| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၀. ပတ္တပိဏ္ဍိကသုတ္တံ
10. Pattapiṇḍikasuttaṃ
၁၉၀. ‘‘ပဉ္စိမေ, ဘိက္ခဝေ, ပတ္တပိဏ္ဍိကာ။ ကတမေ ပဉ္စ? မန္ဒတ္တာ မောမူဟတ္တာ ပတ္တပိဏ္ဍိကော ဟောတိ, ပာပိစ္ဆော ဣစ္ဆာပကတော ပတ္တပိဏ္ဍိကော ဟောတိ, ဥမ္မာဒာ စိတ္တက္ခေပာ ပတ္တပိဏ္ဍိကော ဟောတိ, ‘ဝဏ္ဏိတံ ဗုဒ္ဓေဟိ ဗုဒ္ဓသာဝကေဟီ’တိ ပတ္တပိဏ္ဍိကော ဟောတိ, အပ္ပိစ္ဆတံယေဝ နိသ္သာယ သန္တုဋ္ဌိံယေဝ နိသ္သာယ သလ္လေခံယေဝ နိသ္သာယ ပဝိဝေကံယေဝ နိသ္သာယ ဣဒမတ္ထိတံယေဝ နိသ္သာယ ပတ္တပိဏ္ဍိကော ဟောတိ။ ဣမေ ခော, ဘိက္ခဝေ, ပဉ္စ ပတ္တပိဏ္ဍိကာ။ ဣမေသံ ခော, ဘိက္ခဝေ, ပဉ္စန္နံ ပတ္တပိဏ္ဍိကာနံ ယ္ဝာယံ ပတ္တပိဏ္ဍိကော အပ္ပိစ္ဆတံယေဝ နိသ္သာယ သန္တုဋ္ဌိံယေဝ နိသ္သာယ သလ္လေခံယေဝ နိသ္သာယ ပဝိဝေကံယေဝ နိသ္သာယ ဣဒမတ္ထိတံယေဝ နိသ္သာယ ပတ္တပိဏ္ဍိကော ဟောတိ, အယံ ဣမေသံ ပဉ္စန္နံ ပတ္တပိဏ္ဍိကာနံ အဂ္ဂော စ သေဋ္ဌော စ မောက္ခော စ ဥတ္တမော စ ပဝရော စ။
190. ‘‘Pañcime, bhikkhave, pattapiṇḍikā. Katame pañca? Mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, ‘vaṇṇitaṃ buddhehi buddhasāvakehī’ti pattapiṇḍiko hoti, appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya pattapiṇḍiko hoti. Ime kho, bhikkhave, pañca pattapiṇḍikā. Imesaṃ kho, bhikkhave, pañcannaṃ pattapiṇḍikānaṃ yvāyaṃ pattapiṇḍiko appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya pattapiṇḍiko hoti, ayaṃ imesaṃ pañcannaṃ pattapiṇḍikānaṃ aggo ca seṭṭho ca mokkho ca uttamo ca pavaro ca.
‘‘သေယ္ယထာပိ, ဘိက္ခဝေ, ဂဝာ ခီရံ, ခီရမ္ဟာ ဒဓိ, ဒဓိမ္ဟာ နဝနီတံ, နဝနီတမ္ဟာ သပ္ပိ, သပ္ပိမ္ဟာ သပ္ပိမဏ္ဍော, သပ္ပိမဏ္ဍော တတ္ထ အဂ္ဂမက္ခာယတိ; ဧဝမေဝံ ခော, ဘိက္ခဝေ, ဣမေသံ ပဉ္စန္နံ ပတ္တပိဏ္ဍိကာနံ ယ္ဝာယံ ပတ္တပိဏ္ဍိကော အပ္ပိစ္ဆတံယေဝ နိသ္သာယ သန္တုဋ္ဌိံယေဝ နိသ္သာယ သလ္လေခံယေဝ နိသ္သာယ ပဝိဝေကံယေဝ နိသ္သာယ ဣဒမတ္ထိတံယေဝ နိသ္သာယ ပတ္တပိဏ္ဍိကော ဟောတိ, အယံ ဣမေသံ ပဉ္စန္နံ ပတ္တပိဏ္ဍိကာနံ အဂ္ဂော စ သေဋ္ဌော စ မောက္ခော စ ဥတ္တမော စ ပဝရော စာ’’တိ။ ဒသမံ။
‘‘Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo, sappimaṇḍo tattha aggamakkhāyati; evamevaṃ kho, bhikkhave, imesaṃ pañcannaṃ pattapiṇḍikānaṃ yvāyaṃ pattapiṇḍiko appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya pattapiṇḍiko hoti, ayaṃ imesaṃ pañcannaṃ pattapiṇḍikānaṃ aggo ca seṭṭho ca mokkho ca uttamo ca pavaro cā’’ti. Dasamaṃ.
အရညဝဂ္ဂော စတုတ္ထော။
Araññavaggo catuttho.
တသ္သုဒ္ဒာနံ –
Tassuddānaṃ –
အရညံ စီဝရံ ရုက္ခ၊ သုသာနံ အဗ္ဘောကာသိကံ။
Araññaṃ cīvaraṃ rukkha, susānaṃ abbhokāsikaṃ;
နေသဇ္ဇံ သန္ထတံ ဧကာသနိကံ၊ ခလုပစ္ဆာပိဏ္ဍိကေန စာတိ။
Nesajjaṃ santhataṃ ekāsanikaṃ, khalupacchāpiṇḍikena cāti.
