| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(7) 2. பத்தகம்மவக்³கோ³
(7) 2. Pattakammavaggo
1-4. பத்தகம்மஸுத்தாதி³வண்ணனா
1-4. Pattakammasuttādivaṇṇanā
61-64. து³தியஸ்ஸ பட²மே யே அனிட்டா² ந ஹொந்தி, தே இட்டா²தி அதி⁴ப்பேதாதி ஆஹ ‘‘அனிட்ட²படிக்கே²பேன இட்டா²’’தி. இட்டா²தி ச பரியிட்டா² வா ஹோது மா வா, இட்டா²ரம்மணபூ⁴தாதி அத்தோ². க³வேஸிதம்பி ஹி இட்ட²ந்தி வுச்சதி, தங் இத⁴ நாதி⁴ப்பேதங். மனேதி மனஸ்மிங். கந்தாதி வா கமனீயா, காமேதப்³பா³தி அத்தோ². மனங் அப்பாயந்தீதி இட்ட²பா⁴வேன மனங் வட்³டெ⁴ந்தி. கம்மஸாத⁴னோ இத⁴ போ⁴க³-ஸத்³தோ³தி ஆஹ ‘‘போ⁴கா³தி பு⁴ஞ்ஜிதப்³பா³’’திஆதி³. த⁴ம்மூபகா⁴தங் கத்வா குஸலத⁴ம்மங் வினோதெ³த்வா. உபனிஜ்ஜா²யீயந்தீதி உபஜ்ஜா²யாதி ஆஹ ‘‘ஸுக²து³க்கே²ஸு உபனிஜ்ஜா²யிதப்³ப³த்தா’’தி, ஸுக²து³க்கே²ஸு உப்பன்னேஸு அனுஸ்ஸரிதப்³ப³த்தாதி அத்தோ². ஸந்தி³ட்ட²ஸம்ப⁴த்தேஹீதி எத்த² தத்த² தத்த² ஸங்க³ம்ம தி³ட்ட²மத்தா நாதித³ள்ஹமித்தா ஸந்தி³ட்டா², ஸுட்டு² ப⁴த்தா ஸினேஹவந்தோ த³ள்ஹமித்தா ஸம்ப⁴த்தா.
61-64. Dutiyassa paṭhame ye aniṭṭhā na honti, te iṭṭhāti adhippetāti āha ‘‘aniṭṭhapaṭikkhepena iṭṭhā’’ti. Iṭṭhāti ca pariyiṭṭhā vā hotu mā vā, iṭṭhārammaṇabhūtāti attho. Gavesitampi hi iṭṭhanti vuccati, taṃ idha nādhippetaṃ. Maneti manasmiṃ. Kantāti vā kamanīyā, kāmetabbāti attho. Manaṃ appāyantīti iṭṭhabhāvena manaṃ vaḍḍhenti. Kammasādhano idha bhoga-saddoti āha ‘‘bhogāti bhuñjitabbā’’tiādi. Dhammūpaghātaṃ katvā kusaladhammaṃ vinodetvā. Upanijjhāyīyantīti upajjhāyāti āha ‘‘sukhadukkhesu upanijjhāyitabbattā’’ti, sukhadukkhesu uppannesu anussaritabbattāti attho. Sandiṭṭhasambhattehīti ettha tattha tattha saṅgamma diṭṭhamattā nātidaḷhamittā sandiṭṭhā, suṭṭhu bhattā sinehavanto daḷhamittā sambhattā.
விஸமலோப⁴ந்தி ப³லவலோப⁴ங். ஸுகி²தந்தி ஸஞ்ஜாதஸுக²ங். பீணிதந்தி தா⁴தங் ஸுஹிதங். ததா²பூ⁴தோ பன யஸ்மா ப³லஸம்பன்னோ ஹோதி, தஸ்மா ‘‘ப³லஸம்பன்னங் கரோதீ’’தி வுத்தங்.
Visamalobhanti balavalobhaṃ. Sukhitanti sañjātasukhaṃ. Pīṇitanti dhātaṃ suhitaṃ. Tathābhūto pana yasmā balasampanno hoti, tasmā ‘‘balasampannaṃ karotī’’ti vuttaṃ.
