhi asātāhi amanāpāhi pāṇaharāhi. So tena saṃvijjati, saṃvegaṃ āpajjati. Saṃviggo yoniso padahati. Pahitatto kāyena ceva paramasaccaṃ sacchikaroti, paññāya ca ativijjha passati. Seyyathāpi so, bhikkhave, bhadro assājānīyo aṭṭhivedhaviddho saṃvijjati saṃvegaṃ āpajjati; tathūpamāhaṃ, bhikkhave, imaṃ bhadraṃ purisājānīyaṃ vadāmi. Evarūpopi, bhikkhave, idhekacco bhadro purisājānīyo hoti. Ayaṃ, bhikkhave, catuttho bhadro purisājānīyo santo saṃvijjamāno lokasmiṃ. Ime kho, bhikkhave, cattāro bhadrā purisājānīyā santo saṃvijjamānā lokasmi’’nti. Tatiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3. පතොදසුත්‌තවණ්‌ණනා • 3. Patodasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-7. කෙසිසුත්‌තාදිවණ්‌ණනා • 1-7. Kesisuttādivaṇṇanā
