| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
3. பத்தவக்³கோ³
3. Pattavaggo
1. பத்தஸிக்கா²பத³வண்ணனா
1. Pattasikkhāpadavaṇṇanā
பத்தவக்³க³ஸ்ஸ பட²மே அதிரேகபத்தோதி அனதி⁴ட்டி²தோ ச அவிகப்பிதோ ச, ஸோ ச கோ² உக்கட்ட²மஜ்ஜி²மோமகானங் அஞ்ஞதரோ பமாணயுத்தோவ, தஸ்ஸ பமாணங் ‘‘அட்³டா⁴ள்ஹகோத³னங் க³ண்ஹாதீ’’திஆதி³னா (பாரா 602) நயேன பாளியங் வுத்தங். தத்ராயங் வினிச்ச²யோ – அனுபஹதபுராணஸாலிதண்டு³லானங் ஸுகொட்டிதபரிஸுத்³தா⁴னங் த்³வே மக³த⁴னாளியோ க³ஹெத்வா தேஹி தண்டு³லேஹி அனுத்தண்டு³லமகிலின்னமபிண்டி³கங் ஸுவிஸத³ங் குந்த³மகுளராஸிஸதி³ஸங் அவஸ்ஸாவிதோத³னங் பசித்வா நிரவஸேஸங் பத்தே பக்கி²பித்வா தஸ்ஸ ஓத³னஸ்ஸ சதுத்த²பா⁴க³ப்பமாணோ நாதிக⁴னோ நாதிதனுகோ ஹத்த²ஹாரியோ ஸப்³ப³ஸம்பா⁴ரஸங்க²தோ முக்³க³ஸூபோ பக்கி²பிதப்³போ³, ததோ ஆலோபஸ்ஸ அனுரூபங் யாவசரிமாலோபப்பஹோனகங் மச்ச²மங்ஸாதி³ப்³யஞ்ஜனங் பக்கி²பிதப்³ப³ங், ஸப்பிதேலதக்கரஸகஞ்ஜியாதீ³னி பன க³ணனூபகா³னி ந ஹொந்தி. தானி ஹி ஓத³னக³திகானேவ, நேவ ஹாபேதுங், ந வட்³டே⁴துங் ஸக்கொந்தி, ஏவமேதங் ஸப்³ப³ம்பி பக்கி²த்தங் ஸசே பத்தஸ்ஸ முக²வட்டியா ஹெட்டி²மராஜிஸமங் திட்ட²தி, ஸுத்தேன வா ஹீரேன வா சி²ந்த³ந்தஸ்ஸ ஸுத்தஸ்ஸ வா ஹீரஸ்ஸ வா ஹெட்டி²மந்தங் பு²ஸதி, அயங் உக்கட்டோ² நாம பத்தோ. ஸசே தங் ராஜிங் அதிக்கம்ம தூ²பீகதங் திட்ட²தி, அயங் உக்கட்டோ²மகோ நாம பத்தோ. ஸசே தங் ராஜிங் ந ஸம்பாபுணாதி, அந்தோக³த⁴மேவ ஹோதி, அயங் உக்கட்டு²க்கட்டோ² நாம பத்தோ. உக்கட்ட²தோ உபட்³ட⁴ப்பமாணோ மஜ்ஜி²மோ. மஜ்ஜி²மபத்ததோ உபட்³ட⁴ப்பமாணோ ஓமகோ. தேஸம்பி வுத்தனயேனேவ பே⁴தோ³ வேதி³தப்³போ³. இச்சேதேஸு நவஸு உக்கட்டு²க்கட்டோ² ச ஓமகோமகோ சாதி த்³வே அபத்தா, ஸேஸா ஸத்த பத்தா பமாணயுத்தா நாம, அயமெத்த²ஸங்கே²போ, வித்தா²ரோ பன ஸமந்தபாஸாதி³காயங் (பாரா॰ அட்ட²॰ 2.598 ஆத³யோ) வுத்தோ, தஸ்மா ஏவங் பமாணயுத்தங் ஸமணஸாருப்பேன பக்கங் அயோபத்தங் வா மத்திகாபத்தங் வா லபி⁴த்வா புராணபத்தங் பச்சுத்³த⁴ரித்வா அந்தோத³ஸாஹே அதி⁴ட்டா²தப்³போ³. ஸசே பனஸ்ஸ மூலதோ காகணிகமத்தம்பி தா³தப்³ப³ங் அவஸிட்ட²ங் ஹோதி, அதி⁴ட்டா²னுபகோ³ ந ஹோதி, அப்பச்சுத்³த⁴ரந்தேன விகப்பேதப்³போ³. தத்த² பச்சுத்³த⁴ரணாதி⁴ட்டா²னலக்க²ணங் சீவரவக்³கே³ வுத்தனயேனேவ வேதி³தப்³ப³ங், விகப்பனலக்க²ணங் பரதோ வக்கா²ம. ஸசே பன கோசி அபத்தகோ பி⁴க்கு² த³ஸ பத்தே லபி⁴த்வா ஸப்³பே³ அத்தனாவ பரிபு⁴ஞ்ஜிதுகாமோ ஹோதி, ஏகங் பத்தங் அதி⁴ட்டா²ய புன தி³வஸே தங் பச்சுத்³த⁴ரித்வா அஞ்ஞோ அதி⁴ட்டா²தப்³போ³, ஏதேனுபாயேன வஸ்ஸஸதம்பி பரிஹரிதுங் ஸக்கா. யோ பனஸ்ஸ பத்தோ முக²வட்டிதோ ஹெட்டா² த்³வங்கு³லமத்தோகாஸதோ பட்டா²ய யத்த²கத்த²சி கங்கு³ஸித்த²னிக்க²மனமத்தேன சி²த்³தே³ன சி²த்³தோ³ ஹோதி, ஸோ அதி⁴ட்டா²னுபகோ³ ந ஹோதி. புன சி²த்³தே³ பாகதிகே கதே அதி⁴ட்டா²தப்³போ³, ஸேஸங் அதி⁴ட்டா²னவிஜஹனங் திசீவரே வுத்தனயமேவ.
Pattavaggassa paṭhame atirekapattoti anadhiṭṭhito ca avikappito ca, so ca kho ukkaṭṭhamajjhimomakānaṃ aññataro pamāṇayuttova, tassa pamāṇaṃ ‘‘aḍḍhāḷhakodanaṃ gaṇhātī’’tiādinā (pārā 602) nayena pāḷiyaṃ vuttaṃ. Tatrāyaṃ vinicchayo – anupahatapurāṇasālitaṇḍulānaṃ sukoṭṭitaparisuddhānaṃ dve magadhanāḷiyo gahetvā tehi taṇḍulehi anuttaṇḍulamakilinnamapiṇḍikaṃ suvisadaṃ kundamakuḷarāsisadisaṃ avassāvitodanaṃ pacitvā niravasesaṃ patte pakkhipitvā tassa odanassa catutthabhāgappamāṇo nātighano nātitanuko hatthahāriyo sabbasambhārasaṅkhato muggasūpo pakkhipitabbo, tato ālopassa anurūpaṃ yāvacarimālopappahonakaṃ macchamaṃsādibyañjanaṃ pakkhipitabbaṃ, sappitelatakkarasakañjiyādīni pana gaṇanūpagāni na honti. Tāni hi odanagatikāneva, neva hāpetuṃ, na vaḍḍhetuṃ sakkonti, evametaṃ sabbampi pakkhittaṃ sace pattassa mukhavaṭṭiyā heṭṭhimarājisamaṃ tiṭṭhati, suttena vā hīrena vā chindantassa suttassa vā hīrassa vā heṭṭhimantaṃ phusati, ayaṃ ukkaṭṭho nāma patto. Sace taṃ rājiṃ atikkamma thūpīkataṃ tiṭṭhati, ayaṃ ukkaṭṭhomako nāma patto. Sace taṃ rājiṃ na sampāpuṇāti, antogadhameva hoti, ayaṃ ukkaṭṭhukkaṭṭho nāma patto. Ukkaṭṭhato upaḍḍhappamāṇo majjhimo. Majjhimapattato upaḍḍhappamāṇo omako. Tesampi vuttanayeneva bhedo veditabbo. Iccetesu navasu ukkaṭṭhukkaṭṭho ca omakomako cāti dve apattā, sesā satta pattā pamāṇayuttā nāma, ayametthasaṅkhepo, vitthāro pana samantapāsādikāyaṃ (pārā. aṭṭha. 2.598 ādayo) vutto, tasmā evaṃ pamāṇayuttaṃ samaṇasāruppena pakkaṃ ayopattaṃ vā mattikāpattaṃ vā labhitvā purāṇapattaṃ paccuddharitvā antodasāhe adhiṭṭhātabbo. Sace panassa mūlato kākaṇikamattampi dātabbaṃ avasiṭṭhaṃ hoti, adhiṭṭhānupago na hoti, appaccuddharantena vikappetabbo. Tattha paccuddharaṇādhiṭṭhānalakkhaṇaṃ cīvaravagge vuttanayeneva veditabbaṃ, vikappanalakkhaṇaṃ parato vakkhāma. Sace pana koci apattako bhikkhu dasa patte labhitvā sabbe attanāva paribhuñjitukāmo hoti, ekaṃ pattaṃ adhiṭṭhāya puna divase taṃ paccuddharitvā añño adhiṭṭhātabbo, etenupāyena vassasatampi pariharituṃ sakkā. Yo panassa patto mukhavaṭṭito heṭṭhā dvaṅgulamattokāsato paṭṭhāya yatthakatthaci kaṅgusitthanikkhamanamattena chiddena chiddo hoti, so adhiṭṭhānupago na hoti. Puna chidde pākatike kate adhiṭṭhātabbo, sesaṃ adhiṭṭhānavijahanaṃ ticīvare vuttanayameva.
ஸாவத்தி²யங் ச²ப்³ப³க்³கி³யே ஆரப்³ப⁴ அதிரேகபத்ததா⁴ரணவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, ஸேஸவண்ணனாக்கமோ சீவரவக்³க³ஸ்ஸ பட²மஸிக்கா²பதே³ வுத்தனயேனேவ வேதி³தப்³போ³தி.
Sāvatthiyaṃ chabbaggiye ārabbha atirekapattadhāraṇavatthusmiṃ paññattaṃ, asādhāraṇapaññatti, sesavaṇṇanākkamo cīvaravaggassa paṭhamasikkhāpade vuttanayeneva veditabboti.
பத்தஸிக்கா²பத³வண்ணனா நிட்டி²தா.
Pattasikkhāpadavaṇṇanā niṭṭhitā.
