| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
3. பத்தவக்³கோ³
3. Pattavaggo
1. பத்தஸிக்கா²பத³வண்ணனா
1. Pattasikkhāpadavaṇṇanā
அவிகப்பிதோதி ‘‘இமங் பத்தங் துய்ஹங் விகப்பேமீ’’திஆதி³னா நயேன அவிகப்பிதோ. அட்³டா⁴ள்ஹகோத³னங் க³ண்ஹாதீதி மக³த⁴னாளியா த்³வின்னங் தண்டு³லனாளீனங் ஓத³னங் க³ண்ஹாதி. ‘‘மக³த⁴னாளி நாம அட்³ட⁴தேரஸபலா ஹோதீ’’தி அந்த⁴கட்ட²கதா²யங் வுத்தங். ‘‘ஸீஹளதீ³பே பகதினாளி மஹந்தா, த³மிளனாளி கு²த்³த³கா, மக³த⁴னாளி பமாணயுத்தா, தாய மக³த⁴னாளியா தி³யட்³ட⁴னாளி ஏகா ஸீஹளனாளி ஹோதீ’’தி (பாரா॰ அட்ட²॰ 2.602) மஹாஅட்ட²கதா²யங் வுத்தங். அனுத்தண்டு³லந்தி பாகதோ உக்கந்தங் தண்டு³லங் உத்தண்டு³லங், ந உத்தண்டு³லங் அனுத்தண்டு³லங். ஸப்³ப³ஸம்பா⁴ரஸங்க²தோதி ஜீரகாதி³ஸப்³ப³ஸம்பா⁴ரேஹி ஸங்க²தோ. ஆலோபஸ்ஸ சதுத்த²பா⁴க³ப்பமாணங் ப்³யஞ்ஜனங் ஆலோபஸ்ஸ அனுரூபப்³யஞ்ஜனங்.
Avikappitoti ‘‘imaṃ pattaṃ tuyhaṃ vikappemī’’tiādinā nayena avikappito. Aḍḍhāḷhakodanaṃ gaṇhātīti magadhanāḷiyā dvinnaṃ taṇḍulanāḷīnaṃ odanaṃ gaṇhāti. ‘‘Magadhanāḷi nāma aḍḍhaterasapalā hotī’’ti andhakaṭṭhakathāyaṃ vuttaṃ. ‘‘Sīhaḷadīpe pakatināḷi mahantā, damiḷanāḷi khuddakā, magadhanāḷi pamāṇayuttā, tāya magadhanāḷiyā diyaḍḍhanāḷi ekā sīhaḷanāḷi hotī’’ti (pārā. aṭṭha. 2.602) mahāaṭṭhakathāyaṃ vuttaṃ. Anuttaṇḍulanti pākato ukkantaṃ taṇḍulaṃ uttaṇḍulaṃ, na uttaṇḍulaṃ anuttaṇḍulaṃ. Sabbasambhārasaṅkhatoti jīrakādisabbasambhārehi saṅkhato. Ālopassa catutthabhāgappamāṇaṃ byañjanaṃ ālopassa anurūpabyañjanaṃ.
ஏவங் உக்கட்ட²பத்தங் த³ஸ்ஸெத்வா இதா³னி மஜ்ஜி²மோமகானி த³ஸ்ஸேதுங் ‘‘உக்கட்ட²தோ’’திஆதி³மாஹ. தத்ராயங் நயோ – ஸசே நாளிகோத³னாதி³ ஸப்³ப³ம்பி பக்கி²த்தங் வுத்தனயேனேவ ஹெட்டி²மராஜிஸமங் திட்ட²தி, அயங் மஜ்ஜி²மோ நாம பத்தோ. ஸசே தங் ராஜிங் அதிக்கம்ம தூ²பீகதங் திட்ட²தி, அயங் மஜ்ஜி²மோமகோ நாம பத்தோ. ஸசே தங் ராஜிங் ந ஸம்பாபுணாதி, அந்தோக³த⁴மேவ ஹோதி, அயங் மஜ்ஜி²முக்கட்டோ² நாம பத்தோ. ஸசே பத்தோத³னாதி³ ஸப்³ப³ம்பி பக்கி²த்தங் ஹெட்டி²மராஜிஸமங் திட்ட²தி, அயங் ஓமகோ நாம பத்தோ. ஸசே தங் ராஜிங் அதிக்கம்ம தூ²பீகதங் திட்ட²தி, அயங் ஓமகோமகோ நாம பத்தோ. ஸசே தங் ராஜிங் ந ஸம்பாபுணாதி, அந்தோக³த⁴மேவ ஹோதி, அயங் ஓமகுக்கட்டோ² நாம பத்தோதி. தேனாஹ ‘‘தேஸம்பி வுத்தனயேனேவ பே⁴தோ³ வேதி³தப்³போ³’’தி.
