| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
(৭) ২. পত্তকম্মৰগ্গো
(7) 2. Pattakammavaggo
১. পত্তকম্মসুত্তং
1. Pattakammasuttaṃ
৬১. অথ খো অনাথপিণ্ডিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো অনাথপিণ্ডিকং গহপতিং ভগৰা এতদৰোচ –
61. Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –
‘‘চত্তারোমে , গহপতি, ধম্মা ইট্ঠা কন্তা মনাপা দুল্লভা লোকস্মিং। কতমে চত্তারো? ভোগা মে উপ্পজ্জন্তু সহধম্মেনাতি, অযং পঠমো ধম্মো ইট্ঠো কন্তো মনাপো দুল্লভো লোকস্মিং।
‘‘Cattārome , gahapati, dhammā iṭṭhā kantā manāpā dullabhā lokasmiṃ. Katame cattāro? Bhogā me uppajjantu sahadhammenāti, ayaṃ paṭhamo dhammo iṭṭho kanto manāpo dullabho lokasmiṃ.
‘‘ভোগে লদ্ধা সহধম্মেন যসো মে আগচ্ছতু সহ ঞাতীহি সহ উপজ্ঝাযেহীতি, অযং দুতিযো ধম্মো ইট্ঠো কন্তো মনাপো দুল্লভো লোকস্মিং।
‘‘Bhoge laddhā sahadhammena yaso me āgacchatu saha ñātīhi saha upajjhāyehīti, ayaṃ dutiyo dhammo iṭṭho kanto manāpo dullabho lokasmiṃ.
‘‘ভোগে লদ্ধা সহধম্মেন যসং লদ্ধা সহ ঞাতীহি সহ উপজ্ঝাযেহি চিরং জীৰামি দীঘমাযুং পালেমীতি, অযং ততিযো ধম্মো ইট্ঠো কন্তো মনাপো দুল্লভো লোকস্মিং।
‘‘Bhoge laddhā sahadhammena yasaṃ laddhā saha ñātīhi saha upajjhāyehi ciraṃ jīvāmi dīghamāyuṃ pālemīti, ayaṃ tatiyo dhammo iṭṭho kanto manāpo dullabho lokasmiṃ.
‘‘ভোগে লদ্ধা সহধম্মেন যসং লদ্ধা সহ ঞাতীহি সহ উপজ্ঝাযেহি চিরং জীৰিত্ৰা দীঘমাযুং পালেত্ৰা কাযস্স ভেদা পরং মরণা সুগতিং সগ্গং লোকং উপপজ্জামীতি, অযং চতুত্থো ধম্মো ইট্ঠো কন্তো মনাপো দুল্লভো লোকস্মিং। ইমে খো, গহপতি, চত্তারো ধম্মা ইট্ঠা কন্তা মনাপা দুল্লভা লোকস্মিং।
‘‘Bhoge laddhā sahadhammena yasaṃ laddhā saha ñātīhi saha upajjhāyehi ciraṃ jīvitvā dīghamāyuṃ pāletvā kāyassa bhedā paraṃ maraṇā sugatiṃ saggaṃ lokaṃ upapajjāmīti, ayaṃ catuttho dhammo iṭṭho kanto manāpo dullabho lokasmiṃ. Ime kho, gahapati, cattāro dhammā iṭṭhā kantā manāpā dullabhā lokasmiṃ.
‘‘ইমেসং খো, গহপতি, চতুন্নং ধম্মানং ইট্ঠানং কন্তানং মনাপানং দুল্লভানং লোকস্মিং চত্তারো ধম্মা পটিলাভায সংৰত্তন্তি। কতমে চত্তারো? সদ্ধাসম্পদা, সীলসম্পদা, চাগসম্পদা, পঞ্ঞাসম্পদা।
‘‘Imesaṃ kho, gahapati, catunnaṃ dhammānaṃ iṭṭhānaṃ kantānaṃ manāpānaṃ dullabhānaṃ lokasmiṃ cattāro dhammā paṭilābhāya saṃvattanti. Katame cattāro? Saddhāsampadā, sīlasampadā, cāgasampadā, paññāsampadā.