2. ஊனபஞ்சப³ந்த⁴னஸிக்கா²பத³வண்ணனா
2. Ūnapañcabandhanasikkhāpadavaṇṇanā
து³தியே ஊனானி பஞ்ச ப³ந்த⁴னானி அஸ்ஸாதி ஊனபஞ்சப³ந்த⁴னோ, நாஸ்ஸ பஞ்ச ப³ந்த⁴னானி பூரெந்தீதி அத்தோ², தேன ஊனபஞ்சப³ந்த⁴னேன, இத்த²ம்பூ⁴தஸ்ஸ லக்க²ணே கரணவசனங். தத்த² யஸ்மா அப³ந்த⁴னஸ்ஸாபி பஞ்ச ப³ந்த⁴னானி ந பூரெந்தி ஸப்³ப³ஸோ நத்தி²தாய, தேனஸ்ஸ பத³பா⁴ஜனே ‘‘ஊனபஞ்சப³ந்த⁴னோ நாம பத்தோ அப³ந்த⁴னோ வா ஏகப³ந்த⁴னோ வா’’திஆதி³ (பாரா॰ 613) வுத்தங். ‘‘ஊனபஞ்சப³ந்த⁴னேனா’’தி ச வுத்தத்தா யஸ்ஸ பஞ்சப³ந்த⁴னோ பத்தோ ஹோதி பஞ்சப³ந்த⁴னோகாஸோ வா, தஸ்ஸ ஸோ அபத்தோ, தஸ்மா அஞ்ஞங் விஞ்ஞாபேதுங் வட்டதி. யஸ்மிங் பன பத்தே முக²வட்டிதோ ஹெட்டா² ப⁴ட்டா² த்³வங்கு³லப்பமாணா ஏகாபி ராஜி ஹோதி, தங் தஸ்ஸா ராஜியா ஹெட்டி²மபரியந்தே பத்தவேத⁴கேன விஜ்ஜி²த்வா பசித்வா ஸுத்தரஜ்ஜுகமகசிரஜ்ஜுகாதீ³ஹி வா திபுஸுத்தகேன வா ப³ந்தி⁴த்வா தங் ப³ந்த⁴னங் ஆமிஸஸ்ஸ அலக்³க³னத்த²ங் திபுபட்டகேன வா கேனசி ப³த்³த⁴ஸிலேஸாதி³னா வா படிச்சா²தே³தப்³ப³ங், ஸோ ச பத்தோ அதி⁴ட்ட²ஹித்வா பரிபு⁴ஞ்ஜிதப்³போ³, ஸுகு²மங் வா சி²த்³த³ங் கத்வா ப³ந்தி⁴தப்³போ³, பா²ணிதங் ஜா²பெத்வா பாஸாணசுண்ணேன ப³ந்தி⁴தும்பி வட்டதி. யஸ்ஸ பன த்³வே ராஜியோ வா ஏகாயேவ வா சதுரங்கு³லா, தஸ்ஸ த்³வே ப³ந்த⁴னானி தா³தப்³பா³னி. யஸ்ஸ திஸ்ஸோ வா ஏகாயேவ வா ச²ளங்கு³லா, தஸ்ஸ தீணி. யஸ்ஸ சதஸ்ஸோ வா ஏகாயேவ வா அட்ட²ங்கு³லா, தஸ்ஸ சத்தாரி. யஸ்ஸ பஞ்ச வா ஏகாயேவ வா த³ஸங்கு³லா, ஸோ ப³த்³தோ⁴பி அப³த்³தோ⁴பி அபத்தோயேவ, அஞ்ஞோ விஞ்ஞாபேதப்³போ³, ஏஸ தாவ மத்திகாபத்தே வினிச்ச²யோ.
Dutiye ūnāni pañca bandhanāni assāti ūnapañcabandhano, nāssa pañca bandhanāni pūrentīti attho, tena ūnapañcabandhanena, itthambhūtassa lakkhaṇe karaṇavacanaṃ. Tattha yasmā abandhanassāpi pañca bandhanāni na pūrenti sabbaso natthitāya, tenassa padabhājane ‘‘ūnapañcabandhano nāma patto abandhano vā ekabandhano vā’’tiādi (pārā. 613) vuttaṃ. ‘‘Ūnapañcabandhanenā’’ti ca vuttattā yassa pañcabandhano patto hoti pañcabandhanokāso vā, tassa so apatto, tasmā aññaṃ viññāpetuṃ vaṭṭati. Yasmiṃ pana patte mukhavaṭṭito heṭṭhā bhaṭṭhā dvaṅgulappamāṇā ekāpi rāji hoti, taṃ tassā rājiyā heṭṭhimapariyante pattavedhakena vijjhitvā pacitvā suttarajjukamakacirajjukādīhi vā tipusuttakena vā bandhitvā taṃ bandhanaṃ āmisassa alagganatthaṃ tipupaṭṭakena vā kenaci baddhasilesādinā vā paṭicchādetabbaṃ, so ca patto adhiṭṭhahitvā paribhuñjitabbo, sukhumaṃ vā chiddaṃ katvā bandhitabbo, phāṇitaṃ jhāpetvā pāsāṇacuṇṇena bandhitumpi vaṭṭati. Yassa pana dve rājiyo vā ekāyeva vā caturaṅgulā, tassa dve bandhanāni dātabbāni. Yassa tisso vā ekāyeva vā chaḷaṅgulā, tassa tīṇi. Yassa catasso vā ekāyeva vā aṭṭhaṅgulā, tassa cattāri. Yassa pañca vā ekāyeva vā dasaṅgulā, so baddhopi abaddhopi apattoyeva, añño viññāpetabbo, esa tāva mattikāpatte vinicchayo.
அயோபத்தே பன ஸசேபி பஞ்ச வா அதிரேகானி வா சி²த்³தா³னி ஹொந்தி, தானி சே அயசுண்ணேன வா ஆணியா வா லோஹமண்ட³லேன வா ப³த்³தா⁴னி மட்டா²னி ஹொந்தி, ஸ்வேவ பரிபு⁴ஞ்ஜிதப்³போ³, அஞ்ஞோ ந விஞ்ஞாபேதப்³போ³. அத² பன ஏகம்பி சி²த்³த³ங் மஹந்தங் ஹோதி, லோஹமண்ட³லேன ப³த்³த⁴ம்பி மட்ட²ங் ந ஹோதி, பத்தே ஆமிஸங் லக்³க³தி, அகப்பியோ ஹோதி அயங் பத்தோ, அஞ்ஞோ விஞ்ஞாபேதப்³போ³. யோ பன ஏவங் பத்தஸங்கே²பக³தே வா அயோபத்தே, ஊனபஞ்சப³ந்த⁴னே வா மத்திகாபத்தே ஸதி அஞ்ஞங் விஞ்ஞாபேதி, பயோகே³ து³க்கடங், படிலாபே⁴ன நிஸ்ஸக்³கி³யோ ஹோதி, நிஸ்ஸஜ்ஜிதப்³போ³. நிஸ்ஸஜ்ஜந்தேன ஸங்க⁴மஜ்ஜே² ஏவ நிஸ்ஸஜ்ஜிதப்³போ³, தேன வுத்தங் ‘‘பி⁴க்கு²பரிஸாய நிஸ்ஸஜ்ஜிதப்³போ³’’தி. யோ ச தஸ்ஸா பி⁴க்கு²பரிஸாயாதிஎத்த² தேஹி பி⁴க்கூ²ஹி பகதியா ஏவ அத்தனோ அத்தனோ அதி⁴ட்டி²தங் பத்தங் க³ஹெத்வா ஸன்னிபதிதப்³ப³ங், ததோ ஸம்மதேன பத்தக்³கா³ஹாபகேன பத்தஸ்ஸ விஜ்ஜமானகு³ணங் வத்வா ‘‘ப⁴ந்தே, இமங் க³ண்ஹதா²’’தி தே²ரோ வத்தப்³போ³. ஸசே தே²ரஸ்ஸ ஸோ பத்தோ ந ருச்சதி, அப்பிச்ச²தாய வா ந க³ண்ஹாதி, வட்டதி. தஸ்மிங் பன அனுகம்பாய அக³ண்ஹந்தஸ்ஸ து³க்கடங். ஸசே பன க³ண்ஹாதி, தே²ரஸ்ஸ பத்தங் து³தியத்தே²ரங் கா³ஹாபெத்வா ஏதேனேவ உபாயேன யாவ ஸங்க⁴னவகா கா³ஹாபேதப்³போ³, தேன பரிச்சத்தபத்தோ பன பத்தபரியந்தோ நாம, ஸோ தஸ்ஸ பி⁴க்கு²னோ பதா³தப்³போ³. தேனாபி ஸோ யதா² விஞ்ஞாபெத்வா க³ஹிதபத்தோ, ஏவமேவ ஸக்கச்சங் பரிபு⁴ஞ்ஜிதப்³போ³. ஸசே பன தங் ஜிகு³ச்ச²ந்தோ அதே³ஸே வா நிக்கி²பதி, அபரிபோ⁴கே³ன வா பரிபு⁴ஞ்ஜதி, விஸ்ஸஜ்ஜேதி வா, து³க்கடங் ஆபஜ்ஜதி.
Ayopatte pana sacepi pañca vā atirekāni vā chiddāni honti, tāni ce ayacuṇṇena vā āṇiyā vā lohamaṇḍalena vā baddhāni maṭṭhāni honti, sveva paribhuñjitabbo, añño na viññāpetabbo. Atha pana ekampi chiddaṃ mahantaṃ hoti, lohamaṇḍalena baddhampi maṭṭhaṃ na hoti, patte āmisaṃ laggati, akappiyo hoti ayaṃ patto, añño viññāpetabbo. Yo pana evaṃ pattasaṅkhepagate vā ayopatte, ūnapañcabandhane vā mattikāpatte sati aññaṃ viññāpeti, payoge dukkaṭaṃ, paṭilābhena nissaggiyo hoti, nissajjitabbo. Nissajjantena saṅghamajjhe eva nissajjitabbo, tena vuttaṃ ‘‘bhikkhuparisāya nissajjitabbo’’ti. Yo ca tassā bhikkhuparisāyātiettha tehi bhikkhūhi pakatiyā eva attano attano adhiṭṭhitaṃ pattaṃ gahetvā sannipatitabbaṃ, tato sammatena pattaggāhāpakena pattassa vijjamānaguṇaṃ vatvā ‘‘bhante, imaṃ gaṇhathā’’ti thero vattabbo. Sace therassa so patto na ruccati, appicchatāya vā na gaṇhāti, vaṭṭati. Tasmiṃ pana anukampāya agaṇhantassa dukkaṭaṃ. Sace pana gaṇhāti, therassa pattaṃ dutiyattheraṃ gāhāpetvā eteneva upāyena yāva saṅghanavakā gāhāpetabbo, tena pariccattapatto pana pattapariyanto nāma, so tassa bhikkhuno padātabbo. Tenāpi so yathā viññāpetvā gahitapatto, evameva sakkaccaṃ paribhuñjitabbo. Sace pana taṃ jigucchanto adese vā nikkhipati, aparibhogena vā paribhuñjati, vissajjeti vā, dukkaṭaṃ āpajjati.
