| Library / Tipiṭaka / д̇ибидага • Tipiṭaka / д̣̇взмаад̇игаабаал̣и • Dvemātikāpāḷi |
3. бад̇д̇аваг̇г̇о
3. Pattavaggo
1. бад̇д̇асигкаабад̣̇аван̣н̣анаа
1. Pattasikkhāpadavaṇṇanā
бад̇д̇аваг̇г̇асса батамз ад̇ирзгабад̇д̇од̇и анад̇хидтид̇о жа авигаббид̇о жа, со жа ко уггадтамаж̇жхимомагаанам̣ ан̃н̃ад̇аро бамаан̣аяуд̇д̇ова, д̇асса бамаан̣ам̣ ‘‘ад̣дхаал̣хагод̣̇анам̣ г̇ан̣хаад̇ий’’д̇иаад̣̇инаа (баараа 602) наязна баал̣ияам̣ вуд̇д̇ам̣. д̇ад̇рааяам̣ винижчаяо – анубахад̇абураан̣асаалид̇ан̣д̣улаанам̣ сугоддид̇абарисуд̣̇д̇хаанам̣ д̣̇вз маг̇ад̇ханаал̣ияо г̇ахзд̇ваа д̇зхи д̇ан̣д̣улзхи ануд̇д̇ан̣д̣уламагилиннамабин̣д̣игам̣ сувисад̣̇ам̣ гунд̣̇амагул̣араасисад̣̇исам̣ авассаавид̇од̣̇анам̣ бажид̇ваа ниравасзсам̣ бад̇д̇з багкибид̇ваа д̇асса од̣̇анасса жад̇уд̇т̇абхааг̇аббамаан̣о наад̇игхано наад̇ид̇ануго хад̇т̇ахаарияо саб̣б̣асамбхаарасан̇кад̇о муг̇г̇асуубо багкибид̇аб̣б̣о, д̇ад̇о аалобасса ануруубам̣ яааважаримаалобаббахонагам̣ мажчамам̣саад̣̇иб̣яан̃ж̇анам̣ багкибид̇аб̣б̣ам̣, саббид̇злад̇аггарасаган̃ж̇ияаад̣̇ийни бана г̇ан̣ануубаг̇аани на хонд̇и. д̇аани хи од̣̇анаг̇ад̇игаанзва, нзва хаабзд̇ум̣, на вад̣дхзд̇ум̣ саггонд̇и, звамзд̇ам̣ саб̣б̣амби багкид̇д̇ам̣ сажз бад̇д̇асса мукаваддияаа хздтимарааж̇исамам̣ д̇идтад̇и, суд̇д̇зна ваа хийрзна ваа чинд̣̇анд̇асса суд̇д̇асса ваа хийрасса ваа хздтиманд̇ам̣ пусад̇и, аяам̣ уггадто наама бад̇д̇о. сажз д̇ам̣ рааж̇им̣ ад̇иггамма т̇уубийгад̇ам̣ д̇идтад̇и, аяам̣ уггадтомаго наама бад̇д̇о. сажз д̇ам̣ рааж̇им̣ на самбаабун̣аад̇и, анд̇ог̇ад̇хамзва ход̇и, аяам̣ уггадтуггадто наама бад̇д̇о. уггадтад̇о убад̣дхаббамаан̣о маж̇жхимо. маж̇жхимабад̇д̇ад̇о убад̣дхаббамаан̣о омаго. д̇зсамби вуд̇д̇анаязнзва бхзд̣̇о взд̣̇ид̇аб̣б̣о. ижжзд̇зсу навасу уггадтуггадто жа омагомаго жаад̇и д̣̇вз абад̇д̇аа, сзсаа сад̇д̇а бад̇д̇аа бамаан̣аяуд̇д̇аа наама, аяамзд̇т̇асан̇кзбо, вид̇т̇ааро бана саманд̇абаасаад̣̇игааяам̣ (баараа. адта. 2.598 аад̣̇аяо) вуд̇д̇о, д̇асмаа звам̣ бамаан̣аяуд̇д̇ам̣ саман̣асааруббзна баггам̣ аяобад̇д̇ам̣ ваа мад̇д̇игаабад̇д̇ам̣ ваа лабхид̇ваа бураан̣абад̇д̇ам̣ бажжуд̣̇д̇харид̇ваа анд̇од̣̇асаахз ад̇хидтаад̇аб̣б̣о. сажз банасса муулад̇о гааган̣игамад̇д̇амби д̣̇аад̇аб̣б̣ам̣ авасидтам̣ ход̇и, ад̇хидтаанубаг̇о на ход̇и, аббажжуд̣̇д̇харанд̇зна вигаббзд̇аб̣б̣о. д̇ад̇т̇а бажжуд̣̇д̇харан̣аад̇хидтааналагкан̣ам̣ жийвараваг̇г̇з вуд̇д̇анаязнзва взд̣̇ид̇аб̣б̣ам̣, вигаббаналагкан̣ам̣ барад̇о вагкаама. сажз бана гожи абад̇д̇аго бхигку д̣̇аса бад̇д̇з лабхид̇ваа саб̣б̣з ад̇д̇анаава барибхун̃ж̇ид̇угаамо ход̇и, згам̣ бад̇д̇ам̣ ад̇хидтааяа буна д̣̇ивасз д̇ам̣ бажжуд̣̇д̇харид̇ваа ан̃н̃о ад̇хидтаад̇аб̣б̣о, зд̇знубааязна вассасад̇амби барихарид̇ум̣ саггаа. яо банасса бад̇д̇о мукаваддид̇о хздтаа д̣̇ван̇г̇уламад̇д̇огаасад̇о бадтааяа яад̇т̇агад̇т̇ажи ган̇г̇усид̇т̇анигкаманамад̇д̇зна чид̣̇д̣̇зна чид̣̇д̣̇о ход̇и, со ад̇хидтаанубаг̇о на ход̇и. буна чид̣̇д̣̇з баагад̇игз гад̇з ад̇хидтаад̇аб̣б̣о, сзсам̣ ад̇хидтаанавиж̇аханам̣ д̇ижийварз вуд̇д̇анаяамзва.
Pattavaggassa paṭhame atirekapattoti anadhiṭṭhito ca avikappito ca, so ca kho ukkaṭṭhamajjhimomakānaṃ aññataro pamāṇayuttova, tassa pamāṇaṃ ‘‘aḍḍhāḷhakodanaṃ gaṇhātī’’tiādinā (pārā 602) nayena pāḷiyaṃ vuttaṃ. Tatrāyaṃ vinicchayo – anupahatapurāṇasālitaṇḍulānaṃ sukoṭṭitaparisuddhānaṃ dve magadhanāḷiyo gahetvā tehi taṇḍulehi anuttaṇḍulamakilinnamapiṇḍikaṃ suvisadaṃ kundamakuḷarāsisadisaṃ avassāvitodanaṃ pacitvā niravasesaṃ patte pakkhipitvā tassa odanassa catutthabhāgappamāṇo nātighano nātitanuko hatthahāriyo sabbasambhārasaṅkhato muggasūpo pakkhipitabbo, tato ālopassa anurūpaṃ yāvacarimālopappahonakaṃ macchamaṃsādibyañjanaṃ pakkhipitabbaṃ, sappitelatakkarasakañjiyādīni pana gaṇanūpagāni na honti. Tāni hi odanagatikāneva, neva hāpetuṃ, na vaḍḍhetuṃ sakkonti, evametaṃ sabbampi pakkhittaṃ sace pattassa mukhavaṭṭiyā heṭṭhimarājisamaṃ tiṭṭhati, suttena vā hīrena vā chindantassa suttassa vā hīrassa vā heṭṭhimantaṃ phusati, ayaṃ ukkaṭṭho nāma patto. Sace taṃ rājiṃ atikkamma thūpīkataṃ tiṭṭhati, ayaṃ ukkaṭṭhomako nāma patto. Sace taṃ rājiṃ na sampāpuṇāti, antogadhameva hoti, ayaṃ ukkaṭṭhukkaṭṭho nāma patto. Ukkaṭṭhato upaḍḍhappamāṇo majjhimo. Majjhimapattato upaḍḍhappamāṇo omako. Tesampi vuttanayeneva bhedo veditabbo. Iccetesu navasu ukkaṭṭhukkaṭṭho ca omakomako cāti dve apattā, sesā satta pattā pamāṇayuttā nāma, ayametthasaṅkhepo, vitthāro pana samantapāsādikāyaṃ (pārā. aṭṭha. 2.598 ādayo) vutto, tasmā evaṃ pamāṇayuttaṃ samaṇasāruppena pakkaṃ ayopattaṃ vā mattikāpattaṃ vā labhitvā purāṇapattaṃ paccuddharitvā antodasāhe adhiṭṭhātabbo. Sace panassa mūlato kākaṇikamattampi dātabbaṃ avasiṭṭhaṃ hoti, adhiṭṭhānupago na hoti, appaccuddharantena vikappetabbo. Tattha paccuddharaṇādhiṭṭhānalakkhaṇaṃ cīvaravagge vuttanayeneva veditabbaṃ, vikappanalakkhaṇaṃ parato vakkhāma. Sace pana koci apattako bhikkhu dasa patte labhitvā sabbe attanāva paribhuñjitukāmo hoti, ekaṃ pattaṃ adhiṭṭhāya puna divase taṃ paccuddharitvā añño adhiṭṭhātabbo, etenupāyena vassasatampi pariharituṃ sakkā. Yo panassa patto mukhavaṭṭito heṭṭhā dvaṅgulamattokāsato paṭṭhāya yatthakatthaci kaṅgusitthanikkhamanamattena chiddena chiddo hoti, so adhiṭṭhānupago na hoti. Puna chidde pākatike kate adhiṭṭhātabbo, sesaṃ adhiṭṭhānavijahanaṃ ticīvare vuttanayameva.
саавад̇т̇ияам̣ чаб̣б̣аг̇г̇ияз аараб̣бха ад̇ирзгабад̇д̇ад̇хааран̣авад̇т̇усмим̣ бан̃н̃ад̇д̇ам̣, асаад̇хааран̣абан̃н̃ад̇д̇и, сзсаван̣н̣анааггамо жийвараваг̇г̇асса батамасигкаабад̣̇з вуд̇д̇анаязнзва взд̣̇ид̇аб̣б̣од̇и.
Sāvatthiyaṃ chabbaggiye ārabbha atirekapattadhāraṇavatthusmiṃ paññattaṃ, asādhāraṇapaññatti, sesavaṇṇanākkamo cīvaravaggassa paṭhamasikkhāpade vuttanayeneva veditabboti.
бад̇д̇асигкаабад̣̇аван̣н̣анаа нидтид̇аа.
Pattasikkhāpadavaṇṇanā niṭṭhitā.
