| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
3. පත්‌තවග්‌ගො
3. Pattavaggo
44. අතිරෙකපත්‌තං දසාහං අතික්‌කාමෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ අතිරෙකපත්‌තං ධාරෙසුං, තස්‌මිං වත්‌ථුස්‌මිං. එකා පඤ්‌ඤත්‌ති, එකා අනුපඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති – සියා කායතො ච වාචතො ච සමුට්‌ඨාති, න චිත්‌තතො; සියා කායතො ච වාචතො ච චිත්‌තතො ච සමුට්‌ඨාති…පෙ.….
44. Atirekapattaṃ dasāhaṃ atikkāmentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū atirekapattaṃ dhāresuṃ, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato ca vācato ca samuṭṭhāti, na cittato; siyā kāyato ca vācato ca cittato ca samuṭṭhāti…pe….
45. ඌනපඤ්‌චබන්‌ධනෙන පත්‌තෙන අඤ්‌ඤං නවං පත්‌තං චෙතාපෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සක්‌කෙසු පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ අප්‌පමත්‌තකෙනපි භින්‌නෙන අප්‌පමත්‌තකෙනපි ඛණ්‌ඩෙන විලිඛිතමත්‌තෙනපි බහූ පත්‌තෙ විඤ්‌ඤාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
45. Ūnapañcabandhanena pattena aññaṃ navaṃ pattaṃ cetāpentassa nissaggiyaṃ pācittiyaṃ kattha paññattanti? Sakkesu paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū appamattakenapi bhinnena appamattakenapi khaṇḍena vilikhitamattenapi bahū patte viññāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
46. භෙසජ්‌ජානි පටිග්‌ගහෙත්‌වා සත්‌තාහං අතික්‌කාමෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛූ භෙසජ්‌ජානි පටිග්‌ගහෙත්‌වා සත්‌තාහං අතික්‌කාමෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති කථිනකෙ…පෙ.….
46. Bhesajjāni paṭiggahetvā sattāhaṃ atikkāmentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū bhesajjāni paṭiggahetvā sattāhaṃ atikkāmesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti kathinake…pe….
47. අතිරෙකමාසෙ සෙසෙ ගිම්‌හානෙ වස්‌සිකසාටිකචීවරං පරියෙසන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ අතිරෙකමාසෙ සෙසෙ ගිම්‌හානෙ වස්‌සිකසාටිකචීවරං පරියෙසිංසු, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
47. Atirekamāse sese gimhāne vassikasāṭikacīvaraṃ pariyesantassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū atirekamāse sese gimhāne vassikasāṭikacīvaraṃ pariyesiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
48. භික්‌ඛුස්‌ස සාමං චීවරං දත්‌වා කුපිතෙන අනත්‌තමනෙන අච්‌ඡින්‌දන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ආයස්‌මන්‌තං උපනන්‌දං සක්‍යපුත්‌තං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා උපනන්‌දො සක්‍යපුත්‌තො භික්‌ඛුස්‌ස සාමං චීවරං දත්‌වා කුපිතො අනත්‌තමනො අච්‌ඡින්‌දි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
48. Bhikkhussa sāmaṃ cīvaraṃ datvā kupitena anattamanena acchindantassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto bhikkhussa sāmaṃ cīvaraṃ datvā kupito anattamano acchindi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
49. සාමං සුත්‌තං විඤ්‌ඤාපෙත්‌වා තන්‌තවායෙහි චීවරං වායාපෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? රාජගහෙ පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ සාමං සුත්‌තං විඤ්‌ඤාපෙත්‌වා තන්‌තවායෙහි චීවරං වායාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
49. Sāmaṃ suttaṃ viññāpetvā tantavāyehi cīvaraṃ vāyāpentassa nissaggiyaṃ pācittiyaṃ kattha paññattanti? Rājagahe paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū sāmaṃ suttaṃ viññāpetvā tantavāyehi cīvaraṃ vāyāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
50. පුබ්‌බෙ අප්‌පවාරිතස්‌ස අඤ්‌ඤාතකස්‌ස ගහපතිකස්‌ස තන්‌තවායෙ උපසඞ්‌කමිත්‌වා චීවරෙ විකප්‌පං ආපජ්‌ජන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ආයස්‌මන්‌තං උපනන්‌දං සක්‍යපුත්‌තං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා උපනන්‌දො සක්‍යපුත්‌තො පුබ්‌බෙ අප්‌පවාරිතො අඤ්‌ඤාතකස්‌ස ගහපතිකස්‌ස තන්‌තවායෙ උපසඞ්‌කමිත්‌වා චීවරෙ විකප්‌පං ආපජ්‌ජි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
50. Pubbe appavāritassa aññātakassa gahapatikassa tantavāye upasaṅkamitvā cīvare vikappaṃ āpajjantassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto pubbe appavārito aññātakassa gahapatikassa tantavāye upasaṅkamitvā cīvare vikappaṃ āpajji, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
51. අච්‌චෙකචීවරං පටිග්‌ගහෙත්‌වා චීවරකාලසමයං අතික්‌කාමෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛූ අච්‌චෙකචීවරං පටිග්‌ගහෙත්‌වා චීවරකාලසමයං අතික්‌කාමෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති කථිනකෙ…පෙ.….