ஸக்கேஸு ச²ப்³ப³க்³கி³யே ஆரப்³ப⁴ ப³ஹூ பத்தே விஞ்ஞாபனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங் , அப³ந்த⁴னேன அப³ந்த⁴னங், ஏகப³ந்த⁴னங், து³ப³ந்த⁴னங், திப³ந்த⁴னங், சதுப்³ப³ந்த⁴னங், அப³ந்த⁴னோகாஸங், ஏகத்³விதிசதுப்³ப³ந்த⁴னோகாஸங் சேதாபேதி, ஏவங் ஏகேகேன பத்தேன த³ஸதா⁴ த³ஸவித⁴ங் பத்தங். சேதாபனவஸேன பன ஏகங் நிஸ்ஸக்³கி³யபாசித்தியஸதங் ஹோதி. நட்ட²பத்தஸ்ஸ, பி⁴ன்னபத்தஸ்ஸ, அத்தனோ ஞாதகப்பவாரிதே, அஞ்ஞஸ்ஸ ச ஞாதகப்பவாரிதே, தஸ்ஸேவத்தா²ய விஞ்ஞாபெந்தஸ்ஸ, அத்தனோ த⁴னேன க³ண்ஹதோ, உம்மத்தகாதீ³னஞ்ச அனாபத்தி. அதி⁴ட்டா²னுபக³பத்தஸ்ஸ ஊனபஞ்சப³ந்த⁴னதா, அத்துத்³தே³ஸிகதா, அகதவிஞ்ஞத்தி , தாய ச படிலாபோ⁴தி இமானெத்த² சத்தாரி அங்கா³னி. ஸமுட்டா²னாதீ³னி தோ⁴வாபனஸிக்கா²பதே³ வுத்தனயானேவாதி.
Sakkesu chabbaggiye ārabbha bahū patte viññāpanavatthusmiṃ paññattaṃ, sādhāraṇapaññatti, anāṇattikaṃ , abandhanena abandhanaṃ, ekabandhanaṃ, dubandhanaṃ, tibandhanaṃ, catubbandhanaṃ, abandhanokāsaṃ, ekadviticatubbandhanokāsaṃ cetāpeti, evaṃ ekekena pattena dasadhā dasavidhaṃ pattaṃ. Cetāpanavasena pana ekaṃ nissaggiyapācittiyasataṃ hoti. Naṭṭhapattassa, bhinnapattassa, attano ñātakappavārite, aññassa ca ñātakappavārite, tassevatthāya viññāpentassa, attano dhanena gaṇhato, ummattakādīnañca anāpatti. Adhiṭṭhānupagapattassa ūnapañcabandhanatā, attuddesikatā, akataviññatti , tāya ca paṭilābhoti imānettha cattāri aṅgāni. Samuṭṭhānādīni dhovāpanasikkhāpade vuttanayānevāti.
ஊனபஞ்சப³ந்த⁴னஸிக்கா²பத³வண்ணனா நிட்டி²தா.
Ūnapañcabandhanasikkhāpadavaṇṇanā niṭṭhitā.
3. பே⁴ஸஜ்ஜஸிக்கா²பத³வண்ணனா
3. Bhesajjasikkhāpadavaṇṇanā
ததியே படிஸாயனீயானீதி படிஸாயிதப்³பா³னி, பரிபு⁴ஞ்ஜிதப்³பா³னீதி அத்தோ². ஏதேன ஸயங் உக்³க³ஹெத்வா நிக்கி²த்தானங் ஸத்தாஹாதிக்கமேபி அனாபத்திங் த³ஸ்ஸேதி, தானி ஹி படிஸாயிதுங் ந வட்டந்தி. பே⁴ஸஜ்ஜானீதி பே⁴ஸஜ்ஜகிச்சங் கரொந்து வா, மா வா, ஏவங் லத்³த⁴வோஹாரானி. ஸப்பி நாம க³வாதீ³னங் ஸப்பி, யேஸங் மங்ஸங் கப்பதி, தேஸங் ஸப்பி. ததா² நவனீதங். தேலங் நாம திலஸாஸபமதூ⁴கஏரண்ட³கவஸாதீ³ஹி நிப்³ப³த்திதங். மது⁴ நாம மக்கி²காமது⁴மேவ. பா²ணிதங் நாம உச்சு²ரஸங் உபாதா³ய பன அபக்கா வா அவத்து²கபக்கா வா ஸப்³பா³பி உச்சு²விகதி ‘‘பா²ணித’’ந்தி வேதி³தப்³ப³ங். தானி படிக்³க³ஹெத்வாதி தானி பே⁴ஸஜ்ஜானி படிக்³க³ஹெத்வா, ந தேஸங் வத்தூ²னி. ஏதேன ட²பெத்வா வஸாதேலங் யானெத்த² யாவகாலிகவத்து²கானி, தேஸங் வத்தூ²னி படிக்³க³ஹெத்வா கதானி ஸப்பிஆதீ³னி ஸத்தாஹங் அதிக்காமயதோபி அனாபத்திங் த³ஸ்ஸேதி. வஸாதேலங் பன காலே படிக்³க³ஹிதங் காலே நிபக்கங் காலே ஸங்ஸட்ட²ங் தேலபரிபோ⁴கே³ன பரிபு⁴ஞ்ஜிதுங் அனுஞ்ஞாதங், தஸ்மா ட²பெத்வா மனுஸ்ஸவஸங் அஞ்ஞங் யங்கஞ்சி வஸங் புரேப⁴த்தங் படிக்³க³ஹெத்வா ஸாமங் பசித்வா நிப்³ப³த்திததேலம்பி ஸத்தாஹங் நிராமிஸபரிபோ⁴கே³ன வட்டதி. அனுபஸம்பன்னேன பசித்வா தி³ன்னங் பன தத³ஹுபுரேப⁴த்தங் ஸாமிஸம்பி வட்டதி, அஞ்ஞேஸங் யாவகாலிகவத்தூ²னங் வத்து²ங் பசிதுங் ந வட்டதியேவ. நிப்³ப³த்திதஸப்பி வா நவனீதங் வா பசிதுங் வட்டதி, தங் பன தத³ஹுபுரேப⁴த்தம்பி ஸாமிஸங் பரிபு⁴ஞ்ஜிதுங் ந வட்டதி. புரேப⁴த்தங் படிக்³க³ஹிதகீ²ராதி³தோ அனுபஸம்பன்னேன பசித்வா கதஸப்பிஆதீ³னி பன தத³ஹுபுரேப⁴த்தங் ஸாமிஸானிபி வட்டந்தி, பச்சா²ப⁴த்ததோ பட்டா²ய அனஜ்ஜோ²ஹரணீயானி, ஸத்தாஹாதிக்கமேபி அனாபத்தி. ஸன்னிதி⁴காரகங் பரிபு⁴ஞ்ஜிதப்³பா³னீதி ஸன்னிதி⁴ங் கத்வா நித³ஹித்வா புரேப⁴த்தங் படிக்³க³ஹிதானி தத³ஹுபுரேப⁴த்தங் ஸாமிஸபரிபோ⁴கே³னாபி வட்டந்தி, பச்சா²ப⁴த்ததோ பட்டா²ய பன தானி ச, பச்சா²ப⁴த்தங் படிக்³க³ஹிதானி ச ஸத்தாஹங் நிராமிஸபரிபோ⁴கே³ன பரிபு⁴ஞ்ஜிதப்³பா³னீதி அத்தோ². ‘‘பரிபு⁴ஞ்ஜிதப்³பா³னீ’’தி ச வசனதோ அந்தோஸத்தாஹே அப்³ப⁴ஞ்ஜனாதீ³னங் அத்தா²ய அதி⁴ட்ட²ஹித்வா ட²பிதேஸு அனாபத்தி, யாவஜீவிகானி ஸாஸபமதூ⁴கஏரண்ட³கஅட்டீ²னி தேலகரணத்த²ங் படிக்³க³ஹெத்வா தத³ஹேவ கததேலங் ஸத்தாஹகாலிகங், து³தியதி³வஸே கதங் சா²ஹங் வட்டதி, ததியதி³வஸே கதங் பஞ்சாஹங், சதுத்த²பஞ்சமச²ட்ட²ஸத்தமதி³வஸே கதங் தத³ஹேவ வட்டதி. ஸசே யாவ அருணஸ்ஸ உக்³க³மனா திட்ட²தி, நிஸ்ஸக்³கி³யங் ஹோதி, அட்ட²மதி³வஸே கதங் அனஜ்ஜோ²ஹரணீயங், அனிஸ்ஸக்³கி³யத்தா பன பா³ஹிரபரிபோ⁴கே³ன வட்டதி. ஸசேபி ந கரோதி, தேலத்தா²ய படிக்³க³ஹிதஸாஸபாதீ³னங் பன பாளியங் அனாக³தஸப்பிஆதீ³னஞ்ச ஸத்தாஹாதிக்கமே து³க்கடங் ஆபஜ்ஜதி. ஸீதுத³கேன கதமதூ⁴கபுப்ப²பா²ணிதங் பன பா²ணிதக³திகமேவ, அம்ப³பா²ணிதாதீ³னி யாவகாலிகானி. யங் பனெத்த² ஸத்தாஹகாலிகங், தங் நிஸ்ஸட்ட²ங் படிலபி⁴த்வாபி அருஆதீ³னி வா மக்கே²துங், அஜ்ஜோ²ஹரிதுங் வா ந வட்டதி. பதீ³பே காளவண்ணே வா உபனேதப்³ப³ங், அஞ்ஞஸ்ஸ பி⁴க்கு²னோ காயிகபரிபோ⁴க³ங் வட்டதி. யங் பன நிரபெக்கோ² பரிச்சஜித்வா புன லப⁴தி, தங் அஜ்ஜோ²ஹரிதும்பி வட்டதி. விஸுங் ட²பிதஸப்பிஆதீ³ஸு, ஏகபா⁴ஜனே வா அமிஸ்ஸிதேஸு வத்து²க³ணனாய ஆபத்தியோ.
