| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
5. பத்தனித்³தே³ஸவண்ணனா
5. Pattaniddesavaṇṇanā
60. அயோபத்தோ நாம அயஸா காளலோஹேன நிப்³ப³த்தோ பத்தோ. ஜாதியா உக்கட்டா²தீ³னங் ஸாமஞ்ஞவஸேன. பமாணதோதி பரிச்சே²த³தோ. தயோ பத்தாதி பாட²ஸேஸோ.
60.Ayopatto nāma ayasā kāḷalohena nibbatto patto. Jātiyā ukkaṭṭhādīnaṃ sāmaññavasena. Pamāṇatoti paricchedato. Tayo pattāti pāṭhaseso.
61. ‘‘மக³தே⁴ஸூ’’தி வத்தப்³பே³ மக³தே⁴தி வசனவிபல்லாஸேன வா ‘‘பச்சாஸா ஸதீ’’திஆதீ³ஸு விய ஸு-ஸத்³த³லோபேன வா வுத்தங். நாளித்³வயதண்டு³லஸாதி⁴தந்தி எத்த² மக³தா⁴பெக்கோ²பி நாளி-ஸத்³தோ³ த்³வய-ஸத்³தே³ன ஸமாஸோ ஹோதி க³ம்மகத்தாதி நாளியா த்³வயங் நாளித்³வயங். தத்த² மக³த⁴னாளி நாம அட்³ட⁴தேரஸபலா ஹோதி. எத்த² ச அட்³ட⁴தேரஸபலானி மாஸானந்தி வத³ந்தி. நாளித்³வயேன பமிதா தண்டு³லா ஸுகொட்டிதபரிஸுத்³தா⁴ அனுபஹதபுராணஸாலிதண்டு³லா நாளித்³வயதண்டு³லா, தேஹி ஸாதி⁴தங் பசிதந்தி அத்தோ². ஓத³னந்தி ஸம்மா ஸம்பாதி³தங் அவஸ்ஸாவிதோத³னங். ஸூபந்தி ஓத³னஸ்ஸ சதுத்த²பா⁴க³ப்பமாணங் நாதிக⁴னங் நாதிதனுகங் ஹத்த²ஹாரியங் ஸப்³ப³ஸம்பா⁴ரஸங்க²தங் முக்³க³ஸுபங். ப்³யஞ்ஜனஞ்ச ததூ³பியந்தி தஸ்ஸ ஓத³னஸ்ஸ உபியங் அனுரூபங் யாவ சரிமாலோபப்பஹோனகங் மச்ச²மங்ஸாதி³ப்³யஞ்ஜனஞ்ச உக்கட்டோ² க³ண்ஹாதீதி ஸம்ப³ந்தோ⁴.
61. ‘‘Magadhesū’’ti vattabbe magadheti vacanavipallāsena vā ‘‘paccāsā satī’’tiādīsu viya su-saddalopena vā vuttaṃ. Nāḷidvayataṇḍulasādhitanti ettha magadhāpekkhopi nāḷi-saddo dvaya-saddena samāso hoti gammakattāti nāḷiyā dvayaṃ nāḷidvayaṃ. Tattha magadhanāḷi nāma aḍḍhaterasapalā hoti. Ettha ca aḍḍhaterasapalāni māsānanti vadanti. Nāḷidvayena pamitā taṇḍulā sukoṭṭitaparisuddhā anupahatapurāṇasālitaṇḍulā nāḷidvayataṇḍulā, tehi sādhitaṃ pacitanti attho. Odananti sammā sampāditaṃ avassāvitodanaṃ. Sūpanti odanassa catutthabhāgappamāṇaṃ nātighanaṃ nātitanukaṃ hatthahāriyaṃ sabbasambhārasaṅkhataṃ muggasupaṃ. Byañjanañca tadūpiyanti tassa odanassa upiyaṃ anurūpaṃ yāva carimālopappahonakaṃ macchamaṃsādibyañjanañca ukkaṭṭho gaṇhātīti sambandho.