2. уунабан̃жаб̣анд̇ханасигкаабад̣̇аван̣н̣анаа
2. Ūnapañcabandhanasikkhāpadavaṇṇanā
д̣̇уд̇ияз уунаани бан̃жа б̣анд̇ханаани ассаад̇и уунабан̃жаб̣анд̇хано, наасса бан̃жа б̣анд̇ханаани буурзнд̇ийд̇и ад̇т̇о, д̇зна уунабан̃жаб̣анд̇ханзна, ид̇т̇амбхууд̇асса лагкан̣з гаран̣аважанам̣. д̇ад̇т̇а яасмаа аб̣анд̇ханассааби бан̃жа б̣анд̇ханаани на буурзнд̇и саб̣б̣асо над̇т̇ид̇ааяа, д̇знасса бад̣̇абхааж̇анз ‘‘уунабан̃жаб̣анд̇хано наама бад̇д̇о аб̣анд̇хано ваа згаб̣анд̇хано ваа’’д̇иаад̣̇и (баараа. 613) вуд̇д̇ам̣. ‘‘уунабан̃жаб̣анд̇ханзнаа’’д̇и жа вуд̇д̇ад̇д̇аа яасса бан̃жаб̣анд̇хано бад̇д̇о ход̇и бан̃жаб̣анд̇ханогаасо ваа, д̇асса со абад̇д̇о, д̇асмаа ан̃н̃ам̣ вин̃н̃аабзд̇ум̣ ваддад̇и. яасмим̣ бана бад̇д̇з мукаваддид̇о хздтаа бхадтаа д̣̇ван̇г̇улаббамаан̣аа згааби рааж̇и ход̇и, д̇ам̣ д̇ассаа рааж̇ияаа хздтимабарияанд̇з бад̇д̇авзд̇хагзна виж̇жхид̇ваа бажид̇ваа суд̇д̇араж̇ж̇угамагажираж̇ж̇угаад̣̇ийхи ваа д̇ибусуд̇д̇агзна ваа б̣анд̇хид̇ваа д̇ам̣ б̣анд̇ханам̣ аамисасса алаг̇г̇анад̇т̇ам̣ д̇ибубаддагзна ваа гзнажи б̣ад̣̇д̇хасилзсаад̣̇инаа ваа бадижчаад̣̇зд̇аб̣б̣ам̣, со жа бад̇д̇о ад̇хидтахид̇ваа барибхун̃ж̇ид̇аб̣б̣о, сукумам̣ ваа чид̣̇д̣̇ам̣ гад̇ваа б̣анд̇хид̇аб̣б̣о, паан̣ид̇ам̣ жхаабзд̇ваа баасаан̣ажун̣н̣зна б̣анд̇хид̇умби ваддад̇и. яасса бана д̣̇вз рааж̇ияо ваа згааязва ваа жад̇уран̇г̇улаа, д̇асса д̣̇вз б̣анд̇ханаани д̣̇аад̇аб̣б̣аани. яасса д̇иссо ваа згааязва ваа чал̣ан̇г̇улаа, д̇асса д̇ийн̣и. яасса жад̇ассо ваа згааязва ваа адтан̇г̇улаа, д̇асса жад̇д̇аари. яасса бан̃жа ваа згааязва ваа д̣̇асан̇г̇улаа, со б̣ад̣̇д̇хоби аб̣ад̣̇д̇хоби абад̇д̇оязва, ан̃н̃о вин̃н̃аабзд̇аб̣б̣о, зса д̇аава мад̇д̇игаабад̇д̇з винижчаяо.
Dutiye ūnāni pañca bandhanāni assāti ūnapañcabandhano, nāssa pañca bandhanāni pūrentīti attho, tena ūnapañcabandhanena, itthambhūtassa lakkhaṇe karaṇavacanaṃ. Tattha yasmā abandhanassāpi pañca bandhanāni na pūrenti sabbaso natthitāya, tenassa padabhājane ‘‘ūnapañcabandhano nāma patto abandhano vā ekabandhano vā’’tiādi (pārā. 613) vuttaṃ. ‘‘Ūnapañcabandhanenā’’ti ca vuttattā yassa pañcabandhano patto hoti pañcabandhanokāso vā, tassa so apatto, tasmā aññaṃ viññāpetuṃ vaṭṭati. Yasmiṃ pana patte mukhavaṭṭito heṭṭhā bhaṭṭhā dvaṅgulappamāṇā ekāpi rāji hoti, taṃ tassā rājiyā heṭṭhimapariyante pattavedhakena vijjhitvā pacitvā suttarajjukamakacirajjukādīhi vā tipusuttakena vā bandhitvā taṃ bandhanaṃ āmisassa alagganatthaṃ tipupaṭṭakena vā kenaci baddhasilesādinā vā paṭicchādetabbaṃ, so ca patto adhiṭṭhahitvā paribhuñjitabbo, sukhumaṃ vā chiddaṃ katvā bandhitabbo, phāṇitaṃ jhāpetvā pāsāṇacuṇṇena bandhitumpi vaṭṭati. Yassa pana dve rājiyo vā ekāyeva vā caturaṅgulā, tassa dve bandhanāni dātabbāni. Yassa tisso vā ekāyeva vā chaḷaṅgulā, tassa tīṇi. Yassa catasso vā ekāyeva vā aṭṭhaṅgulā, tassa cattāri. Yassa pañca vā ekāyeva vā dasaṅgulā, so baddhopi abaddhopi apattoyeva, añño viññāpetabbo, esa tāva mattikāpatte vinicchayo.
аяобад̇д̇з бана сажзби бан̃жа ваа ад̇ирзгаани ваа чид̣̇д̣̇аани хонд̇и, д̇аани жз аяажун̣н̣зна ваа аан̣ияаа ваа лохаман̣д̣алзна ваа б̣ад̣̇д̇хаани мадтаани хонд̇и, свзва барибхун̃ж̇ид̇аб̣б̣о, ан̃н̃о на вин̃н̃аабзд̇аб̣б̣о. ат̇а бана згамби чид̣̇д̣̇ам̣ маханд̇ам̣ ход̇и, лохаман̣д̣алзна б̣ад̣̇д̇хамби мадтам̣ на ход̇и, бад̇д̇з аамисам̣ лаг̇г̇ад̇и, агаббияо ход̇и аяам̣ бад̇д̇о, ан̃н̃о вин̃н̃аабзд̇аб̣б̣о. яо бана звам̣ бад̇д̇асан̇кзбаг̇ад̇з ваа аяобад̇д̇з, уунабан̃жаб̣анд̇ханз ваа мад̇д̇игаабад̇д̇з сад̇и ан̃н̃ам̣ вин̃н̃аабзд̇и, баяог̇з д̣̇уггадам̣, бадилаабхзна ниссаг̇г̇ияо ход̇и, ниссаж̇ж̇ид̇аб̣б̣о. ниссаж̇ж̇анд̇зна сан̇гхамаж̇жхз зва ниссаж̇ж̇ид̇аб̣б̣о, д̇зна вуд̇д̇ам̣ ‘‘бхигкубарисааяа ниссаж̇ж̇ид̇аб̣б̣о’’д̇и. яо жа д̇ассаа бхигкубарисааяаад̇изд̇т̇а д̇зхи бхигкуухи багад̇ияаа зва ад̇д̇ано ад̇д̇ано ад̇хидтид̇ам̣ бад̇д̇ам̣ г̇ахзд̇ваа саннибад̇ид̇аб̣б̣ам̣, д̇ад̇о саммад̇зна бад̇д̇аг̇г̇аахаабагзна бад̇д̇асса виж̇ж̇амаанаг̇ун̣ам̣ вад̇ваа ‘‘бханд̇з, имам̣ г̇ан̣хат̇аа’’д̇и т̇зро вад̇д̇аб̣б̣о. сажз т̇зрасса со бад̇д̇о на ружжад̇и, аббижчад̇ааяа ваа на г̇ан̣хаад̇и, ваддад̇и. д̇асмим̣ бана анугамбааяа аг̇ан̣ханд̇асса д̣̇уггадам̣. сажз бана г̇ан̣хаад̇и, т̇зрасса бад̇д̇ам̣ д̣̇уд̇ияад̇т̇зрам̣ г̇аахаабзд̇ваа зд̇знзва убааязна яаава сан̇гханавагаа г̇аахаабзд̇аб̣б̣о, д̇зна барижжад̇д̇абад̇д̇о бана бад̇д̇абарияанд̇о наама, со д̇асса бхигкуно бад̣̇аад̇аб̣б̣о. д̇знааби со яат̇аа вин̃н̃аабзд̇ваа г̇ахид̇абад̇д̇о, звамзва саггажжам̣ барибхун̃ж̇ид̇аб̣б̣о. сажз бана д̇ам̣ ж̇иг̇ужчанд̇о ад̣̇зсз ваа нигкибад̇и, абарибхог̇зна ваа барибхун̃ж̇ад̇и, виссаж̇ж̇зд̇и ваа, д̣̇уггадам̣ аабаж̇ж̇ад̇и.
Ayopatte pana sacepi pañca vā atirekāni vā chiddāni honti, tāni ce ayacuṇṇena vā āṇiyā vā lohamaṇḍalena vā baddhāni maṭṭhāni honti, sveva paribhuñjitabbo, añño na viññāpetabbo. Atha pana ekampi chiddaṃ mahantaṃ hoti, lohamaṇḍalena baddhampi maṭṭhaṃ na hoti, patte āmisaṃ laggati, akappiyo hoti ayaṃ patto, añño viññāpetabbo. Yo pana evaṃ pattasaṅkhepagate vā ayopatte, ūnapañcabandhane vā mattikāpatte sati aññaṃ viññāpeti, payoge dukkaṭaṃ, paṭilābhena nissaggiyo hoti, nissajjitabbo. Nissajjantena saṅghamajjhe eva nissajjitabbo, tena vuttaṃ ‘‘bhikkhuparisāya nissajjitabbo’’ti. Yo ca tassā bhikkhuparisāyātiettha tehi bhikkhūhi pakatiyā eva attano attano adhiṭṭhitaṃ pattaṃ gahetvā sannipatitabbaṃ, tato sammatena pattaggāhāpakena pattassa vijjamānaguṇaṃ vatvā ‘‘bhante, imaṃ gaṇhathā’’ti thero vattabbo. Sace therassa so patto na ruccati, appicchatāya vā na gaṇhāti, vaṭṭati. Tasmiṃ pana anukampāya agaṇhantassa dukkaṭaṃ. Sace pana gaṇhāti, therassa pattaṃ dutiyattheraṃ gāhāpetvā eteneva upāyena yāva saṅghanavakā gāhāpetabbo, tena pariccattapatto pana pattapariyanto nāma, so tassa bhikkhuno padātabbo. Tenāpi so yathā viññāpetvā gahitapatto, evameva sakkaccaṃ paribhuñjitabbo. Sace pana taṃ jigucchanto adese vā nikkhipati, aparibhogena vā paribhuñjati, vissajjeti vā, dukkaṭaṃ āpajjati.
