| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৩. পত্তৰগ্গো
3. Pattavaggo
১. পত্তসিক্খাপদৰণ্ণনা
1. Pattasikkhāpadavaṇṇanā
৬০২. ততিযৰগ্গস্স পঠমে অড্ঢতেরসপলাতি মাগধিকায মানতুলায অড্ঢতেরসপলপরিমিতং উদকং গণ্হন্তং সন্ধায ৰুত্তং, তথা পরিমিতং যৰমাসাদিং গণ্হন্তিং সন্ধাযাতি কেচি। আচরিযধম্মপালত্থেরেন পন ‘‘পকতিচতুমুট্ঠিকং কুডুৰং, চতুকুডুৰং নাল়ি, তায নাল়িযা সোল়স নাল়িযো দোণং, তং পন মগধনাল়িযা দ্ৰাদস নাল়িযো হোন্তীতি ৰদন্তী’’তি ৰুত্তং। দমিল়নাল়ীতি পুরাণনাল়িং সন্ধায ৰুত্তং। সা চ চতুমুট্ঠিকেহি কুডুৰেহি অট্ঠ কুডুৰা, তায নাল়িযা দ্ৰে নাল়িযো মগধনাল়িং গণ্হাতি। পুরাণা পন ‘‘সীহল়নাল়ি তিস্সো নাল়িযো গণ্হাতী’’তি ৰদন্তি, তেসং মতেন মগধনাল়ি ইদানি পৰত্তমানায চতুকুডুৰায দমিল়নাল়িযা চতুনাল়িকা হোতি, ততো মগধনাল়িতো উপড্ঢঞ্চ পুরাণদমিল়নাল়িসঙ্খাতং পত্থং নাম হোতি, এতেন চ ‘‘ওমকো নাম পত্তো পত্থোদনং গণ্হাতী’’তি পাল়িৰচনঞ্চ সমেতি, লোকিযেহিপি –
602. Tatiyavaggassa paṭhame aḍḍhaterasapalāti māgadhikāya mānatulāya aḍḍhaterasapalaparimitaṃ udakaṃ gaṇhantaṃ sandhāya vuttaṃ, tathā parimitaṃ yavamāsādiṃ gaṇhantiṃ sandhāyāti keci. Ācariyadhammapālattherena pana ‘‘pakaticatumuṭṭhikaṃ kuḍuvaṃ, catukuḍuvaṃ nāḷi, tāya nāḷiyā soḷasa nāḷiyo doṇaṃ, taṃ pana magadhanāḷiyā dvādasa nāḷiyo hontīti vadantī’’ti vuttaṃ. Damiḷanāḷīti purāṇanāḷiṃ sandhāya vuttaṃ. Sā ca catumuṭṭhikehi kuḍuvehi aṭṭha kuḍuvā, tāya nāḷiyā dve nāḷiyo magadhanāḷiṃ gaṇhāti. Purāṇā pana ‘‘sīhaḷanāḷi tisso nāḷiyo gaṇhātī’’ti vadanti, tesaṃ matena magadhanāḷi idāni pavattamānāya catukuḍuvāya damiḷanāḷiyā catunāḷikā hoti, tato magadhanāḷito upaḍḍhañca purāṇadamiḷanāḷisaṅkhātaṃ patthaṃ nāma hoti, etena ca ‘‘omako nāma patto patthodanaṃ gaṇhātī’’ti pāḷivacanañca sameti, lokiyehipi –
‘‘লোকিযং মগধঞ্চেতি, পত্থদ্ৰযমুদাহটং।
‘‘Lokiyaṃ magadhañceti, patthadvayamudāhaṭaṃ;
লোকিযং সোল়সপলং, মাগধং দিগুণং মত’’ন্তি॥ –
Lokiyaṃ soḷasapalaṃ, māgadhaṃ diguṇaṃ mata’’nti. –
এৰং লোকে নাল়িযা মগধনাল়ি দিগুণাতি দস্সিতা, এৰঞ্চ গয্হমানে ওমকপত্তস্স চ যাপনমত্তোদনগাহিকা চ সিদ্ধা হোতি। ন হি সক্কা অট্ঠকুডুৰতো ঊনোদনগাহিনা পত্তেন অথূপীকতং পিণ্ডপাতং পরিযেসিত্ৰা যাপেতুং। তেনেৰ ৰেরঞ্জকণ্ডট্ঠকথাযং ‘‘পত্থো নাম নাল়িমত্তং হোতি একস্স পুরিসস্স অলং যাপনায। ৰুত্তম্পি হেতং ‘পত্থোদনো নালমযং দুৰিন্ন’’’ন্তি (জা॰ ২.২১.১৯২) ৰুত্তং, ‘‘একেকস্স দ্ৰিন্নং তিণ্ণং পহোতী’’তি চ আগহং, তস্মা ইধ ৰুত্তনযানুসারেনেৰ গহেতব্বং।
