| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
3. பத்தவக்³கோ³
3. Pattavaggo
1. பத்தஸிக்கா²பத³வண்ணனா
1. Pattasikkhāpadavaṇṇanā
த்³வே அபத்தா, தஸ்மா ஏதே பா⁴ஜனபரிபோ⁴கே³ன பரிபு⁴ஞ்ஜிதப்³பா³, நஅதி⁴ட்டா²னூபகா³னவிகப்பனூபக³தாதி அத்தோ²தி ச. ஸமணஸாருப்பேன பக்கந்தி அயோபத்தோ பஞ்சஹி பாகேஹி பக்கோ ஹோதி, மத்திகாபத்தோ த்³வீஹி. ‘‘பி⁴க்கு²னியா பத்தஸன்னிச்சயஸ்ஸ வாரிதத்தா (வஜிர॰ டீ॰ பாராஜிக 602) பி⁴க்கு²ஸ்ஸபி தங் ‘அனநுரூப’ந்தி கத்வா ‘புராணபத்தங் பச்சுத்³த⁴ரித்வா’தி வுத்த’’ந்தி ச லிகி²தங், தங் ந யுத்தங் பாளியங் ‘‘ஸன்னிச்சயங் கரெய்யாதி அனதி⁴ட்டி²தோ அவிகப்பிதோ’’தி (பாசி॰ 735) வுத்தத்தா. ஸோ ஹி கதி²னக்க²ந்த⁴கே (மஹாவ॰ 306 ஆத³யோ) நிச்சயஸன்னிதி⁴ விய ஏகோபி புனதி³வஸே ‘‘ஸன்னிச்சயோ’’தி வுச்சதி. அனந்தரஸிக்கா²பதே³ பன ‘‘து³தியோ வாரிதோ’’தி அதி⁴ட்டா²னங் நியதங். தஸ்மா த்³வே பத்தே அதி⁴ட்டா²துங் ந லப⁴தி. ஸசே ஏகதோ அதி⁴ட்டா²தி, த்³வேபி அனதி⁴ட்டி²தா ஹொந்தி. விஸுங் விஸுங் அதி⁴ட்டா²தி, து³தியோ அனதி⁴ட்டி²தோ. விகப்பேதுங் பன ப³ஹூபி லப⁴தி. காகணிகமத்தம்பீதி எத்த² பி-காரோ ‘‘ஏகபாகம்பி ஜனேதீ’’தி பாகங் ஸம்பிண்டே³தி. அத² வா ஸசே ஏகபாகேனேவ ஸாருப்போ, வட்டதீதி பாகபரிமாணங் ந வுத்தந்தி க³ஹேதப்³ப³ங். அபத்தத்தா அதி⁴ட்டா²னூபகோ³ ந ஹோதி. அபச்சுத்³த⁴ரந்தேன விகப்பேதப்³போ³தி புராணபத்தங் அபச்சுத்³த⁴ரந்தேன ஸோ பத்தோ விகப்பேதப்³போ³தி அத்தோ²தி லிகி²தங்.
Dve apattā, tasmā ete bhājanaparibhogena paribhuñjitabbā, naadhiṭṭhānūpagānavikappanūpagatāti atthoti ca. Samaṇasāruppena pakkanti ayopatto pañcahi pākehi pakko hoti, mattikāpatto dvīhi. ‘‘Bhikkhuniyā pattasanniccayassa vāritattā (vajira. ṭī. pārājika 602) bhikkhussapi taṃ ‘ananurūpa’nti katvā ‘purāṇapattaṃ paccuddharitvā’ti vutta’’nti ca likhitaṃ, taṃ na yuttaṃ pāḷiyaṃ ‘‘sanniccayaṃ kareyyāti anadhiṭṭhito avikappito’’ti (pāci. 735) vuttattā. So hi kathinakkhandhake (mahāva. 306 ādayo) niccayasannidhi viya ekopi punadivase ‘‘sanniccayo’’ti vuccati. Anantarasikkhāpade pana ‘‘dutiyo vārito’’ti adhiṭṭhānaṃ niyataṃ. Tasmā dve patte adhiṭṭhātuṃ na labhati. Sace ekato adhiṭṭhāti, dvepi anadhiṭṭhitā honti. Visuṃ visuṃ adhiṭṭhāti, dutiyo anadhiṭṭhito. Vikappetuṃ pana bahūpi labhati. Kākaṇikamattampīti ettha pi-kāro ‘‘ekapākampi janetī’’ti pākaṃ sampiṇḍeti. Atha vā sace ekapākeneva sāruppo, vaṭṭatīti pākaparimāṇaṃ na vuttanti gahetabbaṃ. Apattattā adhiṭṭhānūpagona hoti. Apaccuddharantena vikappetabboti purāṇapattaṃ apaccuddharantena so patto vikappetabboti atthoti likhitaṃ.
பத்தஸிக்கா²பத³வண்ணனா நிட்டி²தா.
Pattasikkhāpadavaṇṇanā niṭṭhitā.
