| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
(৭) ২. পত্তকম্মৰগ্গো
(7) 2. Pattakammavaggo
১-৪. পত্তকম্মসুত্তাদিৰণ্ণনা
1-4. Pattakammasuttādivaṇṇanā
৬১-৬৪. দুতিযস্স পঠমে যে অনিট্ঠা ন হোন্তি, তে ইট্ঠাতি অধিপ্পেতাতি আহ ‘‘অনিট্ঠপটিক্খেপেন ইট্ঠা’’তি। ইট্ঠাতি চ পরিযিট্ঠা ৰা হোতু মা ৰা, ইট্ঠারম্মণভূতাতি অত্থো। গৰেসিতম্পি হি ইট্ঠন্তি ৰুচ্চতি, তং ইধ নাধিপ্পেতং। মনেতি মনস্মিং। কন্তাতি ৰা কমনীযা, কামেতব্বাতি অত্থো। মনং অপ্পাযন্তীতি ইট্ঠভাৰেন মনং ৰড্ঢেন্তি। কম্মসাধনো ইধ ভোগ-সদ্দোতি আহ ‘‘ভোগাতি ভুঞ্জিতব্বা’’তিআদি। ধম্মূপঘাতং কত্ৰা কুসলধম্মং ৰিনোদেত্ৰা। উপনিজ্ঝাযীযন্তীতি উপজ্ঝাযাতি আহ ‘‘সুখদুক্খেসু উপনিজ্ঝাযিতব্বত্তা’’তি, সুখদুক্খেসু উপ্পন্নেসু অনুস্সরিতব্বত্তাতি অত্থো। সন্দিট্ঠসম্ভত্তেহীতি এত্থ তত্থ তত্থ সঙ্গম্ম দিট্ঠমত্তা নাতিদল়্হমিত্তা সন্দিট্ঠা, সুট্ঠু ভত্তা সিনেহৰন্তো দল়্হমিত্তা সম্ভত্তা।
61-64. Dutiyassa paṭhame ye aniṭṭhā na honti, te iṭṭhāti adhippetāti āha ‘‘aniṭṭhapaṭikkhepena iṭṭhā’’ti. Iṭṭhāti ca pariyiṭṭhā vā hotu mā vā, iṭṭhārammaṇabhūtāti attho. Gavesitampi hi iṭṭhanti vuccati, taṃ idha nādhippetaṃ. Maneti manasmiṃ. Kantāti vā kamanīyā, kāmetabbāti attho. Manaṃ appāyantīti iṭṭhabhāvena manaṃ vaḍḍhenti. Kammasādhano idha bhoga-saddoti āha ‘‘bhogāti bhuñjitabbā’’tiādi. Dhammūpaghātaṃ katvā kusaladhammaṃ vinodetvā. Upanijjhāyīyantīti upajjhāyāti āha ‘‘sukhadukkhesu upanijjhāyitabbattā’’ti, sukhadukkhesu uppannesu anussaritabbattāti attho. Sandiṭṭhasambhattehīti ettha tattha tattha saṅgamma diṭṭhamattā nātidaḷhamittā sandiṭṭhā, suṭṭhu bhattā sinehavanto daḷhamittā sambhattā.
ৰিসমলোভন্তি বলৰলোভং। সুখিতন্তি সঞ্জাতসুখং। পীণিতন্তি ধাতং সুহিতং। তথাভূতো পন যস্মা বলসম্পন্নো হোতি, তস্মা ‘‘বলসম্পন্নং করোতী’’তি ৰুত্তং।
Visamalobhanti balavalobhaṃ. Sukhitanti sañjātasukhaṃ. Pīṇitanti dhātaṃ suhitaṃ. Tathābhūto pana yasmā balasampanno hoti, tasmā ‘‘balasampannaṃ karotī’’ti vuttaṃ.