62. தஸ்ஸாதி யதா²வுத்தஓத³னாதி³னோ. உபட்³டோ⁴தி உபட்³ட⁴ங் நாளிகோத³னாதி³ அஸ்ஸ அத்தீ²தி உபட்³டோ⁴. ஏவ-காரேன அதிரேகங் நிவத்தேதி. ததோதி யதா²வுத்தனாளிகோத³னாதி³தோ. உக்கட்ட²தோ உக்கட்டோ² ச ஓமகோமகோ ச அபத்தோதி யோஜனா. ஓமகதோ ஓமகோ ஓமகோமகோ. இமினா புன பத்தத்³வயத³ஸ்ஸனேன பமாணதோ தயோபி பத்தா விபா⁴க³தோ நவ ஹொந்தீதி தீ³பேதி. தத்த² யஸ்மிங் மக³த⁴னாளித்³வயதண்டு³லோத³னாதி³கங் ஸப்³ப³ம்பி வட்³ட⁴னபக்கே² டி²தங் பக்கி²த்தங் ஸசே பத்தஸ்ஸ முக²வட்டியா ஹெட்டி²மராஜிஸமங் திட்ட²தி, ஸுத்தேன வா ஹீரேன வா சி²ந்த³ந்தஸ்ஸ ஸுத்தஸ்ஸ வா ஹீரஸ்ஸ வா ஹெட்டி²மந்தங் பு²ஸதி, அயங் உக்கட்டோ² நாம பத்தோ. ஸசே தங் ராஜிங் அதிக்கம்ம தூ²பீகதங் திட்ட²தி, அயங் உக்கட்டோ²மகோ நாம பத்தோ. ஸசே தங் ராஜிங் ந ஸம்பாபுணாதி அந்தோக³தமேவ, அயங் உக்கட்டு²க்கட்டோ² நாம பத்தோ. ‘‘ஏகங் நாளிகோத³னாதி³ ஸப்³ப³ம்பி பக்கி²த்தங் வுத்தனயேனேவ ஹெட்டி²மராஜிஸமங் திட்ட²தி, அயங் மஜ்ஜி²மோ நாம பத்தோ’’திஆதி³னா மஜ்ஜி²மமஜ்ஜி²மோமகமஜ்ஜி²முக்கட்டா² ச ‘‘யத்த² உபட்³ட⁴னாளிகோத³னாதி³ ஸப்³ப³ம்பி பக்கி²த்தங் ஹெட்டி²மராஜிஸமங் திட்ட²தி , அயங் ஓமகோ நாம பத்தோ’’திஆதி³னா ஓமகஓமகோமகஓமகுக்கட்டா² ச பத்தா உக்கட்டே² வுத்தனயேனேவ வேதி³தப்³பா³. தேஸு த்³வே அபத்தா பா⁴ஜனபரிபோ⁴கே³ன பரிபு⁴ஞ்ஜிதப்³பா³, நாதி⁴ட்டா²னூபகா³, ந விகப்பனூபகா³.
