| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
(೭) ೨. ಪತ್ತಕಮ್ಮವಗ್ಗೋ
(7) 2. Pattakammavaggo
೧. ಪತ್ತಕಮ್ಮಸುತ್ತವಣ್ಣನಾ
1. Pattakammasuttavaṇṇanā
೬೧. ದುತಿಯಸ್ಸ ಪಠಮೇ ಅನಿಟ್ಠಪಟಿಕ್ಖೇಪೇನ ಇಟ್ಠಾ। ಮನೇ ಕಮನ್ತಿ ಪವಿಸನ್ತೀತಿ ಕನ್ತಾ। ಮನಂ ಅಪ್ಪಾಯನ್ತಿ ಪವಡ್ಢೇನ್ತೀತಿ ಮನಾಪಾ। ದುಲ್ಲಭಾತಿ ಪರಮದುಲ್ಲಭಾ। ಭೋಗಾತಿ ಭುಞ್ಜಿತಬ್ಬಾ ರೂಪಾದಯೋ ವಿಸಯಾ। ಸಹಧಮ್ಮೇನಾತಿ ಧಮ್ಮೇನೇವ ಸದ್ಧಿಂ ಉಪ್ಪಜ್ಜನ್ತು, ಮಾ ಧಮ್ಮೂಪಘಾತಂ ಕತ್ವಾ ಅಧಮ್ಮೇನಾತಿ। ಅಥವಾ ಸಹಧಮ್ಮೇನಾತಿ ಸಕಾರಣೇನ, ತೇನ ತೇನ ಸೇನಾಪತಿಸೇಟ್ಠಿಟ್ಠಾನಾದಿಕಾರಣೇನ ಸದ್ಧಿಂಯೇವ ಉಪ್ಪಜ್ಜನ್ತೂತಿ ಅತ್ಥೋ। ಯಸೋತಿ ಪರಿವಾರಸಮ್ಪತ್ತಿ। ಸಹ ಞಾತೀಭೀತಿ ಞಾತಕೇಹಿ ಸದ್ಧಿಂ। ಸಹ ಉಪಜ್ಝಾಯೇಹೀತಿ ಸುಖದುಕ್ಖೇಸು ಉಪನಿಜ್ಝಾಯಿತಬ್ಬತ್ತಾ ಉಪಜ್ಝಾಯಸಙ್ಖಾತೇಹಿ ಸನ್ದಿಟ್ಠಸಮ್ಭತ್ತೇಹಿ ಸದ್ಧಿಂ।
61. Dutiyassa paṭhame aniṭṭhapaṭikkhepena iṭṭhā. Mane kamanti pavisantīti kantā. Manaṃ appāyanti pavaḍḍhentīti manāpā. Dullabhāti paramadullabhā. Bhogāti bhuñjitabbā rūpādayo visayā. Sahadhammenāti dhammeneva saddhiṃ uppajjantu, mā dhammūpaghātaṃ katvā adhammenāti. Athavā sahadhammenāti sakāraṇena, tena tena senāpatiseṭṭhiṭṭhānādikāraṇena saddhiṃyeva uppajjantūti attho. Yasoti parivārasampatti. Sahañātībhīti ñātakehi saddhiṃ. Saha upajjhāyehīti sukhadukkhesu upanijjhāyitabbattā upajjhāyasaṅkhātehi sandiṭṭhasambhattehi saddhiṃ.