ஸோப⁴னே காயிகவாசஸிககம்மே ரதோதி ஸூரதோ உகாரஸ்ஸ தீ³க⁴ங் கத்வா, தஸ்ஸ பா⁴வோ ஸோரச்சங், காயிகவாசஸிகோ அவீதிக்கமோ. ஸோ பன அத்த²தோ ஸுஸீலபா⁴வோதி ஆஹ ‘‘க²ந்திஸோரச்சே நிவிட்டா²தி அதி⁴வாஸனக்க²ந்தியஞ்ச ஸுஸீலதாய ச நிவிட்டா²’’தி. ஏகமத்தானந்தி ஏகங் சித்தந்தி அத்தோ². ராகா³தீ³னஞ்ஹி புப்³ப³பா⁴கி³யங் த³மனாதி³ பச்சேகங் இச்சி²தப்³ப³ங், ந மக்³க³க்க²ணே விய ஏகஜ்ஜ²ங் படிஸங்கா²னமுகே²ன பஜஹனதோ. ஏகமத்தானந்தி வா விவேகவஸேன ஏகங் ஏகாகினங் அத்தானங். தேனேவாஹ ‘‘ஏகங் அத்தனோவ அத்தபா⁴வ’’ந்திஆதி³. உபரூபரிபூ⁴மீஸூதி ச²காமஸக்³க³ஸங்கா²தாஸு உபரூபரிகாமபூ⁴மீஸு. கம்மஸ்ஸ ப²லங் அக்³க³ங் நாம. தங் பனெத்த² உச்சகா³மீதி ஆஹ ‘‘உத்³த⁴மக்³க³மஸ்ஸா’’தி. ஸுவக்³கே³ நியுத்தா, ஸுவக்³க³ப்பயோஜனாதி வா ஸோவக்³கி³கா. த³ஸன்னங் விஸேஸானந்தி தி³ப்³ப³ஆயுவண்ணயஸஸுக²ஆதி⁴பதெய்யானஞ்சேவ இட்ட²ரூபாதீ³னஞ்ச ப²லவிஸேஸானங். வண்ணக்³க³ஹணேன செத்த² ஸகோ அத்தபா⁴வவண்ணோ க³ஹிதோ, ரூபக்³க³ஹணேன ப³ஹித்³தா⁴ ரூபாரம்மணங். து³தியததியசதுத்தா²னி உத்தானத்தா²னேவ.
Sobhane kāyikavācasikakamme ratoti sūrato ukārassa dīghaṃ katvā, tassa bhāvo soraccaṃ, kāyikavācasiko avītikkamo. So pana atthato susīlabhāvoti āha ‘‘khantisoracce niviṭṭhāti adhivāsanakkhantiyañca susīlatāya ca niviṭṭhā’’ti. Ekamattānanti ekaṃ cittanti attho. Rāgādīnañhi pubbabhāgiyaṃ damanādi paccekaṃ icchitabbaṃ, na maggakkhaṇe viya ekajjhaṃ paṭisaṅkhānamukhena pajahanato. Ekamattānanti vā vivekavasena ekaṃ ekākinaṃ attānaṃ. Tenevāha ‘‘ekaṃ attanova attabhāva’’ntiādi. Uparūparibhūmīsūti chakāmasaggasaṅkhātāsu uparūparikāmabhūmīsu. Kammassa phalaṃ aggaṃ nāma. Taṃ panettha uccagāmīti āha ‘‘uddhamaggamassā’’ti. Suvagge niyuttā, suvaggappayojanāti vā sovaggikā. Dasannaṃ visesānanti dibbaāyuvaṇṇayasasukhaādhipateyyānañceva iṭṭharūpādīnañca phalavisesānaṃ. Vaṇṇaggahaṇena cettha sako attabhāvavaṇṇo gahito, rūpaggahaṇena bahiddhā rūpārammaṇaṃ. Dutiyatatiyacatutthāni uttānatthāneva.
பத்தகம்மஸுத்தாதி³வண்ணனா நிட்டி²தா.
Pattakammasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. பத்தகம்மஸுத்தங் • 1. Pattakammasuttaṃ
2. ஆனண்யஸுத்தங் • 2. Ānaṇyasuttaṃ
3. ப்³ரஹ்மஸுத்தங் • 3. Brahmasuttaṃ
4. நிரயஸுத்தங் • 4. Nirayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
1. பத்தகம்மஸுத்தவண்ணனா • 1. Pattakammasuttavaṇṇanā
2. ஆனண்யஸுத்தவண்ணனா • 2. Ānaṇyasuttavaṇṇanā
3. ப்³ரஹ்மஸுத்தவண்ணனா • 3. Brahmasuttavaṇṇanā