Tatiye paṭisāyanīyānīti paṭisāyitabbāni, paribhuñjitabbānīti attho. Etena sayaṃ uggahetvā nikkhittānaṃ sattāhātikkamepi anāpattiṃ dasseti, tāni hi paṭisāyituṃ na vaṭṭanti. Bhesajjānīti bhesajjakiccaṃ karontu vā, mā vā, evaṃ laddhavohārāni. Sappi nāma gavādīnaṃ sappi, yesaṃ maṃsaṃ kappati, tesaṃ sappi. Tathā navanītaṃ. Telaṃ nāma tilasāsapamadhūkaeraṇḍakavasādīhi nibbattitaṃ. Madhu nāma makkhikāmadhumeva. Phāṇitaṃ nāma ucchurasaṃ upādāya pana apakkā vā avatthukapakkā vā sabbāpi ucchuvikati ‘‘phāṇita’’nti veditabbaṃ. Tāni paṭiggahetvāti tāni bhesajjāni paṭiggahetvā, na tesaṃ vatthūni. Etena ṭhapetvā vasātelaṃ yānettha yāvakālikavatthukāni, tesaṃ vatthūni paṭiggahetvā katāni sappiādīni sattāhaṃ atikkāmayatopi anāpattiṃ dasseti. Vasātelaṃ pana kāle paṭiggahitaṃ kāle nipakkaṃ kāle saṃsaṭṭhaṃ telaparibhogena paribhuñjituṃ anuññātaṃ, tasmā ṭhapetvā manussavasaṃ aññaṃ yaṃkañci vasaṃ purebhattaṃ paṭiggahetvā sāmaṃ pacitvā nibbattitatelampi sattāhaṃ nirāmisaparibhogena vaṭṭati. Anupasampannena pacitvā dinnaṃ pana tadahupurebhattaṃ sāmisampi vaṭṭati, aññesaṃ yāvakālikavatthūnaṃ vatthuṃ pacituṃ na vaṭṭatiyeva. Nibbattitasappi vā navanītaṃ vā pacituṃ vaṭṭati, taṃ pana tadahupurebhattampi sāmisaṃ paribhuñjituṃ na vaṭṭati. Purebhattaṃ paṭiggahitakhīrādito anupasampannena pacitvā katasappiādīni pana tadahupurebhattaṃ sāmisānipi vaṭṭanti, pacchābhattato paṭṭhāya anajjhoharaṇīyāni, sattāhātikkamepi anāpatti. Sannidhikārakaṃ paribhuñjitabbānīti sannidhiṃ katvā nidahitvā purebhattaṃ paṭiggahitāni tadahupurebhattaṃ sāmisaparibhogenāpi vaṭṭanti, pacchābhattato paṭṭhāya pana tāni ca, pacchābhattaṃ paṭiggahitāni ca sattāhaṃ nirāmisaparibhogena paribhuñjitabbānīti attho. ‘‘Paribhuñjitabbānī’’ti ca vacanato antosattāhe abbhañjanādīnaṃ atthāya adhiṭṭhahitvā ṭhapitesu anāpatti, yāvajīvikāni sāsapamadhūkaeraṇḍakaaṭṭhīni telakaraṇatthaṃ paṭiggahetvā tadaheva katatelaṃ sattāhakālikaṃ, dutiyadivase kataṃ chāhaṃ vaṭṭati, tatiyadivase kataṃ pañcāhaṃ, catutthapañcamachaṭṭhasattamadivase kataṃ tadaheva vaṭṭati. Sace yāva aruṇassa uggamanā tiṭṭhati, nissaggiyaṃ hoti, aṭṭhamadivase kataṃ anajjhoharaṇīyaṃ, anissaggiyattā pana bāhiraparibhogena vaṭṭati. Sacepi na karoti, telatthāya paṭiggahitasāsapādīnaṃ pana pāḷiyaṃ anāgatasappiādīnañca sattāhātikkame dukkaṭaṃ āpajjati. Sītudakena katamadhūkapupphaphāṇitaṃ pana phāṇitagatikameva, ambaphāṇitādīni yāvakālikāni. Yaṃ panettha sattāhakālikaṃ, taṃ nissaṭṭhaṃ paṭilabhitvāpi aruādīni vā makkhetuṃ, ajjhoharituṃ vā na vaṭṭati. Padīpe kāḷavaṇṇe vā upanetabbaṃ, aññassa bhikkhuno kāyikaparibhogaṃ vaṭṭati. Yaṃ pana nirapekkho pariccajitvā puna labhati, taṃ ajjhoharitumpi vaṭṭati. Visuṃ ṭhapitasappiādīsu, ekabhājane vā amissitesu vatthugaṇanāya āpattiyo.
ஸாவத்தி²யங் ஸம்ப³ஹுலே பி⁴க்கூ² ஆரப்³ப⁴ ஸத்தாஹங் அதிக்கமனவத்து²ஸ்மிங் பஞ்ஞத்தங், ஸேஸங் சீவரவக்³க³ஸ்ஸ பட²மஸிக்கா²பதே³ வுத்தனயேனேவ வேதி³தப்³ப³ந்தி.
Sāvatthiyaṃ sambahule bhikkhū ārabbha sattāhaṃ atikkamanavatthusmiṃ paññattaṃ, sesaṃ cīvaravaggassa paṭhamasikkhāpade vuttanayeneva veditabbanti.
பே⁴ஸஜ்ஜஸிக்கா²பத³வண்ணனா நிட்டி²தா.
Bhesajjasikkhāpadavaṇṇanā niṭṭhitā.
4. வஸ்ஸிகஸாடிகஸிக்கா²பத³வண்ணனா
4. Vassikasāṭikasikkhāpadavaṇṇanā
சதுத்தே² மாஸோ ஸேஸோ கி³ம்ஹானந்தி சதுன்னங் கி³ம்ஹமாஸானங் ஏகோ பச்சி²மமாஸோ ஸேஸோ. பரியேஸிதப்³ப³ந்தி கி³ம்ஹானங் பச்சி²மமாஸஸ்ஸ பட²மதி³வஸதோ பட்டா²ய யாவ கத்திகமாஸஸ்ஸ பச்சி²மதி³வஸோ, தாவ ‘‘காலோ வஸ்ஸிகஸாடிகாயா’’திஆதி³னா ஸதுப்பாத³கரணேன, ஸங்க⁴ஸ்ஸ பவாரிதட்டா²னதோ, அத்தனோ ஞாதகப்பவாரிதட்டா²னதோ பன ‘‘தே³த² மே வஸ்ஸிகஸாடிகசீவர’’ந்திஆதி³காய விஞ்ஞத்தியாபி பரியேஸிதப்³ப³ங். அஞ்ஞாதகஅப்பவாரிதட்டா²னே ஸதுப்பாத³ங் கரொந்தஸ்ஸ வத்தபே⁴தே³ து³க்கடங், யதா² வா ததா² வா ‘‘தே³த² மே’’திஆதி³வசனேன விஞ்ஞாபெந்தஸ்ஸ அஞ்ஞாதகவிஞ்ஞத்திஸிக்கா²பதே³ன நிஸ்ஸக்³கி³யங் பாசித்தியங். கத்வா நிவாஸேதப்³ப³ந்தி கி³ம்ஹானங் பச்சி²மத்³த⁴மாஸஸ்ஸ பட²மதி³வஸதோ பட்டா²ய யாவ கத்திகமாஸஸ்ஸ பச்சி²மதி³வஸோ, தாவ ஸூசிகம்மனிட்டா²னேன ஸகிம்பி வண்ணபே⁴த³மத்தரஜனேன கப்பபி³ந்து³கரணேன ச கத்வா பரித³ஹிதப்³பா³. எத்தாவதா கி³ம்ஹானங் பச்சி²மோ மாஸோ பரியேஸனக்கெ²த்தங் , பச்சி²மோ அத்³த⁴மாஸோ கரணனிவாஸனக்கெ²த்தம்பி, வஸ்ஸானஸ்ஸ சதூஸு மாஸேஸு ஸப்³ப³ம்பி தங் வட்டதீதி அயமத்தோ² த³ஸ்ஸிதோ ஹோதி. யோ சாயங் கி³ம்ஹானங் பச்சி²மோ மாஸோ அனுஞ்ஞாதோ, எத்த² கதபரியேஸிதம்பி வஸ்ஸிகஸாடிகங் அதி⁴ட்டா²துங் ந வட்டதி. ஸசே தஸ்மிங் மாஸே அதிக்கந்தே வஸ்ஸங் உக்கட்³டி⁴யதி, புன மாஸபரிஹாரங் லப⁴தி, தோ⁴வித்வா பன நிக்கி²பித்வா வஸ்ஸூபனாயிகதி³வஸே அதி⁴ட்டா²தப்³பா³. ஸசே ஸதிஸம்மோஸேன வா அப்பஹோனகபா⁴வேன வா அகதா ஹோதி. தே ச த்³வே மாஸே வஸ்ஸானஸ்ஸ சதுமாஸந்தி ச² மாஸே பரிஹாரங் லப⁴தி. ஸசே பன கத்திகமாஸே கதி²னங் அத்த²ரியதி, அபரேபி சத்தாரோ மாஸே லப⁴தி, ஏவங் த³ஸ மாஸா ஹொந்தி. ததோ பரம்பி ஸதியா பச்சாஸாய தங் மூலசீவரங் கத்வா ட²பெந்தஸ்ஸ ஏகமாஸந்தி ஏவங் ஏகாத³ஸ மாஸே பரிஹாரங் லப⁴தி, இதோ பரங் ஏகாஹம்பி ந லப⁴தி.
Catutthe māso seso gimhānanti catunnaṃ gimhamāsānaṃ eko pacchimamāso seso. Pariyesitabbanti gimhānaṃ pacchimamāsassa paṭhamadivasato paṭṭhāya yāva kattikamāsassa pacchimadivaso, tāva ‘‘kālo vassikasāṭikāyā’’tiādinā satuppādakaraṇena, saṅghassa pavāritaṭṭhānato, attano ñātakappavāritaṭṭhānato pana ‘‘detha me vassikasāṭikacīvara’’ntiādikāya viññattiyāpi pariyesitabbaṃ. Aññātakaappavāritaṭṭhāne satuppādaṃ karontassa vattabhede dukkaṭaṃ, yathā vā tathā vā ‘‘detha me’’tiādivacanena viññāpentassa aññātakaviññattisikkhāpadena nissaggiyaṃ pācittiyaṃ. Katvā nivāsetabbanti gimhānaṃ pacchimaddhamāsassa paṭhamadivasato paṭṭhāya yāva kattikamāsassa pacchimadivaso, tāva sūcikammaniṭṭhānena sakimpi vaṇṇabhedamattarajanena kappabindukaraṇena ca katvā paridahitabbā. Ettāvatā gimhānaṃ pacchimo māso pariyesanakkhettaṃ , pacchimo addhamāso karaṇanivāsanakkhettampi, vassānassa catūsu māsesu sabbampi taṃ vaṭṭatīti ayamattho dassito hoti. Yo cāyaṃ gimhānaṃ pacchimo māso anuññāto, ettha katapariyesitampi vassikasāṭikaṃ adhiṭṭhātuṃ na vaṭṭati. Sace tasmiṃ māse atikkante vassaṃ ukkaḍḍhiyati, puna māsaparihāraṃ labhati, dhovitvā pana nikkhipitvā vassūpanāyikadivase adhiṭṭhātabbā. Sace satisammosena vā appahonakabhāvena vā akatā hoti. Te ca dve māse vassānassa catumāsanti cha māse parihāraṃ labhati. Sace pana kattikamāse kathinaṃ atthariyati, aparepi cattāro māse labhati, evaṃ dasa māsā honti. Tato parampi satiyā paccāsāya taṃ mūlacīvaraṃ katvā ṭhapentassa ekamāsanti evaṃ ekādasa māse parihāraṃ labhati, ito paraṃ ekāhampi na labhati.