саггзсу чаб̣б̣аг̇г̇ияз аараб̣бха б̣ахуу бад̇д̇з вин̃н̃аабанавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣ , аб̣анд̇ханзна аб̣анд̇ханам̣, згаб̣анд̇ханам̣, д̣̇уб̣анд̇ханам̣, д̇иб̣анд̇ханам̣, жад̇уб̣б̣анд̇ханам̣, аб̣анд̇ханогаасам̣, згад̣̇вид̇ижад̇уб̣б̣анд̇ханогаасам̣ жзд̇аабзд̇и, звам̣ згзгзна бад̇д̇зна д̣̇асад̇хаа д̣̇асавид̇хам̣ бад̇д̇ам̣. жзд̇аабанавасзна бана згам̣ ниссаг̇г̇ияабаажид̇д̇ияасад̇ам̣ ход̇и. надтабад̇д̇асса, бхиннабад̇д̇асса, ад̇д̇ано н̃аад̇агаббаваарид̇з, ан̃н̃асса жа н̃аад̇агаббаваарид̇з, д̇ассзвад̇т̇ааяа вин̃н̃аабзнд̇асса, ад̇д̇ано д̇ханзна г̇ан̣хад̇о, уммад̇д̇агаад̣̇ийнан̃жа анаабад̇д̇и. ад̇хидтаанубаг̇абад̇д̇асса уунабан̃жаб̣анд̇ханад̇аа, ад̇д̇уд̣̇д̣̇зсигад̇аа, агад̇авин̃н̃ад̇д̇и , д̇ааяа жа бадилаабход̇и имаанзд̇т̇а жад̇д̇аари ан̇г̇аани. самудтаанаад̣̇ийни д̇ховаабанасигкаабад̣̇з вуд̇д̇анаяаанзваад̇и.
Sakkesu chabbaggiye ārabbha bahū patte viññāpanavatthusmiṃ paññattaṃ, sādhāraṇapaññatti, anāṇattikaṃ , abandhanena abandhanaṃ, ekabandhanaṃ, dubandhanaṃ, tibandhanaṃ, catubbandhanaṃ, abandhanokāsaṃ, ekadviticatubbandhanokāsaṃ cetāpeti, evaṃ ekekena pattena dasadhā dasavidhaṃ pattaṃ. Cetāpanavasena pana ekaṃ nissaggiyapācittiyasataṃ hoti. Naṭṭhapattassa, bhinnapattassa, attano ñātakappavārite, aññassa ca ñātakappavārite, tassevatthāya viññāpentassa, attano dhanena gaṇhato, ummattakādīnañca anāpatti. Adhiṭṭhānupagapattassa ūnapañcabandhanatā, attuddesikatā, akataviññatti , tāya ca paṭilābhoti imānettha cattāri aṅgāni. Samuṭṭhānādīni dhovāpanasikkhāpade vuttanayānevāti.
уунабан̃жаб̣анд̇ханасигкаабад̣̇аван̣н̣анаа нидтид̇аа.
Ūnapañcabandhanasikkhāpadavaṇṇanā niṭṭhitā.
3. бхзсаж̇ж̇асигкаабад̣̇аван̣н̣анаа
3. Bhesajjasikkhāpadavaṇṇanā
д̇ад̇ияз бадисааяанийяаанийд̇и бадисааяид̇аб̣б̣аани, барибхун̃ж̇ид̇аб̣б̣аанийд̇и ад̇т̇о. зд̇зна саяам̣ уг̇г̇ахзд̇ваа нигкид̇д̇аанам̣ сад̇д̇аахаад̇иггамзби анаабад̇д̇им̣ д̣̇ассзд̇и, д̇аани хи бадисааяид̇ум̣ на вадданд̇и. бхзсаж̇ж̇аанийд̇и бхзсаж̇ж̇агижжам̣ гаронд̇у ваа, маа ваа, звам̣ лад̣̇д̇хавохаараани. сабби наама г̇аваад̣̇ийнам̣ сабби, язсам̣ мам̣сам̣ габбад̇и, д̇зсам̣ сабби. д̇ат̇аа наванийд̇ам̣. д̇злам̣ наама д̇иласаасабамад̇хуугазран̣д̣агавасаад̣̇ийхи ниб̣б̣ад̇д̇ид̇ам̣. мад̇ху наама магкигаамад̇хумзва. паан̣ид̇ам̣ наама ужчурасам̣ убаад̣̇ааяа бана абаггаа ваа авад̇т̇угабаггаа ваа саб̣б̣ааби ужчувигад̇и ‘‘паан̣ид̇а’’нд̇и взд̣̇ид̇аб̣б̣ам̣. д̇аани бадиг̇г̇ахзд̇ваад̇и д̇аани бхзсаж̇ж̇аани бадиг̇г̇ахзд̇ваа, на д̇зсам̣ вад̇т̇ууни. зд̇зна табзд̇ваа васаад̇злам̣ яаанзд̇т̇а яаавагаалигавад̇т̇угаани, д̇зсам̣ вад̇т̇ууни бадиг̇г̇ахзд̇ваа гад̇аани саббиаад̣̇ийни сад̇д̇аахам̣ ад̇иггаамаяад̇оби анаабад̇д̇им̣ д̣̇ассзд̇и. васаад̇злам̣ бана гаалз бадиг̇г̇ахид̇ам̣ гаалз нибаггам̣ гаалз сам̣садтам̣ д̇злабарибхог̇зна барибхун̃ж̇ид̇ум̣ анун̃н̃аад̇ам̣, д̇асмаа табзд̇ваа мануссавасам̣ ан̃н̃ам̣ яам̣ган̃жи васам̣ бурзбхад̇д̇ам̣ бадиг̇г̇ахзд̇ваа саамам̣ бажид̇ваа ниб̣б̣ад̇д̇ид̇ад̇зламби сад̇д̇аахам̣ нираамисабарибхог̇зна ваддад̇и. анубасамбаннзна бажид̇ваа д̣̇иннам̣ бана д̇ад̣̇ахубурзбхад̇д̇ам̣ саамисамби ваддад̇и, ан̃н̃зсам̣ яаавагаалигавад̇т̇уунам̣ вад̇т̇ум̣ бажид̇ум̣ на ваддад̇иязва. ниб̣б̣ад̇д̇ид̇асабби ваа наванийд̇ам̣ ваа бажид̇ум̣ ваддад̇и, д̇ам̣ бана д̇ад̣̇ахубурзбхад̇д̇амби саамисам̣ барибхун̃ж̇ид̇ум̣ на ваддад̇и. бурзбхад̇д̇ам̣ бадиг̇г̇ахид̇акийраад̣̇ид̇о анубасамбаннзна бажид̇ваа гад̇асаббиаад̣̇ийни бана д̇ад̣̇ахубурзбхад̇д̇ам̣ саамисааниби вадданд̇и, бажчаабхад̇д̇ад̇о бадтааяа анаж̇жхохаран̣ийяаани, сад̇д̇аахаад̇иггамзби анаабад̇д̇и. саннид̇хигаарагам̣ барибхун̃ж̇ид̇аб̣б̣аанийд̇и саннид̇хим̣ гад̇ваа нид̣̇ахид̇ваа бурзбхад̇д̇ам̣ бадиг̇г̇ахид̇аани д̇ад̣̇ахубурзбхад̇д̇ам̣ саамисабарибхог̇знааби вадданд̇и, бажчаабхад̇д̇ад̇о бадтааяа бана д̇аани жа, бажчаабхад̇д̇ам̣ бадиг̇г̇ахид̇аани жа сад̇д̇аахам̣ нираамисабарибхог̇зна барибхун̃ж̇ид̇аб̣б̣аанийд̇и ад̇т̇о. ‘‘барибхун̃ж̇ид̇аб̣б̣ааний’’д̇и жа важанад̇о анд̇осад̇д̇аахз аб̣бхан̃ж̇анаад̣̇ийнам̣ ад̇т̇ааяа ад̇хидтахид̇ваа табид̇зсу анаабад̇д̇и, яааваж̇ийвигаани саасабамад̇хуугазран̣д̣агаадтийни д̇злагаран̣ад̇т̇ам̣ бадиг̇г̇ахзд̇ваа д̇ад̣̇ахзва гад̇ад̇злам̣ сад̇д̇аахагаалигам̣, д̣̇уд̇ияад̣̇ивасз гад̇ам̣ чаахам̣ ваддад̇и, д̇ад̇ияад̣̇ивасз гад̇ам̣ бан̃жаахам̣, жад̇уд̇т̇абан̃жамачадтасад̇д̇амад̣̇ивасз гад̇ам̣ д̇ад̣̇ахзва ваддад̇и. сажз яаава арун̣асса уг̇г̇аманаа д̇идтад̇и, ниссаг̇г̇ияам̣ ход̇и, адтамад̣̇ивасз гад̇ам̣ анаж̇жхохаран̣ийяам̣, аниссаг̇г̇ияад̇д̇аа бана б̣аахирабарибхог̇зна ваддад̇и. сажзби на гарод̇и, д̇злад̇т̇ааяа бадиг̇г̇ахид̇асаасабаад̣̇ийнам̣ бана баал̣ияам̣ анааг̇ад̇асаббиаад̣̇ийнан̃жа сад̇д̇аахаад̇иггамз д̣̇уггадам̣ аабаж̇ж̇ад̇и. сийд̇уд̣̇агзна гад̇амад̇хуугабубпапаан̣ид̇ам̣ бана паан̣ид̇аг̇ад̇игамзва, амб̣апаан̣ид̇аад̣̇ийни яаавагаалигаани. яам̣ банзд̇т̇а сад̇д̇аахагаалигам̣, д̇ам̣ ниссадтам̣ бадилабхид̇вааби аруаад̣̇ийни ваа магкзд̇ум̣, аж̇жхохарид̇ум̣ ваа на ваддад̇и. бад̣̇ийбз гаал̣аван̣н̣з ваа убанзд̇аб̣б̣ам̣, ан̃н̃асса бхигкуно гааяигабарибхог̇ам̣ ваддад̇и. яам̣ бана нирабзгко барижжаж̇ид̇ваа буна лабхад̇и, д̇ам̣ аж̇жхохарид̇умби ваддад̇и. висум̣ табид̇асаббиаад̣̇ийсу, згабхааж̇анз ваа амиссид̇зсу вад̇т̇уг̇ан̣анааяа аабад̇д̇ияо.