‘‘কতমা চ, গহপতি, সদ্ধাসম্পদা? ইধ, গহপতি, অরিযসাৰকো সদ্ধো হোতি, সদ্দহতি তথাগতস্স বোধিং – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি, সত্থা দেৰমনুস্সানং বুদ্ধো ভগৰা’তি। অযং ৰুচ্চতি, গহপতি, সদ্ধাসম্পদা।
‘‘Katamā ca, gahapati, saddhāsampadā? Idha, gahapati, ariyasāvako saddho hoti, saddahati tathāgatassa bodhiṃ – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi, satthā devamanussānaṃ buddho bhagavā’ti. Ayaṃ vuccati, gahapati, saddhāsampadā.
‘‘কতমা চ, গহপতি, সীলসম্পদা? ইধ, গহপতি, অরিযসাৰকো পাণাতিপাতা পটিৰিরতো হোতি…পে॰… সুরামেরযমজ্জপমাদট্ঠানা পটিৰিরতো হোতি। অযং ৰুচ্চতি, গহপতি, সীলসম্পদা।
‘‘Katamā ca, gahapati, sīlasampadā? Idha, gahapati, ariyasāvako pāṇātipātā paṭivirato hoti…pe… surāmerayamajjapamādaṭṭhānā paṭivirato hoti. Ayaṃ vuccati, gahapati, sīlasampadā.
‘‘কতমা চ, গহপতি, চাগসম্পদা? ইধ, গহপতি, অরিযসাৰকো ৰিগতমলমচ্ছেরেন চেতসা অগারং অজ্ঝাৰসতি মুত্তচাগো পযতপাণি ৰোসগ্গরতো যাচযোগো দানসংৰিভাগরতো। অযং ৰুচ্চতি, গহপতি, চাগসম্পদা।
‘‘Katamā ca, gahapati, cāgasampadā? Idha, gahapati, ariyasāvako vigatamalamaccherena cetasā agāraṃ ajjhāvasati muttacāgo payatapāṇi vosaggarato yācayogo dānasaṃvibhāgarato. Ayaṃ vuccati, gahapati, cāgasampadā.
‘‘কতমা চ, গহপতি, পঞ্ঞাসম্পদা? অভিজ্ঝাৰিসমলোভাভিভূতেন , গহপতি, চেতসা ৰিহরন্তো অকিচ্চং করোতি, কিচ্চং অপরাধেতি। অকিচ্চং করোন্তো কিচ্চং অপরাধেন্তো যসা চ সুখা চ ধংসতি। ব্যাপাদাভিভূতেন, গহপতি, চেতসা ৰিহরন্তো অকিচ্চং করোতি, কিচ্চং অপরাধেতি। অকিচ্চং করোন্তো কিচ্চং অপরাধেন্তো যসা চ সুখা চ ধংসতি। থিনমিদ্ধাভিভূতেন, গহপতি, চেতসা ৰিহরন্তো অকিচ্চং করোতি কিচ্চং অপরাধেতি। অকিচ্চং করোন্তো কিচ্চং অপরাধেন্তো যসা চ সুখা চ ধংসতি। উদ্ধচ্চকুক্কুচ্চাভিভূতেন, গহপতি, চেতসা ৰিহরন্তো অকিচ্চং করোতি, কিচ্চং অপরাধেতি। অকিচ্চং করোন্তো কিচ্চং অপরাধেন্তো যসা চ সুখা চ ধংসতি। ৰিচিকিচ্ছাভিভূতেন, গহপতি, চেতসা ৰিহরন্তো অকিচ্চং করোতি, কিচ্চং অপরাধেতি। অকিচ্চং করোন্তো কিচ্চং অপরাধেন্তো যসা চ সুখা চ ধংসতি।
‘‘Katamā ca, gahapati, paññāsampadā? Abhijjhāvisamalobhābhibhūtena , gahapati, cetasā viharanto akiccaṃ karoti, kiccaṃ aparādheti. Akiccaṃ karonto kiccaṃ aparādhento yasā ca sukhā ca dhaṃsati. Byāpādābhibhūtena, gahapati, cetasā viharanto akiccaṃ karoti, kiccaṃ aparādheti. Akiccaṃ karonto kiccaṃ aparādhento yasā ca sukhā ca dhaṃsati. Thinamiddhābhibhūtena, gahapati, cetasā viharanto akiccaṃ karoti kiccaṃ aparādheti. Akiccaṃ karonto kiccaṃ aparādhento yasā ca sukhā ca dhaṃsati. Uddhaccakukkuccābhibhūtena, gahapati, cetasā viharanto akiccaṃ karoti, kiccaṃ aparādheti. Akiccaṃ karonto kiccaṃ aparādhento yasā ca sukhā ca dhaṃsati. Vicikicchābhibhūtena, gahapati, cetasā viharanto akiccaṃ karoti, kiccaṃ aparādheti. Akiccaṃ karonto kiccaṃ aparādhento yasā ca sukhā ca dhaṃsati.