ஓரேன சே மாஸோ ஸேஸோ கி³ம்ஹானந்தி கி³ம்ஹானங் பச்சி²மமாஸஸ்ஸ ஓரிமபா⁴கே³ யாவ ஹேமந்தஸ்ஸ பட²மதி³வஸோ, தாவாதி அத்தோ². பரியேஸெய்யாதி ஏதேஸு ஸத்தஸு பிட்டி²ஸமயமாஸேஸு அஞ்ஞாதகஅப்பவாரிதட்டா²னதோ ஸதுப்பாத³கரணேன பரியேஸந்தஸ்ஸ நிஸ்ஸக்³கி³யங் பாசித்தியங், விஞ்ஞாபெந்தஸ்ஸ அஞ்ஞாதகவிஞ்ஞத்திஸிக்கா²பதே³ன நிஸ்ஸக்³கி³யங் பாசித்தியங், ஞாதகப்பவாரிதே விஞ்ஞாபெந்தஸ்ஸ தேன ஸிக்கா²பதே³ன அனாபத்தி, ஸதுப்பாத³ங் கரொந்தஸ்ஸ இமினா ஸிக்கா²பதே³ன ஆபத்தி. ஓரேனத்³த⁴மாஸோ ஸேஸோ கி³ம்ஹானந்தி கி³ம்ஹானஸ்ஸ பச்சி²மத்³த⁴மாஸதோ ஓரிமபா⁴கே³ ஏகஸ்மிங் அத்³த⁴மாஸே. கத்வா நிவாஸெய்யாதி எத்த²ந்தரே த⁴ம்மேன உப்பன்னம்பி கத்வா நிவாஸெந்தஸ்ஸ நிஸ்ஸக்³கி³யங் ஹோதி.
Orena ce māsoseso gimhānanti gimhānaṃ pacchimamāsassa orimabhāge yāva hemantassa paṭhamadivaso, tāvāti attho. Pariyeseyyāti etesu sattasu piṭṭhisamayamāsesu aññātakaappavāritaṭṭhānato satuppādakaraṇena pariyesantassa nissaggiyaṃ pācittiyaṃ, viññāpentassa aññātakaviññattisikkhāpadena nissaggiyaṃ pācittiyaṃ, ñātakappavārite viññāpentassa tena sikkhāpadena anāpatti, satuppādaṃ karontassa iminā sikkhāpadena āpatti. Orenaddhamāso seso gimhānanti gimhānassa pacchimaddhamāsato orimabhāge ekasmiṃ addhamāse. Katvā nivāseyyāti etthantare dhammena uppannampi katvā nivāsentassa nissaggiyaṃ hoti.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ வஸ்ஸிகஸாடிகபரியேஸனவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, அனாணத்திகங், திகபாசித்தியங், ஊனகமாஸத்³த⁴மாஸேஸு அதிரேகஸஞ்ஞினோ வேமதிகஸ்ஸ வா து³க்கடங், ததா² ஸதியா வஸ்ஸிகஸாடிகாய நக்³க³ஸ்ஸ காயங் ஓவஸ்ஸாபயதோ. பொக்க²ரணியாதீ³ஸு பன ந்ஹாயந்தஸ்ஸ வா அச்சி²ன்னசீவரஸ்ஸ வா நட்ட²சீவரஸ்ஸ வா ‘‘அனிவத்த²ங் சோரா ஹரந்தீ’’தி ஏவங் ஆபதா³ஸு வா நிவாஸயதோ உம்மத்தகாதீ³னஞ்ச அனாபத்தி. எத்த² ச வஸ்ஸிகஸாடிகாய அத்துத்³தே³ஸிகதா, அஸமயே பரியேஸனதா, தாய ச படிலாபோ⁴தி இமானி தாவ பரியேஸனாபத்தியா தீணி அங்கா³னி . ஸசீவரதா, ஆபதா³பா⁴வோ, வஸ்ஸிகஸாடிகாய ஸகபா⁴வோ, அஸமயே நிவாஸனந்தி இமானி நிவாஸனாபத்தியா சத்தாரி அங்கா³னி. ஸமுட்டா²னாதீ³னி தோ⁴வாபனஸிக்கா²பதே³ வுத்தனயானேவாதி.
Sāvatthiyaṃ chabbaggiye bhikkhū ārabbha vassikasāṭikapariyesanavatthusmiṃ paññattaṃ, asādhāraṇapaññatti, anāṇattikaṃ, tikapācittiyaṃ, ūnakamāsaddhamāsesu atirekasaññino vematikassa vā dukkaṭaṃ, tathā satiyā vassikasāṭikāya naggassa kāyaṃ ovassāpayato. Pokkharaṇiyādīsu pana nhāyantassa vā acchinnacīvarassa vā naṭṭhacīvarassa vā ‘‘anivatthaṃ corā harantī’’ti evaṃ āpadāsu vā nivāsayato ummattakādīnañca anāpatti. Ettha ca vassikasāṭikāya attuddesikatā, asamaye pariyesanatā, tāya ca paṭilābhoti imāni tāva pariyesanāpattiyā tīṇi aṅgāni . Sacīvaratā, āpadābhāvo, vassikasāṭikāya sakabhāvo, asamaye nivāsananti imāni nivāsanāpattiyā cattāri aṅgāni. Samuṭṭhānādīni dhovāpanasikkhāpade vuttanayānevāti.
வஸ்ஸிகஸாடிகஸிக்கா²பத³வண்ணனா நிட்டி²தா.
Vassikasāṭikasikkhāpadavaṇṇanā niṭṭhitā.
5. சீவரஅச்சி²ந்த³னஸிக்கா²பத³வண்ணனா
5. Cīvaraacchindanasikkhāpadavaṇṇanā
பஞ்சமே ஸாமங் சீவரங் த³த்வாதி வெய்யாவச்சாதீ³னி பச்சாஸிஸமானோ ஸயமேவ த³த்வா. அச்சி²ந்தெ³ய்யாதி வெய்யாவச்சாதீ³னி அகரொந்தங் தி³ஸ்வா ஸகஸஞ்ஞாய அச்சி²ந்த³ந்தஸ்ஸ வத்து²க³ணனாய ஆபத்தியோ. அச்சி²ந்தா³பெய்யாதிஎத்த² பன ‘‘அச்சி²ந்தா³’’தி ஆணத்தியா து³க்கடங், அச்சி²ந்தே³ஸு யத்தகானி ஆணத்தானி, தேஸங் க³ணனாய ஆபத்தியோ.
Pañcame sāmaṃ cīvaraṃ datvāti veyyāvaccādīni paccāsisamāno sayameva datvā. Acchindeyyāti veyyāvaccādīni akarontaṃ disvā sakasaññāya acchindantassa vatthugaṇanāya āpattiyo. Acchindāpeyyātiettha pana ‘‘acchindā’’ti āṇattiyā dukkaṭaṃ, acchindesu yattakāni āṇattāni, tesaṃ gaṇanāya āpattiyo.
ஸாவத்தி²யங் உபனந்த³ங் ஆரப்³ப⁴ சீவரஅச்சி²ந்த³னவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, ஸாணத்திகங், திகபாசித்தியங். அனுபஸம்பன்னே உபஸம்பன்னஸஞ்ஞினோ, வேமதிகஸ்ஸ, அனுபஸம்பன்னஸஞ்ஞினோ வா, உபஸம்பன்னஸ்ஸாபி விகப்பனுபக³பச்சி²மசீவரங் ட²பெத்வா அஞ்ஞங் பரிக்கா²ரங், அனுபஸம்பன்னஸ்ஸ ச யங்கிஞ்சி அச்சி²ந்த³தோ வா து³க்கடங். தேன துட்டே²ன வா குபிதேன வா தி³ன்னங் பன தஸ்ஸ விஸ்ஸாஸங் வா க³ண்ஹந்தஸ்ஸ உம்மத்தகாதீ³னஞ்ச அனாபத்தி. விகப்பனுபக³பச்சி²மசீவரதா, ஸாமங் தி³ன்னதா, ஸகஸஞ்ஞிதா, உபஸம்பன்னதா, கோத⁴வஸேன அச்சி²ந்த³னங் வா அச்சி²ந்தா³பனங் வாதி இமானெத்த² பஞ்ச அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி அஞ்ஞத்ர வேத³னாய. வேத³னா பன இத⁴ து³க்க²வேத³னாயேவாதி.
Sāvatthiyaṃ upanandaṃ ārabbha cīvaraacchindanavatthusmiṃ paññattaṃ, sādhāraṇapaññatti, sāṇattikaṃ, tikapācittiyaṃ. Anupasampanne upasampannasaññino, vematikassa, anupasampannasaññino vā, upasampannassāpi vikappanupagapacchimacīvaraṃ ṭhapetvā aññaṃ parikkhāraṃ, anupasampannassa ca yaṃkiñci acchindato vā dukkaṭaṃ. Tena tuṭṭhena vā kupitena vā dinnaṃ pana tassa vissāsaṃ vā gaṇhantassa ummattakādīnañca anāpatti. Vikappanupagapacchimacīvaratā, sāmaṃ dinnatā, sakasaññitā, upasampannatā, kodhavasena acchindanaṃ vā acchindāpanaṃ vāti imānettha pañca aṅgāni. Samuṭṭhānādīni adinnādānasadisāni aññatra vedanāya. Vedanā pana idha dukkhavedanāyevāti.
சீவரஅச்சி²ந்த³னஸிக்கா²பத³வண்ணனா நிட்டி²தா.
Cīvaraacchindanasikkhāpadavaṇṇanā niṭṭhitā.
6. ஸுத்தவிஞ்ஞத்திஸிக்கா²பத³வண்ணனா
6. Suttaviññattisikkhāpadavaṇṇanā
ச²ட்டே² ஸுத்தந்தி ச²ப்³பி³த⁴ங் கோ²மஸுத்தாதி³ங் வா தேஸங் அனுலோமங் வா. விஞ்ஞாபெத்வாதி சீவரத்தா²ய யாசித்வா. வாயாபெய்யாதி ‘‘சீவரங் மே, ஆவுஸோ, வாயதா²’’தி அகப்பியாய விஞ்ஞத்தியா வாயாபெய்ய. நிஸ்ஸக்³கி³யந்தி ஏவங் வாயாபெந்தஸ்ஸ யோ தந்தவாயோ சீவரவாயனத்த²ங் துரிவேமஸஜ்ஜனாதி³கே பயோகே³ கரோதி, தஸ்ஸ ஸப்³ப³ப்பயோகே³ஸு து³க்கடங், படிலாபே⁴ன நிஸ்ஸக்³கி³யங் ஹோதி.