Tatiye paṭisāyanīyānīti paṭisāyitabbāni, paribhuñjitabbānīti attho. Etena sayaṃ uggahetvā nikkhittānaṃ sattāhātikkamepi anāpattiṃ dasseti, tāni hi paṭisāyituṃ na vaṭṭanti. Bhesajjānīti bhesajjakiccaṃ karontu vā, mā vā, evaṃ laddhavohārāni. Sappi nāma gavādīnaṃ sappi, yesaṃ maṃsaṃ kappati, tesaṃ sappi. Tathā navanītaṃ. Telaṃ nāma tilasāsapamadhūkaeraṇḍakavasādīhi nibbattitaṃ. Madhu nāma makkhikāmadhumeva. Phāṇitaṃ nāma ucchurasaṃ upādāya pana apakkā vā avatthukapakkā vā sabbāpi ucchuvikati ‘‘phāṇita’’nti veditabbaṃ. Tāni paṭiggahetvāti tāni bhesajjāni paṭiggahetvā, na tesaṃ vatthūni. Etena ṭhapetvā vasātelaṃ yānettha yāvakālikavatthukāni, tesaṃ vatthūni paṭiggahetvā katāni sappiādīni sattāhaṃ atikkāmayatopi anāpattiṃ dasseti. Vasātelaṃ pana kāle paṭiggahitaṃ kāle nipakkaṃ kāle saṃsaṭṭhaṃ telaparibhogena paribhuñjituṃ anuññātaṃ, tasmā ṭhapetvā manussavasaṃ aññaṃ yaṃkañci vasaṃ purebhattaṃ paṭiggahetvā sāmaṃ pacitvā nibbattitatelampi sattāhaṃ nirāmisaparibhogena vaṭṭati. Anupasampannena pacitvā dinnaṃ pana tadahupurebhattaṃ sāmisampi vaṭṭati, aññesaṃ yāvakālikavatthūnaṃ vatthuṃ pacituṃ na vaṭṭatiyeva. Nibbattitasappi vā navanītaṃ vā pacituṃ vaṭṭati, taṃ pana tadahupurebhattampi sāmisaṃ paribhuñjituṃ na vaṭṭati. Purebhattaṃ paṭiggahitakhīrādito anupasampannena pacitvā katasappiādīni pana tadahupurebhattaṃ sāmisānipi vaṭṭanti, pacchābhattato paṭṭhāya anajjhoharaṇīyāni, sattāhātikkamepi anāpatti. Sannidhikārakaṃ paribhuñjitabbānīti sannidhiṃ katvā nidahitvā purebhattaṃ paṭiggahitāni tadahupurebhattaṃ sāmisaparibhogenāpi vaṭṭanti, pacchābhattato paṭṭhāya pana tāni ca, pacchābhattaṃ paṭiggahitāni ca sattāhaṃ nirāmisaparibhogena paribhuñjitabbānīti attho. ‘‘Paribhuñjitabbānī’’ti ca vacanato antosattāhe abbhañjanādīnaṃ atthāya adhiṭṭhahitvā ṭhapitesu anāpatti, yāvajīvikāni sāsapamadhūkaeraṇḍakaaṭṭhīni telakaraṇatthaṃ paṭiggahetvā tadaheva katatelaṃ sattāhakālikaṃ, dutiyadivase kataṃ chāhaṃ vaṭṭati, tatiyadivase kataṃ pañcāhaṃ, catutthapañcamachaṭṭhasattamadivase kataṃ tadaheva vaṭṭati. Sace yāva aruṇassa uggamanā tiṭṭhati, nissaggiyaṃ hoti, aṭṭhamadivase kataṃ anajjhoharaṇīyaṃ, anissaggiyattā pana bāhiraparibhogena vaṭṭati. Sacepi na karoti, telatthāya paṭiggahitasāsapādīnaṃ pana pāḷiyaṃ anāgatasappiādīnañca sattāhātikkame dukkaṭaṃ āpajjati. Sītudakena katamadhūkapupphaphāṇitaṃ pana phāṇitagatikameva, ambaphāṇitādīni yāvakālikāni. Yaṃ panettha sattāhakālikaṃ, taṃ nissaṭṭhaṃ paṭilabhitvāpi aruādīni vā makkhetuṃ, ajjhoharituṃ vā na vaṭṭati. Padīpe kāḷavaṇṇe vā upanetabbaṃ, aññassa bhikkhuno kāyikaparibhogaṃ vaṭṭati. Yaṃ pana nirapekkho pariccajitvā puna labhati, taṃ ajjhoharitumpi vaṭṭati. Visuṃ ṭhapitasappiādīsu, ekabhājane vā amissitesu vatthugaṇanāya āpattiyo.
саавад̇т̇ияам̣ самб̣ахулз бхигкуу аараб̣бха сад̇д̇аахам̣ ад̇иггаманавад̇т̇усмим̣ бан̃н̃ад̇д̇ам̣, сзсам̣ жийвараваг̇г̇асса батамасигкаабад̣̇з вуд̇д̇анаязнзва взд̣̇ид̇аб̣б̣анд̇и.
Sāvatthiyaṃ sambahule bhikkhū ārabbha sattāhaṃ atikkamanavatthusmiṃ paññattaṃ, sesaṃ cīvaravaggassa paṭhamasikkhāpade vuttanayeneva veditabbanti.
бхзсаж̇ж̇асигкаабад̣̇аван̣н̣анаа нидтид̇аа.
Bhesajjasikkhāpadavaṇṇanā niṭṭhitā.
4. вассигасаадигасигкаабад̣̇аван̣н̣анаа
4. Vassikasāṭikasikkhāpadavaṇṇanā
жад̇уд̇т̇з маасо сзсо г̇имхаананд̇и жад̇уннам̣ г̇имхамаасаанам̣ зго бажчимамаасо сзсо. бариязсид̇аб̣б̣анд̇и г̇имхаанам̣ бажчимамаасасса батамад̣̇ивасад̇о бадтааяа яаава гад̇д̇игамаасасса бажчимад̣̇ивасо, д̇аава ‘‘гаало вассигасаадигааяаа’’д̇иаад̣̇инаа сад̇уббаад̣̇агаран̣зна, сан̇гхасса баваарид̇адтаанад̇о, ад̇д̇ано н̃аад̇агаббаваарид̇адтаанад̇о бана ‘‘д̣̇зт̇а мз вассигасаадигажийвара’’нд̇иаад̣̇игааяа вин̃н̃ад̇д̇ияааби бариязсид̇аб̣б̣ам̣. ан̃н̃аад̇агааббаваарид̇адтаанз сад̇уббаад̣̇ам̣ гаронд̇асса вад̇д̇абхзд̣̇з д̣̇уггадам̣, яат̇аа ваа д̇ат̇аа ваа ‘‘д̣̇зт̇а мз’’д̇иаад̣̇иважанзна вин̃н̃аабзнд̇асса ан̃н̃аад̇агавин̃н̃ад̇д̇исигкаабад̣̇зна ниссаг̇г̇ияам̣ баажид̇д̇ияам̣. гад̇ваа ниваасзд̇аб̣б̣анд̇и г̇имхаанам̣ бажчимад̣̇д̇хамаасасса батамад̣̇ивасад̇о бадтааяа яаава гад̇д̇игамаасасса бажчимад̣̇ивасо, д̇аава суужигамманидтаанзна сагимби ван̣н̣абхзд̣̇амад̇д̇араж̇анзна габбаб̣инд̣̇угаран̣зна жа гад̇ваа барид̣̇ахид̇аб̣б̣аа. зд̇д̇аавад̇аа г̇имхаанам̣ бажчимо маасо бариязсанагкзд̇д̇ам̣ , бажчимо ад̣̇д̇хамаасо гаран̣аниваасанагкзд̇д̇амби, вассаанасса жад̇уусу маасзсу саб̣б̣амби д̇ам̣ ваддад̇ийд̇и аяамад̇т̇о д̣̇ассид̇о ход̇и. яо жааяам̣ г̇имхаанам̣ бажчимо маасо анун̃н̃аад̇о, зд̇т̇а гад̇абариязсид̇амби вассигасаадигам̣ ад̇хидтаад̇ум̣ на ваддад̇и. сажз д̇асмим̣ маасз ад̇игганд̇з вассам̣ уггад̣дхияад̇и, буна маасабарихаарам̣ лабхад̇и, д̇ховид̇ваа бана нигкибид̇ваа вассуубанааяигад̣̇ивасз ад̇хидтаад̇аб̣б̣аа. сажз сад̇исаммосзна ваа аббахонагабхаавзна ваа агад̇аа ход̇и. д̇з жа д̣̇вз маасз вассаанасса жад̇умаасанд̇и ча маасз барихаарам̣ лабхад̇и. сажз бана гад̇д̇игамаасз гат̇инам̣ ад̇т̇арияад̇и, абарзби жад̇д̇ааро маасз лабхад̇и, звам̣ д̣̇аса маасаа хонд̇и. д̇ад̇о барамби сад̇ияаа бажжаасааяа д̇ам̣ муулажийварам̣ гад̇ваа табзнд̇асса згамаасанд̇и звам̣ згаад̣̇аса маасз барихаарам̣ лабхад̇и, ид̇о барам̣ згаахамби на лабхад̇и.
Catutthe māso seso gimhānanti catunnaṃ gimhamāsānaṃ eko pacchimamāso seso. Pariyesitabbanti gimhānaṃ pacchimamāsassa paṭhamadivasato paṭṭhāya yāva kattikamāsassa pacchimadivaso, tāva ‘‘kālo vassikasāṭikāyā’’tiādinā satuppādakaraṇena, saṅghassa pavāritaṭṭhānato, attano ñātakappavāritaṭṭhānato pana ‘‘detha me vassikasāṭikacīvara’’ntiādikāya viññattiyāpi pariyesitabbaṃ. Aññātakaappavāritaṭṭhāne satuppādaṃ karontassa vattabhede dukkaṭaṃ, yathā vā tathā vā ‘‘detha me’’tiādivacanena viññāpentassa aññātakaviññattisikkhāpadena nissaggiyaṃ pācittiyaṃ. Katvā nivāsetabbanti gimhānaṃ pacchimaddhamāsassa paṭhamadivasato paṭṭhāya yāva kattikamāsassa pacchimadivaso, tāva sūcikammaniṭṭhānena sakimpi vaṇṇabhedamattarajanena kappabindukaraṇena ca katvā paridahitabbā. Ettāvatā gimhānaṃ pacchimo māso pariyesanakkhettaṃ , pacchimo addhamāso karaṇanivāsanakkhettampi, vassānassa catūsu māsesu sabbampi taṃ vaṭṭatīti ayamattho dassito hoti. Yo cāyaṃ gimhānaṃ pacchimo māso anuññāto, ettha katapariyesitampi vassikasāṭikaṃ adhiṭṭhātuṃ na vaṭṭati. Sace tasmiṃ māse atikkante vassaṃ ukkaḍḍhiyati, puna māsaparihāraṃ labhati, dhovitvā pana nikkhipitvā vassūpanāyikadivase adhiṭṭhātabbā. Sace satisammosena vā appahonakabhāvena vā akatā hoti. Te ca dve māse vassānassa catumāsanti cha māse parihāraṃ labhati. Sace pana kattikamāse kathinaṃ atthariyati, aparepi cattāro māse labhati, evaṃ dasa māsā honti. Tato parampi satiyā paccāsāya taṃ mūlacīvaraṃ katvā ṭhapentassa ekamāsanti evaṃ ekādasa māse parihāraṃ labhati, ito paraṃ ekāhampi na labhati.
