| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
5. பஞ்சமவக்³கோ³
5. Pañcamavaggo
(51) 9. படுப்பன்னகதா²
(51) 9. Paṭuppannakathā
441. படுப்பன்னே 1 ஞாணங் அத்தீ²தி? ஆமந்தா. தேன ஞாணேன தங் ஞாணங் ஜானாதீதி? ந ஹேவங் வத்தப்³பே³…பே॰… தேன ஞாணேன தங் ஞாணங் ஜானாதீதி? ஆமந்தா. தேன ஞாணேன தங் ஞாணங் ‘‘ஞாண’’ந்தி ஜானாதீதி? ந ஹேவங் வத்தப்³பே³…பே॰… தேன ஞாணேன தங் ஞாணங் ‘‘ஞாண’’ந்தி ஜானாதீதி? ஆமந்தா. தங் ஞாணங் தஸ்ஸ ஞாணஸ்ஸ ஆரம்மணந்தி? ந ஹேவங் வத்தப்³பே³…பே॰….
441. Paṭuppanne 2 ñāṇaṃ atthīti? Āmantā. Tena ñāṇena taṃ ñāṇaṃ jānātīti? Na hevaṃ vattabbe…pe… tena ñāṇena taṃ ñāṇaṃ jānātīti? Āmantā. Tena ñāṇena taṃ ñāṇaṃ ‘‘ñāṇa’’nti jānātīti? Na hevaṃ vattabbe…pe… tena ñāṇena taṃ ñāṇaṃ ‘‘ñāṇa’’nti jānātīti? Āmantā. Taṃ ñāṇaṃ tassa ñāṇassa ārammaṇanti? Na hevaṃ vattabbe…pe….
தங் ஞாணங் தஸ்ஸ ஞாணஸ்ஸ ஆரம்மணந்தி? ஆமந்தா. தேன ப²ஸ்ஸேன தங் ப²ஸ்ஸங் பு²ஸதி, தாய வேத³னாய தங் வேத³னங் வேதே³தி, தாய ஸஞ்ஞாய தங் ஸஞ்ஞங் ஸஞ்ஜானாதி, தாய சேதனாய தங் சேதனங் சேதேதி, தேன சித்தேன தங் சித்தங் சிந்தேதி, தேன விதக்கேன தங் விதக்கங் விதக்கேதி, தேன விசாரேன தங் விசாரங் விசாரேதி, தாய பீதியா தங் பீதிங் பியாயதி, தாய ஸதியா தங் ஸதிங் ஸரதி, தாய பஞ்ஞாய தங் பஞ்ஞங் பஜானாதி, தேன க²க்³கே³ன தங் க²க்³க³ங் சி²ந்த³தி, தேன ப²ரஸுனா தங் ப²ரஸுங் தச்ச²தி, தாய குதா⁴ரியா தங் குதா⁴ரிங் தச்ச²தி, தாய வாஸியா தங் வாஸிங் தச்ச²தி, தாய ஸூசியா தங் ஸூசிங் ஸிப்³பே³தி, தேன அங்கு³லக்³கே³ன தங் அங்கு³லக்³க³ங் பராமஸதி, தேன நாஸிகக்³கே³ன தங் நாஸிகக்³க³ங் பராமஸதி, தேன மத்த²கேன தங் மத்த²கங் பராமஸதி, தேன கூ³தே²ன தங் கூ³த²ங் தோ⁴வதி, தேன முத்தேன தங் முத்தங் தோ⁴வதி, தேன கே²ளேன தங் கே²ளங் தோ⁴வதி, தேன புப்³பே³ன தங் புப்³ப³ங் தோ⁴வதி, தேன லோஹிதேன தங் லோஹிதங் தோ⁴வதீதி? ந ஹேவங் வத்தப்³பே³ …பே॰….
Taṃ ñāṇaṃ tassa ñāṇassa ārammaṇanti? Āmantā. Tena phassena taṃ phassaṃ phusati, tāya vedanāya taṃ vedanaṃ vedeti, tāya saññāya taṃ saññaṃ sañjānāti, tāya cetanāya taṃ cetanaṃ ceteti, tena cittena taṃ cittaṃ cinteti, tena vitakkena taṃ vitakkaṃ vitakketi, tena vicārena taṃ vicāraṃ vicāreti, tāya pītiyā taṃ pītiṃ piyāyati, tāya satiyā taṃ satiṃ sarati, tāya paññāya taṃ paññaṃ pajānāti, tena khaggena taṃ khaggaṃ chindati, tena pharasunā taṃ pharasuṃ tacchati, tāya kudhāriyā taṃ kudhāriṃ tacchati, tāya vāsiyā taṃ vāsiṃ tacchati, tāya sūciyā taṃ sūciṃ sibbeti, tena aṅgulaggena taṃ aṅgulaggaṃ parāmasati, tena nāsikaggena taṃ nāsikaggaṃ parāmasati, tena matthakena taṃ matthakaṃ parāmasati, tena gūthena taṃ gūthaṃ dhovati, tena muttena taṃ muttaṃ dhovati, tena kheḷena taṃ kheḷaṃ dhovati, tena pubbena taṃ pubbaṃ dhovati, tena lohitena taṃ lohitaṃ dhovatīti? Na hevaṃ vattabbe …pe….
442. ந வத்தப்³ப³ங் – ‘‘படுப்பன்னே ஞாணங் அத்தீ²’’தி? ஆமந்தா. நனு ஸப்³ப³ஸங்கா²ரே அனிச்சதோ தி³ட்டே² தம்பி ஞாணங் அனிச்சதோ தி³ட்ட²ங் ஹோதீதி? ஆமந்தா. ஹஞ்சி ஸப்³ப³ஸங்கா²ரே அனிச்சதோ தி³ட்டே² தம்பி ஞாணங் அனிச்சதோ தி³ட்ட²ங் ஹோதி, தேன வத ரே வத்தப்³பே³ – ‘‘படுப்பன்னே ஞாணங் அத்தீ²’’தி.
442. Na vattabbaṃ – ‘‘paṭuppanne ñāṇaṃ atthī’’ti? Āmantā. Nanu sabbasaṅkhāre aniccato diṭṭhe tampi ñāṇaṃ aniccato diṭṭhaṃ hotīti? Āmantā. Hañci sabbasaṅkhāre aniccato diṭṭhe tampi ñāṇaṃ aniccato diṭṭhaṃ hoti, tena vata re vattabbe – ‘‘paṭuppanne ñāṇaṃ atthī’’ti.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 9. படுப்பன்னஞாணகதா²வண்ணனா • 9. Paṭuppannañāṇakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 9. படுப்பன்னஞாணகதா²வண்ணனா • 9. Paṭuppannañāṇakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 9. படுப்பன்னஞாணகதா²வண்ணனா • 9. Paṭuppannañāṇakathāvaṇṇanā