Chaṭṭhe suttanti chabbidhaṃ khomasuttādiṃ vā tesaṃ anulomaṃ vā. Viññāpetvāti cīvaratthāya yācitvā. Vāyāpeyyāti ‘‘cīvaraṃ me, āvuso, vāyathā’’ti akappiyāya viññattiyā vāyāpeyya. Nissaggiyanti evaṃ vāyāpentassa yo tantavāyo cīvaravāyanatthaṃ turivemasajjanādike payoge karoti, tassa sabbappayogesu dukkaṭaṃ, paṭilābhena nissaggiyaṃ hoti.
ராஜக³ஹே ச²ப்³ப³க்³கி³யே பி⁴க்கூ² ஆரப்³ப⁴ சீவரவாயாபனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், விஞ்ஞாபிதஸுத்தங் விஞ்ஞாபிததந்தவாயேன வாயாபெந்தஸ்ஸ தீ³க⁴தோ வித³த்தி²மத்தே திரியஞ்ச ஹத்த²மத்தே வீதே நிஸ்ஸக்³கி³யங் பாசித்தியங். இதி யாவ சீவரங் வட்³ட⁴தி, தாவ இமினா பமாணேன ஆபத்தியோ வட்³ட⁴ந்தி. தேனேவ பன அவிஞ்ஞத்தியா லத்³த⁴ஸுத்தங் வாயாபெந்தஸ்ஸ யதா² புப்³பே³ நிஸ்ஸக்³கி³யங் , ஏவங் இத⁴ து³க்கடங். தேனேவ விஞ்ஞத்தஞ்ச அவிஞ்ஞத்தஞ்ச வாயாபெந்தஸ்ஸ ஸசே வுத்தப்பமாணேன கேதா³ரப³த்³த⁴ங் விய சீவரங் ஹோதி, அகப்பியஸுத்தமயே பரிச்சே²தே³ பாசித்தியங், இதரஸ்மிங் ததே²வ து³க்கடங். ததோ சே ஊனதரா பரிச்சே²தா³, ஸப்³ப³பரிச்சே²தே³ஸு து³க்கடானேவ. அத² ஏகந்தரிகேன வா ஸுத்தேன தீ³க⁴தோ வா கப்பியங் திரியங் அகப்பியங் கத்வா வீதங் ஹோதி, புப்³பே³ வுத்தப்பமாணக³ணனாய து³க்கடானி. ஏதேனேவ உபாயேன கப்பியதந்தவாயேன அகப்பியஸுத்தே, கப்பியாகப்பியேஹி தந்தவாயேஹி ஸுத்தேபி கப்பியே அகப்பியே கப்பியாகப்பியே ச ஆபத்திபே⁴தோ³ வேதி³தப்³போ³. திகபாசித்தியங், அவாயாபிதே வாயாபிதஸஞ்ஞினோ வேமதிகஸ்ஸ வா து³க்கடங். சீவரஸிப்³ப³னஆயோக³காயப³ந்த⁴னஅங்ஸப³த்³த⁴கபத்தத்த²விகபரிஸ்ஸாவனானங் அத்தா²ய ஸுத்தங் விஞ்ஞாபெந்தஸ்ஸ, ஞாதகப்பவாரிதேஹி கப்பியஸுத்தங் வாயாபெந்தஸ்ஸ, அஞ்ஞஸ்ஸத்தா²ய, அத்தனோ த⁴னேன, உம்மத்தகாதீ³னஞ்ச அனாபத்தி, சீவரத்தா²ய விஞ்ஞாபிதஸுத்தங், அத்துத்³தே³ஸிகதா, அகப்பியதந்தவாயேன அகப்பியவிஞ்ஞத்தியா வாயாபனந்தி இமானெத்த² தீணி அங்கா³னி. ஸமுட்டா²னாதீ³னி தோ⁴வாபனஸிக்கா²பதே³ வுத்தனயானேவாதி.
Rājagahe chabbaggiye bhikkhū ārabbha cīvaravāyāpanavatthusmiṃ paññattaṃ, sādhāraṇapaññatti, anāṇattikaṃ, viññāpitasuttaṃ viññāpitatantavāyena vāyāpentassa dīghato vidatthimatte tiriyañca hatthamatte vīte nissaggiyaṃ pācittiyaṃ. Iti yāva cīvaraṃ vaḍḍhati, tāva iminā pamāṇena āpattiyo vaḍḍhanti. Teneva pana aviññattiyā laddhasuttaṃ vāyāpentassa yathā pubbe nissaggiyaṃ , evaṃ idha dukkaṭaṃ. Teneva viññattañca aviññattañca vāyāpentassa sace vuttappamāṇena kedārabaddhaṃ viya cīvaraṃ hoti, akappiyasuttamaye paricchede pācittiyaṃ, itarasmiṃ tatheva dukkaṭaṃ. Tato ce ūnatarā paricchedā, sabbaparicchedesu dukkaṭāneva. Atha ekantarikena vā suttena dīghato vā kappiyaṃ tiriyaṃ akappiyaṃ katvā vītaṃ hoti, pubbe vuttappamāṇagaṇanāya dukkaṭāni. Eteneva upāyena kappiyatantavāyena akappiyasutte, kappiyākappiyehi tantavāyehi suttepi kappiye akappiye kappiyākappiye ca āpattibhedo veditabbo. Tikapācittiyaṃ, avāyāpite vāyāpitasaññino vematikassa vā dukkaṭaṃ. Cīvarasibbanaāyogakāyabandhanaaṃsabaddhakapattatthavikaparissāvanānaṃ atthāya suttaṃ viññāpentassa, ñātakappavāritehi kappiyasuttaṃ vāyāpentassa, aññassatthāya, attano dhanena, ummattakādīnañca anāpatti, cīvaratthāya viññāpitasuttaṃ, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni. Samuṭṭhānādīni dhovāpanasikkhāpade vuttanayānevāti.
ஸுத்தவிஞ்ஞத்திஸிக்கா²பத³வண்ணனா நிட்டி²தா.
Suttaviññattisikkhāpadavaṇṇanā niṭṭhitā.
7. மஹாபேஸகாரஸிக்கா²பத³வண்ணனா
7. Mahāpesakārasikkhāpadavaṇṇanā
ஸத்தமே தத்ர சே ஸோ பி⁴க்கூ²தி யத்ர கா³மே வா நிக³மே வா தந்தவாயா, தத்ர. புப்³பே³ அப்பவாரிதோதி சீவரஸாமிகேஹி அப்பவாரிதோ ஹுத்வா . விகப்பங் ஆபஜ்ஜெய்யாதி விஸிட்ட²கப்பங் அதி⁴கவிதா⁴னங் ஆபஜ்ஜெய்ய. இதா³னி யேனாகாரேன விகப்பங் ஆபன்னோ ஹோதி, தங் த³ஸ்ஸேதுங் இத³ங் கோ², ஆவுஸோதிஆதி³ வுத்தங். தத்த² ஆயதந்தி தீ³க⁴ங். வித்த²தந்தி புது²லங். அப்பிதந்தி க⁴னங். ஸுவீதந்தி ஸுட்டு² வீதங், ஸப்³ப³ட்டா²னேஸு ஸமங் கத்வா வீதங். ஸுப்பவாயிதந்தி ஸுட்டு² பவாயிதங், ஸப்³ப³ட்டா²னேஸு ஸமங் கத்வா தந்தே பஸாரிதங். ஸுவிலேகி²தந்தி லேக²னியா ஸுட்டு² விலேகி²தங். ஸுவிதச்சி²தந்தி கொச்சே²ன ஸுட்டு² விதச்சி²தங், ஸுட்டு² நித்³தோ⁴தந்தி அத்தோ². பிண்ட³பாதமத்தம்பீதி எத்த² ச ந பி⁴க்கு²னோ பிண்ட³பாததா³னமத்தேன தங் நிஸ்ஸக்³கி³யங் ஹோதி, ஸசே பன தே தஸ்ஸ வசனேன சீவரஸாமிகானங் ஹத்த²தோ ஸுத்தங் க³ஹெத்வா ஈஸகம்பி ஆயதங் வா வித்த²தங் வா அப்பிதங் வா கரொந்தி, அத² தேஸங் பயோகே³ பி⁴க்கு²னோ து³க்கடங், படிலாபே⁴ன நிஸ்ஸக்³கி³யங் ஹோதி.
Sattame tatra ce so bhikkhūti yatra gāme vā nigame vā tantavāyā, tatra. Pubbe appavāritoti cīvarasāmikehi appavārito hutvā . Vikappaṃ āpajjeyyāti visiṭṭhakappaṃ adhikavidhānaṃ āpajjeyya. Idāni yenākārena vikappaṃ āpanno hoti, taṃ dassetuṃ idaṃ kho, āvusotiādi vuttaṃ. Tattha āyatanti dīghaṃ. Vitthatanti puthulaṃ. Appitanti ghanaṃ. Suvītanti suṭṭhu vītaṃ, sabbaṭṭhānesu samaṃ katvā vītaṃ. Suppavāyitanti suṭṭhu pavāyitaṃ, sabbaṭṭhānesu samaṃ katvā tante pasāritaṃ. Suvilekhitanti lekhaniyā suṭṭhu vilekhitaṃ. Suvitacchitanti kocchena suṭṭhu vitacchitaṃ, suṭṭhu niddhotanti attho. Piṇḍapātamattampīti ettha ca na bhikkhuno piṇḍapātadānamattena taṃ nissaggiyaṃ hoti, sace pana te tassa vacanena cīvarasāmikānaṃ hatthato suttaṃ gahetvā īsakampi āyataṃ vā vitthataṃ vā appitaṃ vā karonti, atha tesaṃ payoge bhikkhuno dukkaṭaṃ, paṭilābhena nissaggiyaṃ hoti.
ஸாவத்தி²யங் உபனந்த³ங் ஆரப்³ப⁴ சீவரே விகப்பங் ஆபஜ்ஜனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங், ஞாதகே அஞ்ஞாதகஸஞ்ஞினோ வேமதிகஸ்ஸ வா து³க்கடங். ஞாதகப்பவாரிதானங் தந்தவாயேஹி, அஞ்ஞஸ்ஸ வா அத்தா²ய, அத்தனோ வா த⁴னேன, மஹக்³க⁴ங் வாயாபேதுகாமங் அப்பக்³க⁴ங் வாயாபெந்தஸ்ஸ, உம்மத்தகாதீ³னஞ்ச அனாபத்தி. அஞ்ஞாதகஅப்பவாரிதானங் தந்தவாயே உபஸங்கமித்வா விகப்பமாபஜ்ஜனதா, சீவரஸ்ஸ அத்துத்³தே³ஸிகதா, தஸ்ஸ வசனேன ஸுத்தவட்³ட⁴னங், சீவரப்படிலாபோ⁴தி இமானெத்த² சத்தாரி அங்கா³னி. ஸமுட்டா²னாதீ³னி தோ⁴வாபனஸிக்கா²பதே³ வுத்தனயானேவாதி.