орзна жз маасо сзсо г̇имхаананд̇и г̇имхаанам̣ бажчимамаасасса оримабхааг̇з яаава хзманд̇асса батамад̣̇ивасо, д̇ааваад̇и ад̇т̇о. бариязсзяяаад̇и зд̇зсу сад̇д̇асу бидтисамаяамаасзсу ан̃н̃аад̇агааббаваарид̇адтаанад̇о сад̇уббаад̣̇агаран̣зна бариязсанд̇асса ниссаг̇г̇ияам̣ баажид̇д̇ияам̣, вин̃н̃аабзнд̇асса ан̃н̃аад̇агавин̃н̃ад̇д̇исигкаабад̣̇зна ниссаг̇г̇ияам̣ баажид̇д̇ияам̣, н̃аад̇агаббаваарид̇з вин̃н̃аабзнд̇асса д̇зна сигкаабад̣̇зна анаабад̇д̇и, сад̇уббаад̣̇ам̣ гаронд̇асса иминаа сигкаабад̣̇зна аабад̇д̇и. орзнад̣̇д̇хамаасо сзсо г̇имхаананд̇и г̇имхаанасса бажчимад̣̇д̇хамаасад̇о оримабхааг̇з згасмим̣ ад̣̇д̇хамаасз. гад̇ваа ниваасзяяаад̇и зд̇т̇анд̇арз д̇хаммзна уббаннамби гад̇ваа ниваасзнд̇асса ниссаг̇г̇ияам̣ ход̇и.
Orena ce māsoseso gimhānanti gimhānaṃ pacchimamāsassa orimabhāge yāva hemantassa paṭhamadivaso, tāvāti attho. Pariyeseyyāti etesu sattasu piṭṭhisamayamāsesu aññātakaappavāritaṭṭhānato satuppādakaraṇena pariyesantassa nissaggiyaṃ pācittiyaṃ, viññāpentassa aññātakaviññattisikkhāpadena nissaggiyaṃ pācittiyaṃ, ñātakappavārite viññāpentassa tena sikkhāpadena anāpatti, satuppādaṃ karontassa iminā sikkhāpadena āpatti. Orenaddhamāso seso gimhānanti gimhānassa pacchimaddhamāsato orimabhāge ekasmiṃ addhamāse. Katvā nivāseyyāti etthantare dhammena uppannampi katvā nivāsentassa nissaggiyaṃ hoti.
саавад̇т̇ияам̣ чаб̣б̣аг̇г̇ияз бхигкуу аараб̣бха вассигасаадигабариязсанавад̇т̇усмим̣ бан̃н̃ад̇д̇ам̣, асаад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣, уунагамаасад̣̇д̇хамаасзсу ад̇ирзгасан̃н̃ино взмад̇игасса ваа д̣̇уггадам̣, д̇ат̇аа сад̇ияаа вассигасаадигааяа наг̇г̇асса гааяам̣ овассаабаяад̇о. богкаран̣ияаад̣̇ийсу бана нхааяанд̇асса ваа ажчиннажийварасса ваа надтажийварасса ваа ‘‘анивад̇т̇ам̣ жораа харанд̇ий’’д̇и звам̣ аабад̣̇аасу ваа ниваасаяад̇о уммад̇д̇агаад̣̇ийнан̃жа анаабад̇д̇и. зд̇т̇а жа вассигасаадигааяа ад̇д̇уд̣̇д̣̇зсигад̇аа, асамаяз бариязсанад̇аа, д̇ааяа жа бадилаабход̇и имаани д̇аава бариязсанаабад̇д̇ияаа д̇ийн̣и ан̇г̇аани . сажийварад̇аа, аабад̣̇аабхааво, вассигасаадигааяа сагабхааво, асамаяз ниваасананд̇и имаани ниваасанаабад̇д̇ияаа жад̇д̇аари ан̇г̇аани. самудтаанаад̣̇ийни д̇ховаабанасигкаабад̣̇з вуд̇д̇анаяаанзваад̇и.
Sāvatthiyaṃ chabbaggiye bhikkhū ārabbha vassikasāṭikapariyesanavatthusmiṃ paññattaṃ, asādhāraṇapaññatti, anāṇattikaṃ, tikapācittiyaṃ, ūnakamāsaddhamāsesu atirekasaññino vematikassa vā dukkaṭaṃ, tathā satiyā vassikasāṭikāya naggassa kāyaṃ ovassāpayato. Pokkharaṇiyādīsu pana nhāyantassa vā acchinnacīvarassa vā naṭṭhacīvarassa vā ‘‘anivatthaṃ corā harantī’’ti evaṃ āpadāsu vā nivāsayato ummattakādīnañca anāpatti. Ettha ca vassikasāṭikāya attuddesikatā, asamaye pariyesanatā, tāya ca paṭilābhoti imāni tāva pariyesanāpattiyā tīṇi aṅgāni . Sacīvaratā, āpadābhāvo, vassikasāṭikāya sakabhāvo, asamaye nivāsananti imāni nivāsanāpattiyā cattāri aṅgāni. Samuṭṭhānādīni dhovāpanasikkhāpade vuttanayānevāti.
вассигасаадигасигкаабад̣̇аван̣н̣анаа нидтид̇аа.
Vassikasāṭikasikkhāpadavaṇṇanā niṭṭhitā.
5. жийвараажчинд̣̇анасигкаабад̣̇аван̣н̣анаа
5. Cīvaraacchindanasikkhāpadavaṇṇanā
бан̃жамз саамам̣ жийварам̣ д̣̇ад̇ваад̇и взяяааважжаад̣̇ийни бажжаасисамаано саяамзва д̣̇ад̇ваа. ажчинд̣̇зяяаад̇и взяяааважжаад̣̇ийни агаронд̇ам̣ д̣̇исваа сагасан̃н̃ааяа ажчинд̣̇анд̇асса вад̇т̇уг̇ан̣анааяа аабад̇д̇ияо. ажчинд̣̇аабзяяаад̇изд̇т̇а бана ‘‘ажчинд̣̇аа’’д̇и аан̣ад̇д̇ияаа д̣̇уггадам̣, ажчинд̣̇зсу яад̇д̇агаани аан̣ад̇д̇аани, д̇зсам̣ г̇ан̣анааяа аабад̇д̇ияо.
Pañcame sāmaṃ cīvaraṃ datvāti veyyāvaccādīni paccāsisamāno sayameva datvā. Acchindeyyāti veyyāvaccādīni akarontaṃ disvā sakasaññāya acchindantassa vatthugaṇanāya āpattiyo. Acchindāpeyyātiettha pana ‘‘acchindā’’ti āṇattiyā dukkaṭaṃ, acchindesu yattakāni āṇattāni, tesaṃ gaṇanāya āpattiyo.
саавад̇т̇ияам̣ убананд̣̇ам̣ аараб̣бха жийвараажчинд̣̇анавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, саан̣ад̇д̇игам̣, д̇игабаажид̇д̇ияам̣. анубасамбаннз убасамбаннасан̃н̃ино, взмад̇игасса, анубасамбаннасан̃н̃ино ваа, убасамбаннассааби вигаббанубаг̇абажчимажийварам̣ табзд̇ваа ан̃н̃ам̣ баригкаарам̣, анубасамбаннасса жа яам̣гин̃жи ажчинд̣̇ад̇о ваа д̣̇уггадам̣. д̇зна д̇удтзна ваа губид̇зна ваа д̣̇иннам̣ бана д̇асса виссаасам̣ ваа г̇ан̣ханд̇асса уммад̇д̇агаад̣̇ийнан̃жа анаабад̇д̇и. вигаббанубаг̇абажчимажийварад̇аа, саамам̣ д̣̇иннад̇аа, сагасан̃н̃ид̇аа, убасамбаннад̇аа, год̇хавасзна ажчинд̣̇анам̣ ваа ажчинд̣̇аабанам̣ ваад̇и имаанзд̇т̇а бан̃жа ан̇г̇аани. самудтаанаад̣̇ийни ад̣̇иннаад̣̇аанасад̣̇исаани ан̃н̃ад̇ра взд̣̇анааяа. взд̣̇анаа бана ид̇ха д̣̇угкавзд̣̇анааязваад̇и.
Sāvatthiyaṃ upanandaṃ ārabbha cīvaraacchindanavatthusmiṃ paññattaṃ, sādhāraṇapaññatti, sāṇattikaṃ, tikapācittiyaṃ. Anupasampanne upasampannasaññino, vematikassa, anupasampannasaññino vā, upasampannassāpi vikappanupagapacchimacīvaraṃ ṭhapetvā aññaṃ parikkhāraṃ, anupasampannassa ca yaṃkiñci acchindato vā dukkaṭaṃ. Tena tuṭṭhena vā kupitena vā dinnaṃ pana tassa vissāsaṃ vā gaṇhantassa ummattakādīnañca anāpatti. Vikappanupagapacchimacīvaratā, sāmaṃ dinnatā, sakasaññitā, upasampannatā, kodhavasena acchindanaṃ vā acchindāpanaṃ vāti imānettha pañca aṅgāni. Samuṭṭhānādīni adinnādānasadisāni aññatra vedanāya. Vedanā pana idha dukkhavedanāyevāti.
жийвараажчинд̣̇анасигкаабад̣̇аван̣н̣анаа нидтид̇аа.
Cīvaraacchindanasikkhāpadavaṇṇanā niṭṭhitā.
6. суд̇д̇авин̃н̃ад̇д̇исигкаабад̣̇аван̣н̣анаа
6. Suttaviññattisikkhāpadavaṇṇanā
чадтз суд̇д̇анд̇и чаб̣б̣ид̇хам̣ комасуд̇д̇аад̣̇им̣ ваа д̇зсам̣ ануломам̣ ваа. вин̃н̃аабзд̇ваад̇и жийварад̇т̇ааяа яаажид̇ваа. вааяаабзяяаад̇и ‘‘жийварам̣ мз, аавусо, вааяат̇аа’’д̇и агаббияааяа вин̃н̃ад̇д̇ияаа вааяаабзяяа. ниссаг̇г̇ияанд̇и звам̣ вааяаабзнд̇асса яо д̇анд̇авааяо жийваравааяанад̇т̇ам̣ д̇уривзмасаж̇ж̇анаад̣̇игз баяог̇з гарод̇и, д̇асса саб̣б̣аббаяог̇зсу д̣̇уггадам̣, бадилаабхзна ниссаг̇г̇ияам̣ ход̇и.
Chaṭṭhe suttanti chabbidhaṃ khomasuttādiṃ vā tesaṃ anulomaṃ vā. Viññāpetvāti cīvaratthāya yācitvā. Vāyāpeyyāti ‘‘cīvaraṃ me, āvuso, vāyathā’’ti akappiyāya viññattiyā vāyāpeyya. Nissaggiyanti evaṃ vāyāpentassa yo tantavāyo cīvaravāyanatthaṃ turivemasajjanādike payoge karoti, tassa sabbappayogesu dukkaṭaṃ, paṭilābhena nissaggiyaṃ hoti.
