| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
3. பத்தவக்³கோ³
3. Pattavaggo
1. பத்தஸிக்கா²பத³வண்ணனா
1. Pattasikkhāpadavaṇṇanā
598. ப³ஹூ பத்தே ஸன்னிசயந்தி எத்த² ஸன்னிசயந்தி பா⁴வனபுங்ஸகங், ப³ஹூ பத்தே வா க³ஹெத்வா ஸன்னிசயங் கரிஸ்ஸந்தீதி அத்தோ². ‘‘அட்³ட⁴தேரஸபலமாஸானங் கா³ஹிகா’’தி லிகி²தங். எத்த² –
598.Bahūpatte sannicayanti ettha sannicayanti bhāvanapuṃsakaṃ, bahū patte vā gahetvā sannicayaṃ karissantīti attho. ‘‘Aḍḍhaterasapalamāsānaṃ gāhikā’’ti likhitaṃ. Ettha –
‘‘குடு³வோ சதுபலெய்யோ, குடு³வானங் சதுக்³கு³ணங்;
‘‘Kuḍuvo catupaleyyo, kuḍuvānaṃ catugguṇaṃ;
பத்த²ங் சதுக்³கு³ணோ மாஸா-தி கமாஹு சதுக்³கு³ண’’ந்தி. –
Patthaṃ catugguṇo māsā-ti kamāhu catugguṇa’’nti. –
ஆதி³ங் லோகவோஹாரங் த³ஸ்ஸெத்வாவ கேசி பபஞ்செந்தி.
Ādiṃ lokavohāraṃ dassetvāva keci papañcenti.
602. கா²த³னந்தி கா²த³னீயங் ஸூபாதி³. ‘‘ப்³யஞ்ஜனஸ்ஸ மத்தா நாம ஓத³னதோ சதுத்தோ² பா⁴கோ³’’தி (ம॰ நி॰ அட்ட²॰ 2.387) ப்³ரஹ்மாயுஸுத்தட்ட²கதா²யங் வுத்தத்தா ஆலோபஸ்ஸ சதுத்த²பா⁴க³ங் ப்³யஞ்ஜனங் அனுரூபந்தி க³ஹேதப்³ப³ங். ‘‘பி⁴க்கு²னியா பத்தஸன்னிசயஸ்ஸ வாரிதத்தா தத³னுலோமதோ பி⁴க்கூ²னம்பி து³தியோ வாரிதோ’’தி வுத்தங், தங் ந யுத்தங், பாளியஞ்ஹி ‘‘ஸன்னிசயங் கரெய்யாதி அனதி⁴ட்டி²தோ அவிகப்பிதோ’’தி (பாசி॰ 735) வுத்தங். ஸோ ஹி கதி²னக்க²ந்த⁴கே (மஹாவ॰ 306 ஆத³யோ) நிசயஸன்னிதி⁴ விய ஏகோபி புனதி³வஸே ‘‘ஸன்னிசயோ’’தி வுச்சதி. அனந்தரஸிக்கா²பதே³ பன ‘‘து³தியோ வாரிதோதி அதி⁴ட்டா²னங் நியதங், தஸ்மா த்³வே பத்தே அதி⁴ட்டா²துங் ந லப⁴தி. ஸசே ஏகதோ அதி⁴ட்டா²தி, த்³வேபி ந அதி⁴ட்டி²தா ஹொந்தி. விஸுங் விஸுங் அதி⁴ட்டா²தி, து³தியோ அனதி⁴ட்டி²தோ’’தி வத³ந்தி. விகப்பேதுங் பன ப³ஹூபி லப⁴தி. இதா³னி வத்தப்³ப³ங் ஸந்தா⁴ய ‘‘நாமமத்தே விஸேஸோ’’தி வுத்தங். தத்த² நாமந்தி மஜ்ஜி²மோ மஜ்ஜி²மோமகோ மஜ்ஜி²முக்கட்டோ²திஆதி³.