‘‘স খো সো, গহপতি, অরিযসাৰকো অভিজ্ঝাৰিসমলোভো চিত্তস্স উপক্কিলেসোতি, ইতি ৰিদিত্ৰা অভিজ্ঝাৰিসমলোভং চিত্তস্স উপক্কিলেসং পজহতি। ব্যাপাদো চিত্তস্স উপক্কিলেসোতি, ইতি ৰিদিত্ৰা ব্যাপাদং চিত্তস্স উপক্কিলেসং পজহতি। থিনমিদ্ধং চিত্তস্স উপক্কিলেসোতি, ইতি ৰিদিত্ৰা থিনমিদ্ধং চিত্তস্স উপক্কিলেসং পজহতি। উদ্ধচ্চকুক্কুচ্চং চিত্তস্স উপক্কিলেসোতি, ইতি ৰিদিত্ৰা উদ্ধচ্চকুক্কুচ্চং চিত্তস্স উপক্কিলেসং পজহতি। ৰিচিকিচ্ছা চিত্তস্স উপক্কিলেসোতি, ইতি ৰিদিত্ৰা ৰিচিকিচ্ছং চিত্তস্স উপক্কিলেসং পজহতি।
‘‘Sa kho so, gahapati, ariyasāvako abhijjhāvisamalobho cittassa upakkilesoti, iti viditvā abhijjhāvisamalobhaṃ cittassa upakkilesaṃ pajahati. Byāpādo cittassa upakkilesoti, iti viditvā byāpādaṃ cittassa upakkilesaṃ pajahati. Thinamiddhaṃ cittassa upakkilesoti, iti viditvā thinamiddhaṃ cittassa upakkilesaṃ pajahati. Uddhaccakukkuccaṃ cittassa upakkilesoti, iti viditvā uddhaccakukkuccaṃ cittassa upakkilesaṃ pajahati. Vicikicchā cittassa upakkilesoti, iti viditvā vicikicchaṃ cittassa upakkilesaṃ pajahati.
‘‘যতো চ খো, গহপতি, অরিযসাৰকস্স অভিজ্ঝাৰিসমলোভো চিত্তস্স উপক্কিলেসোতি, ইতি ৰিদিত্ৰা অভিজ্ঝাৰিসমলোভো চিত্তস্স উপক্কিলেসো পহীনো হোতি। ব্যাপাদো চিত্তস্স উপক্কিলেসোতি, ইতি ৰিদিত্ৰা ব্যাপাদো চিত্তস্স উপক্কিলেসো পহীনো হোতি। থিনমিদ্ধং চিত্তস্স উপক্কিলেসোতি, ইতি ৰিদিত্ৰা থিনমিদ্ধং চিত্তস্স উপক্কিলেসো পহীনো হোতি। উদ্ধচ্চকুক্কুচ্চং চিত্তস্স উপক্কিলেসোতি, ইতি ৰিদিত্ৰা উদ্ধচ্চকুক্কুচ্চং চিত্তস্স উপক্কিলেসো পহীনো হোতি। ৰিচিকিচ্ছা চিত্তস্স উপক্কিলেসোতি, ইতি ৰিদিত্ৰা ৰিচিকিচ্ছা চিত্তস্স উপক্কিলেসো পহীনো হোতি। অযং ৰুচ্চতি, গহপতি, অরিযসাৰকো মহাপঞ্ঞো পুথুপঞ্ঞো আপাতদসো 1 পঞ্ঞাসম্পন্নো 2। অযং ৰুচ্চতি, গহপতি , পঞ্ঞাসম্পদা। ইমেসং খো, গহপতি, চতুন্নং ধম্মানং ইট্ঠানং কন্তানং মনাপানং দুল্লভানং লোকস্মিং ইমে চত্তারো ধম্মা পটিলাভায সংৰত্তন্তি।
