| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
3. பத்தவக்³கோ³
3. Pattavaggo
1. பத்தஸிக்கா²பத³வண்ணனா
1. Pattasikkhāpadavaṇṇanā
598-602. பத்தவக்³க³ஸ்ஸ பட²மே ப⁴ண்ட³ந்தி விக்கேதப்³ப³ப⁴ண்ட³ங். யஸ்மா வண்ணஸத்³தோ³ ஸண்டா²னஜாதிரூபாயதனகாரணபமாணகு³ணபஸங்ஸாதீ³ஸு தி³ஸ்ஸதி. ‘‘மஹந்தங் ஸப்பராஜவண்ணங் அபி⁴னிம்மினித்வா’’திஆதீ³ஸு (ஸங்॰ நி॰ 1.142) ஹி ஸண்டா²னங் வுச்சதி. ‘‘ப்³ராஹ்மணோவ ஸெட்டோ² வண்ணோ, ஹீனோ அஞ்ஞோ வண்ணோ’’திஆதீ³ஸு (ம॰ நி॰ 2.402) ஜாதி. ‘‘பரமாய வண்ணபொக்க²ரதாய ஸமன்னாக³தோ’’திஆதீ³ஸு (தீ³॰ நி॰ 1.303) ரூபாயதனங்.
598-602. Pattavaggassa paṭhame bhaṇḍanti vikketabbabhaṇḍaṃ. Yasmā vaṇṇasaddo saṇṭhānajātirūpāyatanakāraṇapamāṇaguṇapasaṃsādīsu dissati. ‘‘Mahantaṃ sapparājavaṇṇaṃ abhinimminitvā’’tiādīsu (saṃ. ni. 1.142) hi saṇṭhānaṃ vuccati. ‘‘Brāhmaṇova seṭṭho vaṇṇo, hīno añño vaṇṇo’’tiādīsu (ma. ni. 2.402) jāti. ‘‘Paramāya vaṇṇapokkharatāya samannāgato’’tiādīsu (dī. ni. 1.303) rūpāyatanaṃ.
‘‘ந ஹராமி ந ப⁴ஞ்ஜாமி, ஆரா ஸிங்கா⁴மி வாரிஜங்;
‘‘Na harāmi na bhañjāmi, ārā siṅghāmi vārijaṃ;
அத² கேன நு வண்ணேன, க³ந்த⁴த்தே²னோதி வுச்சதீ’’தி. (ஸங்॰ நி॰ 1.234; ஜா॰ 1.6.116) –
Atha kena nu vaṇṇena, gandhatthenoti vuccatī’’ti. (saṃ. ni. 1.234; jā. 1.6.116) –
ஆதீ³ஸு காரணங். ‘‘தயோ பத்தஸ்ஸ வண்ணா’’திஆதீ³ஸு (பாரா॰ 602) பமாணங். ‘‘கதா³ ஸஞ்ஞுள்ஹா பன தே க³ஹபதி இமே ஸமணஸ்ஸ கோ³தமஸ்ஸ வண்ணா’’திஆதீ³ஸு (ம॰ நி॰ 2.77) கு³ணோ. ‘‘வண்ணாரஹஸ்ஸ வண்ணங் பா⁴ஸதீ’’திஆதீ³ஸு (அ॰ நி॰ 4.3) பஸங்ஸா. தஸ்மா வுத்தங் ‘‘தயோ பத்தஸ்ஸ வண்ணாதி தீணி பத்தஸ்ஸ பமாணானீ’’தி.
Ādīsu kāraṇaṃ. ‘‘Tayo pattassa vaṇṇā’’tiādīsu (pārā. 602) pamāṇaṃ. ‘‘Kadā saññuḷhā pana te gahapati ime samaṇassa gotamassa vaṇṇā’’tiādīsu (ma. ni. 2.77) guṇo. ‘‘Vaṇṇārahassa vaṇṇaṃ bhāsatī’’tiādīsu (a. ni. 4.3) pasaṃsā. Tasmā vuttaṃ ‘‘tayo pattassa vaṇṇāti tīṇi pattassa pamāṇānī’’ti.
அட்³ட⁴தேரஸபலா ஹோதீதி எத்த² ‘‘மாஸானங் அட்³ட⁴தேரஸபலானி க³ண்ஹாதீ’’தி வத³ந்தி. ‘‘மக³த⁴னாளி நாம ச²பஸதா நாளீ’’தி கேசி. ‘‘அட்ட²பஸதா’’தி அபரே. தத்த² புரிமானங் மதேன திபஸதாய நாளியா த்³வே நாளியோ ஏகா மக³த⁴னாளி ஹோதி, பச்சி²மானங் சதுபஸதாய நாளியா த்³வே நாளியோ ஏகா மக³த⁴னாளி. ஆசரியத⁴ம்மபாலத்தே²ரேன பன ‘‘பகதியா சதுமுட்டி²கங் குடு³வங், சதுகுடு³வங் நாளிகங், தாய நாளியா ஸோளஸ நாளியோ தோ³ணங், தங் பன மக³த⁴னாளியா த்³வாத³ஸ நாளியோ ஹொந்தீ’’தி வுத்தங், தஸ்மா தேன நயேன ‘‘மக³த⁴னாளி நாம பஞ்ச குடு³வானி ஏகஞ்ச முட்டி²ங் ஏகாய முட்டி²யா ததியஞ்ச பா⁴க³ங் க³ண்ஹாதீ’’தி வேதி³தப்³ப³ங்.