Sāvatthiyaṃ upanandaṃ ārabbha cīvare vikappaṃ āpajjanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, ñātake aññātakasaññino vematikassa vā dukkaṭaṃ. Ñātakappavāritānaṃ tantavāyehi, aññassa vā atthāya, attano vā dhanena, mahagghaṃ vāyāpetukāmaṃ appagghaṃ vāyāpentassa, ummattakādīnañca anāpatti. Aññātakaappavāritānaṃ tantavāye upasaṅkamitvā vikappamāpajjanatā, cīvarassa attuddesikatā, tassa vacanena suttavaḍḍhanaṃ, cīvarappaṭilābhoti imānettha cattāri aṅgāni. Samuṭṭhānādīni dhovāpanasikkhāpade vuttanayānevāti.
மஹாபேஸகாரஸிக்கா²பத³வண்ணனா நிட்டி²தா.
Mahāpesakārasikkhāpadavaṇṇanā niṭṭhitā.
8. அச்சேகசீவரஸிக்கா²பத³வண்ணனா
8. Accekacīvarasikkhāpadavaṇṇanā
அட்ட²மே த³ஸாஹானாக³தந்தி த³ஸ அஹானி த³ஸாஹங், தேன த³ஸாஹேன அனாக³தா த³ஸாஹானாக³தா, த³ஸாஹேன அஸம்பத்தாதி அத்தோ², தங் த³ஸாஹானாக³தங், அச்சந்தஸங்யோக³வஸேன பு⁴ம்மத்தே² உபயோக³வசனங். கத்திகதேமாஸிகபுண்ணமந்தி பட²மகத்திகபுண்ணமங், இதா⁴பி பட²மபத³ஸ்ஸ அனுபயோக³தா புரிமனயேனேவ பு⁴ம்மத்தே² உபயோக³வசனங். இத³ங் வுத்தங் ஹோதி – யதோ பட்டா²ய பட²மப்பவாரணா ‘‘த³ஸாஹானாக³தா’’தி வுச்சதி, ஸசேபி தானி தி³வஸானி அச்சந்தமேவ பி⁴க்கு²னோ அச்சேகசீவரங் உப்பஜ்ஜெய்ய, ‘‘அச்சேகங் இத³’’ந்தி ஜானமானேன பி⁴க்கு²னா ஸப்³ப³ம்பி படிக்³க³ஹேதப்³ப³ந்தி. தேன பவாரணாமாஸஸ்ஸ ஜுண்ஹபக்க²பஞ்சமிதோ பட்டா²ய உப்பன்னஸ்ஸ சீவரஸ்ஸ நிதா⁴னகாலோ த³ஸ்ஸிதோ ஹோதி. காமஞ்சேஸ ‘‘த³ஸாஹபரமங் அதிரேகசீவரங் தா⁴ரேதப்³ப³’’ந்திஇமினாவ ஸித்³தோ⁴, அட்டு²ப்பத்திவஸேன பன அபுப்³ப³ங் விய அத்த²ங் த³ஸ்ஸெத்வா ஸிக்கா²பத³ங் ட²பிதங். அச்சேகசீவரந்தி க³மிககி³லானக³ப்³பி⁴னிஅபி⁴னவுப்பன்னஸத்³தா⁴னங் புக்³க³லானங் அஞ்ஞதரேன ‘‘வஸ்ஸாவாஸிகங் த³ஸ்ஸாமீ’’தி ஏவங் ஆரோசெத்வா தி³ன்னங். ஸசே தங் புரே பவாரணாய விப⁴ஜிதங், யேன க³ஹிதங், தேன வஸ்ஸச்சே²தோ³ ந காதப்³போ³, கரோதி சே, தங் சீவரங் ஸங்கி⁴கங் ஹோதி. யாவ சீவரகாலஸமயந்தி அனத்த²தே கதி²னே யாவ வஸ்ஸானஸ்ஸ பச்சி²மோ மாஸோ, அத்த²தே கதி²னே யாவ பஞ்ச மாஸா, தாவ நிக்கி²பிதப்³ப³ங்.
Aṭṭhame dasāhānāgatanti dasa ahāni dasāhaṃ, tena dasāhena anāgatā dasāhānāgatā, dasāhena asampattāti attho, taṃ dasāhānāgataṃ, accantasaṃyogavasena bhummatthe upayogavacanaṃ. Kattikatemāsikapuṇṇamanti paṭhamakattikapuṇṇamaṃ, idhāpi paṭhamapadassa anupayogatā purimanayeneva bhummatthe upayogavacanaṃ. Idaṃ vuttaṃ hoti – yato paṭṭhāya paṭhamappavāraṇā ‘‘dasāhānāgatā’’ti vuccati, sacepi tāni divasāni accantameva bhikkhuno accekacīvaraṃ uppajjeyya, ‘‘accekaṃ ida’’nti jānamānena bhikkhunā sabbampi paṭiggahetabbanti. Tena pavāraṇāmāsassa juṇhapakkhapañcamito paṭṭhāya uppannassa cīvarassa nidhānakālo dassito hoti. Kāmañcesa ‘‘dasāhaparamaṃ atirekacīvaraṃ dhāretabba’’ntiimināva siddho, aṭṭhuppattivasena pana apubbaṃ viya atthaṃ dassetvā sikkhāpadaṃ ṭhapitaṃ. Accekacīvaranti gamikagilānagabbhiniabhinavuppannasaddhānaṃ puggalānaṃ aññatarena ‘‘vassāvāsikaṃ dassāmī’’ti evaṃ ārocetvā dinnaṃ. Sace taṃ pure pavāraṇāya vibhajitaṃ, yena gahitaṃ, tena vassacchedo na kātabbo, karoti ce, taṃ cīvaraṃ saṅghikaṃ hoti. Yāva cīvarakālasamayanti anatthate kathine yāva vassānassa pacchimo māso, atthate kathine yāva pañca māsā, tāva nikkhipitabbaṃ.
ஸாவத்தி²யங் ஸம்ப³ஹுலே பி⁴க்கூ² ஆரப்³ப⁴ அச்சேகசீவரஸ்ஸ சீவரகாலஸமயங் அதிக்கமனவத்து²ஸ்மிங் பஞ்ஞத்தங், ஸேஸமெத்த² சீவரவக்³க³ஸ்ஸ பட²மஸிக்கா²பதே³ வுத்தனயேனேவ வேதி³தப்³ப³ந்தி.
Sāvatthiyaṃ sambahule bhikkhū ārabbha accekacīvarassa cīvarakālasamayaṃ atikkamanavatthusmiṃ paññattaṃ, sesamettha cīvaravaggassa paṭhamasikkhāpade vuttanayeneva veditabbanti.
அச்சேகசீவரஸிக்கா²பத³வண்ணனா நிட்டி²தா.
Accekacīvarasikkhāpadavaṇṇanā niṭṭhitā.
9. ஸாஸங்கஸிக்கா²பத³வண்ணனா
9. Sāsaṅkasikkhāpadavaṇṇanā
நவமே உபவஸ்ஸங் கோ² பனாதி எத்த² உபவஸ்ஸந்தி உபவஸ்ஸ, உபவஸித்வாதி வுத்தங் ஹோதி, உபஸம்பஜ்ஜந்திஆதீ³ஸு (விப⁴॰ 570) விய ஹெத்த² அனுனாஸிகோ த³ட்ட²ப்³போ³, வஸ்ஸங் உபக³ந்த்வா வஸித்வா சாதி அத்தோ². இமஸ்ஸ ச பத³ஸ்ஸ ‘‘ததா²ரூபேஸு பி⁴க்கு² ஸேனாஸனேஸு விஹரந்தோ’’திஇமினா ஸம்ப³ந்தோ⁴, இத³ங் வுத்தங் ஹோதி – வஸ்ஸங் உபக³ந்த்வா வஸித்வா ச ததோ பரங் பச்சி²மகத்திகபுண்ணமபரியோஸானகாலங் யானி கோ² பன தானி ஆரஞ்ஞகானி…பே॰… அந்தரக⁴ரே நிக்கி²பெய்யாதி. தத்த² ஆரஞ்ஞகானீதி ஸப்³ப³பச்சி²மானி ஆரோபிதேன ஆசரியத⁴னுனா கா³மஸ்ஸ இந்த³கீ²லதோ பட்டா²ய பஞ்சத⁴னுஸதப்பமாணே பதே³ஸே கதஸேனாஸனானி. ஸசே பன அபரிக்கி²த்தோ கா³மோ ஹோதி, பரிக்கே²பாரஹட்டா²னதோ பட்டா²ய மினேதப்³ப³ங். ஸசே விஹாரஸ்ஸ பரிக்கே²போ வா அபரிக்கி²த்தஸ்ஸ யங் கா³மதோ ஸப்³ப³பட²மங் ஸேனாஸனங் வா சேதியங் வா போ³தி⁴ வா து⁴வஸன்னிபாதட்டா²னங் வா யாவ , தங் தாவ பகதிமக்³கே³ன மினேதப்³ப³ங், அஞ்ஞங் மக்³க³ங் காதுங், அமக்³கே³ன வா மினேதுங் ந வட்டதி. ஸாஸங்கஸம்மதானீதி சோராதீ³னங் நிவிட்டோ²காஸாதி³த³ஸ்ஸனேன ‘‘ஸாஸங்கானீ’’தி ஸம்மதானி, ஏவங் ஸஞ்ஞாதானீதி அத்தோ². ஸஹ படிப⁴யேன ஸப்படிப⁴யானி, சோரேஹி மனுஸ்ஸானங் ஹதவிலுத்தாகோடிதபா⁴வத³ஸ்ஸனதோ ஸன்னிஹிதப³லவப⁴யானீதி அத்தோ².
Navame upavassaṃ kho panāti ettha upavassanti upavassa, upavasitvāti vuttaṃ hoti, upasampajjantiādīsu (vibha. 570) viya hettha anunāsiko daṭṭhabbo, vassaṃ upagantvā vasitvā cāti attho. Imassa ca padassa ‘‘tathārūpesu bhikkhu senāsanesu viharanto’’tiiminā sambandho, idaṃ vuttaṃ hoti – vassaṃ upagantvā vasitvā ca tato paraṃ pacchimakattikapuṇṇamapariyosānakālaṃ yāni kho pana tāni āraññakāni…pe… antaraghare nikkhipeyyāti. Tattha āraññakānīti sabbapacchimāni āropitena ācariyadhanunā gāmassa indakhīlato paṭṭhāya pañcadhanusatappamāṇe padese katasenāsanāni. Sace pana aparikkhitto gāmo hoti, parikkhepārahaṭṭhānato paṭṭhāya minetabbaṃ. Sace vihārassa parikkhepo vā aparikkhittassa yaṃ gāmato sabbapaṭhamaṃ senāsanaṃ vā cetiyaṃ vā bodhi vā dhuvasannipātaṭṭhānaṃ vā yāva , taṃ tāva pakatimaggena minetabbaṃ, aññaṃ maggaṃ kātuṃ, amaggena vā minetuṃ na vaṭṭati. Sāsaṅkasammatānīti corādīnaṃ niviṭṭhokāsādidassanena ‘‘sāsaṅkānī’’ti sammatāni, evaṃ saññātānīti attho. Saha paṭibhayena sappaṭibhayāni, corehi manussānaṃ hataviluttākoṭitabhāvadassanato sannihitabalavabhayānīti attho.