‘‘Yato ca kho, gahapati, ariyasāvakassa abhijjhāvisamalobho cittassa upakkilesoti, iti viditvā abhijjhāvisamalobho cittassa upakkileso pahīno hoti. Byāpādo cittassa upakkilesoti, iti viditvā byāpādo cittassa upakkileso pahīno hoti. Thinamiddhaṃ cittassa upakkilesoti, iti viditvā thinamiddhaṃ cittassa upakkileso pahīno hoti. Uddhaccakukkuccaṃ cittassa upakkilesoti, iti viditvā uddhaccakukkuccaṃ cittassa upakkileso pahīno hoti. Vicikicchā cittassa upakkilesoti, iti viditvā vicikicchā cittassa upakkileso pahīno hoti. Ayaṃ vuccati, gahapati, ariyasāvako mahāpañño puthupañño āpātadaso 3 paññāsampanno 4. Ayaṃ vuccati, gahapati , paññāsampadā. Imesaṃ kho, gahapati, catunnaṃ dhammānaṃ iṭṭhānaṃ kantānaṃ manāpānaṃ dullabhānaṃ lokasmiṃ ime cattāro dhammā paṭilābhāya saṃvattanti.
‘‘স খো সো, গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি চত্তারি পত্তকম্মানি কত্তা হোতি। কতমানি চত্তারি? ইধ গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি অত্তানং সুখেতি পীণেতি সম্মা সুখং পরিহরতি। মাতাপিতরো সুখেতি পীণেতি সম্মা সুখং পরিহরতি। পুত্তদারদাসকম্মকরপোরিসে সুখেতি পীণেতি সম্মা সুখং পরিহরতি। মিত্তামচ্চে সুখেতি পীণেতি সম্মা সুখং পরিহরতি। ইদমস্স পঠমং ঠানগতং হোতি পত্তগতং আযতনসো পরিভুত্তং।
‘‘Sa kho so, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi cattāri pattakammāni kattā hoti. Katamāni cattāri? Idha gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi attānaṃ sukheti pīṇeti sammā sukhaṃ pariharati. Mātāpitaro sukheti pīṇeti sammā sukhaṃ pariharati. Puttadāradāsakammakaraporise sukheti pīṇeti sammā sukhaṃ pariharati. Mittāmacce sukheti pīṇeti sammā sukhaṃ pariharati. Idamassa paṭhamaṃ ṭhānagataṃ hoti pattagataṃ āyatanaso paribhuttaṃ.
‘‘পুন চপরং, গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি যা তা হোন্তি আপদা অগ্গিতো ৰা উদকতো ৰা রাজতো ৰা চোরতো ৰা অপ্পিযতো ৰা দাযাদতো 5, তথারূপাসু আপদাসু পরিযোধায সংৰত্ততি। সোত্থিং অত্তানং করোতি। ইদমস্স দুতিযং ঠানগতং হোতি পত্তগতং আযতনসো পরিভুত্তং।
‘‘Puna caparaṃ, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi yā tā honti āpadā aggito vā udakato vā rājato vā corato vā appiyato vā dāyādato 6, tathārūpāsu āpadāsu pariyodhāya saṃvattati. Sotthiṃ attānaṃ karoti. Idamassa dutiyaṃ ṭhānagataṃ hoti pattagataṃ āyatanaso paribhuttaṃ.