Aḍḍhaterasapalā hotīti ettha ‘‘māsānaṃ aḍḍhaterasapalāni gaṇhātī’’ti vadanti. ‘‘Magadhanāḷi nāma chapasatā nāḷī’’ti keci. ‘‘Aṭṭhapasatā’’ti apare. Tattha purimānaṃ matena tipasatāya nāḷiyā dve nāḷiyo ekā magadhanāḷi hoti, pacchimānaṃ catupasatāya nāḷiyā dve nāḷiyo ekā magadhanāḷi. Ācariyadhammapālattherena pana ‘‘pakatiyā catumuṭṭhikaṃ kuḍuvaṃ, catukuḍuvaṃ nāḷikaṃ, tāya nāḷiyā soḷasa nāḷiyo doṇaṃ, taṃ pana magadhanāḷiyā dvādasa nāḷiyo hontī’’ti vuttaṃ, tasmā tena nayena ‘‘magadhanāḷi nāma pañca kuḍuvāni ekañca muṭṭhiṃ ekāya muṭṭhiyā tatiyañca bhāgaṃ gaṇhātī’’ti veditabbaṃ.
ஸப்³ப³ஸம்பா⁴ரஸங்க²தோதி ஜீரகாதி³ஸப்³ப³ஸம்பா⁴ரேஹி ஸங்க²தோ. ஆலோபஸ்ஸ ஆலோபஸ்ஸ அனுரூபந்தி எத்த² ‘‘ப்³யஞ்ஜனஸ்ஸ மத்தா நாம ஓத³னசதுத்தோ² பா⁴கோ³’’தி ப்³ரஹ்மாயுஸுத்தஸ்ஸ அட்ட²கதா²யங் (ம॰ நி॰ அட்ட²॰ 2.387) வுத்தத்தா ஆலோபஸ்ஸ சதுத்த²பா⁴க³ப்பமாணங் ப்³யஞ்ஜனங் ஆலோபஸ்ஸ அனுரூபந்தி க³ஹேதப்³ப³ங். இத⁴ பன ஸூபஸ்ஸேவ ஓத³னசதுத்த²பா⁴க³ப்பமாணதங் த³ஸ்ஸெத்வா ஏதஸ்ஸ லக்க²ணே த³ஸ்ஸிதே இதரஸ்ஸபி த³ஸ்ஸிதமேவ ஹோதீதி ப்³யஞ்ஜனஸ்ஸ ததா² விஸேஸெத்வா பமாணங் ந த³ஸ்ஸிதங்.
Sabbasambhārasaṅkhatoti jīrakādisabbasambhārehi saṅkhato. Ālopassa ālopassa anurūpanti ettha ‘‘byañjanassa mattā nāma odanacatuttho bhāgo’’ti brahmāyusuttassa aṭṭhakathāyaṃ (ma. ni. aṭṭha. 2.387) vuttattā ālopassa catutthabhāgappamāṇaṃ byañjanaṃ ālopassa anurūpanti gahetabbaṃ. Idha pana sūpasseva odanacatutthabhāgappamāṇataṃ dassetvā etassa lakkhaṇe dassite itarassapi dassitameva hotīti byañjanassa tathā visesetvā pamāṇaṃ na dassitaṃ.
மக³த⁴னாளியா உபட்³ட⁴ப்பமாணோ இத⁴ பத்தோ²தி ஆஹ ‘‘பத்தோ²த³னந்தி மக³த⁴னாளியா உபட்³ட⁴னாளிகோத³ன’’ந்தி. இமினா ச ‘‘பத்த²த்³வயங் மக³த⁴னாளீ’’தி த³ஸ்ஸிதங் ஹோதி. பத்தோ² ச ‘‘சதுபலோ குடு³வோ, சதுகுடு³வோ பத்தோ²’’தி இமினா லோகியவோஹாரேன வேதி³தப்³போ³. பா⁴ஜனபரிபோ⁴கே³னாதி உத³காஹரணாதி³னா பா⁴ஜனபரிபோ⁴கே³ன.