Evaṃ ukkaṭṭhapattaṃ dassetvā idāni majjhimomakāni dassetuṃ ‘‘ukkaṭṭhato’’tiādimāha. Tatrāyaṃ nayo – sace nāḷikodanādi sabbampi pakkhittaṃ vuttanayeneva heṭṭhimarājisamaṃ tiṭṭhati, ayaṃ majjhimo nāma patto. Sace taṃ rājiṃ atikkamma thūpīkataṃ tiṭṭhati, ayaṃ majjhimomako nāma patto. Sace taṃ rājiṃ na sampāpuṇāti, antogadhameva hoti, ayaṃ majjhimukkaṭṭho nāma patto. Sace pattodanādi sabbampi pakkhittaṃ heṭṭhimarājisamaṃ tiṭṭhati, ayaṃ omako nāma patto. Sace taṃ rājiṃ atikkamma thūpīkataṃ tiṭṭhati, ayaṃ omakomako nāma patto. Sace taṃ rājiṃ na sampāpuṇāti, antogadhameva hoti, ayaṃ omakukkaṭṭho nāma pattoti. Tenāha ‘‘tesampi vuttanayeneva bhedo veditabbo’’ti.
இதா³னி தேஸு அதி⁴ட்டா²னவிகப்பனானதி⁴ட்டா²னாவிகப்பனுபகே³ த³ஸ்ஸேதுங் ‘‘இச்சேதேஸூ’’திஆதி³மாஹ. தத்த² உக்கட்டு²க்கட்டோ²தி உக்கட்ட²தோ உக்கட்டோ². ததோ ஹி ஸோ ‘‘அபத்தோ’’தி வுத்தோ. ஓமகோமகோதி ஓமகதோ ஓமகோ. ததோ ஹி ஸோ ‘‘அபத்தோ’’தி வுத்தோ. ஏதே பன பா⁴ஜனபரிபோ⁴கே³ன பரிபு⁴ஞ்ஜிதப்³பா³, ந அதி⁴ட்டா²னுபகா³ ந விகப்பனுபகா³, இதரே பன ஸத்த அதி⁴ட்ட²ஹித்வா வா விகப்பெத்வா வா பரிபு⁴ஞ்ஜிதப்³பா³. தேனாஹ ‘‘ஸேஸா ஸத்த பத்தா பமாணயுத்தா நாமா’’தி.
Idāni tesu adhiṭṭhānavikappanānadhiṭṭhānāvikappanupage dassetuṃ ‘‘iccetesū’’tiādimāha. Tattha ukkaṭṭhukkaṭṭhoti ukkaṭṭhato ukkaṭṭho. Tato hi so ‘‘apatto’’ti vutto. Omakomakoti omakato omako. Tato hi so ‘‘apatto’’ti vutto. Ete pana bhājanaparibhogena paribhuñjitabbā, na adhiṭṭhānupagā na vikappanupagā, itare pana satta adhiṭṭhahitvā vā vikappetvā vā paribhuñjitabbā. Tenāha ‘‘sesā satta pattā pamāṇayuttā nāmā’’ti.