602.Khādananti khādanīyaṃ sūpādi. ‘‘Byañjanassa mattā nāma odanato catuttho bhāgo’’ti (ma. ni. aṭṭha. 2.387) brahmāyusuttaṭṭhakathāyaṃ vuttattā ālopassa catutthabhāgaṃ byañjanaṃ anurūpanti gahetabbaṃ. ‘‘Bhikkhuniyā pattasannicayassa vāritattā tadanulomato bhikkhūnampi dutiyo vārito’’ti vuttaṃ, taṃ na yuttaṃ, pāḷiyañhi ‘‘sannicayaṃ kareyyāti anadhiṭṭhito avikappito’’ti (pāci. 735) vuttaṃ. So hi kathinakkhandhake (mahāva. 306 ādayo) nicayasannidhi viya ekopi punadivase ‘‘sannicayo’’ti vuccati. Anantarasikkhāpade pana ‘‘dutiyo vāritoti adhiṭṭhānaṃ niyataṃ, tasmā dve patte adhiṭṭhātuṃ na labhati. Sace ekato adhiṭṭhāti, dvepi na adhiṭṭhitā honti. Visuṃ visuṃ adhiṭṭhāti, dutiyo anadhiṭṭhito’’ti vadanti. Vikappetuṃ pana bahūpi labhati. Idāni vattabbaṃ sandhāya ‘‘nāmamatte viseso’’ti vuttaṃ. Tattha nāmanti majjhimo majjhimomako majjhimukkaṭṭhotiādi.
608. ‘‘பாகஸ்ஸ ஹி ஊனத்தா பத்தஸங்க்²யங் ந க³ச்ச²தீ’’தி வசனதோ அதி⁴ட்டி²தபத்தோபி க²ரபாகேன ஸேதத்தா அதி⁴ட்டா²னங் விஜஹதீதி சே? ந, அதி⁴ட்டா²னவிஜஹனேஸு நவஸு அனாக³தத்தா, தஸ்மா பட²மபாகானங் ஏவ ஊனத்தா பத்தஸங்க்²யங் ந க³ச்ச²தி, தஸ்மிங் ஸதி அஞ்ஞங் விஞ்ஞாபேதுங் ந வட்டதி. ‘‘ஊனபஞ்சப³ந்த⁴னேனா’’தி ஹி வுத்தங். சி²த்³தே³, ராஜியா வா ஹி ஸதி தேஹி அதி⁴ட்டா²னங் விஜஹதீதி விஜஹிதே நாயங் படிஸேதோ⁴, தஸ்மா பச்சுத்³த⁴ரித்வா, விகப்பெத்வாபி அஞ்ஞங் விஞ்ஞாபேதுங் ந லப⁴தி.
608. ‘‘Pākassa hi ūnattā pattasaṅkhyaṃ na gacchatī’’ti vacanato adhiṭṭhitapattopi kharapākena setattā adhiṭṭhānaṃ vijahatīti ce? Na, adhiṭṭhānavijahanesu navasu anāgatattā, tasmā paṭhamapākānaṃ eva ūnattā pattasaṅkhyaṃ na gacchati, tasmiṃ sati aññaṃ viññāpetuṃ na vaṭṭati. ‘‘Ūnapañcabandhanenā’’ti hi vuttaṃ. Chidde, rājiyā vā hi sati tehi adhiṭṭhānaṃ vijahatīti vijahite nāyaṃ paṭisedho, tasmā paccuddharitvā, vikappetvāpi aññaṃ viññāpetuṃ na labhati.
ஏவங் பத்தகாரகோ மூலங் லபி⁴த்வாதி எத்த² பசித்வா ட²பிததி³வஸதோ பட்டா²ய. தா³துகாமோ ஹுத்வாதி எத்த² தி³ன்னதி³வஸதோ, ஸுததி³வஸதோ வா பட்டா²ய த³ஸாஹங் வேதி³தப்³ப³ங். லிங்க³பரிவத்தேன பன த³ஸாஹாதிக்கமே பத்தஸாமிகஸ்ஸ பி⁴க்கு²ஸ்ஸ, பி⁴க்கு²னியா பன ரத்தாதிக்கமே நிஸ்ஸக்³கி³யங்.
Evaṃ pattakārako mūlaṃ labhitvāti ettha pacitvā ṭhapitadivasato paṭṭhāya. Dātukāmo hutvāti ettha dinnadivasato, sutadivasato vā paṭṭhāya dasāhaṃ veditabbaṃ. Liṅgaparivattena pana dasāhātikkame pattasāmikassa bhikkhussa, bhikkhuniyā pana rattātikkame nissaggiyaṃ.
பத்தஸிக்கா²பத³வண்ணனா நிட்டி²தா.
Pattasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பத்தஸிக்கா²பத³ங் • 1. Pattasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பத்தஸிக்கா²பத³வண்ணனா • 1. Pattasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. பத்தஸிக்கா²பத³வண்ணனா • 1. Pattasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பத்தஸிக்கா²பத³வண்ணனா • 1. Pattasikkhāpadavaṇṇanā