62.Tassāti yathāvuttaodanādino. Upaḍḍhoti upaḍḍhaṃ nāḷikodanādi assa atthīti upaḍḍho. Eva-kārena atirekaṃ nivatteti. Tatoti yathāvuttanāḷikodanādito. Ukkaṭṭhato ukkaṭṭho ca omakomako ca apattoti yojanā. Omakato omako omakomako. Iminā puna pattadvayadassanena pamāṇato tayopi pattā vibhāgato nava hontīti dīpeti. Tattha yasmiṃ magadhanāḷidvayataṇḍulodanādikaṃ sabbampi vaḍḍhanapakkhe ṭhitaṃ pakkhittaṃ sace pattassa mukhavaṭṭiyā heṭṭhimarājisamaṃ tiṭṭhati, suttena vā hīrena vā chindantassa suttassa vā hīrassa vā heṭṭhimantaṃ phusati, ayaṃ ukkaṭṭho nāma patto. Sace taṃ rājiṃ atikkamma thūpīkataṃ tiṭṭhati, ayaṃ ukkaṭṭhomako nāma patto. Sace taṃ rājiṃ na sampāpuṇāti antogatameva, ayaṃ ukkaṭṭhukkaṭṭho nāma patto. ‘‘Ekaṃ nāḷikodanādi sabbampi pakkhittaṃ vuttanayeneva heṭṭhimarājisamaṃ tiṭṭhati, ayaṃ majjhimo nāma patto’’tiādinā majjhimamajjhimomakamajjhimukkaṭṭhā ca ‘‘yattha upaḍḍhanāḷikodanādi sabbampi pakkhittaṃ heṭṭhimarājisamaṃ tiṭṭhati , ayaṃ omako nāma patto’’tiādinā omakaomakomakaomakukkaṭṭhā ca pattā ukkaṭṭhe vuttanayeneva veditabbā. Tesu dve apattā bhājanaparibhogena paribhuñjitabbā, nādhiṭṭhānūpagā, na vikappanūpagā.
63. கப்போ ஸகோ அதிரேகபத்தோ த³ஸாஹபரமங் தா⁴ரெய்யாதி யோஜனா. தத்த² கப்போதி கப்பியோ. ஸகோதி அத்தனோ ஸந்தகோ. கப்பியத்தா பன அத்தஸந்தகத்தா ச ஸத்தன்னம்பி அதி⁴ட்டா²னவிகப்பனூபக³தா வேதி³தப்³பா³. தத்த² அயோபத்தோ பஞ்சஹி பாகேஹி, மத்திகாபத்தோ த்³வீஹி பாகேஹி பக்கோ அதி⁴ட்டா²னூபகோ³ ச விகப்பனூபகோ³ ச, ததா² உபோ⁴பி காகணிகமத்தஸ்ஸாபி மூலஸ்ஸ அனவஸேஸெத்வா தி³ன்னே, ஸப்³ப³ஸோ அத்தஸந்தகத்தே விஞ்ஞாதே ச அதி⁴ட்டா²னவிகப்பனூபகா³தி த³ட்ட²ப்³ப³ங். அதிரேகபத்தோதி அனதி⁴ட்டி²தாவிகப்பிததாய அதிரேகபத்தோ. அதி⁴ட்டா²னபச்சுத்³தா⁴ரா பனெத்த² சீவரே வுத்தாவ. விகப்பெந்தேன பன பத்தானங் ஏகப³ஹுபா⁴வங், ஸன்னிஹிதாஸன்னிஹிதபா⁴வஞ்ச ஞத்வா ‘‘இமங் பத்த’’ந்தி வா ‘‘இமே பத்தே’’தி வா ‘‘ஏதங் பத்த’’ந்தி வா ‘‘ஏதே பத்தே’’தி வா வத்வா ‘‘துய்ஹங் விகப்பேமீ’’தி வத்தப்³ப³ங். ஸம்முகா²தி³பே⁴தோ³ பனெத்த² சீவரே வக்க²மானநயேன வேதி³தப்³போ³. த³ஸாஹபரமந்தி த³ஸ அஹானி பரமோ பரிச்சே²தோ³ அஸ்ஸாதி த³ஹாஹபரமோ, காலோ, தங். அச்சந்தஸங்யோகே³ உபயோக³வசனங். தா⁴ரெய்யோதி பரிபோ⁴க³வஸேன தா⁴ரேதப்³போ³. தஸ்மிங்காலே அதினாமிதே பத்தோ நிஸ்ஸக்³கி³யோ ஹோதீதி யோஜனா. அதினாமிதேதி அதிக்காமிதே நிஸ்ஸக்³கி³யோ ஹோதி, ஏகாத³ஸே அருணுக்³க³மனே ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா பத³பா⁴ஜனீயே (பாரா॰ 602) வுத்தனயேன பத்தோ நிஸ்ஸஜ்ஜிதப்³போ³ ஹோதி, ததா² ஸதி பாசித்தியாபத்தி சஸ்ஸ ஹோதீதி அதி⁴ப்பாயோ.
