| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
(7) 2. பத்தகம்மவக்³கோ³
(7) 2. Pattakammavaggo
1. பத்தகம்மஸுத்தவண்ணனா
1. Pattakammasuttavaṇṇanā
61. து³தியஸ்ஸ பட²மே அனிட்ட²படிக்கே²பேன இட்டா². மனே கமந்தி பவிஸந்தீதி கந்தா. மனங் அப்பாயந்தி பவட்³டெ⁴ந்தீதி மனாபா. து³ல்லபா⁴தி பரமது³ல்லபா⁴. போ⁴கா³தி பு⁴ஞ்ஜிதப்³பா³ ரூபாத³யோ விஸயா. ஸஹத⁴ம்மேனாதி த⁴ம்மேனேவ ஸத்³தி⁴ங் உப்பஜ்ஜந்து, மா த⁴ம்மூபகா⁴தங் கத்வா அத⁴ம்மேனாதி. அத²வா ஸஹத⁴ம்மேனாதி ஸகாரணேன, தேன தேன ஸேனாபதிஸெட்டி²ட்டா²னாதி³காரணேன ஸத்³தி⁴ங்யேவ உப்பஜ்ஜந்தூதி அத்தோ². யஸோதி பரிவாரஸம்பத்தி. ஸஹ ஞாதீபீ⁴தி ஞாதகேஹி ஸத்³தி⁴ங். ஸஹ உபஜ்ஜா²யேஹீதி ஸுக²து³க்கே²ஸு உபனிஜ்ஜா²யிதப்³ப³த்தா உபஜ்ஜா²யஸங்கா²தேஹி ஸந்தி³ட்ட²ஸம்ப⁴த்தேஹி ஸத்³தி⁴ங்.
61. Dutiyassa paṭhame aniṭṭhapaṭikkhepena iṭṭhā. Mane kamanti pavisantīti kantā. Manaṃ appāyanti pavaḍḍhentīti manāpā. Dullabhāti paramadullabhā. Bhogāti bhuñjitabbā rūpādayo visayā. Sahadhammenāti dhammeneva saddhiṃ uppajjantu, mā dhammūpaghātaṃ katvā adhammenāti. Athavā sahadhammenāti sakāraṇena, tena tena senāpatiseṭṭhiṭṭhānādikāraṇena saddhiṃyeva uppajjantūti attho. Yasoti parivārasampatti. Sahañātībhīti ñātakehi saddhiṃ. Saha upajjhāyehīti sukhadukkhesu upanijjhāyitabbattā upajjhāyasaṅkhātehi sandiṭṭhasambhattehi saddhiṃ.
அகிச்சங் கரோதீதி அகாதப்³ப³ங் கரோதி. கிச்சங் அபராதே⁴தீதி கத்தப்³ப³யுத்தகங் கிச்சங் அகரொந்தோ தங் அபராதே⁴தி நாம. த⁴ங்ஸதீதி பததி பரிஹாயதி. அபி⁴ஜ்ஜா²விஸமலோப⁴ந்தி அபி⁴ஜ்ஜா²ஸங்கா²தங் விஸமலோப⁴ங். பஜஹதீதி நுத³தி நீஹரதி. மஹாபஞ்ஞோதி மஹந்தபஞ்ஞோ. புது²பஞ்ஞோதி புது²லபஞ்ஞோ. ஆபாதத³ஸோதி தங் தங் அத்த²ங் ஆபாதேதி தமேவ பஸ்ஸதி, ஸுகு²மம்பிஸ்ஸ அத்த²ஜாதங் ஆபாதங் ஆக³ச்ச²தியேவாதி அத்தோ².
Akiccaṃ karotīti akātabbaṃ karoti. Kiccaṃ aparādhetīti kattabbayuttakaṃ kiccaṃ akaronto taṃ aparādheti nāma. Dhaṃsatīti patati parihāyati. Abhijjhāvisamalobhanti abhijjhāsaṅkhātaṃ visamalobhaṃ. Pajahatīti nudati nīharati. Mahāpaññoti mahantapañño. Puthupaññoti puthulapañño. Āpātadasoti taṃ taṃ atthaṃ āpāteti tameva passati, sukhumampissa atthajātaṃ āpātaṃ āgacchatiyevāti attho.
