| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၄. ပတ္တိကထာဝဏ္ဏနာ
4. Pattikathāvaṇṇanā
၈၃၇-၈၄၀. ဣဒာနိ ပတ္တိကထာ နာမ ဟောတိ။ တတ္ထ ‘‘ယံ ယံ ပဋိလဗ္ဘတိ, တသ္သ တသ္သ ပဋိလာဘော ပတ္တိ နာမ။ သာ စ အသင္ခတာ’’တိ ယေသံ လဒ္ဓိ, သေယ္ယထာပိ ပုဗ္ဗသေလိယာနညေဝ; တေ သန္ဓာယ ပုစ္ဆာ သကဝာဒိသ္သ, ပဋိညာ ဣတရသ္သ။ သေသမိဓာပိ ဟေဋ္ဌာ ဝုတ္တနယတ္တာ ယထာပာဠိမေဝ နိယ္ယာတီတိ ။ န ဝတ္တဗ္ဗန္တိအာဒိ ယာယ လဒ္ဓိယာ ပတ္တိ အသင္ခတာတိ မညတိ, တံ ပကာသေတုံ ဝုတ္တံ။ တတ္ထ သကဝာဒီ ‘‘န ဟေဝံ ဝတ္တဗ္ဗေ’’တိ ပဋိက္ခိပန္တော ကေဝလံ ပတ္တိယာ ရူပာဒိဘာဝံ န သမ္ပဋိစ္ဆတိ။ န ဟိ ပတ္တိ နာမ ကောစိ ဓမ္မော အတ္ထိ, န ပန အသင္ခတဘာဝံ အနုဇာနာတိ။ ဣတရော ပန ပဋိက္ခေပမတ္တေနေဝ အသင္ခတာတိ လဒ္ဓိံ ပတိဋ္ဌပေတိ, သာ အယောနိသော ပတိဋ္ဌာပိတတ္တာ အပ္ပတိဋ္ဌိတာယေဝာတိ။
837-840. Idāni pattikathā nāma hoti. Tattha ‘‘yaṃ yaṃ paṭilabbhati, tassa tassa paṭilābho patti nāma. Sā ca asaṅkhatā’’ti yesaṃ laddhi, seyyathāpi pubbaseliyānaññeva; te sandhāya pucchā sakavādissa, paṭiññā itarassa. Sesamidhāpi heṭṭhā vuttanayattā yathāpāḷimeva niyyātīti . Na vattabbantiādi yāya laddhiyā patti asaṅkhatāti maññati, taṃ pakāsetuṃ vuttaṃ. Tattha sakavādī ‘‘na hevaṃ vattabbe’’ti paṭikkhipanto kevalaṃ pattiyā rūpādibhāvaṃ na sampaṭicchati. Na hi patti nāma koci dhammo atthi, na pana asaṅkhatabhāvaṃ anujānāti. Itaro pana paṭikkhepamatteneva asaṅkhatāti laddhiṃ patiṭṭhapeti, sā ayoniso patiṭṭhāpitattā appatiṭṭhitāyevāti.
ပတ္တိကထာဝဏ္ဏနာ။
Pattikathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၈၉) ၄. ပတ္တိကထာ • (189) 4. Pattikathā