63. Kappo sako atirekapatto dasāhaparamaṃ dhāreyyāti yojanā. Tattha kappoti kappiyo. Sakoti attano santako. Kappiyattā pana attasantakattā ca sattannampi adhiṭṭhānavikappanūpagatā veditabbā. Tattha ayopatto pañcahi pākehi, mattikāpatto dvīhi pākehi pakko adhiṭṭhānūpago ca vikappanūpago ca, tathā ubhopi kākaṇikamattassāpi mūlassa anavasesetvā dinne, sabbaso attasantakatte viññāte ca adhiṭṭhānavikappanūpagāti daṭṭhabbaṃ. Atirekapattoti anadhiṭṭhitāvikappitatāya atirekapatto. Adhiṭṭhānapaccuddhārā panettha cīvare vuttāva. Vikappentena pana pattānaṃ ekabahubhāvaṃ, sannihitāsannihitabhāvañca ñatvā ‘‘imaṃ patta’’nti vā ‘‘ime patte’’ti vā ‘‘etaṃ patta’’nti vā ‘‘ete patte’’ti vā vatvā ‘‘tuyhaṃ vikappemī’’ti vattabbaṃ. Sammukhādibhedo panettha cīvare vakkhamānanayena veditabbo. Dasāhaparamanti dasa ahāni paramo paricchedo assāti dahāhaparamo, kālo, taṃ. Accantasaṃyoge upayogavacanaṃ. Dhāreyyoti paribhogavasena dhāretabbo. Tasmiṃkāle atināmite patto nissaggiyo hotīti yojanā. Atināmiteti atikkāmite nissaggiyo hoti, ekādase aruṇuggamane saṅghassa vā gaṇassa vā puggalassa vā padabhājanīye (pārā. 602) vuttanayena patto nissajjitabbo hoti, tathā sati pācittiyāpatti cassa hotīti adhippāyo.
64. ‘‘அச்சே²தா³’’திஆதி³ சீவரே வுத்தனயத்தா உத்தானமேவ. அயங் பன விஸேஸோ – மரணுத்³த⁴டாதி உத்³த⁴ரணங் உத்³த⁴ளங், பச்சுத்³தா⁴ரோ. மரணஞ்ச உத்³த⁴டஞ்ச மரணுத்³த⁴டா, தஸ்மா. சி²த்³தே³னாதி யேன கங்கு³ஸித்த²ங் நிக்க²மதி சேவ பவிஸதி ச, தேன முக²வட்டிதோ ஹெட்டா² த்³வங்கு³லசி²த்³தே³ன. பத்தாதி⁴ட்டா²னமுஜ்ஜ²தீதி பத்தோ அதி⁴ட்டா²னங் உஜ்ஜ²தி விஸ்ஸஜ்ஜதி.
64.‘‘Acchedā’’tiādi cīvare vuttanayattā uttānameva. Ayaṃ pana viseso – maraṇuddhaṭāti uddharaṇaṃ uddhaḷaṃ, paccuddhāro. Maraṇañca uddhaṭañca maraṇuddhaṭā, tasmā. Chiddenāti yena kaṅgusitthaṃ nikkhamati ceva pavisati ca, tena mukhavaṭṭito heṭṭhā dvaṅgulachiddena. Pattādhiṭṭhānamujjhatīti patto adhiṭṭhānaṃ ujjhati vissajjati.