рааж̇аг̇ахз чаб̣б̣аг̇г̇ияз бхигкуу аараб̣бха жийваравааяаабанавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, вин̃н̃аабид̇асуд̇д̇ам̣ вин̃н̃аабид̇ад̇анд̇авааязна вааяаабзнд̇асса д̣̇ийгхад̇о вид̣̇ад̇т̇имад̇д̇з д̇ирияан̃жа хад̇т̇амад̇д̇з вийд̇з ниссаг̇г̇ияам̣ баажид̇д̇ияам̣. ид̇и яаава жийварам̣ вад̣дхад̇и, д̇аава иминаа бамаан̣зна аабад̇д̇ияо вад̣дханд̇и. д̇знзва бана авин̃н̃ад̇д̇ияаа лад̣̇д̇хасуд̇д̇ам̣ вааяаабзнд̇асса яат̇аа буб̣б̣з ниссаг̇г̇ияам̣ , звам̣ ид̇ха д̣̇уггадам̣. д̇знзва вин̃н̃ад̇д̇ан̃жа авин̃н̃ад̇д̇ан̃жа вааяаабзнд̇асса сажз вуд̇д̇аббамаан̣зна гзд̣̇аараб̣ад̣̇д̇хам̣ вияа жийварам̣ ход̇и, агаббияасуд̇д̇амаяз барижчзд̣̇з баажид̇д̇ияам̣, ид̇арасмим̣ д̇ат̇зва д̣̇уггадам̣. д̇ад̇о жз уунад̇араа барижчзд̣̇аа, саб̣б̣абарижчзд̣̇зсу д̣̇уггадаанзва. ат̇а зганд̇аригзна ваа суд̇д̇зна д̣̇ийгхад̇о ваа габбияам̣ д̇ирияам̣ агаббияам̣ гад̇ваа вийд̇ам̣ ход̇и, буб̣б̣з вуд̇д̇аббамаан̣аг̇ан̣анааяа д̣̇уггадаани. зд̇знзва убааязна габбияад̇анд̇авааязна агаббияасуд̇д̇з, габбияаагаббиязхи д̇анд̇авааязхи суд̇д̇зби габбияз агаббияз габбияаагаббияз жа аабад̇д̇ибхзд̣̇о взд̣̇ид̇аб̣б̣о. д̇игабаажид̇д̇ияам̣, авааяаабид̇з вааяаабид̇асан̃н̃ино взмад̇игасса ваа д̣̇уггадам̣. жийварасиб̣б̣анаааяог̇агааяаб̣анд̇ханаам̣саб̣ад̣̇д̇хагабад̇д̇ад̇т̇авигабариссааванаанам̣ ад̇т̇ааяа суд̇д̇ам̣ вин̃н̃аабзнд̇асса, н̃аад̇агаббаваарид̇зхи габбияасуд̇д̇ам̣ вааяаабзнд̇асса, ан̃н̃ассад̇т̇ааяа, ад̇д̇ано д̇ханзна, уммад̇д̇агаад̣̇ийнан̃жа анаабад̇д̇и, жийварад̇т̇ааяа вин̃н̃аабид̇асуд̇д̇ам̣, ад̇д̇уд̣̇д̣̇зсигад̇аа, агаббияад̇анд̇авааязна агаббияавин̃н̃ад̇д̇ияаа вааяаабананд̇и имаанзд̇т̇а д̇ийн̣и ан̇г̇аани. самудтаанаад̣̇ийни д̇ховаабанасигкаабад̣̇з вуд̇д̇анаяаанзваад̇и.
Rājagahe chabbaggiye bhikkhū ārabbha cīvaravāyāpanavatthusmiṃ paññattaṃ, sādhāraṇapaññatti, anāṇattikaṃ, viññāpitasuttaṃ viññāpitatantavāyena vāyāpentassa dīghato vidatthimatte tiriyañca hatthamatte vīte nissaggiyaṃ pācittiyaṃ. Iti yāva cīvaraṃ vaḍḍhati, tāva iminā pamāṇena āpattiyo vaḍḍhanti. Teneva pana aviññattiyā laddhasuttaṃ vāyāpentassa yathā pubbe nissaggiyaṃ , evaṃ idha dukkaṭaṃ. Teneva viññattañca aviññattañca vāyāpentassa sace vuttappamāṇena kedārabaddhaṃ viya cīvaraṃ hoti, akappiyasuttamaye paricchede pācittiyaṃ, itarasmiṃ tatheva dukkaṭaṃ. Tato ce ūnatarā paricchedā, sabbaparicchedesu dukkaṭāneva. Atha ekantarikena vā suttena dīghato vā kappiyaṃ tiriyaṃ akappiyaṃ katvā vītaṃ hoti, pubbe vuttappamāṇagaṇanāya dukkaṭāni. Eteneva upāyena kappiyatantavāyena akappiyasutte, kappiyākappiyehi tantavāyehi suttepi kappiye akappiye kappiyākappiye ca āpattibhedo veditabbo. Tikapācittiyaṃ, avāyāpite vāyāpitasaññino vematikassa vā dukkaṭaṃ. Cīvarasibbanaāyogakāyabandhanaaṃsabaddhakapattatthavikaparissāvanānaṃ atthāya suttaṃ viññāpentassa, ñātakappavāritehi kappiyasuttaṃ vāyāpentassa, aññassatthāya, attano dhanena, ummattakādīnañca anāpatti, cīvaratthāya viññāpitasuttaṃ, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni. Samuṭṭhānādīni dhovāpanasikkhāpade vuttanayānevāti.
суд̇д̇авин̃н̃ад̇д̇исигкаабад̣̇аван̣н̣анаа нидтид̇аа.
Suttaviññattisikkhāpadavaṇṇanā niṭṭhitā.
7. махаабзсагаарасигкаабад̣̇аван̣н̣анаа
7. Mahāpesakārasikkhāpadavaṇṇanā
сад̇д̇амз д̇ад̇ра жз со бхигкууд̇и яад̇ра г̇аамз ваа ниг̇амз ваа д̇анд̇авааяаа, д̇ад̇ра. буб̣б̣з аббаваарид̇од̇и жийварасаамигзхи аббаваарид̇о худ̇ваа . вигаббам̣ аабаж̇ж̇зяяаад̇и висидтагаббам̣ ад̇хигавид̇хаанам̣ аабаж̇ж̇зяяа. ид̣̇аани язнаагаарзна вигаббам̣ аабанно ход̇и, д̇ам̣ д̣̇ассзд̇ум̣ ид̣̇ам̣ ко, аавусод̇иаад̣̇и вуд̇д̇ам̣. д̇ад̇т̇а ааяад̇анд̇и д̣̇ийгхам̣. вид̇т̇ад̇анд̇и бут̇улам̣. аббид̇анд̇и гханам̣. сувийд̇анд̇и судту вийд̇ам̣, саб̣б̣адтаанзсу самам̣ гад̇ваа вийд̇ам̣. суббавааяид̇анд̇и судту бавааяид̇ам̣, саб̣б̣адтаанзсу самам̣ гад̇ваа д̇анд̇з басаарид̇ам̣. сувилзкид̇анд̇и лзканияаа судту вилзкид̇ам̣. сувид̇ажчид̇анд̇и гожчзна судту вид̇ажчид̇ам̣, судту нид̣̇д̇ход̇анд̇и ад̇т̇о. бин̣д̣абаад̇амад̇д̇амбийд̇и зд̇т̇а жа на бхигкуно бин̣д̣абаад̇ад̣̇аанамад̇д̇зна д̇ам̣ ниссаг̇г̇ияам̣ ход̇и, сажз бана д̇з д̇асса важанзна жийварасаамигаанам̣ хад̇т̇ад̇о суд̇д̇ам̣ г̇ахзд̇ваа ийсагамби ааяад̇ам̣ ваа вид̇т̇ад̇ам̣ ваа аббид̇ам̣ ваа гаронд̇и, ат̇а д̇зсам̣ баяог̇з бхигкуно д̣̇уггадам̣, бадилаабхзна ниссаг̇г̇ияам̣ ход̇и.
Sattame tatra ce so bhikkhūti yatra gāme vā nigame vā tantavāyā, tatra. Pubbe appavāritoti cīvarasāmikehi appavārito hutvā . Vikappaṃ āpajjeyyāti visiṭṭhakappaṃ adhikavidhānaṃ āpajjeyya. Idāni yenākārena vikappaṃ āpanno hoti, taṃ dassetuṃ idaṃ kho, āvusotiādi vuttaṃ. Tattha āyatanti dīghaṃ. Vitthatanti puthulaṃ. Appitanti ghanaṃ. Suvītanti suṭṭhu vītaṃ, sabbaṭṭhānesu samaṃ katvā vītaṃ. Suppavāyitanti suṭṭhu pavāyitaṃ, sabbaṭṭhānesu samaṃ katvā tante pasāritaṃ. Suvilekhitanti lekhaniyā suṭṭhu vilekhitaṃ. Suvitacchitanti kocchena suṭṭhu vitacchitaṃ, suṭṭhu niddhotanti attho. Piṇḍapātamattampīti ettha ca na bhikkhuno piṇḍapātadānamattena taṃ nissaggiyaṃ hoti, sace pana te tassa vacanena cīvarasāmikānaṃ hatthato suttaṃ gahetvā īsakampi āyataṃ vā vitthataṃ vā appitaṃ vā karonti, atha tesaṃ payoge bhikkhuno dukkaṭaṃ, paṭilābhena nissaggiyaṃ hoti.
саавад̇т̇ияам̣ убананд̣̇ам̣ аараб̣бха жийварз вигаббам̣ аабаж̇ж̇анавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣, н̃аад̇агз ан̃н̃аад̇агасан̃н̃ино взмад̇игасса ваа д̣̇уггадам̣. н̃аад̇агаббаваарид̇аанам̣ д̇анд̇авааязхи, ан̃н̃асса ваа ад̇т̇ааяа, ад̇д̇ано ваа д̇ханзна, махаг̇гхам̣ вааяаабзд̇угаамам̣ аббаг̇гхам̣ вааяаабзнд̇асса, уммад̇д̇агаад̣̇ийнан̃жа анаабад̇д̇и. ан̃н̃аад̇агааббаваарид̇аанам̣ д̇анд̇авааяз убасан̇гамид̇ваа вигаббамаабаж̇ж̇анад̇аа, жийварасса ад̇д̇уд̣̇д̣̇зсигад̇аа, д̇асса важанзна суд̇д̇авад̣дханам̣, жийвараббадилаабход̇и имаанзд̇т̇а жад̇д̇аари ан̇г̇аани. самудтаанаад̣̇ийни д̇ховаабанасигкаабад̣̇з вуд̇д̇анаяаанзваад̇и.