‘‘পুন চপরং, গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি পঞ্চবলিং কত্তা হোতি – ঞাতিবলিং, অতিথিবলিং, পুব্বপেতবলিং, রাজবলিং, দেৰতাবলিং। ইদমস্স ততিযং ঠানগতং হোতি পত্তগতং আযতনসো পরিভুত্তং।
‘‘Puna caparaṃ, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi pañcabaliṃ kattā hoti – ñātibaliṃ, atithibaliṃ, pubbapetabaliṃ, rājabaliṃ, devatābaliṃ. Idamassa tatiyaṃ ṭhānagataṃ hoti pattagataṃ āyatanaso paribhuttaṃ.
‘‘পুন চপরং, গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি যে তে সমণব্রাহ্মণা মদপ্পমাদা পটিৰিরতা খন্তিসোরচ্চে নিৰিট্ঠা একমত্তানং দমেন্তি, একমত্তানং সমেন্তি, একমত্তানং পরিনিব্বাপেন্তি, তথারূপেসু সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং । ইদমস্স চতুত্থং ঠানগতং হোতি পত্তগতং আযতনসো পরিভুত্তং।
‘‘Puna caparaṃ, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi ye te samaṇabrāhmaṇā madappamādā paṭiviratā khantisoracce niviṭṭhā ekamattānaṃ damenti, ekamattānaṃ samenti, ekamattānaṃ parinibbāpenti, tathārūpesu samaṇabrāhmaṇesu uddhaggikaṃ dakkhiṇaṃ patiṭṭhāpeti sovaggikaṃ sukhavipākaṃ saggasaṃvattanikaṃ . Idamassa catutthaṃ ṭhānagataṃ hoti pattagataṃ āyatanaso paribhuttaṃ.
‘‘স খো সো, গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি ইমানি চত্তারি পত্তকম্মানি কত্তা হোতি। যস্স কস্সচি, গহপতি, অঞ্ঞত্র ইমেহি চতূহি পত্তকম্মেহি ভোগা পরিক্খযং গচ্ছন্তি, ইমে ৰুচ্চন্তি, গহপতি, ভোগা অট্ঠানগতা অপত্তগতা অনাযতনসো পরিভুত্তা। যস্স কস্সচি, গহপতি, ইমেহি চতূহি পত্তকম্মেহি ভোগা পরিক্খযং গচ্ছন্তি, ইমে ৰুচ্চন্তি, গহপতি, ভোগা ঠানগতা পত্তগতা আযতনসো পরিভুত্তা’’তি।
‘‘Sa kho so, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi imāni cattāri pattakammāni kattā hoti. Yassa kassaci, gahapati, aññatra imehi catūhi pattakammehi bhogā parikkhayaṃ gacchanti, ime vuccanti, gahapati, bhogā aṭṭhānagatā apattagatā anāyatanaso paribhuttā. Yassa kassaci, gahapati, imehi catūhi pattakammehi bhogā parikkhayaṃ gacchanti, ime vuccanti, gahapati, bhogā ṭhānagatā pattagatā āyatanaso paribhuttā’’ti.
উদ্ধগ্গা দক্খিণা দিন্না, অথো পঞ্চবলী কতা।
Uddhaggā dakkhiṇā dinnā, atho pañcabalī katā;
উপট্ঠিতা সীলৰন্তো, সঞ্ঞতা ব্রহ্মচারযো॥
Upaṭṭhitā sīlavanto, saññatā brahmacārayo.
‘‘যদত্থং ভোগং ইচ্ছেয্য, পণ্ডিতো ঘরমাৰসং।
‘‘Yadatthaṃ bhogaṃ iccheyya, paṇḍito gharamāvasaṃ;
সো মে অত্থো অনুপ্পত্তো, কতং অননুতাপিযং॥
So me attho anuppatto, kataṃ ananutāpiyaṃ.
ইধেৰ নং পসংসন্তি, পেচ্চ সগ্গে পমোদতী’’তি॥ পঠমং।
Idheva naṃ pasaṃsanti, pecca sagge pamodatī’’ti. paṭhamaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১. পত্তকম্মসুত্তৰণ্ণনা • 1. Pattakammasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৪. পত্তকম্মসুত্তাদিৰণ্ণনা • 1-4. Pattakammasuttādivaṇṇanā
