| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៥. បញ្ចមវគ្គោ
5. Pañcamavaggo
(៥១) ៩. បដុប្បន្នកថា
(51) 9. Paṭuppannakathā
៤៤១. បដុប្បន្នេ 1 ញាណំ អត្ថីតិ? អាមន្តា។ តេន ញាណេន តំ ញាណំ ជានាតីតិ? ន ហេវំ វត្តព្ពេ…បេ.… តេន ញាណេន តំ ញាណំ ជានាតីតិ? អាមន្តា។ តេន ញាណេន តំ ញាណំ ‘‘ញាណ’’ន្តិ ជានាតីតិ? ន ហេវំ វត្តព្ពេ…បេ.… តេន ញាណេន តំ ញាណំ ‘‘ញាណ’’ន្តិ ជានាតីតិ? អាមន្តា។ តំ ញាណំ តស្ស ញាណស្ស អារម្មណន្តិ? ន ហេវំ វត្តព្ពេ…បេ.…។
441. Paṭuppanne 2 ñāṇaṃ atthīti? Āmantā. Tena ñāṇena taṃ ñāṇaṃ jānātīti? Na hevaṃ vattabbe…pe… tena ñāṇena taṃ ñāṇaṃ jānātīti? Āmantā. Tena ñāṇena taṃ ñāṇaṃ ‘‘ñāṇa’’nti jānātīti? Na hevaṃ vattabbe…pe… tena ñāṇena taṃ ñāṇaṃ ‘‘ñāṇa’’nti jānātīti? Āmantā. Taṃ ñāṇaṃ tassa ñāṇassa ārammaṇanti? Na hevaṃ vattabbe…pe….
តំ ញាណំ តស្ស ញាណស្ស អារម្មណន្តិ? អាមន្តា។ តេន ផស្សេន តំ ផស្សំ ផុសតិ, តាយ វេទនាយ តំ វេទនំ វេទេតិ, តាយ សញ្ញាយ តំ សញ្ញំ សញ្ជានាតិ, តាយ ចេតនាយ តំ ចេតនំ ចេតេតិ, តេន ចិត្តេន តំ ចិត្តំ ចិន្តេតិ, តេន វិតក្កេន តំ វិតក្កំ វិតក្កេតិ, តេន វិចារេន តំ វិចារំ វិចារេតិ, តាយ បីតិយា តំ បីតិំ បិយាយតិ, តាយ សតិយា តំ សតិំ សរតិ, តាយ បញ្ញាយ តំ បញ្ញំ បជានាតិ, តេន ខគ្គេន តំ ខគ្គំ ឆិន្ទតិ, តេន ផរសុនា តំ ផរសុំ តច្ឆតិ, តាយ កុធារិយា តំ កុធារិំ តច្ឆតិ, តាយ វាសិយា តំ វាសិំ តច្ឆតិ, តាយ សូចិយា តំ សូចិំ សិព្ពេតិ, តេន អង្គុលគ្គេន តំ អង្គុលគ្គំ បរាមសតិ, តេន នាសិកគ្គេន តំ នាសិកគ្គំ បរាមសតិ, តេន មត្ថកេន តំ មត្ថកំ បរាមសតិ, តេន គូថេន តំ គូថំ ធោវតិ, តេន មុត្តេន តំ មុត្តំ ធោវតិ, តេន ខេឡេន តំ ខេឡំ ធោវតិ, តេន បុព្ពេន តំ បុព្ពំ ធោវតិ, តេន លោហិតេន តំ លោហិតំ ធោវតីតិ? ន ហេវំ វត្តព្ពេ …បេ.…។
Taṃ ñāṇaṃ tassa ñāṇassa ārammaṇanti? Āmantā. Tena phassena taṃ phassaṃ phusati, tāya vedanāya taṃ vedanaṃ vedeti, tāya saññāya taṃ saññaṃ sañjānāti, tāya cetanāya taṃ cetanaṃ ceteti, tena cittena taṃ cittaṃ cinteti, tena vitakkena taṃ vitakkaṃ vitakketi, tena vicārena taṃ vicāraṃ vicāreti, tāya pītiyā taṃ pītiṃ piyāyati, tāya satiyā taṃ satiṃ sarati, tāya paññāya taṃ paññaṃ pajānāti, tena khaggena taṃ khaggaṃ chindati, tena pharasunā taṃ pharasuṃ tacchati, tāya kudhāriyā taṃ kudhāriṃ tacchati, tāya vāsiyā taṃ vāsiṃ tacchati, tāya sūciyā taṃ sūciṃ sibbeti, tena aṅgulaggena taṃ aṅgulaggaṃ parāmasati, tena nāsikaggena taṃ nāsikaggaṃ parāmasati, tena matthakena taṃ matthakaṃ parāmasati, tena gūthena taṃ gūthaṃ dhovati, tena muttena taṃ muttaṃ dhovati, tena kheḷena taṃ kheḷaṃ dhovati, tena pubbena taṃ pubbaṃ dhovati, tena lohitena taṃ lohitaṃ dhovatīti? Na hevaṃ vattabbe …pe….
៤៤២. ន វត្តព្ពំ – ‘‘បដុប្បន្នេ ញាណំ អត្ថី’’តិ? អាមន្តា។ ននុ សព្ពសង្ខារេ អនិច្ចតោ ទិដ្ឋេ តម្បិ ញាណំ អនិច្ចតោ ទិដ្ឋំ ហោតីតិ? អាមន្តា។ ហញ្ចិ សព្ពសង្ខារេ អនិច្ចតោ ទិដ្ឋេ តម្បិ ញាណំ អនិច្ចតោ ទិដ្ឋំ ហោតិ, តេន វត រេ វត្តព្ពេ – ‘‘បដុប្បន្នេ ញាណំ អត្ថី’’តិ។
442. Na vattabbaṃ – ‘‘paṭuppanne ñāṇaṃ atthī’’ti? Āmantā. Nanu sabbasaṅkhāre aniccato diṭṭhe tampi ñāṇaṃ aniccato diṭṭhaṃ hotīti? Āmantā. Hañci sabbasaṅkhāre aniccato diṭṭhe tampi ñāṇaṃ aniccato diṭṭhaṃ hoti, tena vata re vattabbe – ‘‘paṭuppanne ñāṇaṃ atthī’’ti.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៩. បដុប្បន្នញាណកថាវណ្ណនា • 9. Paṭuppannañāṇakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៩. បដុប្បន្នញាណកថាវណ្ណនា • 9. Paṭuppannañāṇakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៩. បដុប្បន្នញាណកថាវណ្ណនា • 9. Paṭuppannañāṇakathāvaṇṇanā