51. Accekacīvaraṃ paṭiggahetvā cīvarakālasamayaṃ atikkāmentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū accekacīvaraṃ paṭiggahetvā cīvarakālasamayaṃ atikkāmesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti kathinake…pe….
52. තිණ්‌ණං චීවරානං අඤ්‌ඤතරං චීවරං අන්‌තරඝරෙ නික්‌ඛිපිත්‌වා අතිරෙකඡාරත්‌තං විප්‌පවසන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛූ තිණ්‌ණං චීවරානං අඤ්‌ඤතරං චීවරං අන්‌තරඝරෙ නික්‌ඛිපිත්‌වා අතිරෙකඡාරත්‌තං විප්‌පවසිංසු, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති කථිනකෙ…පෙ.….
52. Tiṇṇaṃ cīvarānaṃ aññataraṃ cīvaraṃ antaraghare nikkhipitvā atirekachārattaṃ vippavasantassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū tiṇṇaṃ cīvarānaṃ aññataraṃ cīvaraṃ antaraghare nikkhipitvā atirekachārattaṃ vippavasiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti kathinake…pe….
53. ජානං සඞ්‌ඝිකං ලාභං පරිණතං අත්‌තනො පරිණාමෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ ජානං සඞ්‌ඝිකං ලාභං පරිණතං අත්‌තනො පරිණාමෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
53. Jānaṃ saṅghikaṃ lābhaṃ pariṇataṃ attano pariṇāmentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū jānaṃ saṅghikaṃ lābhaṃ pariṇataṃ attano pariṇāmesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
පත්‌තවග්‌ගො තතියො.
Pattavaggo tatiyo.
තිංස නිස්‌සග්‌ගියා පාචිත්‌තියා නිට්‌ඨිතා.
Tiṃsa nissaggiyā pācittiyā niṭṭhitā.
තස්‌සුද්‌දානං –
Tassuddānaṃ –
දසෙකරත්‌තිමාසො ච, ධොවනඤ්‌ච පටිග්‌ගහො;
Dasekarattimāso ca, dhovanañca paṭiggaho;
කොසියා සුද්‌ධද්‌වෙභාගා, ඡබ්‌බස්‌සානි නිසීදනං;
Kosiyā suddhadvebhāgā, chabbassāni nisīdanaṃ;
ද්‌වෙ ච ලොමානි උග්‌ගණ්‌හෙ, උභො නානප්‌පකාරකා.
Dve ca lomāni uggaṇhe, ubho nānappakārakā.
ද්‌වෙ ච පත්‌තානි භෙසජ්‌ජං, වස්‌සිකා දානපඤ්‌චමං;
Dve ca pattāni bhesajjaṃ, vassikā dānapañcamaṃ;
සාමං වායාපනච්‌චෙකො, සාසඞ්‌කං සඞ්‌ඝිකෙන චාති.
Sāmaṃ vāyāpanacceko, sāsaṅkaṃ saṅghikena cāti.
Footnotes:
