| Library / Tipiṭaka / തിപിടക • Tipiṭaka / പരിവാരപാളി • Parivārapāḷi |
൩. പത്തവഗ്ഗോ
3. Pattavaggo
൧൬൪. അതിരേകപത്തം ദസാഹം അതിക്കാമേന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.
164. Atirekapattaṃ dasāhaṃ atikkāmento ekaṃ āpattiṃ āpajjati. Nissaggiyaṃ pācittiyaṃ.
ഊനപഞ്ചബന്ധനേന പത്തേന അഞ്ഞം നവം പത്തം ചേതാപേന്തോ ദ്വേ ആപത്തിയോ ആപജ്ജതി. ചേതാപേതി, പയോഗേ ദുക്കടം; ചേതാപിതേ നിസ്സഗ്ഗിയം പാചിത്തിയം.
Ūnapañcabandhanena pattena aññaṃ navaṃ pattaṃ cetāpento dve āpattiyo āpajjati. Cetāpeti, payoge dukkaṭaṃ; cetāpite nissaggiyaṃ pācittiyaṃ.
ഭേസജ്ജാനി പടിഗ്ഗഹേത്വാ സത്താഹം അതിക്കാമേന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.
Bhesajjāni paṭiggahetvā sattāhaṃ atikkāmento ekaṃ āpattiṃ āpajjati. Nissaggiyaṃ pācittiyaṃ.
അതിരേകമാസേ സേസേ ഗിമ്ഹാനേ വസ്സികസാടികചീവരം പരിയേസന്തോ ദ്വേ ആപത്തിയോ ആപജ്ജതി. പരിയേസതി, പയോഗേ ദുക്കടം; പരിയിട്ഠേ നിസ്സഗ്ഗിയം പാചിത്തിയം.
Atirekamāse sese gimhāne vassikasāṭikacīvaraṃ pariyesanto dve āpattiyo āpajjati. Pariyesati, payoge dukkaṭaṃ; pariyiṭṭhe nissaggiyaṃ pācittiyaṃ.
ഭിക്ഖുസ്സ സാമം ചീവരം ദത്വാ കുപിതോ അനത്തമനോ അച്ഛിന്ദന്തോ ദ്വേ ആപത്തിയോ ആപജ്ജതി. അച്ഛിന്ദതി, പയോഗേ ദുക്കടം; അച്ഛിന്നേ നിസ്സഗ്ഗിയം പാചിത്തിയം.
Bhikkhussa sāmaṃ cīvaraṃ datvā kupito anattamano acchindanto dve āpattiyo āpajjati. Acchindati, payoge dukkaṭaṃ; acchinne nissaggiyaṃ pācittiyaṃ.
സാമം സുത്തം വിഞ്ഞാപേത്വാ തന്തവായേഹി ചീവരം വായാപേന്തോ ദ്വേ ആപത്തിയോ ആപജ്ജതി. വായാപേതി, പയോഗേ ദുക്കടം; വായാപിതേ നിസ്സഗ്ഗിയം പാചിത്തിയം.
Sāmaṃ suttaṃ viññāpetvā tantavāyehi cīvaraṃ vāyāpento dve āpattiyo āpajjati. Vāyāpeti, payoge dukkaṭaṃ; vāyāpite nissaggiyaṃ pācittiyaṃ.
പുബ്ബേ അപ്പവാരിതോ അഞ്ഞാതകസ്സ ഗഹപതികസ്സ തന്തവായേ ഉപസങ്കമിത്വാ ചീവരേ വികപ്പം ആപജ്ജന്തോ ദ്വേ ആപത്തിയോ ആപജ്ജതി. വികപ്പം ആപജ്ജതി, പയോഗേ ദുക്കടം; വികപ്പം ആപന്നേ നിസ്സഗ്ഗിയം പാചിത്തിയം.
Pubbe appavārito aññātakassa gahapatikassa tantavāye upasaṅkamitvā cīvare vikappaṃ āpajjanto dve āpattiyo āpajjati. Vikappaṃ āpajjati, payoge dukkaṭaṃ; vikappaṃ āpanne nissaggiyaṃ pācittiyaṃ.
അച്ചേകചീവരം പടിഗ്ഗഹേത്വാ ചീവരകാലസമയം അതിക്കാമേന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.
Accekacīvaraṃ paṭiggahetvā cīvarakālasamayaṃ atikkāmento ekaṃ āpattiṃ āpajjati. Nissaggiyaṃ pācittiyaṃ.
തിണ്ണം ചീവരാനം അഞ്ഞതരം ചീവരം അന്തരഘരേ നിക്ഖിപിത്വാ അതിരേകഛാരത്തം വിപ്പവസന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.
Tiṇṇaṃ cīvarānaṃ aññataraṃ cīvaraṃ antaraghare nikkhipitvā atirekachārattaṃ vippavasanto ekaṃ āpattiṃ āpajjati. Nissaggiyaṃ pācittiyaṃ.
ജാനം സങ്ഘികം ലാഭം പരിണതം അത്തനോ പരിണാമേന്തോ ദ്വേ ആപത്തിയോ ആപജ്ജതി. പരിണാമേതി, പയോഗേ ദുക്കടം; പരിണാമിതേ നിസ്സഗ്ഗിയം പാചിത്തിയം.
Jānaṃ saṅghikaṃ lābhaṃ pariṇataṃ attano pariṇāmento dve āpattiyo āpajjati. Pariṇāmeti, payoge dukkaṭaṃ; pariṇāmite nissaggiyaṃ pācittiyaṃ.
പത്തവഗ്ഗോ തതിയോ.
Pattavaggo tatiyo.
തിംസ നിസ്സഗ്ഗിയാ പാചിത്തിയാ നിട്ഠിതാ.
Tiṃsa nissaggiyā pācittiyā niṭṭhitā.