அந்தரக⁴ரே நிக்கி²பெய்யாதி ஆரஞ்ஞகஸ்ஸ ஸேனாஸனஸ்ஸ ஸமந்தா ஸப்³ப³தி³ஸாபா⁴கே³ஸு அத்தனா அபி⁴ருசிதே கோ³சரகா³மே நிக்கி²பெய்ய. தஞ்ச கோ² ஸதியா அங்க³ஸம்பத்தியா, தத்ராயங் அங்க³ஸம்பத்தி – புரிமிகாய உபக³ந்த்வா மஹாபவாரணாய பவாரிதோ ஹோதி, இத³மேகங் அங்க³ங். கத்திகமாஸோயேவ ஹோதி, இத³ங் து³தியங் அங்க³ங். பஞ்சத⁴னுஸதிகபச்சி²மப்பமாணயுத்தங் ஸேனாஸனங் ஹோதி, இத³ங் ததியங் அங்க³ங். ஊனப்பமாணே வா கா³வுததோ அதிரேகப்பமாணே வா ந லப⁴தி, யத்ர ஹி பிண்டா³ய சரித்வா பு⁴த்தவேலாயமேவ புன விஹாரங் ஸக்கா ஆக³ந்துங், ததே³வ இதா⁴தி⁴ப்பேதங். ஸாஸங்கஸப்படிப⁴யமேவ ஹோதி, இத³ங் சதுத்த²ங் அங்க³ங் ஹோதீதி. கோசிதே³வ பச்சயோதி கிஞ்சிதே³வ காரணங். தேன சீவரேனாதி தேன அந்தரக⁴ரே நிக்கி²த்தசீவரேன. விப்பவாஸாயாதி வியோக³வாஸாய. ததோ சே உத்தரி விப்பவஸெய்யாதி சா²ரத்ததோ உத்தரி தஸ்மிங் ஸேனாஸனே ஸத்தமங் அருணங் உட்டா²பெய்யாதி அத்தோ², ததா² அஸக்கொந்தேன பன கா³மஸீமங் ஓக்கமித்வா ஸபா⁴யங் வா யத்த² கத்த²சி வா வஸித்வா சீவரப்பவத்திங் ஞத்வா பக்கமிதுங் வட்டதி. அஞ்ஞத்ர பி⁴க்கு²ஸம்முதியாதி யங் ஸங்கோ⁴ கி³லானஸ்ஸ பி⁴க்கு²னோ சீவரேன விப்பவாஸஸம்முதிங் தே³தி, தங் ட²பெத்வா அலத்³த⁴ஸம்முதிகஸ்ஸ அதிரேகசா²ரத்தங் விப்பவஸதோ நிஸ்ஸக்³கி³யங் ஹோதி.
Antaraghare nikkhipeyyāti āraññakassa senāsanassa samantā sabbadisābhāgesu attanā abhirucite gocaragāme nikkhipeyya. Tañca kho satiyā aṅgasampattiyā, tatrāyaṃ aṅgasampatti – purimikāya upagantvā mahāpavāraṇāya pavārito hoti, idamekaṃ aṅgaṃ. Kattikamāsoyeva hoti, idaṃ dutiyaṃ aṅgaṃ. Pañcadhanusatikapacchimappamāṇayuttaṃ senāsanaṃ hoti, idaṃ tatiyaṃ aṅgaṃ. Ūnappamāṇe vā gāvutato atirekappamāṇe vā na labhati, yatra hi piṇḍāya caritvā bhuttavelāyameva puna vihāraṃ sakkā āgantuṃ, tadeva idhādhippetaṃ. Sāsaṅkasappaṭibhayameva hoti, idaṃ catutthaṃ aṅgaṃ hotīti. Kocideva paccayoti kiñcideva kāraṇaṃ. Tena cīvarenāti tena antaraghare nikkhittacīvarena. Vippavāsāyāti viyogavāsāya. Tato ce uttari vippavaseyyāti chārattato uttari tasmiṃ senāsane sattamaṃ aruṇaṃ uṭṭhāpeyyāti attho, tathā asakkontena pana gāmasīmaṃ okkamitvā sabhāyaṃ vā yattha katthaci vā vasitvā cīvarappavattiṃ ñatvā pakkamituṃ vaṭṭati. Aññatra bhikkhusammutiyāti yaṃ saṅgho gilānassa bhikkhuno cīvarena vippavāsasammutiṃ deti, taṃ ṭhapetvā aladdhasammutikassa atirekachārattaṃ vippavasato nissaggiyaṃ hoti.
ஸாவத்தி²யங் ஸம்ப³ஹுலே பி⁴க்கூ² ஆரப்³ப⁴ சீவரவிப்பவாஸவத்து²ஸ்மிங் பஞ்ஞத்தங், ஸேஸமெத்த² சீவரவக்³க³ஸ்ஸ து³தியஸிக்கா²பதே³ வுத்தனயேனேவ வேதி³தப்³ப³ந்தி.
Sāvatthiyaṃ sambahule bhikkhū ārabbha cīvaravippavāsavatthusmiṃ paññattaṃ, sesamettha cīvaravaggassa dutiyasikkhāpade vuttanayeneva veditabbanti.
ஸாஸங்கஸிக்கா²பத³வண்ணனா நிட்டி²தா.
Sāsaṅkasikkhāpadavaṇṇanā niṭṭhitā.
10. பரிணதஸிக்கா²பத³வண்ணனா
10. Pariṇatasikkhāpadavaṇṇanā
த³ஸமே ஸங்கி⁴கந்தி ஸங்க⁴ஸ்ஸ ஸந்தகங். ஸோ ஹி ஸங்க⁴ஸ்ஸ பரிணதத்தா ஹத்தே² அனாருள்ஹோபி ஏகேன பரியாயேன ஸங்க⁴ஸந்தகோ ஹோதி. லாப⁴ந்தி லபி⁴தப்³ப³ங் சீவராதி³வத்து²ங். பரிணதந்தி ‘‘த³ஸ்ஸாம கரிஸ்ஸாமா’’தி வசீபே⁴தே³ன வா ஹத்த²முத்³தா³ய வா ஸங்க⁴ஸ்ஸ நின்னங் ஹுத்வா டி²தங். அத்தனோ பரிணாமெய்யாதி ‘‘இத³ங் மய்ஹங் தே³தா²’’திஆதீ³னி வத³ந்தோ அத்தனின்னங் கரெய்ய. ஸசே பன ஸங்க⁴ஸ்ஸ தி³ன்னங் ஹோதி, தங் க³ஹேதுங் ந வட்டதி, ஸங்க⁴ஸ்ஸேவ தா³தப்³ப³ங். பரிணதங் பன ஸஹத⁴ம்மிகானங் வா கி³ஹீனங் வா அந்தமஸோ மாதுஸந்தகம்பி அத்தனோ பரிணாமெந்தஸ்ஸ பயோகே³ து³க்கடங், படிலாபே⁴ன நிஸ்ஸக்³கி³யங் ஹோதி.
Dasame saṅghikanti saṅghassa santakaṃ. So hi saṅghassa pariṇatattā hatthe anāruḷhopi ekena pariyāyena saṅghasantako hoti. Lābhanti labhitabbaṃ cīvarādivatthuṃ. Pariṇatanti ‘‘dassāma karissāmā’’ti vacībhedena vā hatthamuddāya vā saṅghassa ninnaṃ hutvā ṭhitaṃ. Attano pariṇāmeyyāti ‘‘idaṃ mayhaṃ dethā’’tiādīni vadanto attaninnaṃ kareyya. Sace pana saṅghassa dinnaṃ hoti, taṃ gahetuṃ na vaṭṭati, saṅghasseva dātabbaṃ. Pariṇataṃ pana sahadhammikānaṃ vā gihīnaṃ vā antamaso mātusantakampi attano pariṇāmentassa payoge dukkaṭaṃ, paṭilābhena nissaggiyaṃ hoti.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ பரிணாமனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், பரிணதே வேமதிகஸ்ஸ, அபரிணதே பரிணதஸஞ்ஞினோ சேவ வேமதிகஸ்ஸ ச, ஸங்க⁴சேதியபுக்³க³லேஸு யஸ்ஸ கஸ்ஸசி பரிணதங் அஞ்ஞஸங்கா⁴தீ³னங் பரிணாமெந்தஸ்ஸ ச து³க்கடங். அபரிணதஸஞ்ஞினோ, ‘‘கத்த² தே³மா’’தி புச்சி²தே ‘‘யத்த² தும்ஹாகங் சித்தங் பஸீத³தி, தத்த² தே³த², தும்ஹாகங் தெ³ய்யத⁴ம்மோ பரிபோ⁴க³ங் வா லபெ⁴ய்யா’’திஆதீ³னி வத³ந்தஸ்ஸ, உம்மத்தகாதீ³னஞ்ச அனாபத்தி. ஸங்கே⁴ பரிணதபா⁴வோ, தங் ஞத்வா அத்தனோ பரிணாமனங், படிலாபோ⁴தி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.
Sāvatthiyaṃ chabbaggiye bhikkhū ārabbha pariṇāmanavatthusmiṃ paññattaṃ, sādhāraṇapaññatti, anāṇattikaṃ, pariṇate vematikassa, apariṇate pariṇatasaññino ceva vematikassa ca, saṅghacetiyapuggalesu yassa kassaci pariṇataṃ aññasaṅghādīnaṃ pariṇāmentassa ca dukkaṭaṃ. Apariṇatasaññino, ‘‘kattha demā’’ti pucchite ‘‘yattha tumhākaṃ cittaṃ pasīdati, tattha detha, tumhākaṃ deyyadhammo paribhogaṃ vā labheyyā’’tiādīni vadantassa, ummattakādīnañca anāpatti. Saṅghe pariṇatabhāvo, taṃ ñatvā attano pariṇāmanaṃ, paṭilābhoti imānettha tīṇi aṅgāni. Samuṭṭhānādīni adinnādānasadisānīti.
பரிணதஸிக்கா²பத³வண்ணனா நிட்டி²தா.
Pariṇatasikkhāpadavaṇṇanā niṭṭhitā.
பத்தவக்³கோ³ ததியோ.
Pattavaggo tatiyo.
இதி கங்கா²விதரணியா பாதிமொக்க²வண்ணனாய
Iti kaṅkhāvitaraṇiyā pātimokkhavaṇṇanāya
நிஸ்ஸக்³கி³யபாசித்தியவண்ணனா நிட்டி²தா.
Nissaggiyapācittiyavaṇṇanā niṭṭhitā.
