| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. පත්‌තපිණ්‌ඩිකසුත්‌තං
10. Pattapiṇḍikasuttaṃ
190. ‘‘පඤ්‌චිමෙ, භික්‌ඛවෙ, පත්‌තපිණ්‌ඩිකා. කතමෙ පඤ්‌ච? මන්‌දත්‌තා මොමූහත්‌තා පත්‌තපිණ්‌ඩිකො හොති, පාපිච්‌ඡො ඉච්‌ඡාපකතො පත්‌තපිණ්‌ඩිකො හොති, උම්‌මාදා චිත්‌තක්‌ඛෙපා පත්‌තපිණ්‌ඩිකො හොති, ‘වණ්‌ණිතං බුද්‌ධෙහි බුද්‌ධසාවකෙහී’ති පත්‌තපිණ්‌ඩිකො හොති, අප්‌පිච්‌ඡතංයෙව නිස්‌සාය සන්‌තුට්‌ඨිංයෙව නිස්‌සාය සල්‌ලෙඛංයෙව නිස්‌සාය පවිවෙකංයෙව නිස්‌සාය ඉදමත්‌ථිතංයෙව නිස්‌සාය පත්‌තපිණ්‌ඩිකො හොති. ඉමෙ ඛො, භික්‌ඛවෙ, පඤ්‌ච පත්‌තපිණ්‌ඩිකා. ඉමෙසං ඛො, භික්‌ඛවෙ, පඤ්‌චන්‌නං පත්‌තපිණ්‌ඩිකානං ය්‌වායං පත්‌තපිණ්‌ඩිකො අප්‌පිච්‌ඡතංයෙව නිස්‌සාය සන්‌තුට්‌ඨිංයෙව නිස්‌සාය සල්‌ලෙඛංයෙව නිස්‌සාය පවිවෙකංයෙව නිස්‌සාය ඉදමත්‌ථිතංයෙව නිස්‌සාය පත්‌තපිණ්‌ඩිකො හොති, අයං ඉමෙසං පඤ්‌චන්‌නං පත්‌තපිණ්‌ඩිකානං අග්‌ගො ච සෙට්‌ඨො ච මොක්‌ඛො ච උත්‌තමො ච පවරො ච.
190. ‘‘Pañcime, bhikkhave, pattapiṇḍikā. Katame pañca? Mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, ‘vaṇṇitaṃ buddhehi buddhasāvakehī’ti pattapiṇḍiko hoti, appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya pattapiṇḍiko hoti. Ime kho, bhikkhave, pañca pattapiṇḍikā. Imesaṃ kho, bhikkhave, pañcannaṃ pattapiṇḍikānaṃ yvāyaṃ pattapiṇḍiko appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya pattapiṇḍiko hoti, ayaṃ imesaṃ pañcannaṃ pattapiṇḍikānaṃ aggo ca seṭṭho ca mokkho ca uttamo ca pavaro ca.
‘‘සෙය්‍යථාපි, භික්‌ඛවෙ, ගවා ඛීරං, ඛීරම්‌හා දධි, දධිම්‌හා නවනීතං, නවනීතම්‌හා සප්‌පි, සප්‌පිම්‌හා සප්‌පිමණ්‌ඩො, සප්‌පිමණ්‌ඩො තත්‌ථ අග්‌ගමක්‌ඛායති; එවමෙවං ඛො, භික්‌ඛවෙ, ඉමෙසං පඤ්‌චන්‌නං පත්‌තපිණ්‌ඩිකානං ය්‌වායං පත්‌තපිණ්‌ඩිකො අප්‌පිච්‌ඡතංයෙව නිස්‌සාය සන්‌තුට්‌ඨිංයෙව නිස්‌සාය සල්‌ලෙඛංයෙව නිස්‌සාය පවිවෙකංයෙව නිස්‌සාය ඉදමත්‌ථිතංයෙව නිස්‌සාය පත්‌තපිණ්‌ඩිකො හොති, අයං ඉමෙසං පඤ්‌චන්‌නං පත්‌තපිණ්‌ඩිකානං අග්‌ගො ච සෙට්‌ඨො ච මොක්‌ඛො ච උත්‌තමො ච පවරො චා’’ති. දසමං.
‘‘Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo, sappimaṇḍo tattha aggamakkhāyati; evamevaṃ kho, bhikkhave, imesaṃ pañcannaṃ pattapiṇḍikānaṃ yvāyaṃ pattapiṇḍiko appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya pattapiṇḍiko hoti, ayaṃ imesaṃ pañcannaṃ pattapiṇḍikānaṃ aggo ca seṭṭho ca mokkho ca uttamo ca pavaro cā’’ti. Dasamaṃ.
අරඤ්‌ඤවග්‌ගො චතුත්‌ථො.
Araññavaggo catuttho.
තස්‌සුද්‌දානං –
Tassuddānaṃ –
අරඤ්‌ඤං චීවරං රුක්‌ඛ, සුසානං අබ්‌භොකාසිකං;
Araññaṃ cīvaraṃ rukkha, susānaṃ abbhokāsikaṃ;
නෙසජ්‌ජං සන්‌ථතං එකාසනිකං, ඛලුපච්‌ඡාපිණ්‌ඩිකෙන චාති.
Nesajjaṃ santhataṃ ekāsanikaṃ, khalupacchāpiṇḍikena cāti.