সোভনে কাযিকৰাচসিককম্মে রতোতি সূরতো উকারস্স দীঘং কত্ৰা, তস্স ভাৰো সোরচ্চং, কাযিকৰাচসিকো অৰীতিক্কমো। সো পন অত্থতো সুসীলভাৰোতি আহ ‘‘খন্তিসোরচ্চে নিৰিট্ঠাতি অধিৰাসনক্খন্তিযঞ্চ সুসীলতায চ নিৰিট্ঠা’’তি। একমত্তানন্তি একং চিত্তন্তি অত্থো। রাগাদীনঞ্হি পুব্বভাগিযং দমনাদি পচ্চেকং ইচ্ছিতব্বং, ন মগ্গক্খণে ৰিয একজ্ঝং পটিসঙ্খানমুখেন পজহনতো। একমত্তানন্তি ৰা ৰিৰেকৰসেন একং একাকিনং অত্তানং। তেনেৰাহ ‘‘একং অত্তনোৰ অত্তভাৰ’’ন্তিআদি। উপরূপরিভূমীসূতি ছকামসগ্গসঙ্খাতাসু উপরূপরিকামভূমীসু। কম্মস্স ফলং অগ্গং নাম। তং পনেত্থ উচ্চগামীতি আহ ‘‘উদ্ধমগ্গমস্সা’’তি। সুৰগ্গে নিযুত্তা, সুৰগ্গপ্পযোজনাতি ৰা সোৰগ্গিকা। দসন্নং ৰিসেসানন্তি দিব্বআযুৰণ্ণযসসুখআধিপতেয্যানঞ্চেৰ ইট্ঠরূপাদীনঞ্চ ফলৰিসেসানং। ৰণ্ণগ্গহণেন চেত্থ সকো অত্তভাৰৰণ্ণো গহিতো, রূপগ্গহণেন বহিদ্ধা রূপারম্মণং। দুতিযততিযচতুত্থানি উত্তানত্থানেৰ।
Sobhane kāyikavācasikakamme ratoti sūrato ukārassa dīghaṃ katvā, tassa bhāvo soraccaṃ, kāyikavācasiko avītikkamo. So pana atthato susīlabhāvoti āha ‘‘khantisoracce niviṭṭhāti adhivāsanakkhantiyañca susīlatāya ca niviṭṭhā’’ti. Ekamattānanti ekaṃ cittanti attho. Rāgādīnañhi pubbabhāgiyaṃ damanādi paccekaṃ icchitabbaṃ, na maggakkhaṇe viya ekajjhaṃ paṭisaṅkhānamukhena pajahanato. Ekamattānanti vā vivekavasena ekaṃ ekākinaṃ attānaṃ. Tenevāha ‘‘ekaṃ attanova attabhāva’’ntiādi. Uparūparibhūmīsūti chakāmasaggasaṅkhātāsu uparūparikāmabhūmīsu. Kammassa phalaṃ aggaṃ nāma. Taṃ panettha uccagāmīti āha ‘‘uddhamaggamassā’’ti. Suvagge niyuttā, suvaggappayojanāti vā sovaggikā. Dasannaṃ visesānanti dibbaāyuvaṇṇayasasukhaādhipateyyānañceva iṭṭharūpādīnañca phalavisesānaṃ. Vaṇṇaggahaṇena cettha sako attabhāvavaṇṇo gahito, rūpaggahaṇena bahiddhā rūpārammaṇaṃ. Dutiyatatiyacatutthāni uttānatthāneva.
পত্তকম্মসুত্তাদিৰণ্ণনা নিট্ঠিতা।
Pattakammasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
১. পত্তকম্মসুত্তং • 1. Pattakammasuttaṃ
২. আনণ্যসুত্তং • 2. Ānaṇyasuttaṃ
৩. ব্রহ্মসুত্তং • 3. Brahmasuttaṃ
৪. নিরযসুত্তং • 4. Nirayasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
১. পত্তকম্মসুত্তৰণ্ণনা • 1. Pattakammasuttavaṇṇanā
২. আনণ্যসুত্তৰণ্ণনা • 2. Ānaṇyasuttavaṇṇanā
৩. ব্রহ্মসুত্তৰণ্ণনা • 3. Brahmasuttavaṇṇanā