ಅಕಿಚ್ಚಂ ಕರೋತೀತಿ ಅಕಾತಬ್ಬಂ ಕರೋತಿ। ಕಿಚ್ಚಂ ಅಪರಾಧೇತೀತಿ ಕತ್ತಬ್ಬಯುತ್ತಕಂ ಕಿಚ್ಚಂ ಅಕರೋನ್ತೋ ತಂ ಅಪರಾಧೇತಿ ನಾಮ। ಧಂಸತೀತಿ ಪತತಿ ಪರಿಹಾಯತಿ। ಅಭಿಜ್ಝಾವಿಸಮಲೋಭನ್ತಿ ಅಭಿಜ್ಝಾಸಙ್ಖಾತಂ ವಿಸಮಲೋಭಂ। ಪಜಹತೀತಿ ನುದತಿ ನೀಹರತಿ। ಮಹಾಪಞ್ಞೋತಿ ಮಹನ್ತಪಞ್ಞೋ। ಪುಥುಪಞ್ಞೋತಿ ಪುಥುಲಪಞ್ಞೋ। ಆಪಾತದಸೋತಿ ತಂ ತಂ ಅತ್ಥಂ ಆಪಾತೇತಿ ತಮೇವ ಪಸ್ಸತಿ, ಸುಖುಮಮ್ಪಿಸ್ಸ ಅತ್ಥಜಾತಂ ಆಪಾತಂ ಆಗಚ್ಛತಿಯೇವಾತಿ ಅತ್ಥೋ।
Akiccaṃ karotīti akātabbaṃ karoti. Kiccaṃ aparādhetīti kattabbayuttakaṃ kiccaṃ akaronto taṃ aparādheti nāma. Dhaṃsatīti patati parihāyati. Abhijjhāvisamalobhanti abhijjhāsaṅkhātaṃ visamalobhaṃ. Pajahatīti nudati nīharati. Mahāpaññoti mahantapañño. Puthupaññoti puthulapañño. Āpātadasoti taṃ taṃ atthaṃ āpāteti tameva passati, sukhumampissa atthajātaṃ āpātaṃ āgacchatiyevāti attho.
ಉಟ್ಠಾನವೀರಿಯಾಧಿಗತೇಹೀತಿ ಉಟ್ಠಾನಸಙ್ಖಾತೇನ ವೀರಿಯೇನ ಅಧಿಗತೇಹಿ। ಬಾಹಾಬಲಪರಿಚಿತೇಹೀತಿ ಬಾಹಾಬಲೇನ ಪರಿಚಿತೇಹಿ ವಡ್ಢಿತೇಹಿ। ಸೇದಾವಕ್ಖಿತ್ತೇಹೀತಿ ಅವಕ್ಖಿತ್ತಸೇದೇಹಿ, ಸೇದಂ ಮುಞ್ಚಿತ್ವಾ ವಾಯಾಮೇನ ಪಯೋಗೇನ ಸಮಧಿಗತೇಹೀತಿ ಅತ್ಥೋ। ಧಮ್ಮಿಕೇಹೀತಿ ಧಮ್ಮಯುತ್ತೇಹಿ। ಧಮ್ಮಲದ್ಧೇಹೀತಿ ದಸಕುಸಲಕಮ್ಮಪಥಧಮ್ಮೇ ಅಕೋಪೇತ್ವಾ ಲದ್ಧೇಹಿ। ಪತ್ತಕಮ್ಮಾನೀತಿ ಯುತ್ತಕಮ್ಮಾನಿ ಅನುಚ್ಛವಿಕಕಮ್ಮಾನಿ। ಸುಖೇತೀತಿ ಸುಖಿತಂ ಕರೋತಿ। ಪೀಣೇತೀತಿ ಪೀಣಿತಂ ಬಲಸಮ್ಪನ್ನಂ ಕರೋತಿ। ಠಾನಗತಂ ಹೋತೀತಿ ಕಾರಣಗತಂ ಹೋತಿ। ಕಿಂ ಪನ ತನ್ತಿ? ಚತೂಸು ಪತ್ತಕಮ್ಮೇಸು ಏಕಂ ಭೋಗೇಹಿ ಕತ್ತಬ್ಬಕಮ್ಮಂ ಭೋಗಜಾತಮೇವ ಠಾನಗತಂ। ಪತ್ತಗತನ್ತಿ ಯುತ್ತಪ್ಪತ್ತಟ್ಠಾನಗತಂ। ಆಯತನಸೋ ಪರಿಭುತ್ತನ್ತಿ ಕಾರಣೇನೇವ ಪರಿಭುತ್ತಂ ಭೋಗಜಾತಂ ಹೋತಿ।
Uṭṭhānavīriyādhigatehīti uṭṭhānasaṅkhātena vīriyena adhigatehi. Bāhābalaparicitehīti bāhābalena paricitehi vaḍḍhitehi. Sedāvakkhittehīti avakkhittasedehi, sedaṃ muñcitvā vāyāmena payogena samadhigatehīti attho. Dhammikehīti dhammayuttehi. Dhammaladdhehīti dasakusalakammapathadhamme akopetvā laddhehi. Pattakammānīti yuttakammāni anucchavikakammāni. Sukhetīti sukhitaṃ karoti. Pīṇetīti pīṇitaṃ balasampannaṃ karoti. Ṭhānagataṃ hotīti kāraṇagataṃ hoti. Kiṃ pana tanti? Catūsu pattakammesu ekaṃ bhogehi kattabbakammaṃ bhogajātameva ṭhānagataṃ. Pattagatanti yuttappattaṭṭhānagataṃ. Āyatanaso paribhuttanti kāraṇeneva paribhuttaṃ bhogajātaṃ hoti.