Evaṃ loke nāḷiyā magadhanāḷi diguṇāti dassitā, evañca gayhamāne omakapattassa ca yāpanamattodanagāhikā ca siddhā hoti. Na hi sakkā aṭṭhakuḍuvato ūnodanagāhinā pattena athūpīkataṃ piṇḍapātaṃ pariyesitvā yāpetuṃ. Teneva verañjakaṇḍaṭṭhakathāyaṃ ‘‘pattho nāma nāḷimattaṃ hoti ekassa purisassa alaṃ yāpanāya. Vuttampi hetaṃ ‘patthodano nālamayaṃ duvinna’’’nti (jā. 2.21.192) vuttaṃ, ‘‘ekekassa dvinnaṃ tiṇṇaṃ pahotī’’ti ca āgahaṃ, tasmā idha vuttanayānusāreneva gahetabbaṃ.
আলোপস্স অনুরূপন্তি এত্থ ‘‘ব্যঞ্জনস্স মত্তা নাম ওদনতো চতুত্থভাগো’’তি (ম॰ নি॰ অট্ঠ॰ ২.৩৮৭) ব্রহ্মাযুসুত্তট্ঠকথাযং ৰুত্তত্তা আলোপস্স চতুত্থভাগমেৰ ব্যঞ্জনং অনুরূপন্তি দট্ঠব্বং। ওদনগতিকানেৰাতি ওদনস্স অন্তো এৰ পৰিসনসীলানি সিযুং, অত্তনো ওকাসং ন গৰেসন্তীতি অত্থো। নামমত্তেতি ‘‘মজ্ঝিমো পত্তো মজ্ঝিমোমকো’’তিআদিনামমত্তে।
Ālopassaanurūpanti ettha ‘‘byañjanassa mattā nāma odanato catutthabhāgo’’ti (ma. ni. aṭṭha. 2.387) brahmāyusuttaṭṭhakathāyaṃ vuttattā ālopassa catutthabhāgameva byañjanaṃ anurūpanti daṭṭhabbaṃ. Odanagatikānevāti odanassa anto eva pavisanasīlāni siyuṃ, attano okāsaṃ na gavesantīti attho. Nāmamatteti ‘‘majjhimo patto majjhimomako’’tiādināmamatte.
৬০৭-৮. এৰং পযোগে পযোগেতি পরিযোসানালোপজ্ঝোহরণপযোগে পযোগে, আলোপে আলোপেতি অত্থো। কত্ৰাতি পাকপরিযোসানং কত্ৰা। পচিত্ৰা ঠপেস্সামীতি কাল়ৰণ্ণপাকং সন্ধায ৰুত্তং। ছিদ্দন্তি মুখৰট্টিতো দ্ৰঙ্গুলস্স হেট্ঠাছিদ্দং ৰুত্তং। সেসং পঠমকথিনে ৰুত্তনযমেৰ।
607-8.Evaṃ payoge payogeti pariyosānālopajjhoharaṇapayoge payoge, ālope ālopeti attho. Katvāti pākapariyosānaṃ katvā. Pacitvā ṭhapessāmīti kāḷavaṇṇapākaṃ sandhāya vuttaṃ. Chiddanti mukhavaṭṭito dvaṅgulassa heṭṭhāchiddaṃ vuttaṃ. Sesaṃ paṭhamakathine vuttanayameva.
পত্তসিক্খাপদৰণ্ণনা নিট্ঠিতা।
Pattasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. পত্তসিক্খাপদং • 1. Pattasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১. পত্তসিক্খাপদৰণ্ণনা • 1. Pattasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. পত্তসিক্খাপদৰণ্ণনা • 1. Pattasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. পত্তসিক্খাপদৰণ্ণনা • 1. Pattasikkhāpadavaṇṇanā
