| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
(৭) ২. পত্তকম্মৰগ্গো
(7) 2. Pattakammavaggo
১. পত্তকম্মসুত্তৰণ্ণনা
1. Pattakammasuttavaṇṇanā
৬১. দুতিযস্স পঠমে অনিট্ঠপটিক্খেপেন ইট্ঠা। মনে কমন্তি পৰিসন্তীতি কন্তা। মনং অপ্পাযন্তি পৰড্ঢেন্তীতি মনাপা। দুল্লভাতি পরমদুল্লভা। ভোগাতি ভুঞ্জিতব্বা রূপাদযো ৰিসযা। সহধম্মেনাতি ধম্মেনেৰ সদ্ধিং উপ্পজ্জন্তু, মা ধম্মূপঘাতং কত্ৰা অধম্মেনাতি। অথৰা সহধম্মেনাতি সকারণেন, তেন তেন সেনাপতিসেট্ঠিট্ঠানাদিকারণেন সদ্ধিংযেৰ উপ্পজ্জন্তূতি অত্থো। যসোতি পরিৰারসম্পত্তি। সহ ঞাতীভীতি ঞাতকেহি সদ্ধিং। সহ উপজ্ঝাযেহীতি সুখদুক্খেসু উপনিজ্ঝাযিতব্বত্তা উপজ্ঝাযসঙ্খাতেহি সন্দিট্ঠসম্ভত্তেহি সদ্ধিং।
61. Dutiyassa paṭhame aniṭṭhapaṭikkhepena iṭṭhā. Mane kamanti pavisantīti kantā. Manaṃ appāyanti pavaḍḍhentīti manāpā. Dullabhāti paramadullabhā. Bhogāti bhuñjitabbā rūpādayo visayā. Sahadhammenāti dhammeneva saddhiṃ uppajjantu, mā dhammūpaghātaṃ katvā adhammenāti. Athavā sahadhammenāti sakāraṇena, tena tena senāpatiseṭṭhiṭṭhānādikāraṇena saddhiṃyeva uppajjantūti attho. Yasoti parivārasampatti. Sahañātībhīti ñātakehi saddhiṃ. Saha upajjhāyehīti sukhadukkhesu upanijjhāyitabbattā upajjhāyasaṅkhātehi sandiṭṭhasambhattehi saddhiṃ.
অকিচ্চং করোতীতি অকাতব্বং করোতি। কিচ্চং অপরাধেতীতি কত্তব্বযুত্তকং কিচ্চং অকরোন্তো তং অপরাধেতি নাম। ধংসতীতি পততি পরিহাযতি। অভিজ্ঝাৰিসমলোভন্তি অভিজ্ঝাসঙ্খাতং ৰিসমলোভং। পজহতীতি নুদতি নীহরতি। মহাপঞ্ঞোতি মহন্তপঞ্ঞো। পুথুপঞ্ঞোতি পুথুলপঞ্ঞো। আপাতদসোতি তং তং অত্থং আপাতেতি তমেৰ পস্সতি, সুখুমম্পিস্স অত্থজাতং আপাতং আগচ্ছতিযেৰাতি অত্থো।
Akiccaṃ karotīti akātabbaṃ karoti. Kiccaṃ aparādhetīti kattabbayuttakaṃ kiccaṃ akaronto taṃ aparādheti nāma. Dhaṃsatīti patati parihāyati. Abhijjhāvisamalobhanti abhijjhāsaṅkhātaṃ visamalobhaṃ. Pajahatīti nudati nīharati. Mahāpaññoti mahantapañño. Puthupaññoti puthulapañño. Āpātadasoti taṃ taṃ atthaṃ āpāteti tameva passati, sukhumampissa atthajātaṃ āpātaṃ āgacchatiyevāti attho.
উট্ঠানৰীরিযাধিগতেহীতি উট্ঠানসঙ্খাতেন ৰীরিযেন অধিগতেহি। বাহাবলপরিচিতেহীতি বাহাবলেন পরিচিতেহি ৰড্ঢিতেহি। সেদাৰক্খিত্তেহীতি অৰক্খিত্তসেদেহি, সেদং মুঞ্চিত্ৰা ৰাযামেন পযোগেন সমধিগতেহীতি অত্থো। ধম্মিকেহীতি ধম্মযুত্তেহি। ধম্মলদ্ধেহীতি দসকুসলকম্মপথধম্মে অকোপেত্ৰা লদ্ধেহি। পত্তকম্মানীতি যুত্তকম্মানি অনুচ্ছৰিককম্মানি। সুখেতীতি সুখিতং করোতি। পীণেতীতি পীণিতং বলসম্পন্নং করোতি। ঠানগতং হোতীতি কারণগতং হোতি। কিং পন তন্তি? চতূসু পত্তকম্মেসু একং ভোগেহি কত্তব্বকম্মং ভোগজাতমেৰ ঠানগতং। পত্তগতন্তি যুত্তপ্পত্তট্ঠানগতং। আযতনসো পরিভুত্তন্তি কারণেনেৰ পরিভুত্তং ভোগজাতং হোতি।
Uṭṭhānavīriyādhigatehīti uṭṭhānasaṅkhātena vīriyena adhigatehi. Bāhābalaparicitehīti bāhābalena paricitehi vaḍḍhitehi. Sedāvakkhittehīti avakkhittasedehi, sedaṃ muñcitvā vāyāmena payogena samadhigatehīti attho. Dhammikehīti dhammayuttehi. Dhammaladdhehīti dasakusalakammapathadhamme akopetvā laddhehi. Pattakammānīti yuttakammāni anucchavikakammāni. Sukhetīti sukhitaṃ karoti. Pīṇetīti pīṇitaṃ balasampannaṃ karoti. Ṭhānagataṃ hotīti kāraṇagataṃ hoti. Kiṃ pana tanti? Catūsu pattakammesu ekaṃ bhogehi kattabbakammaṃ bhogajātameva ṭhānagataṃ. Pattagatanti yuttappattaṭṭhānagataṃ. Āyatanaso paribhuttanti kāraṇeneva paribhuttaṃ bhogajātaṃ hoti.