Magadhanāḷiyā upaḍḍhappamāṇo idha patthoti āha ‘‘patthodananti magadhanāḷiyā upaḍḍhanāḷikodana’’nti. Iminā ca ‘‘patthadvayaṃ magadhanāḷī’’ti dassitaṃ hoti. Pattho ca ‘‘catupalo kuḍuvo, catukuḍuvo pattho’’ti iminā lokiyavohārena veditabbo. Bhājanaparibhogenāti udakāharaṇādinā bhājanaparibhogena.
607. தோ⁴தேதி பரிபோ⁴கா³வஸானத³ஸ்ஸனத்த²ங் வுத்தங், ந பன தோ⁴தேயேவ து³க்கடங் ஆபஜ்ஜதி ததோ புரேதரங் பரிபோ⁴க³காலேயேவ ஆபஜ்ஜனதோ.
607.Dhoteti paribhogāvasānadassanatthaṃ vuttaṃ, na pana dhoteyeva dukkaṭaṃ āpajjati tato puretaraṃ paribhogakāleyeva āpajjanato.
608. பஞ்சஹி த்³வீஹீதி இத³ங் ‘‘எத்தாவதா காளவண்ணதா ஸம்பஜ்ஜதீ’’தி த³ஸ்ஸனத்த²ங் வுத்தங். ‘‘யதி³ பன ஏகேனபி பாகேன காளவண்ணோ ஹோதி, அதி⁴ட்டா²னுபகோ³யேவா’’தி வத³ந்தி. ஹத்தா²னாக³தஸ்ஸபி அதி⁴ட்டா²தப்³ப³பா⁴வத³ஸ்ஸனத்த²ங் ‘‘யதி³ஹீ’’திஆதி³ வுத்தங். இமினா ச தூ³ரே டி²தம்பி அதி⁴ட்டா²துங் விகப்பேதுஞ்ச லப⁴தி, ட²பிதட்டா²னஸல்லக்க²ணஞ்ச ந பமாணந்தி வேதி³தப்³ப³ங். ஸுத்வா வாதி பத்தகாரகேன பேஸிதபி⁴க்கு²னா அனாணத்தோ கேவலங் தஸ்ஸ கதெ²ந்தஸ்ஸ வசனமத்தங் ஸுத்வா. ந பமாணந்தி தேன அபேஸிதத்தா. ஸாமந்தவிஹாரேதி இத³ங் உபசாரமத்தங், ததோ தூ³ரே டி²தம்பி அதி⁴ட்டா²துங் வட்டதியேவ. ட²பிதட்டா²னங் ஸல்லக்கெ²த்வாதி இத³ம்பி உபசாரமத்தங், பத்தஸல்லக்க²ணமேவெத்த² பமாணங். பத்தே வா சி²த்³த³ங் ஹோதீதி முக²வட்டிதோ ஹெட்டா² த்³வங்கு³லமத்தோகாஸதோ பட்டா²ய யத்த² கத்த²சி சி²த்³த³ங் ஹோதி. ஸேஸமெத்த² பட²மகதி²னே வுத்தனயமேவ.
608.Pañcahi dvīhīti idaṃ ‘‘ettāvatā kāḷavaṇṇatā sampajjatī’’ti dassanatthaṃ vuttaṃ. ‘‘Yadi pana ekenapi pākena kāḷavaṇṇo hoti, adhiṭṭhānupagoyevā’’ti vadanti. Hatthānāgatassapi adhiṭṭhātabbabhāvadassanatthaṃ ‘‘yadihī’’tiādi vuttaṃ. Iminā ca dūre ṭhitampi adhiṭṭhātuṃ vikappetuñca labhati, ṭhapitaṭṭhānasallakkhaṇañca na pamāṇanti veditabbaṃ. Sutvā vāti pattakārakena pesitabhikkhunā anāṇatto kevalaṃ tassa kathentassa vacanamattaṃ sutvā. Na pamāṇanti tena apesitattā. Sāmantavihāreti idaṃ upacāramattaṃ, tato dūre ṭhitampi adhiṭṭhātuṃ vaṭṭatiyeva. Ṭhapitaṭṭhānaṃ sallakkhetvāti idampi upacāramattaṃ, pattasallakkhaṇamevettha pamāṇaṃ. Patte vā chiddaṃ hotīti mukhavaṭṭito heṭṭhā dvaṅgulamattokāsato paṭṭhāya yattha katthaci chiddaṃ hoti. Sesamettha paṭhamakathine vuttanayameva.
பத்தஸிக்கா²பத³வண்ணனா நிட்டி²தா.
Pattasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பத்தஸிக்கா²பத³ங் • 1. Pattasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பத்தஸிக்கா²பத³வண்ணனா • 1. Pattasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பத்தஸிக்கா²பத³வண்ணனா • 1. Pattasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பத்தஸிக்கா²பத³வண்ணனா • 1. Pattasikkhāpadavaṇṇanā
