| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৩. পত্তৰগ্গো
3. Pattavaggo
১৬৪. অতিরেকপত্তং দসাহং অতিক্কামেন্তো একং আপত্তিং আপজ্জতি। নিস্সগ্গিযং পাচিত্তিযং।
164. Atirekapattaṃ dasāhaṃ atikkāmento ekaṃ āpattiṃ āpajjati. Nissaggiyaṃ pācittiyaṃ.
ঊনপঞ্চবন্ধনেন পত্তেন অঞ্ঞং নৰং পত্তং চেতাপেন্তো দ্ৰে আপত্তিযো আপজ্জতি। চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং।
Ūnapañcabandhanena pattena aññaṃ navaṃ pattaṃ cetāpento dve āpattiyo āpajjati. Cetāpeti, payoge dukkaṭaṃ; cetāpite nissaggiyaṃ pācittiyaṃ.
ভেসজ্জানি পটিগ্গহেত্ৰা সত্তাহং অতিক্কামেন্তো একং আপত্তিং আপজ্জতি। নিস্সগ্গিযং পাচিত্তিযং।
Bhesajjāni paṭiggahetvā sattāhaṃ atikkāmento ekaṃ āpattiṃ āpajjati. Nissaggiyaṃ pācittiyaṃ.
অতিরেকমাসে সেসে গিম্হানে ৰস্সিকসাটিকচীৰরং পরিযেসন্তো দ্ৰে আপত্তিযো আপজ্জতি। পরিযেসতি, পযোগে দুক্কটং; পরিযিট্ঠে নিস্সগ্গিযং পাচিত্তিযং।
Atirekamāse sese gimhāne vassikasāṭikacīvaraṃ pariyesanto dve āpattiyo āpajjati. Pariyesati, payoge dukkaṭaṃ; pariyiṭṭhe nissaggiyaṃ pācittiyaṃ.
ভিক্খুস্স সামং চীৰরং দত্ৰা কুপিতো অনত্তমনো অচ্ছিন্দন্তো দ্ৰে আপত্তিযো আপজ্জতি। অচ্ছিন্দতি, পযোগে দুক্কটং; অচ্ছিন্নে নিস্সগ্গিযং পাচিত্তিযং।
Bhikkhussa sāmaṃ cīvaraṃ datvā kupito anattamano acchindanto dve āpattiyo āpajjati. Acchindati, payoge dukkaṭaṃ; acchinne nissaggiyaṃ pācittiyaṃ.
সামং সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেন্তো দ্ৰে আপত্তিযো আপজ্জতি। ৰাযাপেতি, পযোগে দুক্কটং; ৰাযাপিতে নিস্সগ্গিযং পাচিত্তিযং।
Sāmaṃ suttaṃ viññāpetvā tantavāyehi cīvaraṃ vāyāpento dve āpattiyo āpajjati. Vāyāpeti, payoge dukkaṭaṃ; vāyāpite nissaggiyaṃ pācittiyaṃ.
পুব্বে অপ্পৰারিতো অঞ্ঞাতকস্স গহপতিকস্স তন্তৰাযে উপসঙ্কমিত্ৰা চীৰরে ৰিকপ্পং আপজ্জন্তো দ্ৰে আপত্তিযো আপজ্জতি। ৰিকপ্পং আপজ্জতি, পযোগে দুক্কটং; ৰিকপ্পং আপন্নে নিস্সগ্গিযং পাচিত্তিযং।
Pubbe appavārito aññātakassa gahapatikassa tantavāye upasaṅkamitvā cīvare vikappaṃ āpajjanto dve āpattiyo āpajjati. Vikappaṃ āpajjati, payoge dukkaṭaṃ; vikappaṃ āpanne nissaggiyaṃ pācittiyaṃ.
অচ্চেকচীৰরং পটিগ্গহেত্ৰা চীৰরকালসমযং অতিক্কামেন্তো একং আপত্তিং আপজ্জতি। নিস্সগ্গিযং পাচিত্তিযং।
Accekacīvaraṃ paṭiggahetvā cīvarakālasamayaṃ atikkāmento ekaṃ āpattiṃ āpajjati. Nissaggiyaṃ pācittiyaṃ.
তিণ্ণং চীৰরানং অঞ্ঞতরং চীৰরং অন্তরঘরে নিক্খিপিত্ৰা অতিরেকছারত্তং ৰিপ্পৰসন্তো একং আপত্তিং আপজ্জতি। নিস্সগ্গিযং পাচিত্তিযং।
Tiṇṇaṃ cīvarānaṃ aññataraṃ cīvaraṃ antaraghare nikkhipitvā atirekachārattaṃ vippavasanto ekaṃ āpattiṃ āpajjati. Nissaggiyaṃ pācittiyaṃ.
জানং সঙ্ঘিকং লাভং পরিণতং অত্তনো পরিণামেন্তো দ্ৰে আপত্তিযো আপজ্জতি। পরিণামেতি, পযোগে দুক্কটং; পরিণামিতে নিস্সগ্গিযং পাচিত্তিযং।
Jānaṃ saṅghikaṃ lābhaṃ pariṇataṃ attano pariṇāmento dve āpattiyo āpajjati. Pariṇāmeti, payoge dukkaṭaṃ; pariṇāmite nissaggiyaṃ pācittiyaṃ.
পত্তৰগ্গো ততিযো।
Pattavaggo tatiyo.
তিংস নিস্সগ্গিযা পাচিত্তিযা নিট্ঠিতা।
Tiṃsa nissaggiyā pācittiyā niṭṭhitā.