உட்டா²னவீரியாதி⁴க³தேஹீதி உட்டா²னஸங்கா²தேன வீரியேன அதி⁴க³தேஹி. பா³ஹாப³லபரிசிதேஹீதி பா³ஹாப³லேன பரிசிதேஹி வட்³டி⁴தேஹி. ஸேதா³வக்கி²த்தேஹீதி அவக்கி²த்தஸேதே³ஹி, ஸேத³ங் முஞ்சித்வா வாயாமேன பயோகே³ன ஸமதி⁴க³தேஹீதி அத்தோ². த⁴ம்மிகேஹீதி த⁴ம்மயுத்தேஹி. த⁴ம்மலத்³தே⁴ஹீதி த³ஸகுஸலகம்மபத²த⁴ம்மே அகோபெத்வா லத்³தே⁴ஹி. பத்தகம்மானீதி யுத்தகம்மானி அனுச்ச²விககம்மானி. ஸுகே²தீதி ஸுகி²தங் கரோதி. பீணேதீதி பீணிதங் ப³லஸம்பன்னங் கரோதி. டா²னக³தங் ஹோதீதி காரணக³தங் ஹோதி. கிங் பன தந்தி? சதூஸு பத்தகம்மேஸு ஏகங் போ⁴கே³ஹி கத்தப்³ப³கம்மங் போ⁴க³ஜாதமேவ டா²னக³தங். பத்தக³தந்தி யுத்தப்பத்தட்டா²னக³தங். ஆயதனஸோ பரிபு⁴த்தந்தி காரணேனேவ பரிபு⁴த்தங் போ⁴க³ஜாதங் ஹோதி.
Uṭṭhānavīriyādhigatehīti uṭṭhānasaṅkhātena vīriyena adhigatehi. Bāhābalaparicitehīti bāhābalena paricitehi vaḍḍhitehi. Sedāvakkhittehīti avakkhittasedehi, sedaṃ muñcitvā vāyāmena payogena samadhigatehīti attho. Dhammikehīti dhammayuttehi. Dhammaladdhehīti dasakusalakammapathadhamme akopetvā laddhehi. Pattakammānīti yuttakammāni anucchavikakammāni. Sukhetīti sukhitaṃ karoti. Pīṇetīti pīṇitaṃ balasampannaṃ karoti. Ṭhānagataṃ hotīti kāraṇagataṃ hoti. Kiṃ pana tanti? Catūsu pattakammesu ekaṃ bhogehi kattabbakammaṃ bhogajātameva ṭhānagataṃ. Pattagatanti yuttappattaṭṭhānagataṃ. Āyatanaso paribhuttanti kāraṇeneva paribhuttaṃ bhogajātaṃ hoti.
பரியோதா⁴ய ஸங்வத்ததீதி பித³ஹித்வா வத்ததி. யதா² அக்³கி³ஆதீ³ஹி உப்பன்னாஸு ஆபதா³ஸு, ஏவங் ஆதி³த்தகே³ஹனிப்³பா³பனாதீ³னங் அத்தா²ய த⁴னபரிச்சாக³ங் கத்வா தாஸங் ஆபதா³னங் மக்³க³ங் பித³ஹதி நிவாரேதி. ஸொத்தி²ங் அத்தானங் கரோதீதி நிருபத்³த³வங் கே²மங் அத்தானங் கரோதி. ஞாதிப³லிந்தி ஞாதகானங் ப³லிங். அதிதி²ப³லிந்தி ஆக³ந்துகானங் ப³லிங். புப்³ப³பேதப³லிந்தி பரலோகக³தானங் ஞாதகானங் ப³லிங். ராஜப³லிந்தி ரஞ்ஞோ கத்தப்³ப³யுத்தகங் ராஜப³லிங். தே³வதாப³லிந்தி தே³வதானங் கத்தப்³ப³ப³லிங். ஸப்³ப³மேதங் தேஸங் தேஸங் யதா²னுச்ச²விகவஸேன தா³தப்³ப³தா³னஸ்ஸ அதி⁴வசனங்.