Sāvatthiyaṃ upanandaṃ ārabbha cīvare vikappaṃ āpajjanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, ñātake aññātakasaññino vematikassa vā dukkaṭaṃ. Ñātakappavāritānaṃ tantavāyehi, aññassa vā atthāya, attano vā dhanena, mahagghaṃ vāyāpetukāmaṃ appagghaṃ vāyāpentassa, ummattakādīnañca anāpatti. Aññātakaappavāritānaṃ tantavāye upasaṅkamitvā vikappamāpajjanatā, cīvarassa attuddesikatā, tassa vacanena suttavaḍḍhanaṃ, cīvarappaṭilābhoti imānettha cattāri aṅgāni. Samuṭṭhānādīni dhovāpanasikkhāpade vuttanayānevāti.
махаабзсагаарасигкаабад̣̇аван̣н̣анаа нидтид̇аа.
Mahāpesakārasikkhāpadavaṇṇanā niṭṭhitā.
8. ажжзгажийварасигкаабад̣̇аван̣н̣анаа
8. Accekacīvarasikkhāpadavaṇṇanā
адтамз д̣̇асаахаанааг̇ад̇анд̇и д̣̇аса ахаани д̣̇асаахам̣, д̇зна д̣̇асаахзна анааг̇ад̇аа д̣̇асаахаанааг̇ад̇аа, д̣̇асаахзна асамбад̇д̇аад̇и ад̇т̇о, д̇ам̣ д̣̇асаахаанааг̇ад̇ам̣, ажжанд̇асам̣яог̇авасзна бхуммад̇т̇з убаяог̇аважанам̣. гад̇д̇игад̇змаасигабун̣н̣аманд̇и батамагад̇д̇игабун̣н̣амам̣, ид̇хааби батамабад̣̇асса анубаяог̇ад̇аа буриманаязнзва бхуммад̇т̇з убаяог̇аважанам̣. ид̣̇ам̣ вуд̇д̇ам̣ ход̇и – яад̇о бадтааяа батамаббавааран̣аа ‘‘д̣̇асаахаанааг̇ад̇аа’’д̇и вужжад̇и, сажзби д̇аани д̣̇ивасаани ажжанд̇амзва бхигкуно ажжзгажийварам̣ уббаж̇ж̇зяяа, ‘‘ажжзгам̣ ид̣̇а’’нд̇и ж̇аанамаанзна бхигкунаа саб̣б̣амби бадиг̇г̇ахзд̇аб̣б̣анд̇и. д̇зна бавааран̣аамаасасса ж̇ун̣хабагкабан̃жамид̇о бадтааяа уббаннасса жийварасса нид̇хаанагаало д̣̇ассид̇о ход̇и. гааман̃жзса ‘‘д̣̇асаахабарамам̣ ад̇ирзгажийварам̣ д̇хаарзд̇аб̣б̣а’’нд̇ииминаава сид̣̇д̇хо, адтуббад̇д̇ивасзна бана абуб̣б̣ам̣ вияа ад̇т̇ам̣ д̣̇ассзд̇ваа сигкаабад̣̇ам̣ табид̇ам̣. ажжзгажийваранд̇и г̇амигаг̇илаанаг̇аб̣бхиниабхинавуббаннасад̣̇д̇хаанам̣ буг̇г̇алаанам̣ ан̃н̃ад̇арзна ‘‘вассааваасигам̣ д̣̇ассаамий’’д̇и звам̣ аарожзд̇ваа д̣̇иннам̣. сажз д̇ам̣ бурз бавааран̣ааяа вибхаж̇ид̇ам̣, язна г̇ахид̇ам̣, д̇зна вассажчзд̣̇о на гаад̇аб̣б̣о, гарод̇и жз, д̇ам̣ жийварам̣ сан̇гхигам̣ ход̇и. яаава жийварагааласамаяанд̇и анад̇т̇ад̇з гат̇инз яаава вассаанасса бажчимо маасо, ад̇т̇ад̇з гат̇инз яаава бан̃жа маасаа, д̇аава нигкибид̇аб̣б̣ам̣.
Aṭṭhame dasāhānāgatanti dasa ahāni dasāhaṃ, tena dasāhena anāgatā dasāhānāgatā, dasāhena asampattāti attho, taṃ dasāhānāgataṃ, accantasaṃyogavasena bhummatthe upayogavacanaṃ. Kattikatemāsikapuṇṇamanti paṭhamakattikapuṇṇamaṃ, idhāpi paṭhamapadassa anupayogatā purimanayeneva bhummatthe upayogavacanaṃ. Idaṃ vuttaṃ hoti – yato paṭṭhāya paṭhamappavāraṇā ‘‘dasāhānāgatā’’ti vuccati, sacepi tāni divasāni accantameva bhikkhuno accekacīvaraṃ uppajjeyya, ‘‘accekaṃ ida’’nti jānamānena bhikkhunā sabbampi paṭiggahetabbanti. Tena pavāraṇāmāsassa juṇhapakkhapañcamito paṭṭhāya uppannassa cīvarassa nidhānakālo dassito hoti. Kāmañcesa ‘‘dasāhaparamaṃ atirekacīvaraṃ dhāretabba’’ntiimināva siddho, aṭṭhuppattivasena pana apubbaṃ viya atthaṃ dassetvā sikkhāpadaṃ ṭhapitaṃ. Accekacīvaranti gamikagilānagabbhiniabhinavuppannasaddhānaṃ puggalānaṃ aññatarena ‘‘vassāvāsikaṃ dassāmī’’ti evaṃ ārocetvā dinnaṃ. Sace taṃ pure pavāraṇāya vibhajitaṃ, yena gahitaṃ, tena vassacchedo na kātabbo, karoti ce, taṃ cīvaraṃ saṅghikaṃ hoti. Yāva cīvarakālasamayanti anatthate kathine yāva vassānassa pacchimo māso, atthate kathine yāva pañca māsā, tāva nikkhipitabbaṃ.
саавад̇т̇ияам̣ самб̣ахулз бхигкуу аараб̣бха ажжзгажийварасса жийварагааласамаяам̣ ад̇иггаманавад̇т̇усмим̣ бан̃н̃ад̇д̇ам̣, сзсамзд̇т̇а жийвараваг̇г̇асса батамасигкаабад̣̇з вуд̇д̇анаязнзва взд̣̇ид̇аб̣б̣анд̇и.
Sāvatthiyaṃ sambahule bhikkhū ārabbha accekacīvarassa cīvarakālasamayaṃ atikkamanavatthusmiṃ paññattaṃ, sesamettha cīvaravaggassa paṭhamasikkhāpade vuttanayeneva veditabbanti.
ажжзгажийварасигкаабад̣̇аван̣н̣анаа нидтид̇аа.
Accekacīvarasikkhāpadavaṇṇanā niṭṭhitā.
9. саасан̇гасигкаабад̣̇аван̣н̣анаа
9. Sāsaṅkasikkhāpadavaṇṇanā
навамз убавассам̣ ко банаад̇и зд̇т̇а убавассанд̇и убавасса, убавасид̇ваад̇и вуд̇д̇ам̣ ход̇и, убасамбаж̇ж̇анд̇иаад̣̇ийсу (вибха. 570) вияа хзд̇т̇а анунаасиго д̣̇адтаб̣б̣о, вассам̣ убаг̇анд̇ваа васид̇ваа жаад̇и ад̇т̇о. имасса жа бад̣̇асса ‘‘д̇ат̇ааруубзсу бхигку сзнаасанзсу вихаранд̇о’’д̇ииминаа самб̣анд̇хо, ид̣̇ам̣ вуд̇д̇ам̣ ход̇и – вассам̣ убаг̇анд̇ваа васид̇ваа жа д̇ад̇о барам̣ бажчимагад̇д̇игабун̣н̣амабарияосаанагаалам̣ яаани ко бана д̇аани ааран̃н̃агаани…бз… анд̇арагхарз нигкибзяяаад̇и. д̇ад̇т̇а ааран̃н̃агаанийд̇и саб̣б̣абажчимаани ааробид̇зна аажарияад̇ханунаа г̇аамасса инд̣̇акийлад̇о бадтааяа бан̃жад̇ханусад̇аббамаан̣з бад̣̇зсз гад̇асзнаасанаани. сажз бана абаригкид̇д̇о г̇аамо ход̇и, баригкзбаарахадтаанад̇о бадтааяа минзд̇аб̣б̣ам̣. сажз вихаарасса баригкзбо ваа абаригкид̇д̇асса яам̣ г̇аамад̇о саб̣б̣абатамам̣ сзнаасанам̣ ваа жзд̇ияам̣ ваа б̣од̇хи ваа д̇хувасаннибаад̇адтаанам̣ ваа яаава , д̇ам̣ д̇аава багад̇имаг̇г̇зна минзд̇аб̣б̣ам̣, ан̃н̃ам̣ маг̇г̇ам̣ гаад̇ум̣, амаг̇г̇зна ваа минзд̇ум̣ на ваддад̇и. саасан̇гасаммад̇аанийд̇и жораад̣̇ийнам̣ нивидтогаасаад̣̇ид̣̇ассанзна ‘‘саасан̇гааний’’д̇и саммад̇аани, звам̣ сан̃н̃аад̇аанийд̇и ад̇т̇о. саха бадибхаязна саббадибхаяаани, жорзхи мануссаанам̣ хад̇авилуд̇д̇аагодид̇абхаавад̣̇ассанад̇о саннихид̇аб̣алавабхаяаанийд̇и ад̇т̇о.
Navame upavassaṃ kho panāti ettha upavassanti upavassa, upavasitvāti vuttaṃ hoti, upasampajjantiādīsu (vibha. 570) viya hettha anunāsiko daṭṭhabbo, vassaṃ upagantvā vasitvā cāti attho. Imassa ca padassa ‘‘tathārūpesu bhikkhu senāsanesu viharanto’’tiiminā sambandho, idaṃ vuttaṃ hoti – vassaṃ upagantvā vasitvā ca tato paraṃ pacchimakattikapuṇṇamapariyosānakālaṃ yāni kho pana tāni āraññakāni…pe… antaraghare nikkhipeyyāti. Tattha āraññakānīti sabbapacchimāni āropitena ācariyadhanunā gāmassa indakhīlato paṭṭhāya pañcadhanusatappamāṇe padese katasenāsanāni. Sace pana aparikkhitto gāmo hoti, parikkhepārahaṭṭhānato paṭṭhāya minetabbaṃ. Sace vihārassa parikkhepo vā aparikkhittassa yaṃ gāmato sabbapaṭhamaṃ senāsanaṃ vā cetiyaṃ vā bodhi vā dhuvasannipātaṭṭhānaṃ vā yāva , taṃ tāva pakatimaggena minetabbaṃ, aññaṃ maggaṃ kātuṃ, amaggena vā minetuṃ na vaṭṭati. Sāsaṅkasammatānīti corādīnaṃ niviṭṭhokāsādidassanena ‘‘sāsaṅkānī’’ti sammatāni, evaṃ saññātānīti attho. Saha paṭibhayena sappaṭibhayāni, corehi manussānaṃ hataviluttākoṭitabhāvadassanato sannihitabalavabhayānīti attho.