65. இதா³னி ‘‘பத்த’’ந்திஆதி³னா அஞ்ஞதா² பரிஹரணே து³க்கடங் த³ஸ்ஸேதி. தத்த² ஸோத³கங் பத்தங் ந படிஸாமெய்யாதி யோஜனா. ந படிஸாமெய்யாதி கு³த்தட்டா²னே ந நிக்கி²பெய்ய, ‘‘ஸோத³கங் பத்தங் உண்ஹே ந ச ஓதபே’’திஆதி³னா ச யோஜனீயங். ந ச ஓதபேதி நேவ ஈஸகங் தாபெய்ய. ந நித³ஹேதி நிருத³கங் கத்வாபி பு⁴ஸங் ந நித³ஹெய்ய, வோத³கங் கத்வா ஈஸகங் தாபெய்யாதிபி ப்³யதிரேகத்தோ². பூ⁴ம்யா ந ட²பேதி க²ராய பூ⁴மியா ந ட²பெய்ய. யத்த² பன வண்ணோ ந து³ஸ்ஸதி, ஏவரூபாய மத்திகாய பரிப⁴ண்ட³கதாய பூ⁴மியா வா ததா²ரூபாய ஏவ வாலிகாய வா நிக்குஜ்ஜித்வா உக்குஜ்ஜித்வா ட²பேதுங் வட்டதி. நோ ச லக்³க³யேதி பி⁴த்திகி²லாதீ³ஸு ந ஓலம்பெ³ய்ய.
65. Idāni ‘‘patta’’ntiādinā aññathā pariharaṇe dukkaṭaṃ dasseti. Tattha sodakaṃ pattaṃ na paṭisāmeyyāti yojanā. Na paṭisāmeyyāti guttaṭṭhāne na nikkhipeyya, ‘‘sodakaṃ pattaṃ uṇhe na ca otape’’tiādinā ca yojanīyaṃ. Na ca otapeti neva īsakaṃ tāpeyya. Na nidaheti nirudakaṃ katvāpi bhusaṃ na nidaheyya, vodakaṃ katvā īsakaṃ tāpeyyātipi byatirekattho. Bhūmyā na ṭhapeti kharāya bhūmiyā na ṭhapeyya. Yattha pana vaṇṇo na dussati, evarūpāya mattikāya paribhaṇḍakatāya bhūmiyā vā tathārūpāya eva vālikāya vā nikkujjitvā ukkujjitvā ṭhapetuṃ vaṭṭati. No ca laggayeti bhittikhilādīsu na olambeyya.
66. ‘‘மிட்³ட⁴ந்தே வா’’திஆதி³னா வத்வா பத்தங் ட²பேதுங் ந ச கப்பதீதி யோஜேதப்³ப³ங். மிட்³ட⁴ந்தேதி ஆளிந்த³கமிட்³டி⁴காதீ³னங் மிட்³டீ⁴னங் அந்தே. ஸசே பன பரிவத்தெத்வா தத்தே²வ பதிட்டா²தி, ஏவரூபாய வித்தி²ண்ணாய மிட்³டி⁴யா ட²பேதுங் வட்டதி. பரிப⁴ண்ட³ந்தே வாதி பா³ஹிரபஸ்ஸே கதாய தனுகாய மிட்³டி⁴காய அந்தே வா. எத்த² வா-ஸத்³தோ³ ஸமுச்சயே, ஸோ ச பச்சேகங் யோஜேதப்³போ³. அங்கே பன அங்ஸப³த்³த⁴கேன அங்ஸகூடே லக்³கெ³த்வா ட²பேதுஞ்ச வட்டதி. ச²த்தேபி ப⁴ண்ட³கேன ஸத்³தி⁴ங் ப³ந்தி⁴த்வா வா அட்டங் கத்வா வா ட²பேதுங் வட்டதி. மஞ்சேபி அஞ்ஞேன ஸத்³தி⁴ங் ப³ந்தி⁴த்வா ட²பேதுங், அடனியங் ப³ந்தி⁴த்வா ஓலம்பே³துங் வட்டதி.