Pariyodhāyasaṃvattatīti pidahitvā vattati. Yathā aggiādīhi uppannāsu āpadāsu, evaṃ ādittagehanibbāpanādīnaṃ atthāya dhanapariccāgaṃ katvā tāsaṃ āpadānaṃ maggaṃ pidahati nivāreti. Sotthiṃ attānaṃ karotīti nirupaddavaṃ khemaṃ attānaṃ karoti. Ñātibalinti ñātakānaṃ baliṃ. Atithibalinti āgantukānaṃ baliṃ. Pubbapetabalinti paralokagatānaṃ ñātakānaṃ baliṃ. Rājabalinti rañño kattabbayuttakaṃ rājabaliṃ. Devatābalinti devatānaṃ kattabbabaliṃ. Sabbametaṃ tesaṃ tesaṃ yathānucchavikavasena dātabbadānassa adhivacanaṃ.
க²ந்திஸோரச்சே நிவிட்டா²தி அதி⁴வாஸனக்க²ந்தியஞ்ச ஸுஸீலதாய ச நிவிட்டா². ஏகமத்தானங் த³மெந்தீதி ஏகங் அத்தனோவ அத்தபா⁴வங் இந்த்³ரியத³மேன த³மெந்தி. ஸமெந்தீதி அத்தனோ சித்தங் கிலேஸவூபஸமனேன ஸமெந்தி. பரினிப்³பா³பெந்தீதி கிலேஸபரினிப்³பா³னேனேவ பரினிப்³பா³பெந்தி. உத்³த⁴க்³கி³கந்திஆதீ³ஸு உபரூபரிபூ⁴மீஸு ப²லதா³னவஸேன உத்³த⁴மக்³க³மஸ்ஸாதி உத்³த⁴க்³கி³கா. ஸக்³க³ஸ்ஸ ஹிதாதி தத்ருபபத்திஜனநதோ ஸோவக்³கி³கா. நிப்³ப³த்தனிப்³ப³த்தட்டா²னே ஸுகோ²வ விபாகோ அஸ்ஸாதி ஸுக²விபாகா. ஸுட்டு² அக்³கா³னங் தி³ப்³ப³வண்ணாதீ³னங் த³ஸன்னங் விஸேஸானங் நிப்³ப³த்தனதோ ஸக்³க³ஸங்வத்தனிகா, ஏவரூபங் த³க்கி²ணங் பதிட்டா²பேதீதி அத்தோ².
Khantisoracce niviṭṭhāti adhivāsanakkhantiyañca susīlatāya ca niviṭṭhā. Ekamattānaṃ damentīti ekaṃ attanova attabhāvaṃ indriyadamena damenti. Samentīti attano cittaṃ kilesavūpasamanena samenti. Parinibbāpentīti kilesaparinibbāneneva parinibbāpenti. Uddhaggikantiādīsu uparūparibhūmīsu phaladānavasena uddhamaggamassāti uddhaggikā. Saggassa hitāti tatrupapattijananato sovaggikā. Nibbattanibbattaṭṭhāne sukhova vipāko assāti sukhavipākā. Suṭṭhu aggānaṃ dibbavaṇṇādīnaṃ dasannaṃ visesānaṃ nibbattanato saggasaṃvattanikā, evarūpaṃ dakkhiṇaṃ patiṭṭhāpetīti attho.
அரியத⁴ம்மே டி²தோதி பஞ்சஸீலத⁴ம்மே பதிட்டி²தோ. பேச்ச ஸக்³கே³ பமோத³தீதி பரலோகங் க³ந்த்வா யத்த² ஸக்³கே³ படிஸந்தி⁴ங் க³ண்ஹாதி, தத்த² மோத³தி. ஸோதாபன்னஸகதா³கா³மினோ வா ஹொந்து அனாகா³மீ வா, ஸப்³பே³ஸங் அயங் படிபதா³ லப்³ப⁴தேவாதி.
Ariyadhamme ṭhitoti pañcasīladhamme patiṭṭhito. Pecca sagge pamodatīti paralokaṃ gantvā yattha sagge paṭisandhiṃ gaṇhāti, tattha modati. Sotāpannasakadāgāmino vā hontu anāgāmī vā, sabbesaṃ ayaṃ paṭipadā labbhatevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. பத்தகம்மஸுத்தங் • 1. Pattakammasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-4. பத்தகம்மஸுத்தாதி³வண்ணனா • 1-4. Pattakammasuttādivaṇṇanā
