| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৫. পঞ্চমৰগ্গো
5. Pañcamavaggo
(৫১) ৯. পটুপ্পন্নকথা
(51) 9. Paṭuppannakathā
৪৪১. পটুপ্পন্নে 1 ঞাণং অত্থীতি? আমন্তা। তেন ঞাণেন তং ঞাণং জানাতীতি? ন হেৰং ৰত্তব্বে…পে॰… তেন ঞাণেন তং ঞাণং জানাতীতি? আমন্তা। তেন ঞাণেন তং ঞাণং ‘‘ঞাণ’’ন্তি জানাতীতি? ন হেৰং ৰত্তব্বে…পে॰… তেন ঞাণেন তং ঞাণং ‘‘ঞাণ’’ন্তি জানাতীতি? আমন্তা। তং ঞাণং তস্স ঞাণস্স আরম্মণন্তি? ন হেৰং ৰত্তব্বে…পে॰…।
441. Paṭuppanne 2 ñāṇaṃ atthīti? Āmantā. Tena ñāṇena taṃ ñāṇaṃ jānātīti? Na hevaṃ vattabbe…pe… tena ñāṇena taṃ ñāṇaṃ jānātīti? Āmantā. Tena ñāṇena taṃ ñāṇaṃ ‘‘ñāṇa’’nti jānātīti? Na hevaṃ vattabbe…pe… tena ñāṇena taṃ ñāṇaṃ ‘‘ñāṇa’’nti jānātīti? Āmantā. Taṃ ñāṇaṃ tassa ñāṇassa ārammaṇanti? Na hevaṃ vattabbe…pe….
তং ঞাণং তস্স ঞাণস্স আরম্মণন্তি? আমন্তা। তেন ফস্সেন তং ফস্সং ফুসতি, তায ৰেদনায তং ৰেদনং ৰেদেতি, তায সঞ্ঞায তং সঞ্ঞং সঞ্জানাতি, তায চেতনায তং চেতনং চেতেতি, তেন চিত্তেন তং চিত্তং চিন্তেতি, তেন ৰিতক্কেন তং ৰিতক্কং ৰিতক্কেতি, তেন ৰিচারেন তং ৰিচারং ৰিচারেতি, তায পীতিযা তং পীতিং পিযাযতি, তায সতিযা তং সতিং সরতি, তায পঞ্ঞায তং পঞ্ঞং পজানাতি, তেন খগ্গেন তং খগ্গং ছিন্দতি, তেন ফরসুনা তং ফরসুং তচ্ছতি, তায কুধারিযা তং কুধারিং তচ্ছতি, তায ৰাসিযা তং ৰাসিং তচ্ছতি, তায সূচিযা তং সূচিং সিব্বেতি, তেন অঙ্গুলগ্গেন তং অঙ্গুলগ্গং পরামসতি, তেন নাসিকগ্গেন তং নাসিকগ্গং পরামসতি, তেন মত্থকেন তং মত্থকং পরামসতি, তেন গূথেন তং গূথং ধোৰতি, তেন মুত্তেন তং মুত্তং ধোৰতি, তেন খেল়েন তং খেল়ং ধোৰতি, তেন পুব্বেন তং পুব্বং ধোৰতি, তেন লোহিতেন তং লোহিতং ধোৰতীতি? ন হেৰং ৰত্তব্বে …পে॰…।
Taṃ ñāṇaṃ tassa ñāṇassa ārammaṇanti? Āmantā. Tena phassena taṃ phassaṃ phusati, tāya vedanāya taṃ vedanaṃ vedeti, tāya saññāya taṃ saññaṃ sañjānāti, tāya cetanāya taṃ cetanaṃ ceteti, tena cittena taṃ cittaṃ cinteti, tena vitakkena taṃ vitakkaṃ vitakketi, tena vicārena taṃ vicāraṃ vicāreti, tāya pītiyā taṃ pītiṃ piyāyati, tāya satiyā taṃ satiṃ sarati, tāya paññāya taṃ paññaṃ pajānāti, tena khaggena taṃ khaggaṃ chindati, tena pharasunā taṃ pharasuṃ tacchati, tāya kudhāriyā taṃ kudhāriṃ tacchati, tāya vāsiyā taṃ vāsiṃ tacchati, tāya sūciyā taṃ sūciṃ sibbeti, tena aṅgulaggena taṃ aṅgulaggaṃ parāmasati, tena nāsikaggena taṃ nāsikaggaṃ parāmasati, tena matthakena taṃ matthakaṃ parāmasati, tena gūthena taṃ gūthaṃ dhovati, tena muttena taṃ muttaṃ dhovati, tena kheḷena taṃ kheḷaṃ dhovati, tena pubbena taṃ pubbaṃ dhovati, tena lohitena taṃ lohitaṃ dhovatīti? Na hevaṃ vattabbe …pe….
৪৪২. ন ৰত্তব্বং – ‘‘পটুপ্পন্নে ঞাণং অত্থী’’তি? আমন্তা। ননু সব্বসঙ্খারে অনিচ্চতো দিট্ঠে তম্পি ঞাণং অনিচ্চতো দিট্ঠং হোতীতি? আমন্তা। হঞ্চি সব্বসঙ্খারে অনিচ্চতো দিট্ঠে তম্পি ঞাণং অনিচ্চতো দিট্ঠং হোতি, তেন ৰত রে ৰত্তব্বে – ‘‘পটুপ্পন্নে ঞাণং অত্থী’’তি।
442. Na vattabbaṃ – ‘‘paṭuppanne ñāṇaṃ atthī’’ti? Āmantā. Nanu sabbasaṅkhāre aniccato diṭṭhe tampi ñāṇaṃ aniccato diṭṭhaṃ hotīti? Āmantā. Hañci sabbasaṅkhāre aniccato diṭṭhe tampi ñāṇaṃ aniccato diṭṭhaṃ hoti, tena vata re vattabbe – ‘‘paṭuppanne ñāṇaṃ atthī’’ti.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৯. পটুপ্পন্নঞাণকথাৰণ্ণনা • 9. Paṭuppannañāṇakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. পটুপ্পন্নঞাণকথাৰণ্ণনা • 9. Paṭuppannañāṇakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৯. পটুপ্পন্নঞাণকথাৰণ্ণনা • 9. Paṭuppannañāṇakathāvaṇṇanā