ಪರಿಯೋಧಾಯ ಸಂವತ್ತತೀತಿ ಪಿದಹಿತ್ವಾ ವತ್ತತಿ। ಯಥಾ ಅಗ್ಗಿಆದೀಹಿ ಉಪ್ಪನ್ನಾಸು ಆಪದಾಸು, ಏವಂ ಆದಿತ್ತಗೇಹನಿಬ್ಬಾಪನಾದೀನಂ ಅತ್ಥಾಯ ಧನಪರಿಚ್ಚಾಗಂ ಕತ್ವಾ ತಾಸಂ ಆಪದಾನಂ ಮಗ್ಗಂ ಪಿದಹತಿ ನಿವಾರೇತಿ। ಸೋತ್ಥಿಂ ಅತ್ತಾನಂ ಕರೋತೀತಿ ನಿರುಪದ್ದವಂ ಖೇಮಂ ಅತ್ತಾನಂ ಕರೋತಿ। ಞಾತಿಬಲಿನ್ತಿ ಞಾತಕಾನಂ ಬಲಿಂ। ಅತಿಥಿಬಲಿನ್ತಿ ಆಗನ್ತುಕಾನಂ ಬಲಿಂ। ಪುಬ್ಬಪೇತಬಲಿನ್ತಿ ಪರಲೋಕಗತಾನಂ ಞಾತಕಾನಂ ಬಲಿಂ। ರಾಜಬಲಿನ್ತಿ ರಞ್ಞೋ ಕತ್ತಬ್ಬಯುತ್ತಕಂ ರಾಜಬಲಿಂ। ದೇವತಾಬಲಿನ್ತಿ ದೇವತಾನಂ ಕತ್ತಬ್ಬಬಲಿಂ। ಸಬ್ಬಮೇತಂ ತೇಸಂ ತೇಸಂ ಯಥಾನುಚ್ಛವಿಕವಸೇನ ದಾತಬ್ಬದಾನಸ್ಸ ಅಧಿವಚನಂ।
Pariyodhāyasaṃvattatīti pidahitvā vattati. Yathā aggiādīhi uppannāsu āpadāsu, evaṃ ādittagehanibbāpanādīnaṃ atthāya dhanapariccāgaṃ katvā tāsaṃ āpadānaṃ maggaṃ pidahati nivāreti. Sotthiṃ attānaṃ karotīti nirupaddavaṃ khemaṃ attānaṃ karoti. Ñātibalinti ñātakānaṃ baliṃ. Atithibalinti āgantukānaṃ baliṃ. Pubbapetabalinti paralokagatānaṃ ñātakānaṃ baliṃ. Rājabalinti rañño kattabbayuttakaṃ rājabaliṃ. Devatābalinti devatānaṃ kattabbabaliṃ. Sabbametaṃ tesaṃ tesaṃ yathānucchavikavasena dātabbadānassa adhivacanaṃ.