தஸ்மாதி யஸ்மா ஸத்த பத்தா பமாணயுத்தா, தஸ்மா. ஸமணஸாருப்பேன பக்கந்தி எத்த² அயோபத்தோ பஞ்சஹி பாகேஹி (பாரா॰ அட்ட²॰ 2.608) பக்கோ ஸமணஸாருப்பேன பக்கோ ஹோதி, மத்திகாபத்தோ த்³வீஹி பாகேஹி. ஸசே ஏகோ பாகோ ஊனோ ஹோதி, ந அதி⁴ட்டா²னுபகோ³. யதா² ச ஸமணஸாருப்பேன பக்கோயேவ அதி⁴ட்டா²னுபகோ³, ததா² உபோ⁴பி யங் மூலங் தா³தப்³ப³ங், தஸ்மிங் தி³ன்னேயேவ அதி⁴ட்டா²னுபகா³. யதி³ பன அப்பகம்பி அதி³ன்னங் ஹோதி, ந அதி⁴ட்டா²னுபகா³. தேனாஹ ‘‘ஸசே பனா’’திஆதி³. ‘‘காகணிகமத்தங் நாம தி³யட்³ட⁴வீஹீ’’தி வத³ந்தி. ஸசேபி பத்தஸாமிகோ வத³தி ‘‘யதா³ தும்ஹாகங் மூலங் ப⁴விஸ்ஸதி, ததா³ த³ஸ்ஸத², அதி⁴ட்ட²ஹித்வா பரிபு⁴ஞ்ஜதா²’’தி, நேவ அதி⁴ட்டா²னுபகோ³ ஹோதி. பாகஸ்ஸ ஹி ஊனத்தா பத்தஸங்க²ங் ந க³ச்ச²தி. மூலஸ்ஸ ஸகலஸ்ஸ வா ஏகதே³ஸஸ்ஸ வா அதி³ன்னத்தா ஸகபா⁴வங் ந உபேதி, அஞ்ஞஸ்ஸேவ ஸந்தகோ ஹோதி. தஸ்மா பாகே ச மூலே ச நிட்டி²தேயேவ அதி⁴ட்டா²னுபகோ³ ஹோதி. யோ அதி⁴ட்டா²னுபகோ³, ஸ்வேவ விகப்பனுபகோ³ ச. தேனாஹ ‘‘அபச்சுத்³த⁴ரந்தேனா’’திஆதி³. அபச்சுத்³த⁴ரந்தேன விகப்பேதப்³போ³தி புராணபத்தங் அபச்சுத்³த⁴ரந்தேன நவோ பத்தோ விகப்பேதப்³போ³தி அத்தோ², ட²பேதப்³போ³தி அதி⁴ப்பாயோ. கங்கு³ஸித்த²ந்தி ஸத்தன்னங் த⁴ஞ்ஞானங் லாமகத⁴ஞ்ஞஸித்த²ந்தி ஆஹ ‘‘கங்கு³ஸித்த²னிக்க²மனமத்தேன சி²த்³தே³னா’’தி.
Tasmāti yasmā satta pattā pamāṇayuttā, tasmā. Samaṇasāruppena pakkanti ettha ayopatto pañcahi pākehi (pārā. aṭṭha. 2.608) pakko samaṇasāruppena pakko hoti, mattikāpatto dvīhi pākehi. Sace eko pāko ūno hoti, na adhiṭṭhānupago. Yathā ca samaṇasāruppena pakkoyeva adhiṭṭhānupago, tathā ubhopi yaṃ mūlaṃ dātabbaṃ, tasmiṃ dinneyeva adhiṭṭhānupagā. Yadi pana appakampi adinnaṃ hoti, na adhiṭṭhānupagā. Tenāha ‘‘sace panā’’tiādi. ‘‘Kākaṇikamattaṃ nāma diyaḍḍhavīhī’’ti vadanti. Sacepi pattasāmiko vadati ‘‘yadā tumhākaṃ mūlaṃ bhavissati, tadā dassatha, adhiṭṭhahitvā paribhuñjathā’’ti, neva adhiṭṭhānupago hoti. Pākassa hi ūnattā pattasaṅkhaṃ na gacchati. Mūlassa sakalassa vā ekadesassa vā adinnattā sakabhāvaṃ na upeti, aññasseva santako hoti. Tasmā pāke ca mūle ca niṭṭhiteyeva adhiṭṭhānupago hoti. Yo adhiṭṭhānupago, sveva vikappanupago ca. Tenāha ‘‘apaccuddharantenā’’tiādi. Apaccuddharantena vikappetabboti purāṇapattaṃ apaccuddharantena navo patto vikappetabboti attho, ṭhapetabboti adhippāyo. Kaṅgusitthanti sattannaṃ dhaññānaṃ lāmakadhaññasitthanti āha ‘‘kaṅgusitthanikkhamanamattena chiddenā’’ti.
பத்தஸிக்கா²பத³வண்ணனா நிட்டி²தா.
Pattasikkhāpadavaṇṇanā niṭṭhitā.