66. ‘‘Miḍḍhante vā’’tiādinā vatvā pattaṃ ṭhapetuṃ na ca kappatīti yojetabbaṃ. Miḍḍhanteti āḷindakamiḍḍhikādīnaṃ miḍḍhīnaṃ ante. Sace pana parivattetvā tattheva patiṭṭhāti, evarūpāya vitthiṇṇāya miḍḍhiyā ṭhapetuṃ vaṭṭati. Paribhaṇḍante vāti bāhirapasse katāya tanukāya miḍḍhikāya ante vā. Ettha vā-saddo samuccaye, so ca paccekaṃ yojetabbo. Aṅke pana aṃsabaddhakena aṃsakūṭe laggetvā ṭhapetuñca vaṭṭati. Chattepi bhaṇḍakena saddhiṃ bandhitvā vā aṭṭaṃ katvā vā ṭhapetuṃ vaṭṭati. Mañcepi aññena saddhiṃ bandhitvā ṭhapetuṃ, aṭaniyaṃ bandhitvā olambetuṃ vaṭṭati.
67. பத்தேன உச்சி²ட்டோ²த³கஞ்ச சலகட்டி²கஞ்ச ந நீஹரெய்யாதி ஸம்ப³ந்தோ⁴. உச்சி²ட்டோ²த³கந்தி முக²விக்கா²லனோத³கங். சலகானி ச சப்³பெ³த்வா அபவித்³தா⁴மிஸானி அட்டி²கானி மச்ச²மங்ஸஅட்டி²கானி ச சலகட்டி²கங். பத்தங் படிக்³க³ஹங் கத்வா ஹத்த²ங் தோ⁴விதும்பி ஹத்த²தோ⁴தாதி³ உத³கம்பி பத்தே ஆகிரித்வா நீஹரிதும்பி அனுச்சி²ட்ட²ங் ஸுத்³த⁴பத்தங் உச்சி²ட்ட²ஹத்தே²ன க³ண்ஹிதும்பி ந வட்டதி. மச்ச²மங்ஸப²லாப²லாதீ³னி கா²த³ந்தோ யங் தத்த² அட்டி²ங் வா சலகங் வா ச²ட்³டே³துகாமோ ஹோதி, தங் பத்தே ட²பேதுங் ந லப⁴தி. முக²தோ நீஹடங் பன யங் கிஞ்சி புன அகா²தி³துகாமோ பத்தே ட²பேதுங் ந லப⁴தி. ஸிங்கி³வேராதீ³னி ட³ங்ஸித்வா புன ட²பேதுங் லப⁴தி. பத்தஹத்தோ²தி பத்தோ ஹத்தே² யஸ்ஸாதி விக்³க³ஹோ. ‘‘பத்தஹத்தோ², கவாட’’ந்தி ச உபலக்க²ணமேதங். யத்த² கத்த²சி ஸரீராவயவே பன பத்தஸ்மிங் ஸதி யேன கேனசி ஸரீராவயவேன கவாடங் பணாமேதுங், க⁴டிகங் வா உக்கி²பிதுங், ஸூசிங் வா குஞ்சிகாய அவாபுரிதுங் ந லப⁴தி. அங்ஸகூடே பன பத்தங் லக்³கெ³த்வா யதா²ஸுக²ங் அவாபுரிதுங் லப⁴தி.
67. Pattena ucchiṭṭhodakañca calakaṭṭhikañca na nīhareyyāti sambandho. Ucchiṭṭhodakanti mukhavikkhālanodakaṃ. Calakāni ca cabbetvā apaviddhāmisāni aṭṭhikāni macchamaṃsaaṭṭhikāni ca calakaṭṭhikaṃ. Pattaṃ paṭiggahaṃ katvā hatthaṃ dhovitumpi hatthadhotādi udakampi patte ākiritvā nīharitumpi anucchiṭṭhaṃ suddhapattaṃ ucchiṭṭhahatthena gaṇhitumpi na vaṭṭati. Macchamaṃsaphalāphalādīni khādanto yaṃ tattha aṭṭhiṃ vā calakaṃ vā chaḍḍetukāmo hoti, taṃ patte ṭhapetuṃ na labhati. Mukhato nīhaṭaṃ pana yaṃ kiñci puna akhāditukāmo patte ṭhapetuṃ na labhati. Siṅgiverādīni ḍaṃsitvā puna ṭhapetuṃ labhati. Pattahatthoti patto hatthe yassāti viggaho. ‘‘Pattahattho, kavāṭa’’nti ca upalakkhaṇametaṃ. Yattha katthaci sarīrāvayave pana pattasmiṃ sati yena kenaci sarīrāvayavena kavāṭaṃ paṇāmetuṃ, ghaṭikaṃ vā ukkhipituṃ, sūciṃ vā kuñcikāya avāpurituṃ na labhati. Aṃsakūṭe pana pattaṃ laggetvā yathāsukhaṃ avāpurituṃ labhati.
