| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. পত্তসুত্তং
6. Pattasuttaṃ
অথ খো মারস্স পাপিমতো এতদহোসি – ‘‘অযং খো সমণো গোতমো পঞ্চন্নং উপাদানক্খন্ধানং উপাদায ভিক্খূনং ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি। তে চ ভিক্খূ অট্ঠিং কত্ৰা মনসি কত্ৰা সব্বচেতসা সমন্নাহরিত্ৰা ওহিতসোতা ধম্মং সুণন্তি। যংনূনাহং যেন সমণো গোতমো তেনুপসঙ্কমেয্যং ৰিচক্খুকম্মাযা’’তি।
Atha kho mārassa pāpimato etadahosi – ‘‘ayaṃ kho samaṇo gotamo pañcannaṃ upādānakkhandhānaṃ upādāya bhikkhūnaṃ dhammiyā kathāya sandasseti samādapeti samuttejeti sampahaṃseti. Te ca bhikkhū aṭṭhiṃ katvā manasi katvā sabbacetasā samannāharitvā ohitasotā dhammaṃ suṇanti. Yaṃnūnāhaṃ yena samaṇo gotamo tenupasaṅkameyyaṃ vicakkhukammāyā’’ti.
তেন খো পন সমযেন সম্বহুলা পত্তা অব্ভোকাসে নিক্খিত্তা হোন্তি। অথ খো মারো পাপিমা বলীবদ্দৰণ্ণং অভিনিম্মিনিত্ৰা যেন তে পত্তা তেনুপসঙ্কমি। অথ খো অঞ্ঞতরো ভিক্খু অঞ্ঞতরং ভিক্খুং এতদৰোচ – ‘‘ভিক্খু, ভিক্খু, এসো বলীবদ্দো পত্তে ভিন্দেয্যা’’তি। এৰং ৰুত্তে ভগৰা তং ভিক্খুং এতদৰোচ – ‘‘ন সো, ভিক্খু, বলীবদ্দো। মারো এসো পাপিমা তুম্হাকং ৰিচক্খুকম্মায আগতো’’তি। অথ খো ভগৰা ‘‘মারো অযং পাপিমা’’ ইতি ৰিদিত্ৰা মারং পাপিমন্তং গাথায অজ্ঝভাসি –
Tena kho pana samayena sambahulā pattā abbhokāse nikkhittā honti. Atha kho māro pāpimā balībaddavaṇṇaṃ abhinimminitvā yena te pattā tenupasaṅkami. Atha kho aññataro bhikkhu aññataraṃ bhikkhuṃ etadavoca – ‘‘bhikkhu, bhikkhu, eso balībaddo patte bhindeyyā’’ti. Evaṃ vutte bhagavā taṃ bhikkhuṃ etadavoca – ‘‘na so, bhikkhu, balībaddo. Māro eso pāpimā tumhākaṃ vicakkhukammāya āgato’’ti. Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāya ajjhabhāsi –
‘‘রূপং ৰেদযিতং সঞ্ঞা, ৰিঞ্ঞাণং যঞ্চ সঙ্খতং।
‘‘Rūpaṃ vedayitaṃ saññā, viññāṇaṃ yañca saṅkhataṃ;
নেসোহমস্মি নেতং মে, এৰং তত্থ ৰিরজ্জতি॥
Nesohamasmi netaṃ me, evaṃ tattha virajjati.
‘‘এৰং ৰিরত্তং খেমত্তং, সব্বসংযোজনাতিগং।
‘‘Evaṃ virattaṃ khemattaṃ, sabbasaṃyojanātigaṃ;
অন্ৰেসং সব্বট্ঠানেসু, মারসেনাপি নাজ্ঝগা’’তি॥
Anvesaṃ sabbaṭṭhānesu, mārasenāpi nājjhagā’’ti.
অথ খো মারো পাপিমা…পে॰… তত্থেৰন্তরধাযীতি।
Atha kho māro pāpimā…pe… tatthevantaradhāyīti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬. পত্তসুত্তৰণ্ণনা • 6. Pattasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬. পত্তসুত্তৰণ্ণনা • 6. Pattasuttavaṇṇanā