ಖನ್ತಿಸೋರಚ್ಚೇ ನಿವಿಟ್ಠಾತಿ ಅಧಿವಾಸನಕ್ಖನ್ತಿಯಞ್ಚ ಸುಸೀಲತಾಯ ಚ ನಿವಿಟ್ಠಾ। ಏಕಮತ್ತಾನಂ ದಮೇನ್ತೀತಿ ಏಕಂ ಅತ್ತನೋವ ಅತ್ತಭಾವಂ ಇನ್ದ್ರಿಯದಮೇನ ದಮೇನ್ತಿ। ಸಮೇನ್ತೀತಿ ಅತ್ತನೋ ಚಿತ್ತಂ ಕಿಲೇಸವೂಪಸಮನೇನ ಸಮೇನ್ತಿ। ಪರಿನಿಬ್ಬಾಪೇನ್ತೀತಿ ಕಿಲೇಸಪರಿನಿಬ್ಬಾನೇನೇವ ಪರಿನಿಬ್ಬಾಪೇನ್ತಿ। ಉದ್ಧಗ್ಗಿಕನ್ತಿಆದೀಸು ಉಪರೂಪರಿಭೂಮೀಸು ಫಲದಾನವಸೇನ ಉದ್ಧಮಗ್ಗಮಸ್ಸಾತಿ ಉದ್ಧಗ್ಗಿಕಾ। ಸಗ್ಗಸ್ಸ ಹಿತಾತಿ ತತ್ರುಪಪತ್ತಿಜನನತೋ ಸೋವಗ್ಗಿಕಾ। ನಿಬ್ಬತ್ತನಿಬ್ಬತ್ತಟ್ಠಾನೇ ಸುಖೋವ ವಿಪಾಕೋ ಅಸ್ಸಾತಿ ಸುಖವಿಪಾಕಾ। ಸುಟ್ಠು ಅಗ್ಗಾನಂ ದಿಬ್ಬವಣ್ಣಾದೀನಂ ದಸನ್ನಂ ವಿಸೇಸಾನಂ ನಿಬ್ಬತ್ತನತೋ ಸಗ್ಗಸಂವತ್ತನಿಕಾ, ಏವರೂಪಂ ದಕ್ಖಿಣಂ ಪತಿಟ್ಠಾಪೇತೀತಿ ಅತ್ಥೋ।
Khantisoracce niviṭṭhāti adhivāsanakkhantiyañca susīlatāya ca niviṭṭhā. Ekamattānaṃ damentīti ekaṃ attanova attabhāvaṃ indriyadamena damenti. Samentīti attano cittaṃ kilesavūpasamanena samenti. Parinibbāpentīti kilesaparinibbāneneva parinibbāpenti. Uddhaggikantiādīsu uparūparibhūmīsu phaladānavasena uddhamaggamassāti uddhaggikā. Saggassa hitāti tatrupapattijananato sovaggikā. Nibbattanibbattaṭṭhāne sukhova vipāko assāti sukhavipākā. Suṭṭhu aggānaṃ dibbavaṇṇādīnaṃ dasannaṃ visesānaṃ nibbattanato saggasaṃvattanikā, evarūpaṃ dakkhiṇaṃ patiṭṭhāpetīti attho.
ಅರಿಯಧಮ್ಮೇ ಠಿತೋತಿ ಪಞ್ಚಸೀಲಧಮ್ಮೇ ಪತಿಟ್ಠಿತೋ। ಪೇಚ್ಚ ಸಗ್ಗೇ ಪಮೋದತೀತಿ ಪರಲೋಕಂ ಗನ್ತ್ವಾ ಯತ್ಥ ಸಗ್ಗೇ ಪಟಿಸನ್ಧಿಂ ಗಣ್ಹಾತಿ, ತತ್ಥ ಮೋದತಿ। ಸೋತಾಪನ್ನಸಕದಾಗಾಮಿನೋ ವಾ ಹೋನ್ತು ಅನಾಗಾಮೀ ವಾ, ಸಬ್ಬೇಸಂ ಅಯಂ ಪಟಿಪದಾ ಲಬ್ಭತೇವಾತಿ।
Ariyadhamme ṭhitoti pañcasīladhamme patiṭṭhito. Pecca sagge pamodatīti paralokaṃ gantvā yattha sagge paṭisandhiṃ gaṇhāti, tattha modati. Sotāpannasakadāgāmino vā hontu anāgāmī vā, sabbesaṃ ayaṃ paṭipadā labbhatevāti.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧. ಪತ್ತಕಮ್ಮಸುತ್ತಂ • 1. Pattakammasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೪. ಪತ್ತಕಮ್ಮಸುತ್ತಾದಿವಣ್ಣನಾ • 1-4. Pattakammasuttādivaṇṇanā