68. பூ⁴மியா பூ⁴மிஸம்ப³ந்தீ⁴ ஆதா⁴ரகோ, தஸ்மிங் த³ந்தவல்லிவெத்தாதீ³ஹி கதே வலயாதா⁴ரகே ச ஏகதா³ருனா கதே தா³ருஆதா⁴ரகே ச ப³ஹூஹி த³ண்டே³ஹி கதே த³ண்டா³தா⁴ரகே ச யத்த² ட²பிதோ பத்தோ யதா² பரிவத்தித்வா ந பரிபததி, ததா² ஸுட்டு² ஸஜ்ஜிதே தஸ்மிங் பத்தஸ்ஸுபரி பத்தோதி ஏவரூபே து³வே பத்தே ட²பெய்யாதி பத³த்த²யோஜனா. ப⁴மகோடிஸதி³ஸோ பன தா³ருஆதா⁴ரகோ தீஹி த³ண்ட³கேஹி ப³த்³தோ⁴ த³ண்டா³தா⁴ரகோ ச ஏகஸ்ஸபி பத்தஸ்ஸ அனோகாஸோ, தத்த² ட²பெத்வாபி ஹத்தே²ன க³ஹெத்வா நிஸீதி³தப்³ப³ங். பூ⁴மியந்தி கடஸாரகாதி³னா அத்த²தாய பூ⁴மியா பன நிக்குஜ்ஜித்வா வா படிகுஜ்ஜித்வா வா ஏகங் பத்தங் ட²பெய்யாதி யோஜனா.
68. Bhūmiyā bhūmisambandhī ādhārako, tasmiṃ dantavallivettādīhi kate valayādhārake ca ekadārunā kate dāruādhārake ca bahūhi daṇḍehi kate daṇḍādhārake ca yattha ṭhapito patto yathā parivattitvā na paripatati, tathā suṭṭhu sajjite tasmiṃ pattassupari pattoti evarūpe duve patte ṭhapeyyāti padatthayojanā. Bhamakoṭisadiso pana dāruādhārako tīhi daṇḍakehi baddho daṇḍādhārako ca ekassapi pattassa anokāso, tattha ṭhapetvāpi hatthena gahetvā nisīditabbaṃ. Bhūmiyanti kaṭasārakādinā atthatāya bhūmiyā pana nikkujjitvā vā paṭikujjitvā vā ekaṃ pattaṃ ṭhapeyyāti yojanā.
69. இதா³னி அகப்பியபத்தே த³ஸ்ஸேதி ‘‘தா³ரூ’’திஆதி³னா. தத்த² ஸுவண்ணமேவ ஸோவண்ணங். தா³ரு ச ரூபியஞ்ச ஸோவண்ணஞ்ச மணி ச வேளுரியஞ்ச தா³ரு…பே॰… வேளுரியானி, தேஹி நிப்³ப³த்தா தா³ரு…பே॰… மயா . தீ³கோ⁴ பன ‘‘வேளுரியாமயா’’தி கா³தா²ப³ந்த⁴ஸுக²த்த²ங் கதோ. ஏவமுபரிபி தாதி³ஸங் விஞ்ஞெய்யங். தத்த² இந்த³னீலாதி³ மணி நாம. கங்ஸோ ச காசோ ச திபு ச ஸீஸஞ்ச ப²லிகா ச தம்ப³லோஹோ சாதி த்³வந்தோ³, தேஹி ஜாதா கங்ஸ…பே॰… ஜா. தத்த² கங்ஸ-ஸத்³தே³ன வட்டலோஹோபி ஸங்க³ஹிதோ. ஸேதங் திபு, கண்ஹங் ஸீஸங்.