পরিযোধায সংৰত্ততীতি পিদহিত্ৰা ৰত্ততি। যথা অগ্গিআদীহি উপ্পন্নাসু আপদাসু, এৰং আদিত্তগেহনিব্বাপনাদীনং অত্থায ধনপরিচ্চাগং কত্ৰা তাসং আপদানং মগ্গং পিদহতি নিৰারেতি। সোত্থিং অত্তানং করোতীতি নিরুপদ্দৰং খেমং অত্তানং করোতি। ঞাতিবলিন্তি ঞাতকানং বলিং। অতিথিবলিন্তি আগন্তুকানং বলিং। পুব্বপেতবলিন্তি পরলোকগতানং ঞাতকানং বলিং। রাজবলিন্তি রঞ্ঞো কত্তব্বযুত্তকং রাজবলিং। দেৰতাবলিন্তি দেৰতানং কত্তব্ববলিং। সব্বমেতং তেসং তেসং যথানুচ্ছৰিকৰসেন দাতব্বদানস্স অধিৰচনং।
Pariyodhāyasaṃvattatīti pidahitvā vattati. Yathā aggiādīhi uppannāsu āpadāsu, evaṃ ādittagehanibbāpanādīnaṃ atthāya dhanapariccāgaṃ katvā tāsaṃ āpadānaṃ maggaṃ pidahati nivāreti. Sotthiṃ attānaṃ karotīti nirupaddavaṃ khemaṃ attānaṃ karoti. Ñātibalinti ñātakānaṃ baliṃ. Atithibalinti āgantukānaṃ baliṃ. Pubbapetabalinti paralokagatānaṃ ñātakānaṃ baliṃ. Rājabalinti rañño kattabbayuttakaṃ rājabaliṃ. Devatābalinti devatānaṃ kattabbabaliṃ. Sabbametaṃ tesaṃ tesaṃ yathānucchavikavasena dātabbadānassa adhivacanaṃ.
খন্তিসোরচ্চে নিৰিট্ঠাতি অধিৰাসনক্খন্তিযঞ্চ সুসীলতায চ নিৰিট্ঠা। একমত্তানং দমেন্তীতি একং অত্তনোৰ অত্তভাৰং ইন্দ্রিযদমেন দমেন্তি। সমেন্তীতি অত্তনো চিত্তং কিলেসৰূপসমনেন সমেন্তি। পরিনিব্বাপেন্তীতি কিলেসপরিনিব্বানেনেৰ পরিনিব্বাপেন্তি। উদ্ধগ্গিকন্তিআদীসু উপরূপরিভূমীসু ফলদানৰসেন উদ্ধমগ্গমস্সাতি উদ্ধগ্গিকা। সগ্গস্স হিতাতি তত্রুপপত্তিজননতো সোৰগ্গিকা। নিব্বত্তনিব্বত্তট্ঠানে সুখোৰ ৰিপাকো অস্সাতি সুখৰিপাকা। সুট্ঠু অগ্গানং দিব্বৰণ্ণাদীনং দসন্নং ৰিসেসানং নিব্বত্তনতো সগ্গসংৰত্তনিকা, এৰরূপং দক্খিণং পতিট্ঠাপেতীতি অত্থো।
Khantisoracce niviṭṭhāti adhivāsanakkhantiyañca susīlatāya ca niviṭṭhā. Ekamattānaṃ damentīti ekaṃ attanova attabhāvaṃ indriyadamena damenti. Samentīti attano cittaṃ kilesavūpasamanena samenti. Parinibbāpentīti kilesaparinibbāneneva parinibbāpenti. Uddhaggikantiādīsu uparūparibhūmīsu phaladānavasena uddhamaggamassāti uddhaggikā. Saggassa hitāti tatrupapattijananato sovaggikā. Nibbattanibbattaṭṭhāne sukhova vipāko assāti sukhavipākā. Suṭṭhu aggānaṃ dibbavaṇṇādīnaṃ dasannaṃ visesānaṃ nibbattanato saggasaṃvattanikā, evarūpaṃ dakkhiṇaṃ patiṭṭhāpetīti attho.
অরিযধম্মে ঠিতোতি পঞ্চসীলধম্মে পতিট্ঠিতো। পেচ্চ সগ্গে পমোদতীতি পরলোকং গন্ত্ৰা যত্থ সগ্গে পটিসন্ধিং গণ্হাতি, তত্থ মোদতি। সোতাপন্নসকদাগামিনো ৰা হোন্তু অনাগামী ৰা, সব্বেসং অযং পটিপদা লব্ভতেৰাতি।
Ariyadhamme ṭhitoti pañcasīladhamme patiṭṭhito. Pecca sagge pamodatīti paralokaṃ gantvā yattha sagge paṭisandhiṃ gaṇhāti, tattha modati. Sotāpannasakadāgāmino vā hontu anāgāmī vā, sabbesaṃ ayaṃ paṭipadā labbhatevāti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. পত্তকম্মসুত্তং • 1. Pattakammasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৪. পত্তকম্মসুত্তাদিৰণ্ণনা • 1-4. Pattakammasuttādivaṇṇanā
