| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၉. ဧကူနဝီသတိမဝဂ္ဂော
19. Ekūnavīsatimavaggo
(၁၈၉) ၄. ပတ္တိကထာ
(189) 4. Pattikathā
၈၃၇. ပတ္တိ အသင္ခတာတိ? အာမန္တာ။ နိဗ္ဗာနံ တာဏံ လေဏံ သရဏံ ပရာယဏံ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ ပတ္တိ အသင္ခတာ, နိဗ္ဗာနံ အသင္ခတန္တိ? အာမန္တာ။ ဒ္ဝေ အသင္ခတာနီတိ? န ဟေဝံ ဝတ္တဗ္ဗေ။ပေ.။ ဒ္ဝေ အသင္ခတာနီတိ? အာမန္တာ။ ဒ္ဝေ တာဏာနိ။ပေ.။ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။။
837. Patti asaṅkhatāti? Āmantā. Nibbānaṃ tāṇaṃ leṇaṃ saraṇaṃ parāyaṇaṃ accutaṃ amatanti? Na hevaṃ vattabbe…pe… patti asaṅkhatā, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
၈၃၈. စီဝရသ္သ ပတ္တိ အသင္ခတာတိ? အာမန္တာ။ နိဗ္ဗာနံ။ပေ.။ အမတန္တိ? န ဟေဝံ ဝတ္တဗ္ဗေ။ပေ.။ စီဝရသ္သ ပတ္တိ အသင္ခတာ, နိဗ္ဗာနံ အသင္ခတန္တိ? အာမန္တာ။ ဒ္ဝေ အသင္ခတာနီတိ? န ဟေဝံ ဝတ္တဗ္ဗေ။ပေ.။ ဒ္ဝေ အသင္ခတာနီတိ? အာမန္တာ။ ဒ္ဝေ တာဏာနိ။ပေ.။ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။ ပိဏ္ဍပာတသ္သ။ပေ.။ သေနာသနသ္သ။ပေ.။ ဂိလာနပစ္စယဘေသဇ္ဇပရိက္ခာရသ္သ ပတ္တိ အသင္ခတာတိ? အာမန္တာ။ နိဗ္ဗာနံ။ပေ.။ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ ဂိလာနပစ္စယဘေသဇ္ဇပရိက္ခာရသ္သ ပတ္တိ အသင္ခတာ, နိဗ္ဗာနံ အသင္ခတန္တိ? အာမန္တာ။ ဒ္ဝေ အသင္ခတာနီတိ? န ဟေဝံ ဝတ္တဗ္ဗေ။ပေ.။ ဒ္ဝေ အသင္ခတာနီတိ? အာမန္တာ။ ဒ္ဝေ တာဏာနိ။ပေ.။ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။။
838. Cīvarassa patti asaṅkhatāti? Āmantā. Nibbānaṃ…pe… amatanti? Na hevaṃ vattabbe…pe… cīvarassa patti asaṅkhatā, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe… piṇḍapātassa…pe… senāsanassa…pe… gilānapaccayabhesajjaparikkhārassa patti asaṅkhatāti? Āmantā. Nibbānaṃ…pe… accutaṃ amatanti? Na hevaṃ vattabbe…pe… gilānapaccayabhesajjaparikkhārassa patti asaṅkhatā, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
စီဝရသ္သ ပတ္တိ အသင္ခတာ။ပေ.။ ပိဏ္ဍပာတသ္သ။ပေ.။ သေနာသနသ္သ။ပေ.။ ဂိလာနပစ္စယဘေသဇ္ဇပရိက္ခာရသ္သ ပတ္တိ အသင္ခတာ, နိဗ္ဗာနံ အသင္ခတန္တိ? အာမန္တာ။ ပဉ္စ အသင္ခတာနီတိ? န ဟေဝံ ဝတ္တဗ္ဗေ။ပေ.။ ပဉ္စ အသင္ခတာနီတိ? အာမန္တာ။ ပဉ္စ တာဏာနိ။ပေ.။ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။။
Cīvarassa patti asaṅkhatā…pe… piṇḍapātassa…pe… senāsanassa…pe… gilānapaccayabhesajjaparikkhārassa patti asaṅkhatā, nibbānaṃ asaṅkhatanti? Āmantā. Pañca asaṅkhatānīti? Na hevaṃ vattabbe…pe… pañca asaṅkhatānīti? Āmantā. Pañca tāṇāni…pe… antarikā vāti? Na hevaṃ vattabbe…pe….