69. Idāni akappiyapatte dasseti ‘‘dārū’’tiādinā. Tattha suvaṇṇameva sovaṇṇaṃ. Dāru ca rūpiyañca sovaṇṇañca maṇi ca veḷuriyañca dāru…pe… veḷuriyāni, tehi nibbattā dāru…pe… mayā. Dīgho pana ‘‘veḷuriyāmayā’’ti gāthābandhasukhatthaṃ kato. Evamuparipi tādisaṃ viññeyyaṃ. Tattha indanīlādi maṇi nāma. Kaṃso ca kāco ca tipu ca sīsañca phalikā ca tambaloho cāti dvando, tehi jātā kaṃsa…pe… jā. Tattha kaṃsa-saddena vaṭṭalohopi saṅgahito. Setaṃ tipu, kaṇhaṃ sīsaṃ.
70. ச²வஸீஸமயோதி ச²வஸ்ஸ மதமனுஸ்ஸஸ்ஸ ஸீஸங் ஸீஸகபாலங், தேன நிப்³ப³த்தோ ச²வஸீஸமயோ. க⁴டி ச தும்ப³ஞ்ச, தேஸங் கடாஹோ, தேஹி ஜாதாதி க⁴டிதும்ப³கடாஹஜா. தத்த² க⁴டீதி க⁴டோயேவ. தும்ப³ங் அலாபு³. இதி இமே ஸப்³பே³ பத்தா அகப்பியா வுத்தா, து³க்கடவத்து²கா ச வுத்தாதி யோஜனா. தத்த² ரூபியாதீ³ஸு சதூஸு ஸசே கி³ஹீ ப⁴த்தக்³கே³ஸு ஸுவண்ணதட்டகாதீ³ஸு ப்³யஞ்ஜனங் கத்வா உபனாமெந்தி, ஆமஸிதுங் ந வட்டதி. கங்ஸகாசப²லிகஜானி பன தட்டகாதீ³னி பா⁴ஜனானி புக்³க³லிகபரிபோ⁴கே³னேவ ந வட்டந்தி, ஸங்கி⁴கபரிபோ⁴கே³ன வா கி³ஹிவிகடானி வா வட்டந்தி. க⁴டிதும்ப³கடாஹஜா பன லபி⁴த்வா பரிஹரிதுங் ந வட்டந்தி, தாவகாலிகங் பரிபு⁴ஞ்ஜிதுங் வட்டந்தி.
70.Chavasīsamayoti chavassa matamanussassa sīsaṃ sīsakapālaṃ, tena nibbatto chavasīsamayo. Ghaṭi ca tumbañca, tesaṃ kaṭāho, tehi jātāti ghaṭitumbakaṭāhajā. Tattha ghaṭīti ghaṭoyeva. Tumbaṃ alābu. Iti ime sabbe pattā akappiyā vuttā, dukkaṭavatthukā ca vuttāti yojanā. Tattha rūpiyādīsu catūsu sace gihī bhattaggesu suvaṇṇataṭṭakādīsu byañjanaṃ katvā upanāmenti, āmasituṃ na vaṭṭati. Kaṃsakācaphalikajāni pana taṭṭakādīni bhājanāni puggalikaparibhogeneva na vaṭṭanti, saṅghikaparibhogena vā gihivikaṭāni vā vaṭṭanti. Ghaṭitumbakaṭāhajā pana labhitvā pariharituṃ na vaṭṭanti, tāvakālikaṃ paribhuñjituṃ vaṭṭanti.
பத்தனித்³தே³ஸவண்ணனா நிட்டி²தா.
Pattaniddesavaṇṇanā niṭṭhitā.
