| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. பத்தஸுத்தவண்ணனா
6. Pattasuttavaṇṇanā
152. ச²ட்டே² பஞ்சன்னங் உபாதா³னக்க²ந்தா⁴னங் உபாதா³யாதி பஞ்ச உபாதா³னக்க²ந்தே⁴ ஆதி³யித்வா, ஸபா⁴வஸாமஞ்ஞலக்க²ணவஸேன நானப்பகாரதோ விப⁴ஜித்வா த³ஸ்ஸெந்தோ. ஸந்த³ஸ்ஸேதீதி க²ந்தா⁴னங் ஸபா⁴வலக்க²ணாதீ³னி த³ஸ்ஸேதி. ஸமாத³பேதீதி க³ண்ஹாபேதி. ஸமுத்தேஜேதீதி ஸமாதா³னம்ஹி உஸ்ஸாஹங் ஜனேதி. ஸம்பஹங்ஸேதீதி படிவித்³த⁴கு³ணேன வோதா³பேதி ஜோதாபேதி. அட்டி²ங் கத்வாதி அத்தி²கங் கத்வா, ‘‘அயங் நோ அதி⁴க³ந்தப்³போ³ அத்தோ²’’தி ஏவங் ஸல்லக்கெ²த்வா தாய தே³ஸனாய அத்தி²கா ஹுத்வா. மனஸி கத்வாதி சித்தே ட²பெத்வா. ஸப்³ப³சேதஸோ ஸமன்னாஹரித்வாதி ஸப்³பே³ன தேன கம்மகாரகசித்தேன ஸமன்னாஹரித்வா. ஓஹிதஸோதாதி ட²பிதாஸோதா. அப்³போ⁴காஸே நிக்கி²த்தாதி ஓதாபனத்தா²ய ட²பிதா.
152. Chaṭṭhe pañcannaṃ upādānakkhandhānaṃ upādāyāti pañca upādānakkhandhe ādiyitvā, sabhāvasāmaññalakkhaṇavasena nānappakārato vibhajitvā dassento. Sandassetīti khandhānaṃ sabhāvalakkhaṇādīni dasseti. Samādapetīti gaṇhāpeti. Samuttejetīti samādānamhi ussāhaṃ janeti. Sampahaṃsetīti paṭividdhaguṇena vodāpeti jotāpeti. Aṭṭhiṃ katvāti atthikaṃ katvā, ‘‘ayaṃ no adhigantabbo attho’’ti evaṃ sallakkhetvā tāya desanāya atthikā hutvā. Manasi katvāti citte ṭhapetvā. Sabbacetaso samannāharitvāti sabbena tena kammakārakacittena samannāharitvā. Ohitasotāti ṭhapitāsotā. Abbhokāse nikkhittāti otāpanatthāya ṭhapitā.
ரூபங் வேத³யிதங் ஸஞ்ஞாந்தி, ஏதே ரூபாத³யோ தயோ க²ந்தா⁴. யஞ்ச ஸங்க²தந்தி இமினா ஸங்கா²ரக்க²ந்தோ⁴ க³ஹிதோ. ஏவங் தத்த² விரஜ்ஜதீதி ‘‘ஏஸோ அஹங் ந ஹோமி, ஏதங் மய்ஹங் ந ஹோதீ’’தி பஸ்ஸந்தோ ஏவங் தேஸு க²ந்தே⁴ஸு விரஜ்ஜதி. கே²மத்தந்தி கே²மீபூ⁴தங் அத்தபா⁴வங். இமினா ப²லக்க²ணங் த³ஸ்ஸேதி. அன்வேஸந்தி ப⁴வயோனிக³திடி²திஸத்தாவாஸஸங்கா²தேஸு ஸப்³ப³ட்டா²னேஸு பரியேஸமானா. நாஜ்ஜ²கா³தி ந பஸ்ஸீதி. ச²ட்ட²ங்.
Rūpaṃ vedayitaṃ saññānti, ete rūpādayo tayo khandhā. Yañca saṅkhatanti iminā saṅkhārakkhandho gahito. Evaṃ tattha virajjatīti ‘‘eso ahaṃ na homi, etaṃ mayhaṃ na hotī’’ti passanto evaṃ tesu khandhesu virajjati. Khemattanti khemībhūtaṃ attabhāvaṃ. Iminā phalakkhaṇaṃ dasseti. Anvesanti bhavayonigatiṭhitisattāvāsasaṅkhātesu sabbaṭṭhānesu pariyesamānā. Nājjhagāti na passīti. Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. பத்தஸுத்தங் • 6. Pattasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. பத்தஸுத்தவண்ணனா • 6. Pattasuttavaṇṇanā