၈၃၉. ပဌမသ္သ ဈာနသ္သ ပတ္တိ အသင္ခတာ (ဧဝံ သဗ္ဗံ ဝိတ္ထာရေတဗ္ဗံ) ဒုတိယသ္သ ဈာနသ္သ။ တတိယသ္သ ဈာနသ္သ။ စတုတ္ထသ္သ ဈာနသ္သ။ အာကာသာနဉ္စာယတနသ္သ။ ဝိညာဏဉ္စာယတနသ္သ။ အာကိဉ္စညာယတနသ္သ။ နေဝသညာနာသညာယတနသ္သ။ သောတာပတ္တိမဂ္ဂသ္သ။ သောတာပတ္တိဖလသ္သ။ သကဒာဂာမိမဂ္ဂသ္သ။ သကဒာဂာမိဖလသ္သ။ အနာဂာမိမဂ္ဂသ္သ။ အနာဂာမိဖလသ္သ။ အရဟတ္တမဂ္ဂသ္သ။ အရဟတ္တဖလသ္သ ပတ္တိ အသင္ခတာတိ? အာမန္တာ။ နိဗ္ဗာနံ။ပေ.။ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ အရဟတ္တဖလသ္သ ပတ္တိ အသင္ခတာ, နိဗ္ဗာနံ အသင္ခတန္တိ? အာမန္တာ ။ ဒ္ဝေ အသင္ခတာနီတိ? န ဟေဝံ ဝတ္တဗ္ဗေ။ပေ.။ ဒ္ဝေ အသင္ခတာနီတိ? အာမန္တာ။ ဒ္ဝေ တာဏာနိ။ပေ.။ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။။
839. Paṭhamassa jhānassa patti asaṅkhatā (evaṃ sabbaṃ vitthāretabbaṃ) dutiyassa jhānassa… tatiyassa jhānassa… catutthassa jhānassa… ākāsānañcāyatanassa… viññāṇañcāyatanassa… ākiñcaññāyatanassa… nevasaññānāsaññāyatanassa… sotāpattimaggassa… sotāpattiphalassa… sakadāgāmimaggassa… sakadāgāmiphalassa… anāgāmimaggassa… anāgāmiphalassa… arahattamaggassa… arahattaphalassa patti asaṅkhatāti? Āmantā. Nibbānaṃ…pe… accutaṃ amatanti? Na hevaṃ vattabbe…pe… arahattaphalassa patti asaṅkhatā, nibbānaṃ asaṅkhatanti? Āmantā . Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
သောတာပတ္တိမဂ္ဂသ္သ ပတ္တိ အသင္ခတာ။ သောတာပတ္တိဖလသ္သ ပတ္တိ အသင္ခတာ။ အရဟတ္တမဂ္ဂသ္သ ပတ္တိ အသင္ခတာ။ အရဟတ္တဖလသ္သ ပတ္တိ အသင္ခတာ။ နိဗ္ဗာနံ အသင္ခတန္တိ? အာမန္တာ။ နဝ အသင္ခတာနီတိ? န ဟေဝံ ဝတ္တဗ္ဗေ။ပေ.။ နဝ အသင္ခတာနီတိ? အာမန္တာ။ နဝ တာဏာနိ။ပေ.။ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။။
Sotāpattimaggassa patti asaṅkhatā… sotāpattiphalassa patti asaṅkhatā… arahattamaggassa patti asaṅkhatā… arahattaphalassa patti asaṅkhatā… nibbānaṃ asaṅkhatanti? Āmantā. Nava asaṅkhatānīti? Na hevaṃ vattabbe…pe… nava asaṅkhatānīti? Āmantā. Nava tāṇāni…pe… antarikā vāti? Na hevaṃ vattabbe…pe….
၈၄၀. န ဝတ္တဗ္ဗံ – ပတ္တိ အသင္ခတာတိ? အာမန္တာ။ ပတ္တိ ရူပံ ။ ဝေဒနာ။ သညာ။ သင္ခာရာ။ ဝိညာဏန္တိ? န ဟေဝံ ဝတ္တဗ္ဗေ။ တေန ဟိ ပတ္တိ အသင္ခတာတိ။
840. Na vattabbaṃ – patti asaṅkhatāti? Āmantā. Patti rūpaṃ … vedanā… saññā… saṅkhārā… viññāṇanti? Na hevaṃ vattabbe. Tena hi patti asaṅkhatāti.
ပတ္တိကထာ နိဋ္ဌိတာ။
Pattikathā niṭṭhitā.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၄. ပတ္တိကထာဝဏ္ဏနာ • 4. Pattikathāvaṇṇanā