анд̇арагхарз нигкибзяяаад̇и ааран̃н̃агасса сзнаасанасса саманд̇аа саб̣б̣ад̣̇исаабхааг̇зсу ад̇д̇анаа абхиружид̇з г̇ожараг̇аамз нигкибзяяа. д̇ан̃жа ко сад̇ияаа ан̇г̇асамбад̇д̇ияаа, д̇ад̇рааяам̣ ан̇г̇асамбад̇д̇и – буримигааяа убаг̇анд̇ваа махаабавааран̣ааяа баваарид̇о ход̇и, ид̣̇амзгам̣ ан̇г̇ам̣. гад̇д̇игамаасоязва ход̇и, ид̣̇ам̣ д̣̇уд̇ияам̣ ан̇г̇ам̣. бан̃жад̇ханусад̇игабажчимаббамаан̣аяуд̇д̇ам̣ сзнаасанам̣ ход̇и, ид̣̇ам̣ д̇ад̇ияам̣ ан̇г̇ам̣. уунаббамаан̣з ваа г̇аавуд̇ад̇о ад̇ирзгаббамаан̣з ваа на лабхад̇и, яад̇ра хи бин̣д̣ааяа жарид̇ваа бхуд̇д̇авзлааяамзва буна вихаарам̣ саггаа ааг̇анд̇ум̣, д̇ад̣̇зва ид̇хаад̇хиббзд̇ам̣. саасан̇гасаббадибхаяамзва ход̇и, ид̣̇ам̣ жад̇уд̇т̇ам̣ ан̇г̇ам̣ ход̇ийд̇и. гожид̣̇зва бажжаяод̇и гин̃жид̣̇зва гааран̣ам̣. д̇зна жийварзнаад̇и д̇зна анд̇арагхарз нигкид̇д̇ажийварзна. виббаваасааяаад̇и вияог̇аваасааяа. д̇ад̇о жз уд̇д̇ари виббавасзяяаад̇и чаарад̇д̇ад̇о уд̇д̇ари д̇асмим̣ сзнаасанз сад̇д̇амам̣ арун̣ам̣ удтаабзяяаад̇и ад̇т̇о, д̇ат̇аа асаггонд̇зна бана г̇аамасиймам̣ оггамид̇ваа сабхааяам̣ ваа яад̇т̇а гад̇т̇ажи ваа васид̇ваа жийвараббавад̇д̇им̣ н̃ад̇ваа баггамид̇ум̣ ваддад̇и. ан̃н̃ад̇ра бхигкусаммуд̇ияаад̇и яам̣ сан̇гхо г̇илаанасса бхигкуно жийварзна виббаваасасаммуд̇им̣ д̣̇зд̇и, д̇ам̣ табзд̇ваа алад̣̇д̇хасаммуд̇игасса ад̇ирзгачаарад̇д̇ам̣ виббавасад̇о ниссаг̇г̇ияам̣ ход̇и.
Antaraghare nikkhipeyyāti āraññakassa senāsanassa samantā sabbadisābhāgesu attanā abhirucite gocaragāme nikkhipeyya. Tañca kho satiyā aṅgasampattiyā, tatrāyaṃ aṅgasampatti – purimikāya upagantvā mahāpavāraṇāya pavārito hoti, idamekaṃ aṅgaṃ. Kattikamāsoyeva hoti, idaṃ dutiyaṃ aṅgaṃ. Pañcadhanusatikapacchimappamāṇayuttaṃ senāsanaṃ hoti, idaṃ tatiyaṃ aṅgaṃ. Ūnappamāṇe vā gāvutato atirekappamāṇe vā na labhati, yatra hi piṇḍāya caritvā bhuttavelāyameva puna vihāraṃ sakkā āgantuṃ, tadeva idhādhippetaṃ. Sāsaṅkasappaṭibhayameva hoti, idaṃ catutthaṃ aṅgaṃ hotīti. Kocideva paccayoti kiñcideva kāraṇaṃ. Tena cīvarenāti tena antaraghare nikkhittacīvarena. Vippavāsāyāti viyogavāsāya. Tato ce uttari vippavaseyyāti chārattato uttari tasmiṃ senāsane sattamaṃ aruṇaṃ uṭṭhāpeyyāti attho, tathā asakkontena pana gāmasīmaṃ okkamitvā sabhāyaṃ vā yattha katthaci vā vasitvā cīvarappavattiṃ ñatvā pakkamituṃ vaṭṭati. Aññatra bhikkhusammutiyāti yaṃ saṅgho gilānassa bhikkhuno cīvarena vippavāsasammutiṃ deti, taṃ ṭhapetvā aladdhasammutikassa atirekachārattaṃ vippavasato nissaggiyaṃ hoti.
саавад̇т̇ияам̣ самб̣ахулз бхигкуу аараб̣бха жийваравиббаваасавад̇т̇усмим̣ бан̃н̃ад̇д̇ам̣, сзсамзд̇т̇а жийвараваг̇г̇асса д̣̇уд̇ияасигкаабад̣̇з вуд̇д̇анаязнзва взд̣̇ид̇аб̣б̣анд̇и.
Sāvatthiyaṃ sambahule bhikkhū ārabbha cīvaravippavāsavatthusmiṃ paññattaṃ, sesamettha cīvaravaggassa dutiyasikkhāpade vuttanayeneva veditabbanti.
саасан̇гасигкаабад̣̇аван̣н̣анаа нидтид̇аа.
Sāsaṅkasikkhāpadavaṇṇanā niṭṭhitā.
10. барин̣ад̇асигкаабад̣̇аван̣н̣анаа
10. Pariṇatasikkhāpadavaṇṇanā
д̣̇асамз сан̇гхиганд̇и сан̇гхасса санд̇агам̣. со хи сан̇гхасса барин̣ад̇ад̇д̇аа хад̇т̇з анаарул̣хоби згзна барияааязна сан̇гхасанд̇аго ход̇и. лаабханд̇и лабхид̇аб̣б̣ам̣ жийвараад̣̇ивад̇т̇ум̣. барин̣ад̇анд̇и ‘‘д̣̇ассаама гариссаамаа’’д̇и важийбхзд̣̇зна ваа хад̇т̇амуд̣̇д̣̇ааяа ваа сан̇гхасса ниннам̣ худ̇ваа тид̇ам̣. ад̇д̇ано барин̣аамзяяаад̇и ‘‘ид̣̇ам̣ маяхам̣ д̣̇зт̇аа’’д̇иаад̣̇ийни вад̣̇анд̇о ад̇д̇аниннам̣ гарзяяа. сажз бана сан̇гхасса д̣̇иннам̣ ход̇и, д̇ам̣ г̇ахзд̇ум̣ на ваддад̇и, сан̇гхассзва д̣̇аад̇аб̣б̣ам̣. барин̣ад̇ам̣ бана сахад̇хаммигаанам̣ ваа г̇ихийнам̣ ваа анд̇амасо маад̇усанд̇агамби ад̇д̇ано барин̣аамзнд̇асса баяог̇з д̣̇уггадам̣, бадилаабхзна ниссаг̇г̇ияам̣ ход̇и.
Dasame saṅghikanti saṅghassa santakaṃ. So hi saṅghassa pariṇatattā hatthe anāruḷhopi ekena pariyāyena saṅghasantako hoti. Lābhanti labhitabbaṃ cīvarādivatthuṃ. Pariṇatanti ‘‘dassāma karissāmā’’ti vacībhedena vā hatthamuddāya vā saṅghassa ninnaṃ hutvā ṭhitaṃ. Attano pariṇāmeyyāti ‘‘idaṃ mayhaṃ dethā’’tiādīni vadanto attaninnaṃ kareyya. Sace pana saṅghassa dinnaṃ hoti, taṃ gahetuṃ na vaṭṭati, saṅghasseva dātabbaṃ. Pariṇataṃ pana sahadhammikānaṃ vā gihīnaṃ vā antamaso mātusantakampi attano pariṇāmentassa payoge dukkaṭaṃ, paṭilābhena nissaggiyaṃ hoti.
саавад̇т̇ияам̣ чаб̣б̣аг̇г̇ияз бхигкуу аараб̣бха барин̣ааманавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, барин̣ад̇з взмад̇игасса, абарин̣ад̇з барин̣ад̇асан̃н̃ино жзва взмад̇игасса жа, сан̇гхажзд̇ияабуг̇г̇алзсу яасса гассажи барин̣ад̇ам̣ ан̃н̃асан̇гхаад̣̇ийнам̣ барин̣аамзнд̇асса жа д̣̇уггадам̣. абарин̣ад̇асан̃н̃ино, ‘‘гад̇т̇а д̣̇змаа’’д̇и бужчид̇з ‘‘яад̇т̇а д̇умхаагам̣ жид̇д̇ам̣ басийд̣̇ад̇и, д̇ад̇т̇а д̣̇зт̇а, д̇умхаагам̣ д̣̇зяяад̇хаммо барибхог̇ам̣ ваа лабхзяяаа’’д̇иаад̣̇ийни вад̣̇анд̇асса, уммад̇д̇агаад̣̇ийнан̃жа анаабад̇д̇и. сан̇гхз барин̣ад̇абхааво, д̇ам̣ н̃ад̇ваа ад̇д̇ано барин̣ааманам̣, бадилаабход̇и имаанзд̇т̇а д̇ийн̣и ан̇г̇аани. самудтаанаад̣̇ийни ад̣̇иннаад̣̇аанасад̣̇исаанийд̇и.
Sāvatthiyaṃ chabbaggiye bhikkhū ārabbha pariṇāmanavatthusmiṃ paññattaṃ, sādhāraṇapaññatti, anāṇattikaṃ, pariṇate vematikassa, apariṇate pariṇatasaññino ceva vematikassa ca, saṅghacetiyapuggalesu yassa kassaci pariṇataṃ aññasaṅghādīnaṃ pariṇāmentassa ca dukkaṭaṃ. Apariṇatasaññino, ‘‘kattha demā’’ti pucchite ‘‘yattha tumhākaṃ cittaṃ pasīdati, tattha detha, tumhākaṃ deyyadhammo paribhogaṃ vā labheyyā’’tiādīni vadantassa, ummattakādīnañca anāpatti. Saṅghe pariṇatabhāvo, taṃ ñatvā attano pariṇāmanaṃ, paṭilābhoti imānettha tīṇi aṅgāni. Samuṭṭhānādīni adinnādānasadisānīti.
барин̣ад̇асигкаабад̣̇аван̣н̣анаа нидтид̇аа.
Pariṇatasikkhāpadavaṇṇanā niṭṭhitā.
бад̇д̇аваг̇г̇о д̇ад̇ияо.
Pattavaggo tatiyo.
ид̇и ган̇каавид̇аран̣ияаа баад̇имогкаван̣н̣анааяа
Iti kaṅkhāvitaraṇiyā pātimokkhavaṇṇanāya
ниссаг̇г̇ияабаажид̇д̇ияаван̣н̣анаа нидтид̇аа.
Nissaggiyapācittiyavaṇṇanā niṭṭhitā.
